فراولتي فراولتي حلوة البسمتي

بسم الله ..
السلام عليكم ورحمة الله وبركاته ..
كيف الحال والأحوال جميعا ..؟؟
موضووعي تابع لحملة أختنا الغاليه توفي المنتوفي ..الله يوفقها ويستر عليها ويرزقها الجنة ..
بسم الله نبدأ على طول ومن دون أي مقدمات من ورجه مني لكم ..
فراولتي مصنوعه من الجوخ وأنا أول مره ماأعرف الجوخ بس شفت موضووع عن الجوخورحنا المكتبه وزوجي سأل الرجال عندك جوخ طبعا إحنا لو بيجيب لنا خيشه ويقول ذا جوخ نصدق نقول بس ناس يسمونه جوخ
..
المهم يوم رحت البيت طلع زوجي مشتريه ومافيه عندي غير لون ووردي يفقع ..
أنا حطيت القطعه في ماء فيه كركديه , لين اللون صار شوي مقبول إنه يصير فراوله ..
بعدين رسمت على القماش فراوله وقصيت من جنب الرسم بقليل حتى تكون الخياطه على الرسم ..
بعد ماخيطتها طبعا صورتها لكم لأني من اول ناويه أنزلها لكم .. حبايب قلبي إنتم
وهذي صورة المواد الخام >> بتسوي إنها فاهمه ..تعلمته من الجغرافيا
إستعملت إبره وخيط وعلبه وحجر وقطن وطبعا قطعة القماش والبقيه بعدين ..
طبعا العلبه والحجر اللي جواتها حتى إذا أحد حركها تطلع صوت .. صوتها مره حلو تصلح للبزران الصغيرين النوانوه ..
خيطتها بعدين حطيت الحجر في العلبه وحطيت في الفراوله من تحت قطن حتى تكوون محشيه من تحت
وبعدين حطيت العلبه أم حجر في النص وحطيت حولينها ومن فوقها قطن ولميتها على بعضها وخيطتها ..
بعدين فكرت وش أسوي لها من فوق كنت بسويه بالورق بعدين عذرت قلت ماينفع وجات في رأسي
إني أسوي لها قبعه بالصوف ( الكروشيه ) بعدين سويت لها القبعه باأخضر ولصقتها بالغراء لأن الخيوط
بتعدمها وإختكم في الله إذا جات بتخيط وتثبت شيء تخبص الدنيا على بعضها فاحترمت نفسها وأستعملت
الغراء ..
وهذي هي من بعد ماثبت رأسها ..
وبعدين فكرت في النقط اللي تجي في الفراوله كيف أسويها أول مره قلت بحط لها حبة بركه بعدين
قلت لا حرام ألعب بالنعمه ..
وأروح للشنطه حقت أختي واخذ قلم أسود وأحط لك من النقط لين شفت إنها جات يازينها ..
وأجيكم اسوي لها العود حقها إلى الآن ماأدري وش إسمه ..
وأكمله بالصوف وأثبته بالغراء ..
وفي الأخير طلعت لنا هذي الفراوله الجميله .. سووها وحركوها حتى تكمل و تسمعوون الصوت خ ..
المعذره أخواتي إذا كانت الصوور ماهي واضحه لأني كنت اصور بجوالي ..
> > >ماني مصدقه عيوني صلحت الصوور وطلعت وش زينها حليله ..
ياحب قلبي لك يابنت الغربيه ..الله يوفقك ويستر عليك ويحفظك لأحبابك مشكوره ياقلبي ..
الله يرزقك الجنة إنتي وأحبابك يارب ..
لكم حبي وإحترامي ..