فضفضة و لو انا غلطانة قولولي

1. الا و هو ، موضوع تهميش البنت في الزواج

السلام عليكم
اليوم طالت أعماركم راح نتكلم عن موضوع مثير للحزن و الغيظ و الهم و الغم و كل اللي تعرفوه !!!!!!<<< اخلصي طيب

الا و هو ، موضوع تهميش البنت في الزواج

لاحظت انه هالحركة كتير عندنا في بلدنا ، و اللي تقول بلدنا بلد الاسلام اقولك لا هي في دا الموضوع بالذات ( الزواج ) مو بلد اسلام ، بلد عادات و تقاليد اهلها خلوها فوق الدين !!!
ليش يا بنات الأهل صارو كده ؟؟؟ لمن يجي عريس للبنت ، ( خلينا نقول انه أخلاقه كويسة و يعرف ربنا و يصلي و يصوم ) طبقا لحديث الرسول عليه الصلاة و السلام ( من جاءكم من ترضون دينه و خلقه فزوجوه ) ، لكن مع كده نفاجأ أنه الأهل رفضو ، ليش ؟؟؟ عشانه مو من نفس القبيلة !!! ، و لا زي الاخت عشان شكل الولد ما يتوافق مع البنت ، أو يطلعو اي سبب تاني تافه !
و ينسو انه يكفي للرجل ان يتخلق بأخلاق الرسول مع زوجاته و كيفيه معاملته لهن عشان يكون عريس تحلم بيه أي بنت !!
للأسف عندنا صار حديث تاني ( من ترضون قبيلته و اخلاقه و صلاته فزوجوه ) لاحظو الترتيب لانه هادا المهم عندهم ، و كمان اللي نرفزني اكتر ، وحده من الفراشات هداها الله لقيتها بتتكلم في دا الموضوع و تقول من متى البنت كانت تختار ؟؟؟!!! الله اكبر ، حتى حق الاختيار و ارتضاء فلان من الناس زوج لها صار حرام ؟؟؟ من متى يا ناس يا عالم يا هو حرام البنت تقول رأيها في إنسان متقدم لها ؟؟؟
بنت من الفراشات كاتبة انه اتقدم لها ولد خالها ، ابوها قالها الولد ما ينعاب و طلع ولا اعطاها فرصة تقول رأيها و حتى كمان هو اللي وقع بدالها على ورقة الملكة !!! يعني احنا قد كده حقوقنا مهضومة و مالنا رأي ؟؟؟ ليش ؟؟؟؟!!!!!!!!!!!!!
و بعدين في قضية تانية ، عضوة من الفراشات جزاها الله خير قالت لي كلمة و قالت لي حطيها حلقة في ادنك ألا و هي ( البنت هي اللي دائما الخسرانة و الطرف الخاسر في أي شي ) ، يعني لو الرجال بالله عليكم طلع خاين و كداب و نصاب و يضرب و ما يعامل كويس ، من اللي بيتحمل و يتصبر و تحتسب الاجر عند الله ؟؟؟ اكيد الحرمة و لا حضرته ما يعيبه شي ، و الله ثم و الله لو كانت هي اللي تسوي كده كان ما صبر عليها يوم واحد و رجعها لبيت أهلها و راح اتزوج عليها من بكرة !!!
طبعا راح احكيلكم قصتي : انا وحدة من البنات اللي تعرضت لهالموقف ، و اللي الين دحين انا شايله على اهلي بسببه ، تقدم لي رجل ذو لحية و جي من المسجد ، الاخ متقدم لي و هو عارف اني بنت موظفة و ادرس ، و أهلي أصرو عليه بسبب لحيته و قالو عليه اكيد انسان صالح ( لاحظو الانطباع اللي يعمله اي انسان ملتحي في الناس و كأن كل رجل ذو لحية يخاف ربه!) اهلي جبروني عليه بكل الوسائل اللي تتوقعوها و بالأخير تعرفو ايش قال الرجال ؟؟؟؟
قال أنا عشان أملك ، بنتكم تسيب الشغل و تسيب الدراسة و تقعد بالبيت ! يعني بالزبط كأنه يتمنن عليا انه تقدم لي و يقوللي يا انا يا مستقبلك و تحمدي ربك كمان !! ، من متى انسلب حق البنت في الدراسة و العمل لو أرادت ؟؟؟ و بفرض أنه أنا تركت مستقبلي عشان عيونه بعدين ما صار نصيب في الملكة او في الزواج ، بالله عليكم وين أروح ؟؟ أرجع للفراغ في بيت أهلي ؟؟؟ و طبعا كما هو معروف يا اخواتي الرجال مالهم أمان ، لو تركت مستقبلي عشانه و بعد الزواج مل مني و طفش و عينه زاغت هنا ولا هنا أو جا في يوم من الايام اكتشف اني كنت مغصوبة عليه و قرر يتزوج عليا ، بالله ايش يكون موقفي ؟؟؟؟ خسرت الماضي و الحاضر و المستقبل و لله الحمد ، بالله عليكم وين العدل ؟؟؟
ابغا أسأل ليش حالنا انقلب ؟؟؟ ليش الرجال صار مسموح له يمارس كل حقوقه و البنت لا ؟؟؟ و اذا مارست حقوقها فهي بنت متمردة و جريئة و بتعمل حاجة حرام و خسرانة كمان !!!
هل حرام شرعاً يأخذو رأينا في خطيب متقدم لنا ؟؟؟ هل حرام شرعاً لو بنت اتزوجت غير قبيلي ارتضت فيه اخلاقه و دينه ؟؟؟ هل حرام شرعاً لو البنت ما اخدت ولد عمها ( اللي محجوزة له )
طبعا اعرف حتجي وحدة تقول طب يمكن ولد عمها المحجوزة له و لا ولد قبيلتها خير لها من احد تاني ، اقولك طال عمرك الخير و الاخلاق الحلوة و المعاملة الكويسة من الرجل لزوجته تطلع من الشخص نفسه و من اخلاق الشخص نفسه ، مو من قبيلة الانسان او نسب و عرق الانسان ، او حتى من شكل الانسان !!! ، قصدي يعني مو معنى كده انه ولد عمها عشان انه ولد عمها فهو في خير بس الولد من قبيلة تانية مثلا فهو فيه شر !!!
انا آآآآآآآآآسفة جدا اني طولت عليكم ، بس اللي عندها اعتراض على كلامي و شايفة كلامي غلط تقوللي على الأقل أعرف انا غلطانة ولا صح
في انتظار ردودكم