فطايري مثل القطنه

ماشاء الله فطايري مثل القطنه ولذيذه والكل يسئلني عن الطريقه بس ما اقول لهم
طبعا في بدايه دخولي للمطبخ كنت ابي اتفنن في الفطاير وكل ما اسوي تطلع حالتها حاله وماتناكل
وكل ما اسوي عجينه الكل يتطنز علي اكلي
في الاخير صار الكل يسئلني عن الطريقه
ما اطول عليكم...........
حطي في العجانه ..3 اكواب طحين..3 ملاعق كبار حليب نيدو ..بيضه..ملعقه صغيره فانيلا..ملعقه كبيره بيكنبودر..كوب ماي..استكانه شاي زيت..نص استكانه شاي سكر..ملعقه صغيره ملح ..ملعقه كبيره جبن سائل..ملعقه كبيره خميره
وفيه بنات ما ياخذون بالهم على اشكال الخميره..نفس الخميره الي فيها صوره طباخ لابس ابيض ما اعرف شسمها..في منها نوعين
نوع فيه خط احمر(هذي ما تترك ريحه الخميره في العجينه حلوه) وفيه نوع مافيه الخط الاحمر يعني لونها ابيض وازرق بس(هذي تخلي ريحه العجينه مو حلوه)
وخليها في العجانه 10 دقايق او ربع ساعه عشان تطلع لينه اكثر
وخليها تتخمر 3 ساعات
واستخدميها في جميع انواع الفطاير والبيتزا
وهني على قلوبكم