قررتي تفصلين فستان تعالي هنا قبل لا تفصلي

السلام عليكم يافرشات
هذا موضوع اعجبني في احد المنتديات وحبيت انقله لكم للافاده
ان شاء الله يعجبكم وتستفيدون منه
بعض النقاط الاساسيه
1_ بما انك راح تخيطي وتختاري موديل من الكتالوج
والكتالوج كله عارضات ازياء يعني اجسامهم مثاليه
من ناحية الطول والرشاقه والقوام
اذن لازم تحطي في بالك ان الموديل اللي يطلع عليها حلو
مو ضروري انه يليق على جسمك
وبالتالي لازم نراعي الفروق الفرديه
والعيوب اللي نبغى نخفيها في اجسامنا
والمناطق اللي نحب نبرزها كمان
2_ نص نجاح الفستان يعتمد على حسن اختيار اللون
يعني اذا كان عندك مناسبه مهمه
لا تقولي اسوي هذه المره لون عمري ما لبسته
بالعكس اختاري لون تكوني لبستيه زمان
والكل انبهر عليه حتى لو كان لون بلوزه عاديه
لبستيها وكل من شافك قلك هذا اللون حلو عليكي
لانك ممكن تختاري موديل حلو
وتشتري قماش غالي والتفصيل يكون ميه ميه
لكن تتورطي في لون يظلمك
انتي وتباني فيه باهته مثلا
او اكبر من سنك وبكذا ضاع تعبك على الفاضي
3_ لما تقصي القماش خذي متر زياده مثلا من كل نوع
لانك ممكن ينقص عليكي القماش
او يخرب جزء من الفستان وتبغي تصلحيه
وتروحي تدوري القماش تلاقيه خلص
او ما تحصلي نفس الدرجه حقتك وانواع البكا
4_ اذا كانت المناسبه تهمك مره
انصحك تروحي عند خياطه انتي جربتيها شخصيا
ومتاكده منها ميه في الميه
واذا مضطره وكنت تجربيها اول مره
لا تعطيها القماش الغالي مباشرة
قوليلها ابغاك تنفذيلي الموديل على قماش بطانه
بنجيه مثلا وشوفي ظبط ولا لا
لانك ممكن تجازفي وتعطيها قماش غالي
وتعدمه وبكذا ضاع منك مبلغ كبير
ووقت ومجهود على الفاضي
5_ لما تروحي تسوي البروفه الاولى اللي على الشلحه
لازم تاخذي معاك الصندل والسنتيان
والمشد اللي بتلبسيهم في المناسبه
ليش
لانك ممكن تكوني لابسه في البروفه صندل واطي مثلا
وهي تعملك الطول على هذا الاساس
وتجي يوم الفرح تلبسي عالي ويبان الفستان شامر
او ممكن تكوني مو لابسه مشد
وهي تظبطلك المقاس على كذا
وتلبسي يومها مشد ويسير الفستان مبحبح ومو ثابت على جسمك
وبالتالي راعي هذه النقطه تمام
6_ لازم تستلمي الفستان اقل شي قبلها باسبوع
عشان لو كان في تصليح تلحقيه
ولو خرب الفستان الله لا يقدر
تلحقي تدوري جاهز على رواقه
مو تاخذي أي شي لانك ما عندك وقت
وتقعدي طول الفرح مبوزه
7_ لازم يكون معاك رقم الخياطه عشان تتابعيها كل الوقت
ليش
لانك ممكن تحطي قماشك عندها
وتقلك تعالي بعد اسبوع بروفه
وتروحي في نفس اليوم تلاقيها ما خلصت لسه
لانها ماسكه فساتين ثانيه
وبالتالي لازم تتابعيها على طول عشان ما تضيعلك وقتك
ان شاء الله اعجبكم الموضوع
وانتظر ردودكم الحلوه