قصة على طول العمر حبك هو الوحيد اللي سكن قلبي

تسلمى ياقمر على القصه الروعة وياريت تنزلى بقية الأجزاء بسرعه

أسلوب ان كل واحد يحكي عن نفسه
اكثر من رائع
يعطيك العافيه

ام المهدي كمليها

روعه استنى باقي الأجزاء بفارغ الصبر

الزهرةالزرقاء , بريق الالماسه ,عسوله ,الحبوبه2005 اشكركم على الرد
وان شاء الله انزل الجزء الثاني

الجزء
من قصة على طول العمر حبك هو الوحيد اللي سكن قلبي
الريم : كنت نازله من غرفتي وشفت الوضع في الصالة شو اللي يصير كأني وانا نازله سمعت كلمة مات بس ما سمعت بالضبط منو ومن الخوف بدل ما ازيد من خطواتي عشان اوصل بسرعة واعرف الموضوع تبطأت بخطواتي لاني ما ابي اسمع خبر مب زين لكن مهما حاولت اخر خطواتي في النهاية وصلت الصالة وشفت عمتي وعمي يبجون وشفت فيصل واقف على اليدار يبجي وبصوت مخنوق قلت لهم شو اللي صاير شو فيكم؟؟
فيصل : قربت صوب الريم وقلت لها هاني عطاج عمره
الريم : شو تقول انت لا طبعا اكيد تمزح هاني ولد عمتي ...
في ها الحزه دخل مازن وقيس ومزنه وراهم وهي تتحايل على مازن يقول لها شو السالفة ومن دخلت شافت الوضع كان الخوف بيقتلها شو صاير
بو مازن : يالله يا مازن نروح المستشفي نكمل اجراءات وانت يا فيصل تم هنا مع امك وخوانك
مزنه : اجراءات شو يا يبة فهموني
قيس : حرام عليكم قولوا شو صاير وسار صوب ريم قالها شو صاير ريم قولي لي ليش اماية تبجي وليش انتي تبجي
الريم : شو اقول لك ما كان ودي اقول ها الخبر بس مضطرة وقلت بلسان ثقيل وحرف يا دوب قدرت اطلعها هاني مات
صدمة قيس ومزنه كانت قوية ويمكن الصدمة على قيس كانت اقوي وما قدر يمسك نفسة وطاح على الارض .
شله فيصل غرفته وطلب من ريم تم معاه اما مزنه كانت يالسة يم امها وحاطه راسها في حضن امها اللي الغريب انها ما نزلت ولا دمعة كانت بس ساكته .
نص ساعة من الاحداث هذي وكان البيت متروس ناس اكيد انهم اهلهم ومعارفهم ويرانهم وبعدها بساعة ثانية كانت سيارة بو مازن دخله البيت وفيها على الكرسي الخلفي جثة هاني عشان يشوفونه اهله للمره الاخيرة في حياتهم قبل ما يغسلونه ويدفنونه ..
ام مازن : مشيت بخطوات بطيئة كيف بشوفك يا هاني وانت في خلقة بيضاء وانت ظاهر من عندي الصبح بكندورتك وغترتك وضحكتك يالله يا ربي ترحمة وتغفر له رضيه عليك يا هاني دنيا واخرة راضيه عليك يا ولدي وربي يرضى عليك من رضاي وحبته على راسه .
كل خوانه شافوه ودعوه الوداع الاخير إلا قيس اللي كان مغمي عليه من سماع الخبر
الريم : كنت اطالع على هاني وكل حركاته وسوالفة وهذربته وضحكه في خيالي وكنت مثل اللي مب مصدقة ان هاني مات على الرغم اني اشوفة الحين قدامي جثة هامدة ما تتحرك
في ايام العزاء ام طارق وثريا ما خلوا ام مازن كله معاها وكأنهم من اهل البيت فعلا الناس معادنهم تبان في الشدائد والنعم والله يا ام طارق على وقفتج الحلوه مع اختج ام مازن .
في غرفة مزنه كانت مزنه يالسة تقرأ قرآن وشوي دق الباب كانت خلود هي اللي تدق الباب (خلود هي بنت عمة مزنه ) هم صار لهم فتره متزاعلين وما يكلمون بعض بسبب حسين اللي طلب فك خطبته من مزنه بعد اللي صار لخالها بو الريم لكن في حزه الحزن الاهل مهما كانوا متزاعلين يكونوا محتاجين لمواساة بعض
حسين كان يالس في الميلس مع الريايل وبعد كان متأثر وايد بوفاة ولد خاله هاني وكان ندمان على اللي سواه لانه عرف ان الدنيا على كبرها ما تسوي وفي لحظة الانسان يخسرها .
خلود : لوت على مزنه اول ما فتحت الباب وتمت تبجي من خاطر
اللى حصل ان مزنه هي اللي تمت تسكت خلود وقالت لها اطلبي له الرحمة يا خلود هو ربه ختارة وما اعتقد ان الانسان مفروض يعترض على ارادة الله .
بعد شهر من كل الحزن اللي خيم على بيت بو مازن وصار كل شخص من ها العائلة حزين رغم ايمانهم بالله إلا ان الموضوع ما يخلى افتقادهم لهاني اللي كل ركن في البيت يذكرهم فيه وعشان جي قرر بو مازن انه يشتري بيت ثاني غير ها البيت عشان ينتقلوا فيه لانه في كل ركن من اركان ها البيت ذكري لهاني من هو وصغير لين يوم وفاته .. بس ام مازن رفضت ها الفكرة وقالت انها راح تقضى عمرها الباقي في ها البيت وانها ما تقدر على الاقل تتخلى عن ذكري ولدها وطبعا بو مازن ما قدر يسوي شئ غير انه ينفذ لها طلبها هاي ام مازن الغالية وهو يمكن فكر في ها الفكرة بعتقاد منه ان ها الفكرة ممكن تخلى ام مازن تنسى ولدها .. ما عرف ان ذكري ولدها مب بس في المكان بس هي كانت مجرد محاولة عشان يطلعها من الحزن اللي فيه .
صار بو مازن قريب من عيالة اكثر وعرف ان العمر مب بس شغل عشان جي صار يرجع البيت من وقت ويخلى حد من اللى معاه في الشغل يسافرون لمه كان فيه شغل مضطر انه يسافر له ..
مزنه رجعت دوامها ولكن اكيد ان وفاة هاني اثرت فيها كثير وصارت ما تحط مكياج في الدوام وصارت محجبة والكل لاحظ التغير اللي تغيرته مزنه ..
مازن اول يوم دوام اتصل فيه خليل اللي ما قدر يزوره البيت بس عزاه في التلفون لانكم تذكرون ان خليل زار مازن الدوام وطلب منه يشوفه ولكنه لمه تصل بمازن بالليل وما رد عليه هذيج الليلة لانها كانت ليلة وفاه اخوه بس اليوم رد مازن عليه وتعذر منه وطبعا خليل قدر ظرف مازن وقاله خلاص اكلمك يوم ثاني واسف على ازعاجك ..
الريم : الكل تأقلم الحين على وفاه هاني بس انا ما قدرت اتحمل صحيح ان علاقتي في هاني مب لين ذاك الزود بس حتى ولو انسان كان عايش معاي في نفس البيت اشوفه كل يوم فجئة يختفي ما قدرت استوعب ها الموضوع وكل مره اغلط لمه ازجر على قيس اقوله هاني وها الشئ كان يمكن يضايق عمتي ويضايقني انا شخصيا ..
قيس : حاولت اني ارجع لدراستي وحاولت اسوي كل شئ كان هاني يطلب اني اسويه واللي يمكن غريب صرت اتصل بربع هاني واحب اسمع منهم سوالف هاني خارج البيت والحمد لله اخوي هاني انسان تقي ويخاف ربه وحتى مع ربعة له سمعة حلوه بأخلاقة العالية وتدينه
فيصل : يمكن تعتقدون اني ما احس او اني قوي لكن من داخل انا حزين ومتضايق بس يمكن كنت امسك نفسي عشان امي وأبوي وخواني وبنت خالي الريم وله انا يمكن اكثر واحد فاقد هاني في البيت لانه على الاقل هو الشخص اللي ييلس يسولف معاي ويمزح معي لكن ما في ايدي اقول غير الله يرحمة وبصراحة انا خطرت لي فكره بعد نهاية هذا الكورس قررت اني اخذ امي ونسافر السعودية نعتمر عن هاني ومنه امي ترتاح في بيت الله وتدعي لهاني وما ترددت اني اقولها ها الشئ بس لمه اماية خبرت ابوي قال لا احنا كلنا نطلع على العمرة في اجازه نص السنة وها الخبر اسعد الكل بس مازن اللي ما يقدر يسافر معاهم لانه ما عطوه اجازه في الدوام خاصة انه ماخذ كل اجازتة وقال معليه بسافر السعودية اول ما اخذ اجازه لاني انا بعد محتاج اني ازور بيت الله ..
في بيت بو طارق
ثريا : في ايام العزاء تلاقيت مع شاب حلو واخلاقة عالية وحشيم بصراحة يلفت انتباه كل بنت سمعت مزنه تقوله مازن يعني هو ولد خالتي ام مازن اخو مزنه ومن هذيج الايام وهو في بالي ما رضي يسير من خيالي وبصراحة اكثر ادعي ربي في كل صلاة انه يكون من نصيبي ايه لا تطالعوني جي (من منا حنا البنات ما تبي تنستر تحت ظل ريال حشيم ومتدين واخلاقة عالية)
امي بعد لاحظت ان ها الموضوع في بالها خاصة اني احسها انها صارت تلمح اني كبرت واني بعرس وبخليها بروحها بس هي ما تبي تزوجني لحد ما يرجع طارق يعني اكيد فيه حد كلمها عن موضوع زواج معقوله تكون خالتي ام مازن لا اكيد لان خالتي وايد متأثره بوفاة ولدها هاني الله يرحمة يا ربي تراني ما ابي اتزوج أي شخص غير اللي في بالي (شو يالسة اقول انا شكلي مريضة وله فيني شئ اللي يسمعني الحين ارمس يقول ان مازن لمح انه يباني وله شئ ما كأنه حب من طرف واحد ويمكن حتى ما يكون حب )
ثريا : بصراحة صرت اتحين الفرص واتصل في الريم لانها اقرب لي من مزنه واعرض عليها خدمتي في مساعدتها في الدراسة عشان بس اسير بيتهم مجرد اني اشوف مازن حتى من بعيد او مجرد اني احس اني متواجده في المكان اللي هو متواجد فيه احس براحة (وربي تراه مب خبلة بس شكلي طبيت ولا حد سمى علي)
في بيت بو مازن
ام مازن : فكرة ممكن تقولون عنها شريره او تسلط خطرت في بالي بس خلاص انا احس اني مب قادرة اتحمل ان ولدي مازن مب معرس لين الحين عشان جي انتظرت لحد ما رجع مصلى العشاء وقلت له مازن ابيك في موضوع .
مازن : خير اماية ؟؟
ام مازن : مازن انا بخطب لك ثريا بنت يرانا وما ابيك ترفض
مازن : طالعت اماية مستغرب لهجة اماية في رمستها كأنها تأمرني وكأنها قررت وما فيه مجال اني اناقش وهذا الاسلوب غريب عن اماية عشان جي ما رديت عليها باي شئ وطلعت غرفتي ما حبيت ايلس واتناقش معاها لانها شكلها معصبة وعشان ما اغلط بكلمة معاها هاي امي وطاعتها من طاعة الرحمن وقلت بكلمها بس في وقت تكون هدت فيه لاني الحين لو كلمتها بتعاند .
ام مازن : ما ستغربت تصرف مازن الحكيم وحسيت انه عرف اني ارمس وانا مب مقتنعة
الريم : بصراحة انا سمعت كلام عمتي لمازن واستغربت رده فعل مازن وبصراحة قهرني وايد عشان جي طلعت وراه وقبل لا يدخل غرفته قلت له مازن ممكن اتكلم معاك (لا تستغربون من ها الجرأه ) وقلت له انت اناني تفكر في نفسك وبس وما فكرت في عمتي اللى تبي تزوجك وتفرح فيك وين التدين اللي تقول عليه
مازن : شكلي مسكت اعصابي وايد وحان الوقت اني الضغط اللي داخلى يطلع وكنت اطالع ويه ريم وهي تتكلم وقهرتني عشان جي رفعت ايدي وصفعتها كف على ويها عشان تسكت .
مزنه : كنت طالعة من حجرتي وشفت الموقف اللي يصير قدامي مازن يصفع الريم يا ربي عشان جي بسرعة ركضت صوب الريم .
الريم : الكف اللي عطاني اياه مازن كان معناه كبير مازن عمره ما سواها حتى وانا صغيرة يسويها الحين والغريب اني حسيت اني انا اللي غلطت في رمستي معاه وقلت له اسفة ودخلت غرفتي ودخلت مزنه بعد وراي .
مزنه : شو اللي صار شو قلتي لمازن خلاه ينقهر بها الشكل مازن الهادي ؟؟ بصراحة انا مب عارفة شو يصير في ها البيت وقربت صوب الريم ولويت عليها لاني حسيت انها الحين محتاجة لحضن دافي ترتمي فيه واول مرة احس بأحساس اني الكبيرة والريم صغيرة ومحتاجة رعايتي وهتمامي فيها .
مازن : دخلت غرفتي وانا مب مستوعب اللي صار اللي اتذكره انها كانت ترمس واني رفعت ايدي وصفعتها .
في اليوم الثاني نزلت الصبح من وقت وطلعت وما هتميت منو بيوصل قيس ومزنه والريم دوامتهم وطلعت سرت الدوام اليوم وصلت من وقت ويلست على مكتبي مب سرحان وله ضايق مثل ما راح تعتقدوا لا يلست اخلص شغلى وعلى الساعة 10 ترخصت من المدير بعد طبعا ما خبرته اني خلصت شغلي وطلعت على بوظبي عند ربيعي بوعسكور اللي يداوم هناك .. اكيد ان امي اتصلت قبلها عشان تعرف ليش انا طلعت من وقت وانا اعتقد هي تحسبني ضايق من كلامها هي معاي عشان جي قلت لها اماية ما فيني شئ بس خلي فيصل اليوم يوصلهم وحاولت انهي المكالمة بسرعة .
الساعة 12 وصلت بوظبي لا تستغربوا ليش خذت كل ها الوقت بس كنت امشى على راحتي لاني بصراحة انا مب عارف شو اسوي وكيف اتصرف جي المهم كنت متواعد مع سعيد اني اتلاقي وياه في باركنات المارينا عشان انا ما اعرف شقته وين بالضبط وياني بو عسكور وقالي يالله بتتغدى معاي قلت له لا انا ما خبرت الاهل بس كنت حاب ارمس معاك قاله سعيد نزين انا خبرت الحرمة تسوي الغدي وبعد الغدى بنسولف على راحتنا يالله يا مازن .
طبعا سعيد معرس وعنده بنت ما شاء الله عليها حبوبه وعليها سوالف وبصراحة حسدت سعيد على السعادة اللي عايشها واكثر شئ لمه سمعت روان بنته تنادية باباه وتميت اضحك على سعيد اللي يالس يأكلها هو اللي من زمان ما يطيق حد يقطع عليه لمه ياكل ههه سبحان الله المهم بعد الغدى خذ سعيد روان بنته اللي رقدت وفي ايدها العيش ههه وعطاها امها .
سعيد : هاه الحين فضينا لك يا مازن قول شو عندك
مازن : ما ادري كيف ابتدي سالفتي يا سعيد غريبة وحلها يمكن في نظر الناس سهل بس في نظري صعب
سعيد : السالفة جي سالفة حب وله يا مازن؟؟
مازن : هيه نعم اللي احبها ما تحس بمشاعري تجاها وانت عارف انا مب من النوع اللي ممكن اسوي مثل أي شاب واصارحها هاي بنت خالي يعني حشمتها من حشمة اماية وما ابي امي تفاتحها عشان ما توافق على زواجنا رد لجميل امي عليها وبصراحة انا البارحة تأكدت اني مب في بالها وخبر سعيد السالفة كلها .
سعيد : تسمع رايي
مازن : يا ريت يا بوعسكور
سعيد : تزوج اللي امك اختارتها لك وله بنت خالك شكلها ما تكن لك مشاعر غير مشاعر الاخت لاخوها وعيش حياتك تراه العمر يمضى يا خوي وبصراحة اجمل نعمة على الانسان لمه يتزوج الحرمة الصالحة واكيد خالتي ما ختارت لك غير بنت ناس ومحترمة
مازن : يصير خير يا سعيد .
اكيد اني اتصلت بامي وقلت لها اني ما بتغدى في البيت ولكني ما قلت لها اني في بوظبي قلت لها عندي شغل بخلصة وبرجع المغرب لاني مقرر اني العصر ارجع العين وفعلا بعد ما صلينا العصر في المسيد انا وسعيد ودعته وسرت على العين .
رايكم مازن ممكن يسمع نصيحة صديقة سعيد؟؟
والريم معقوله انها ما راح تحس بمشاعر مازن؟؟
ضنكم شو بيصير بين مازن والريم ؟؟
وثريا يا تري ممكن تكون شئ بحياة مازن؟؟
الجزء الخامس
في بيت بو مازن
ام مازن : كنت انتظر مازن يرجع واقوله اني ما كنت اقصد الكلام اللي قلته لاني عمري ما كنت مستبده في تربيتي مع عيالي وقلت اني بستسمح منه على اسلوبي معاه البارحة فديته مازن ما يهون علي يزعل ويتكدر ويمكن هو في خاطره وحده معينه وبيخبرني عنها بس ينتظر شوي .
مازن : اول ما رجعت البيت وشفت اماية سرت صوبها وحبيتها على راسها .
ام مازن : فديتك مازن سامحني على اسلوبي معاك البارحة تراه والله ما كان قصدي بس كنت خايفة عليك يمر فيك العمر ولا تعرس ولاني حابة اشوف عيالك واكحل عيوني فيهم
مازن : ابتسمت لاماية وقلت لها اماية خلاص فالج طيب مره باجر سيري على العرب وخطبي لي اللي خترتيها لي تراني ما بخذ الأ وحده انتي تختاريها بنفسج ودامج مقتنعة ببنت اليران خلاص كلميهم وردي علي .
ام مازن : انصدمت من اللي قاله مازن يعني صج وافق ولحظة حسيت اني تضايقت وقلت له مازن تراه لو كنت موافق عشان ترضيني انا راضية عليك بدون ما تخذ اللي اخترتها انا لك لو كان يعني فيه وحده في بالك
مازن : افا عليج يا ام مازن لا ابدا ما فيه حد في بالي وبعدين انا بصراحة حسيت بالغيرة يوم شفت روان بنت سعيد تقوله يبة وخاطري يكون عندي اولاد (شكلي خرتها وشكل امي عرفت اني كنت في بوظبي عند سعيدعشان جي قالت لي كيف حالة سعيد ؟؟)
في بيت بو طارق
كانت ام خالد مع ام طارق في ميلس الحريم شكل ام خالد قررت انها تخطب ثريا لولدها وشكل ام طارق مستانسة بها الخبر الحلو لان اكيد سعادة كل ام لمه تزوج بنتها وتطمن عليها انها عند ريال يحترمها ويقدرها وخالد والنعم فيه هو يقرب حج ريلها بو طارق وهي كل اللي سمعته عنه خير عشان جي قالت ام طارق لام خالد انها بتشاور البنت وابوها وبترد عليهم .
في ها الوقت اتصلت ام مازن فيها وقبل لا ترد عليها ام طارق اترخصت ام خالد عنها وقالت لها ننتظر ردكم يا ختي وطبعا ام طارق وعدتها خير ..
ام طارق : هلا والله بام مازن هلا الغالية
ام مازن : هلا فديتج والله تولهت عليج اليوم ما سريتي صوبي
ام طارق : سمحيني فديتج بس كانت عندي ام خالد ياية تطلب ثريا لولدها خالد
ام مازن : شو؟؟
ام طارق : ياية تطلب ثريا لخالد
ام مازن : يا ربي شو ها الحظ هيه ورديتي عليهم ؟
ام طارق : لا طبعا قلت بشاور ابوها والبنت
ام مازن : يالله عسى ربج يقدم اللي فيه الخير وتعذرت لها بانه ياني خط ثاني وقفلت السماعة لاني اتضايقت بصراحة بس قلت بتريا وما بقول لمازن شئ لين ما اتاكد ان ثريا نخطبت وبدور له وحده ثانية .
في بيت بوطارق
بو طارق : رجعت من الدوام وناديت على ام طارق وقلت لها شو اللي سمعته اليوم من طارق؟؟
ام طارق : شو سمعت فديتك؟؟
بو طارق : قالي طارق ان فيه عرب خطبوا منج ثريا وطارق اخر الدنيا يعرف وانا ما ادري
ام طارق : فديتك تراه من سارت عني ام خالد اتصل طارق فديته وخبرته ان خالته ام خالد عندها وانها ياية تخطب ثريا وعاد اكيد هو اتصل فيك وعلمك لاني قلت بعلمك اول ما ترجع البيت
بو طارق : ههه لا فديتج بس حبيت امزح معاج وله ادري انج بتعلميني المهم شو خبرتي ثريا؟
ام طارق : لا ما قلت لها
بو طارق : يالله نزين عشوني تراه ميت يوع
في ها الحزة نزلت ثريا وشافت ابوها وامها يضحكون هي اصلا متعودة تشوفهم جي كل ما يكونوا مع بعض وقالت لهم العذول وصل ههه يالله اقطعوا الرمسة السرية وخليكم على الاخبار العامة ويات ولوت على ابوها وحبته على راسه وقالت له فديتك من 8 ساعات ما شفناك ههه(لواته طبعا)
بو طارق : هلا فديتج انتي طالعة على امج حنونه
ثريا : كل شئ ترجعة لها ههه خلاص اوكى يا بو طارق على امي على امي
ام طارق : ولج الشرف يا بنت راشد
بو طارق : زين جي يا ثريا يبتي لنا الرمسة ؟؟ ههه
في بيت بو مازن
في غرفة الريم
كنت يالسة وما نفس في أي شئ كل اللي في بالي اللحظة اللي صفعني فيها مازن معقوله انا عصبت فيه لها الدرجة؟؟ وشو قلت له اصلا يعصب ؟؟
شوي ودخل قيس اللي متعود يدق الباب ويدخل ما يترياني اقوله ادخل وقف على الباب لمه شاف الدموع اللي في عيوني وقالي سلامت بلاج شو صار بعد تراه مب حمل خبر شين يكفي اللى فينا
الريم : ما شئ مزكمة شوي عشان جي
قيس : واللي مزكم على قولتج عيونه تدمع اقولج انا صح صغير بس مب غبي ولو ما تبي ترمسي خلاص قولي ما بقول ما فيه داعي للجذب وعقب يكتب الملك اللى في ايدج اليسار لج سيئة (بصراحة كنت مقهور)
الريم : حسيت اني تفشلت من رمسة قيس الصغير وحسيت اني صرت ملطشة الكل عشان جي قلت له خلني بروحي ما ابي اشوف حد ممكن؟
قيس : انقهرت اكثر صحيح اني حاس اني متعاطف معاها بس اسوبها كان مب اوكى معاي عشان جي انسحب من الحجرة ومن قهري رزعت الباب بقو .
الريم : انا شو سويت؟؟ وليش انا دائما احس فيهم وهم ولا واحد حس فيني؟؟ لا يا الريم حرام عليج قيس طول عمره اقرب واحد لج وهو حساس وايد يا ربي شو سويت انا ؟؟
رقدت من الضيق اللي فيني صحيح سمعت صوت مزنه وهي داخلة الحجرة هي صارت كل يوم تيني عشان تسولف معاي وصارت تحسسني انها قريبة مني لكني بصراحة في ها الوقت ما كنت ابي اتكلم مع أي شخص عشان جي خلتني وسارت
في حجرة مازن
بصراحة قررت اني ما افكر في أي شئ وعشان جي لمه حسيت اني متملل نشيت وقررت اني اظهر ايلس مع فيصل بس ما اتمني انه ما يعرف اني وافقت اتزوج البنت اللي خطبتها امي لي لاني ما ابي اتكلم عن الموضوع ابي اتكلم عن أي شئ غير ها الشئ .
والحمد لله لمه دخلت على فيصل حجرته حصلته يلعب بلاي ستيشن ههه بعده الحبيب ما نسى اللعب (الله يرحمك يا هاني كان هو دوم هو وياه يلعبون مع بعض وكنت دوم اسمع سوالفهم وضحكم ) قربت من فيصل وقلت له اللعب وياك؟؟
فيصل : يا ريت
مازن : بس انا ما اعرف علمني
فيصل : ههه نزين يا مازن وتميت افهم مازن الاشياء الرئيسية وهو ما شاء الله عليه ذكي لقت الملعومات بسرعة ههه
مازن : خلاص كل يوم بلعب وياك
فيصل : لا الشيخ بعد انت ما تصير حريف بلعب مع قيس ما فيني كل يوم اخسر ههه
مازن : فيصل شو رايك نطلع نمشى
فيصل : احس ببرد خليها يوم ثاني الحين اللعب اللعب
مازن : نزين وتميت اللعب وحاولت اشغل بالي باللعب وما افكر في أي شئ لحد ما حسيت اني نعسان وترخصت عن فيصل عشان اروح ارقد .
بعد 10 ايام من كل ها الاحداث بس شفت الريم وجه لوجه واكيد اني تجاهلتها تماما وسرت صوب التلفزيون وشغلته وتميت اطالع برنامج سيرة ونفتحت الموضوع بصراحة شدني
وشكل الريم طلعت بسرعة لانها هي بعد ما تبي تشوفني رغم اني حسيت انها نقهرت من تجاهلي لها ولكني قلت في نفسي احسن تستاهل حد قالها تغلط في الكلام معاي اونه شو انا اناني لو كنت اناني كنتي انتي يا الريم ملك لي الحين ولا كنت احس بتعب وضيق الحين
الريم : كنت انتظر ثريا تزورني لاني متواعده معاها عشان تدرسني انجليزي او بمعني اصح كنت محتاجة اسولف مع شخص غير الاشخاص الموجودين في البيت وعشان جي طلعت في حديقة البيت عشان اترياها ومن وصلت وفتحت باب الصالة قلت لها ولد عمتي في الصالة يعني لا ترفعي الغشواه مرينا من الصالة وطلعنا غرفتي .
ثريا : يا ربي شكثر انا محظوظة اني اشوف مازن اول ما ادخل البيت فديتك يا مازن وانت تطالع التلفزيون (الحمد لله ان الريم نبهتني وخليت الغشواه بصراحة تحتها اتصرف على كيفي ههه كان ودي ابوس الريم من الفرحة)
الريم : يلست قدام ثريا وانا ساكته وسرحانه وعشان جي اكيد انها سألتني عن السبب لكن ما كان عندي جواب او بمعني اصح ما ابي اجاوب
ثريا : بلاج انتي اليوم احسج غريبة مب ريم اللي اعرفها
الريم : ما شئ تعبانه شوي وبصراحة مالي خلق ادرس انا اتصلت فيج عشان اسولف معاج
ثريا : فديتج قولي اسمعج
الريم : لا مب موضوع معين يعني انتي رمسي سولفي لي عن أي شئ وبعدها السوالف بين ههه
ثريا : شو اقولج خاطري بصراحة كنت ارمس عن المشاعر اللي احسها تجاه مازن بس ما قدرت وعشان جي ما طلعت عن الموضوع وسألت الريم انتي عمرج حبيتي؟؟
الريم : بصراحة سؤالها كان مثل السهم اللي اتصوب على الفريسة وصابها سؤال غريب عمره ما خطر في بالي وعمري ما حسيت ان ممكن شخص يسألني ها السؤال ما ادري شو اقول لكم وابتسمت لها وقلت لها ليش عاد سألتي ها السؤال ليكون انتي ...
ثريا : ما انتظرتها تكمل رمستها وبصراحة حسيت في لحظتها انها كاشفتني او خفت ان عيوني تكون فضحتني (يقولون اللي على راسه....) لكن تداركت الموقف وقلت لها لا بس لان البنات كلهم يرمسون عن ها الموضوع وانتي ما شاء الله عليج حلوه واكيد ان فيه شاب حاول يتقرب منج ان كان من عائلتج او من اخو ربيعاتج ..
الريم : شو فيها ثريا اليوم كلامها احسه مثل الاسهم شو اقولج يا ثريا وقفت وتميت واقفة على الشباك وقلت لها انتي ما تعرفي شئ عن حياتي يا ثريا وانا ما لي خلق اضايق فيج بس انا اقولج شئ واحد اني عايشة مب عشان احقق اهداف مثل كل بنت انا عايشة عشان ربي عاطني ها العمر واحس اني افقد كل يوم منه بدون هدف ولا اني اسعي لهدف فيه مالي احلام مثل كل بنت بالزواج والاطفال لانه حلم بعيد وصعب انه يتحقق يمكن الشئ الوحيد اللي سمحت لنفسي اني احلم فيه اني اشتغل وما ادري ان كان بيتحقق وله بيكون مصيري جدران ها الغرفة .
ثريا

الريم : ما فيه حد يرمس بس اسمع انفاس تتصاعد وفضولي بيقتلني ابي اعرف منو وابدا ما توقعت المتصل مازن وبصراحة خطر في بالي ان ثريا داقة
مازن : بعد ما مسحت دموعي وحاولت اتماسك قلت بصوت متقطع الريم
الريم : انصدمت المتصل ريال والصوت مب غريب علي صوت مازن اللي اقدر اميزه وسط مليون صوت وقلت انا بعد بصوت متقطع ومتفاجئ مازن؟؟؟
مازن : كنت اسمع انفاسها هي الثانية سمعت صوتها وهي تنادي اسمي يا حلاة اسمي وهو طالع من بين شفايفها وتميت اتخيلها بصراحة مشتاق لها موت رغم انا في بيت واحد إلا اني حاس اني متوله عليها
بس للاسف مره ثانية خانتني شجاعتي وبدل ما اقول اللي في قلبي اطريت اني اقفل المبايل للمرة الثانية اكيد اني خليت الريم في حيرة اكبر من المره الاولي .
الريم : لا تستغربون لاني فعلا ها المره ما استغربت تصرف مازن لاني صرت متعودة على تصرفاته الغريبة معاي بس ما انكر ان فضولي بيقتلني اني اعرف شو هو الشئ اللي يبى يقوله لاني حاسة ان فيه شئ يبي يقوله .
مزنه : بعد نص ساعة من ما عطيت الريم مبايلى طلعت اشوفها خلصت وله وحصلتها تصلى ومبايلى على الشبرية خذته ويلست انتظرها لحد ما تخلص مصليه لاني كنت بسألها شو يبي فيها مازن وفعلا بعد ما خلصت سألتها هاه شو عنده مازن؟
الريم : كنت طالبة منه يب لي مرجع من المكتبة عشان اسوي بحث بس يقولي انه ما حصله ويسألني اذا يجيب لي شئ ثاني وله (كيف جذبت ها الجذبة ما ادري حسيت هي اللي طلعت معاي)
مزنه : بكل سهوله صدقت الريم وخذت مبايلى وطلعت وسرت الصالة ايلس مع قيس اللي صارلي فتره احس اني ابتعدت عنه وتميت اشرح له بعض مسائل الرياضيات لاني شاطرة في الرياضيات .
بعد اسبوع من كل ها الاحداث وبالتحديد الساعة 8 بالليل في بيت بو مازن كانت عمتي ام مازن تدخن عمي ومازن وفيصل بعود عشان يظهرون يسيرون بيت قوم اهل ثريا لانهم حددوا اليوم عشان يسيرون يخطبوها رسمي وطبعا عمتي بجت لانها تذكرت هاني وتمت تدعي له وانا ومزنه حاولنا نخفف عليها ونقول لها انها تفرح لمازن .
وتمينا نترياهم لحد ما رجعوا وطلع مازن وفيصل كل واحد غرفته إلا عمي يلس عندنا وقال لنا تفاصيل سيرتهم من اول ما وصلوا بيتهم لحد ما رجعوا من هناك وكانت عمتي مستانسة بالقو وفرحت اكثر لمه قال لها عمي انهم حددوا موعد الملجة اول اسبوع من رجعة طارق اخو ثريا يعني بعد اقل من شهر .
الريم بصراحة ما استغربت تصرف مازن انه يطلع غرفته ويتجاهل وجودنا لانه هو ما تجاهل وجود الكل تجاهل وجودي انا خاصة بعد اتصالة الاخير فيني واللي انا قررت اني اتجاهله بس للاسف شكلي ما قدرت ها المرة اتجاهلة .
في الجامعة
كنت يالسة في الكفتريا لانه بصراحة ما كان لي خاطر ادخل محاضرات وما كان بعد لي خاطر ايلس في البيت لان مازن ولد عمتي عنده اجازه يتجهز للملجة الحبيب وانا بصراحة علامة الاستفهام اللي كبر الدنيا فوق راسي بصراحة خلاص شكلي بسأل مازن شو هو الشئ اللي شجاعته تخونه انه يقول لي عليه ...
ووسط افكاري الجهنمية ههه حسيت بظلمة ورفعت راسي اطالع بلاها الدنيا صارت جي وما شفت غير بنت ما ادري يمكن وزنها مائة وشئ واقفة قدامي(لازم تظلم الدنيا ههه) قالت لي بصوت عكس جسمها سبحان الله انتي الريم؟؟؟
الريم : تذكرت مسرحيات عادل امام في ها اللحظة بس انا في موقف جد الحين ولازم اخفي البسمة اللي شاجه حلقي الحين وله لو عطتني كف ها البنت ما اعتقد اني برجع للحياة ههه وقلت لها نعم (اوني مخلية نفسي شجاعة)
البنت : عطتني ظرف وسارت عني
بصراحة ما تجرأت ازجرها ومسكت الظرف وتأملته وايد بس ما كان لي خاطر افتحة لانه بصراحة ما خاطري اتفاجأ باي شئ ويمكن خذيت الموضوع ببساطة حطيت الظرف في شنطتي واتصلت على فيصل عشان يجي ياخذني خلاص مب قادرة ايلس جي في الكفتريا ما فينا على شئ ثاني يصير .
فيصل اعتذر انه يجي ياخذني يعني شو ؟؟؟
يعني يا شطار ان مازن هو اللي بيجي ياخذني من الجامعة يا ربي يعني انا ناقصة؟؟ وحسيت بلوعة جبد بصراحة وخوف وحسيت ان كل آلم الكون تجمعت عندي بس ما فيه حل قدامي غير اني ارضخ للامر الواقع واول مرة احس انه وصل بسرعة ركبت يمه بعد ما سلمت عليه وتميت ساكته وشكله هو متجاهل اني يمه في السيارة وما صدقت على الله اني اوصل البيت اوني بسأله شو اسأله وانا يوم اشوفه احس بخوف ههه
شفتوا الهدية لمزنه ههه عليكم واحد
يا تري بيتم زواج مازن وثريا؟؟
مزنه منو بتختار حسن وله خليل؟؟
الريم ليش حست بضيق بعد خطبة مازن؟؟
واخيرا منو البنت اللي يات لريم وعطتها الظرف؟؟
والظرف اصلا شو فيه؟؟
الجزء السابع
في بيت بو طارق
بعد اقل من شهر وصل طارق وطبعا ام طارق وبو طارق من فرحتهم قرروا انهم يسون عزيمة كبيرة لفرحتهم برجعة ولدهم بالشهادة وبرجعته لهم وفعلا كانت الحفلة شئ رهيب قمه في الترتيب .
وطبعا ام مازن ومزنه والريم وخلود بنت عمتهم كانت معاهم كانوا موجودات في الحفلة اللي كانت شبه عائلية.
في المطبخ كانت الريم ومزنه يساعدن ثريا في التحضير الاشياء البسيطة لان الغدى كانوا متفقين مع مطبخ شعبي يسويه لهم وشوي ودخل بو طارق وطارق عليهم مما خلي مزنه والريم يرفعن غشاويهن على ويوهن ورجع طارق لوراء اما بو طارق عادي دخل وعطي الاغراض اللي في ايده لثريا وطارق تم على باب المطبخ الخارجي يرمس ثريا ويقول لها تقول للخدامة تنزل له كندورة غير اللي لابسها لانها تخيست ما ادري شو مسوي الولد ههه .
وفعلا زجرت ثريا على الخدامة تنزل كندورة لطارق من غرفته لانه ما يقدر يدخل الصالة كلها حريم وطبعا نظام بيتهم الصالة الداخلية للبيت مفتوحة على بعض وعشان جي هو وايد يستحي بس منو بعد ما لبس كندورته الثانية اصرت امه عليه انه يدخل يسلم على خالته ام مازن لانها حشرته فيهم ههه وطبعا ما عنده حل غير انه يسمع كلام امه ويدخل يسلم على خالته ام مازن وفعلا من شافاها ارتاح لها وعرف ان اللي امه حكته له عنهم شئ بسيط .
ام مازن : مبروك يا ولدي والف حمدا لله على سلامتك
طارق : الله يبارك فيج خالتي وكان منزل راسة من الخجل
ام طارق : يالله عقبال العروس ههه فعلا هي خاطرها تزوجه
ام مازن : عسى نشاء الله طارق فديته كل بنت تتمناه
طارق : جي خالتي بنغر ههه عقب قال لهم يالله من رخصتكم تامرون علي شئ؟
ام مازن وام طارق سلمت يا ولدي
في ها الحزه كانت ثريا ومزنه والريم وخلود يايات من صوب المطبخ وقالت ثريا فديت اخوي وسمعها طارق وابتسم لها وطبعا شئ طبيعي شاف كل البنات اللي معاها لانهم ما توقعوا يشوفون طارق في الصالة وما كانن متغشيات وطبعنين البنات كلهن شافن طارق اللي ما شاء الله عليه طويل ورغم انه اسمر شوي بس جماله الخليجي مخلنه قمر .
في ميلس الريايل
طبعا بو مازن يقول لبو طارق ان طارق خلاص رجع وفرحوا برجعته وانهم الحين يبون يفرحون بمازن وثريا وطبعا بو طارق قال لهم افا عليكم خلاص حددو انتو موعد الملجة ونحن جاهزين
بو طارق قاله خلاص نشوف الحريم وانا اشوف نستعجل فيها بصراحة نحن محتاجين للفرح وطالع على مازن اللي كان حاس انهم يرمسون عن ها الموضوع مما خلاه يتضايق هو لحد الحين مب قادر يستوعب فكره انه بيعرس .
طارق : يلس يم قيس اللي تم يسولف معاه ما شاء الله عليه وطارق مستانس بالسوالف معاه وعقب انضم فيصل لهم وتموا يسولفون مع بعض .
طبعا طارق ما عنده اصدقاء في الامارات لانه من طول عمره عايش في الخارج عشان جي هو بعده ما تأقلم في العيشة في الامارات بس يحاول .
في بيت بو مازن
الريم : بعد ما رجعت من ها العزيمة دخلت غرفتها ترتاح بعد ما حست ان خلود ومزنه يبون يرمسون بروحهم عشان جي هي بعد محتاية تيلس مع نفسها .
بصراحة انا حسيت بالغيرة من ثريا وتعاملها مع اخوها طارق من الظاهر انهم متفاهمين وحتى مزنه وخوانها وخلود وخوانها انا الوحيده ما عندي خوان يهتمون فيني واهتم فيهم امزح معاهم ويمزحون معي مثل ما كل بنت تسوي .
حسيت بس الحين اني خاطري اعرف شو في الظرف اللى عطتني اياه البنت الضخمة رغم خوفي الكبير من اني افتح الظرف إلا اني سميت بسم الله وفتحته اطالع بس مب مستوعبة اللي اشوفه جدامي وكان في الظرف رسالة فتحتها وحاولت اقراها رغم انها مكتوبة بخط اليد غصبا عني سالت دموعي ما ادري هي دموع فرح وله حزن
سمعت حد يحاول يفتح باب غرفتي وحسيت اني ميته خوف بس قررت اني ما ارمس عشان يعتقد اللي ياي اني راقده وفعلا نجحت الخطة انا الحين محتاية ايلس مع نفسي اكثر من اول وعلى رغم التعب اللي كان فيني إلا اني ما قدرت ارقد وتميت في غرفتي لحد اليوم الثاني ما نزلت من الغرفة ولا شفت احد من اهل البيت حتى مزنه اللي يات تدق باب غرفتي اكثر من مره
وبصراحة انتظرت يوم السبت رغم اني كنت خايفة من ها اليوم طبعا في الفترة الاخيرة انا صرت اسير الجامعة مع فيصل واحيانا اطر اني اسير مع مازن لكن اليوم قلت لعمتي اني بسير مع ربيعتي هي بتمر علي لانا بنسير قبل مكتبة زايد عشان نبي نسوي بحث مشترك وعقب بنسير الجامعة وطبعا عمتي اقتنعت بالسالفة ومشت عليها القصة المؤلفة
الساعة 9 كانت سيارة مرسيدس لونها اسود مخفي كامل واقفة قدام البيت وقالت لي عمتي ربيعتج يمكن وصلت يالله نزلي لها بسرعة ورغم خوفي الكبير اني اتجرأ على ها الخطوه إلا ان فضولي كان بيقتلني .
وصلت مكان ما ادري كيف اوصفة لكم اقول حلو ما اقدر اقول يهبل ما اقدر احس انه اكثر من جي رغم انه في العين إلا اني اول مره ادخل قصر جي ايه قصر ما اقدر اقول انه بيت عادي ولا فيلا عادية كانت حديقة ها القصر كبيرة ولحد ما وصلنا الفيلا الداخلية يمكن ربع ساعة ديروا بالكم بالسيارة يعني تخيلتوا المكان اللي انا سايرة له؟؟
طبعا بقي اني انزل من السيارة بعد ما فتح الدريول الباب وطول الوقت كان استفهام غريب يحيرني وكان خوف كبير في داخلي يا تري اللي انا سويته صح وله؟؟
بس رغم ذلك حسيت بشوية اطمأنان بعد ما دخلت وستقبلتني الخدامة بكوب عصير مثلج كأنها كانت حاسة فيني حليلها وكانت عيوني على روعة المكان مب قادرة احركها وركزت نظري في كوب العصير اللي قدامي.
في بيت ام حسين
خلود رجعت البيت وانا مب عارفة شو يدور في راسي من افكار وله شو لو سألني اخوي حسين عن مزنه شو اقول له وقلت ما علي بهرب غرفتي لكن منو يخليني اهرب كأن حسين يتريا رجعتي من بيت خالي بو مازن عشان جي مسكني على الدري وقالي هاه شو اخبار العرب اللي كنتي معاهم؟
خلود : هاه ؟؟ وكأني اول مره اسمع سؤال مثل جي قلت له هيه بخير الحمد لله يسلمون عليك
حسين : شو ؟؟ والله يسلمون علي؟؟ من صج؟؟
خلود : شو قلت انا شو هببت وبتسمت بسمة ما ادري كيف قدرت اطلعها من بين شفايفي وقلت له هيه يالله من رخصتك بسير ارتاح حاسة تعبانه وعندي مليون شغله وشغله لازم اخلصهم تدري انا في التقنية وتعرف عاد انت الدراسة
حسين : رغم اني حاس ان اختي فيها شئ مب طبيعي إلا اني وقفت عند كلمتها ان العرب اللي كانت عندهم يسلمون علي وحسيت اني فرحان اقصد طاير من الفرح.
ام حسين : كانت متأثرة في اول ايام وفاه هاني ولد اخوها لكن بعد ها الايام رجعت حليمة لعادتها الجديمة وكاهي مره ثانية ما عندها غير القال والقيل وان فلانه سوت وفلانه عدلت وتحرض بناتها على ازواجهم وشكلها ما راح ترتاح إلا لمه وحده من بناتها ترجع لها مطلقة .
في بيت بو طارق
طبعا بو طارق قال لام طارق ان بو مازن فاتحة عشان موضوع ملجة مازن وثريا وقالت له ام طارق انهم ما عندهم الحين أي مانع قالها بو طارق عيل خلاص باجر ارد عليه وخليكم انتي وام مازن تشوفون شو تبون لحفلة الملجة وباقي الامور انا وبو مازن ما بنختلف عليها .
في بيت بو مازن
ام مازن وبو مازن بعد يتناقشون في نفس الموضوع وطبعا ام مازن قالت انها ما تبي تسوي حفلة للملجة لانه بعده ما مرت سنه على وفاه هاني وانهم راح يأجلون الفرح لحد العرس قالها بومازن اللي تشوفينه يا ام مازن لكن لازم تخبرين ام طارق وتشوفون ثريا يمكن تبي تفرح في ملجتها البنت
ام مازن : ثريا بنت عاقل وتفهم في الاصول وما اعتقد انها بتعارض ها الشئ
بو مازن : على راحتكم يالله تصبحون على خير .
في حجرة مزنه
كنت يالسة وحاسة في نار في قلبي ما ادري بلاني احس اني مب طبيعية واحس اني مخنوقة ونفس الوقت مب خاطري اشوف احد تميت يالسة في حجرتي لكن دخول فيصل غرفتي خلاني اتصرف عادي لكن شكلي ما قدرت اخفي اللي احس فيه عشان جي أول سؤال سألني اياه فيصل بلاج ؟؟
مزنه : ما قدرت ارفع راسي في ويه وقلت له ضايقة ومب عارفة شو السبب
فيصل : اول مره احس ان اختي محتاجة لي واول مرة اقرب صوبها والوي عليها وقلت لها شو رايج نظهر تغيرين جو ونرمس يمكن ترتاحي
مزنه : الفكره اللي قالها فيصل مقبوله عشان جي هزيت راسي بالموافقة
فيصل : شوفي الريم إذا بتظهر معانا .
مزنه : هاي الفكره ما عيبتني لاني ابي اظهر مع اخوي بروحي بس بعد هزيت راسي بالموافقة وقبل لا اتجهز سرت غرفة الريم عشان اقول لها بس تلومت فيها يوم قالت انها ما بتسير وحسيت اني كنت انانية حتى لو كان بتفكيري وحاولت اقنعها بس شكلها معزمة انها ما تظهر وقلت يمكن عندها دراسة وله شئ عشان جي قبل لا اظهر قلت لها نزين تبين شئ ايبة لج وانا راجعة عشان يمكن اخفف اللوم اللي حسيته تجاها لكنها قالت لي مشكورة .
فيصل لبست كندورة وغترة وظهرت ونزلت انتظر مزنه لحد ما تخلص في الصالة بعد طبعا ما دقيت عليها باب غرفتها وقلت لها اني انتظرها تحت حصلت اماية وقيس الدلوع ههه كان راقد على حجرها وتلعب له بشعرة وتسولف معاه وشكل قيس كان يطلب منها شئ ولمه شافوني نازل وشكلي بظهر سالتني امي على وين؟
قلت لها بظهر انا ومزنه وقال قيس الملسون ههه يا عيني على العلاقات اللي توطدت يالله لنا الله ما حد يعبرنا .
اماية وفيصل ضحكوا من خاطر والغريبة ان مزنه نزلت بسرعة يعني بختصار لا كان فيه احمر ولا اخضر على ويها كانت لابسة كندورة البيت ولابسة عليها عباة صح مفتوحة بس حتى ولو شكلها مرتب ما شاء الله عليها .
في غرفة الريم
كل شئ يدور حوالي صرت مب فاهمته فكرت في علاقة مزنه وفيصل اللي توطدت وحمدت ربي وفكرت شوي في مازن ولد عمتي اللي صرت ما اشوفه لانه وبصراحة يتجنب انه يشوفني عشان جي ما حبيت اضايقة فكرت بعد في قيس اللي حسيت نفسي صرت بعيده عنه عشان جي لبست شيلتي وبسرعة ظهرت من الغرفة ما كنت ادري وينه فيه بالضبط يعني اكيد اني اول مكان سرت له عشان اشوفه غرفته دقيت الباب بس ما حصلته وبصراحة اكثر حسيت بفكرة شيطانية ثانية تخطر في بالي ههه زمان ما ضحكت وزمان ما سويت مقلب في قيس عشان جي سرت غرفتي واتصلت على المطبخ وقلت للخدامة تطلع لي معاها بصل وثوم ما اقول لكم كيف استغربت الخدامة من ها الطلب الغريب لكن ما في يدها أي شئ تسويه غير انها تنفذ طلبي وشوي ويات يايبة الاغراض في كيسة غليضة عشان ما حد يشوفهم مثل ما طلبت منها
شو سويت في الاغراض اللي طلبتهم منها؟؟ اكيد اني يبت علبة وحطيتهم فيها والعلبة دخلتها في علبة ثانية يعني حطيتهم في ثلاث علب شكلهم كشخة وغلفتهم بطريقة ولا اروع يعني تفننت على كيف كيفي وما انسى اقول لكم اني كتبت على ورقة كبيرة وحطيتها في ظرف (تعيش وتاكل غيرها مع تحياتي بنت خالك ) وظهرت من الغرفة وتلاقيت مع منو؟؟
لا مب قيس كان المرعب ههه(هذا اللقب اللي استقريت اني اطلقة على مازن) وما انكر اني ما قدرت اطالع على عيونه لكن شكله كان مركز على وعلي اللي كان في ايدي واللي انا نسيت اني شالته من الخوف اللي حسيت فيه وانا واقفة قدام مازن
يمكن وقفتي قدامة طالت دقايق بس حسيتها دهر ويمكن انه هو انسحب من وقت بس لاني ما طالعت عليه ما حسيت فيه وهو ينزل بس بعد شوي قررت اني ارفع راسي ونصدمت بعدم وجودة .
لا ما تضايقت بالعكس تنفست الصعداء على قولتهم وكملت مشواري لغرفة قيس وانا ظاهرة من غرفة قيس تلاقيت مع منو؟؟
هاي المرة عاد هيه نعم كان قيس وقالي وهو مستغرب الريم؟؟
الريم : طبعا تخرعت لكن بسرعة حاولت اظهر عدم المبالاة وقلت له يت ادورك من غرفتك بصراحة اشتقت لك وشتقت لسوالف معاك و وكنت بكمل وقالي
قيس : تشتاق لج العافية يا بنت خالي
الريم : نزين حشا اصبر اكمل رمستي
قيس : لا اليوم يعتبر يوم سعادتي قولي غناتي (وهذي اول مره يقولي ها الكلمة)
الريم : بصراحة يا قيس انا يبت لك هدية واتمني انها تعيبك واتمني ترجع علاقتنا شرات اول وننسى كل اللى صار في الفترة الماضية
قيس : شو اللي صار يا غبية من دون ما تقولي انا ما اشيل لج غير كل احترام ههه بدليل كلمة غبية ههه لكن تدرين اني امزح معاج يالله المهم لا تأخريني بسير اطالع الهدية اللى اشتريتها لي ياي من زمان ما حد ياب لي هدية
الريم : حاولت اخفي الضحكة اللي كانت بتفضحني وقلت لو تميت معاه اكيد اني بضحك عشان جي قلت له انا بنزل اشوف عمتي وبرجع اطلع لك اوكى (طبعا انا كنت ابي اهرب عند عمتي لاني اعرف قيس لو عصب مشكلة)
قيس : اوكى بس لا تتأخري
الريم : لا ما راح اتأخر (منو يقول اني ما راح اتأخر انت اصلا ما راح تشوف ويهي لحد ما تهدا) ونزلت ولقيت عمتي في غرفتها وطبعا استحيت ادخل لان عمي بو مازن كان موجود يعني شو ما فيه حد راح يحميني من شر قيس المنتظر انا شو اللي خلاني اسوي جي ما شئ حل غير اني اطلع غرفتي بسرعة واقفل الباب على روحي لكن اخاف احصلة على الدري وله شئ شو اسوي الحين ؟؟
تفكيري ما طال وايد وكان المرعب في ويهي واول مرة المرعب هو الحل وقررت اني ايلس في الصالة بعد ما يا هو صوب التلفزيون وشغلة قررت اني ايلس قريب منه عشان بعد ما اضمن الاستاذ قيس وكانت انظاري موجهه لدري .
يمكن ربع ساعة ونزل قيس اللي كان باين عليه انه معصب بس اول ما شافني يالسة مع مازن صحيح انا ما كنا نرمس ولا شئ وكان مازن مشغول بالتلفزيون يا قيس وكان خاطره يعطيني بوكس على راسي ههه لكن تمالك اعصابة لانه عارف ان مازن بيتهاوش معاه لكن سوا لي حركة انه معليه وهو يبتسم لمه كان مازن مشغول بالتلفزيون وعقب يا قيس ويلس وقال لمازن هاه المعرس تراه سمعت اماية تقول ان ملجتك بتكون عقب اسبوعين .
مازن : كان ها الخبر مثل الصدمة عليه (اول مرة احس ان الايام تمضى بسرعة معقوله عقب اسبوعين بدخل القفص الذهبي على قولتهم ) وقلبي انزين ولكني حاولت اظهر عكس مشاعري لكني شكلي فشلت ونشيت بسير غرفتي وانا ماشئ ياني صوت الريم وهي تنادي علي
الريم : لا تستغربون ايه ناديت عليه لانه المنقذ في ها الحالة عشان جي قلت له مازن ممكن ارمس معاك شوي وطالعت على قيس بس ها المرة كانت نظره هادية مب نظره تحدي .
مازن : طالع علي مستغرب عقب طالع على قيس وكأنه يطلب منه يخلينا بروحنا .
قيس : فهمت ان مازن ما يباني اكون موجود عشان جي قررت بيني وبين نفسي اني أجل الانتقام الحين وانسحبت بهدو .
مازن : يلست على الكرسي وانتظرت الريم تقول الرمسة اللي عندها رغم اني كنت خايف انها تسألني سؤال واكيد كلكم متوقع شو السؤال اللي خفت الريم تسألني اياه .
الريم : ما ادري كيف يبت ها الشجاعة وما اعرف كيف ابتدي رمستي ايه هاي مب بس خطه عشان اتخلص من انتقام قيس هاي فرصة وكنت حابة استغلها ويمكن احسن شئ انك تنفذ بدون ما تكون مقرر لاني دائما يوم اكون مقررة اكنسل واحس بخوف وتوني برمس إلا وفيصل ومزنه راجعين من برع يايبين معاهم عشى وفرحانين .
لا تطالعوني جي هاي الاقدار هي اللى تحكم في اللحظة اللي حسيت اني برمس قطع علينا دخول فيصل ومزنه وطبعا طلبت مني مزنه اساعدها نحط العشى بعد ما فسخت عباتها وحتطها على الكرسي في الصالة لحد ما تطلع غرفتها بصراحة شكل مزنه كان وايد مستانس اما فيصل تم يالس مع مازن يسولف معاه وما كنت اعرف في شو يسولفون وما كان يهمني اعرف في شو يسولفون .
مزنه طلبت مني انادي قيس لكني قلت لها اسفة ريلها فيها شد عضلي ما اقدر اطلع وقررت انها هي تروح تناديه وانا بيني وبين نفسي كنت مرعوبة وتميت ادعي ربي ان قيس يكون عاقل وينتقم بس هب الحين .
نزلت مزنه بعد شوي بعد ما قالت ان قيس ما يبي عشى وانه بيرقد وبعد عمي وعمتي اعتذروا ما يبون عشى يعني تعشينا انا ومزنه وفيصل ومازن .
ظنكم البيت اللي سارت له الريم بيت منو؟؟
ومازن معقوله انه يتزوج ثريا؟؟
طارق معقوله يسير شئ في حياته؟؟
مزنه شو بيكون قرارها ؟؟
الجزء الثامن
في غرفة الريم...
اول مرة احس احساس غريب اول مرة انظر لعيون مازن وها المره الخوف اللي حسيت فيه مب مثل أي خوف معقوله انا فهمت شو يدور في خاطره؟؟ لا طبعا اكيد انا غلطانه وللحظة حسيت اني فهمت شئ بس اللي فهمته خوفني موت لا لا طبعا حاولت اشتت افكاري وطبعا ها الشئ خذ مني وقت الليل كله .
في غرفة فيصل
انا اليوم ما اعرف شو فيني مب طبيعي حاس نفسي مب قادر ارقد حاس كل ما غمضت عيوني وانا اطالع صورتها في بالي بسمتها (استغفر الله) لا انا شئ فيني ..
بعدها حاولت افكر في طلعتي اليوم مع اختي مزنه وحاولت افكر في كلامها لي وخوفها حاولت بعد افكر في الجامعة اللي ادرس فيها اخر سنه .. بس شكلي فشلت وقراري اني اطلع واسير غرفة مازن هو اخر قرار واخر فكره فكرت فيهم وما ترددت لحظة اني انفذ القرار.
دقيت الباب وكنت خايف اني احصل مازن راقد خاصة اني من طلع هو عنا يرقد فترة طويلة لكني لقيته فاتح الكمبيوتر ويكتب في الملجد اللى كلنا ما نعرف شو يحوي فيه ومن طالع على وانا ادخل الغرفة قفل الكمبيوتر ولف الكرسي عشان يطالع علي خاصة اني يت ويلست على السرير بحيث اني اتكلم معاه .
يمكن ما كنت محتاج وقت طويل اني افهم مازن باللى فيني لان الحيرة والقلق اللي فيني كانت واضحة هذا اللي كنت اعتقد انا ولكني للاسف اعتقادي ما كان في محلة ونقهرت يوم قالي مازن وانا اقوله شكل الحب بدا يدق باب قلبي ..
مازن : شو ؟؟ الحب؟؟ انت؟؟
فيصل : طالعت على مازن وقلت له وليش مستغرب؟؟
مازن : انته تحب؟؟
فيصل : ليش تعت

انتظر ردودكم خواتي

ماشاء الله عليك حبيبتي
القصه حلوه مره
كاسره خاطري الريم
الله يرفع حظها