قصة كفن صفعني نفعني للكاتبة البدور

هذا هو الجزء الثاني من كفن صفعني نفعني وان شالله يكون احلى من الاول مثل ماوعدتكم..
الجزء الثاني
مرت حصة على ربيعتها موزه بسيارتهم الستيشن اللي يسوقها دريولهم عبد الواحد وحصوه الربشه لازم ترفع صوت المسجل يوم يسوق دريولهم الخديه السيارة وتشتته
وكانت حصة حاطه أغنية سهرتنا لرابح صقر ... وهب بس شيه لا الحبيبة حصة كانت ترقص بعد ومن حظها المنحوس شافها واحد خايس وفهم الحركة إنها يا لحبيب الحقنا وطبعا هو ما عنده مانع ... وما انتبهت حصة لين ما قاللها الدريول :
- ماما..ماما.. سوف سوف هزا ريال في سيارة ورا مال انتي سيارة ..
وأول ماقاللها الدريول هاذا الكلام لفت الشيله عدل ويلست باحترام علشان ما يلحقهم ويسويلهم مشاكل
موزه تعاتب حصة : ارتحتي الحين ..بردت دودتج هاذا اللي أنت تبينه هالخايس يالس يلحقنا .....والله انه فاضي وما عنده شغل ....ما ترومين اتقرين مثل الوادم يوم توصلين البيت هزي على كيفج هب في السيارة جدام الناس ..والله فضحتينا
حصه وهي على الدقه بتدمع عينها : انزين أنا بس كنت اصفق
موزه : ..................................
حصه : خلاص يا موزه حصل خير
موزه:....................................
حصه : انزين خله يلحقنا اللي يقول نحن بنعطيه ويه
موزه : ممكن تكرمينا بسكوتج ؟؟؟؟؟؟؟
وتمت حصه ساكته ومتلومه من ربيعتها
لفتتها حركات صدت ولقت الخايس يالس يأشر لها ويسوي حركات تقهر
بس ما رامت تضحك عليه وتسوي شي لأنه هب وقته خاصه ان ربيعتها محرجه عليها الحين وهي ماترضى بزعلها .
قالت حصة في خاطرها الله يسامحج يا حكومة دبي مانعين عنا المخفي اللي ناخذ فيه راحتنا بس شو بيدنا ؟؟؟ حدنا مخفي 30% ماييب ولا يودي والحين لا أروم لا ارقص ولا آكل في السيارة .
وصلوا البنات صحارى سنتر، وبعدها موزه مويمه على ربيعتها تحجبت موزه اما حصه عدلت جذلتها ونزلن من السيارة ويالله يوم الخميس في صحارى شو الزحمة ......عجيبه وشو شباب بوظبي وشباب الشارجه ودبي مثل النمل ماشا الله ما عندي خبر شو لهم بصحارى .
المهم بالنسبه للولد اللي كان يلحق البنات تراه ما فجاهم ونزل وياهم صحارى دشن البنات صحارى من الباب وركبن الدري المتحرك وتمشن ويوم وصلوا صوب ستاربكس اللي جدا (( ALDO)) حمرت خدودهن من النظرات اللي طايحه عليهن اللي يقول داخلين مسابقات ملكات جمال وطبعا أنا ما اقدر أنكر ان البنات ( حصه وموزه ) يخبلن ماشاء الله جمال رباني بدون مكياج وبمكياج .وكانت العيون في صحارى متوجهة لحصه لأنها متمكيجه ولأنها طويلة ... باختصار تلفت النظر ...وطبعا هاذي هب نية حصه.. تمن يتمشن لين ما وصلن فوق صوب السينمات.... اختارت حصة سينما صحارى لأنها تحيدها دايما خاليه ومافيها زحمه حجزن تذكره ويلسن في كراسي الانتظار اللي حاطينها جدا ستاربكس اللي صوب السينما وطبعا من الجهة الثانيه الاخوان خالد وربيعه جمال يالسين في ستاربكس ...خالد يشم هوا ...(اللي يقول يالس عالبحر ) ..وجمال يتفرج عالبنات
وشاق حلجه من الابتسامات راع بوظبي .. موزه وحصة انقهرن يوم شافوا الغبي لاحقنهم وراز ويهه وياهم في السينما ..(اف يالقهر)
موزه: ماعرف شو اسويبج ؟؟ الغبي لاحقنا .
صدت حصة تطالعه .... واشرتلها موزه انها ما تطالع .
حصة : البسيه خليه يولي
موزه : نحن بنخليه يولي بس هو بيخلينا انولي !
حصة :.............................................
ارتفع الضغط عند موزه يوم شافته ياي ايلس جدامهم وكان بودها انها اتفر الشنطه عاويهه الخسفه ....واللي يقهر زياده انه يالس يبتسم بشكل يا ربي يقهر وياويهه..
الله يغربله ... استغفر الله هذا يتجاشر على عمره بس خله يسوي شي أنا براويه العين الحاره .
وبالفعل الولد اتجاشر على عمره واتجدم بكل وقاحه وحط الرقم على الطاولة جدا حصه ..حصه اتيبست مكانها ما عرفت شو تسوي بس موزه كانت متحلفتله ونشت من كرسيها ورفعت كاس العصير وجبته عاويهه ......
حصه شهقت من الصدمه والولد اتيبس مكانه وموزه انصدمت من الحركة اللي سوتها .المهم إن خالد ومنصور لفت نضرهم الموقف اللي يالس يستوي ... المشكلة أن الموقف ما انتهى هنيه الولد نش وصفعها على ويها هنيه موزه من قوة الصفعه يلست وطبعا دمعت عينها.. وحليلها ما سوت شي علشان ما تكبر السالفه ويتيمعون الناس وتستوي فضيحة ..
خالد : هذا ما يستحي ...
جمال: يمكن أخوها ..؟
خالد : أخوها ويحط الرقم على الطاولة ؟؟!!
جمال: صدقك والله!
خالد : انا بسير أطالع الوضع من قريب وأتفاهم ويا الولد
جمال: أرجوك لا تتدخل ....
خالد ما عطاه ويه....... وسار صوب الولد اللي شل الرقم وحطه في أيد حصة عقب هذا كله
خالد اتقرب من الولد وقاله بصوت رجولي يخوف : يا أخ شو عندك هنيه ؟؟
الولد: نعم ؟؟ وأنت من تكون حضرتك ...لو سمحت لا تتدخل في شي ما يخصك ..
خالد : كيف ما ادخل يالنذل وانا اشوف خواتي ينصفعن...
الولد احترق ويهه وما عرف وين يوديه وحس بتوتر
خالد عطاه بكس على ويهه والولد طبعا ما سوى شي روح بهدوء ( ماله ويه الحبيب اتفشل )
اتقرب جمال من خالد وكانت موزه اتصيح بهدوء وما رفعت راسها اللين الحين لكن في قلبها كانت مستانسه ان هذا الولد الشهم دافع عنها صدق انه ريال ماشاء الله عليه وكانت عايبتنها الحركة انه يسمي عمره أخوها لو كان سعيد أخوها هنيه جان ضربها وما كان بيدافع عنها .
حصه : مشكور اخويه ما قصرت
خالد: مافي داعي تشكريني يا أختي هذا واجب
حصه : والله اني مستحيه منك يااخويه ماعرف كيف أكرمك
خالد : لا أختي ماقصرتي أتمنى اني ماكون أزعجتكم بأي شي
حصه : لا إزعاج ولا شي
خالد : أختي تامرين بشي
حصه : مايامر عليك عدو سلامتك اخويه
خالد : الله يسلمج مع السلامة
حصه : مع السلامة
وروح خالد ويا ربيعه يتمشون وحصه سارت ويا موزه تمسح دموعها في الحمام
جمال: شفتها يا خلوود ؟؟؟؟؟؟؟؟؟؟؟؟؟
خالد : منو؟؟؟؟؟؟؟؟
جمال: اه يا ربي ماحلاتها
خالد : منو يا ريال
جمال: البنت اللي كنت اتكلمها شفت الذوق والاحترام والجمال والدلال .... ولا سمعت صوتها العذب ااه ...مع السلامة اخوي ....مارووم يا ريال لازم اقولها انها حلوه وتخبل واني متخبل عليها ....فديتها والله
خالد : يا ريال استح عاويهك عيب والله عيب
جمال: اني أعجب بوحده عيب ؟؟؟؟؟؟؟؟؟؟؟؟؟؟؟
خالد : أنت هاي البنت ما تعرفها ليش تييب طاريها ؟
جمال: والله يا ريال ماعرف شو اقولك... صدقت بكلامك
خالد.........اننزين انا ربيعتها غامضتني
جمال : هيه ....اقول شو رايك نلحقهم ونعرف وين بيتهم
خالد : لا شو أخاف يلاحظون ويزعلون وبعدين انا اريد اسير وافي سنتر
جمال: آه يا دنيا ظلمتيني
خالد : خلاص صار اللي صار خلهم في حالهم اذا كان لك نصيب فبيكون من حظك
جمال : خلاص شو بقول ....يلا سرينا وافي سنتر
وساروا الشباب وافي... أما موزه دخلتها ربيعتها الحمام تهديها وعقب بالغصب دخلتها السينما لأنها كانت ناويه اترد البيت ... وكانت موزه تحمد ربها إن الناس ما تيمعت وان الولد اللي دافع عنها عرف كيف يهدي المشكلة يلست موزه تدعيله بالخير وحليله يستاهل ... كانت حصه مندمجه بالفلم وموزه اتفكر بالريال اللي دافع عنها كيف اتردله الجميل...؟ وليش هيه يالسه اتفكر فيه بهذي الطريقه..؟ وهي حتى ما شافت شكله .!!
خلص الفيلم اللي ما فهمت منه موزه أي شي لان الريال الغريب شغل بالها ...طلبت موزه انها اترد البيت لكن ربيعتها أصرت انها تتمشى شوي ..
حصه : يلا عاد بسج زعل ونكد خلنا نتمشى هب مصدقه اني خلصت سنه أولى لا تنكدين علي خلينا نتمشى ونشاهد العرب .
موزه : وشو تشوفين فيهم..؟؟! يلا اتاخرنا الساعة تسع الحينه.. سعيد اذا شافني برع البيت ها لوقت بينازعني ..!
حصه : يا هالسعيد مالج بعد لاعت جبدي
ورن تليفون موزه وردت عليه : الو ؟
ام موزه : هلا أمي وين دارج الغالية ؟
موزه : قلتلج أمي بسير ويا حصه السينما .
أم موزه : برايج بنيتيه ...برايج ...جان بسيرين بيتهم بعد
موزه : انزين سعيد ما بيقولي شي
ام موزه : هبابه يقولج شي وانا عاطتنج الإذن .
موزه : خلاص ماعليه مع السلامة
وسكرت موزه التليفون وعطت ربيعتها التفاصيل اللي طلبتها .........
اتخبلت حصه يوم عرفت ان ربيعتها عندها الإذن والتصريح بالخروج ،
ويت على بالها أفكار جهنمية ( يعني أفكار بترفع الضغط حق موزه ) وموزه وحليلها ما عندها خبر بهالافكار ..
اتصلت حصه حق الدريول عبد الواحد ...
حصه : الوو ....عبد الواحد اقوول جيب سيارة جدام باركينج انا الحين سير..
عبد الواحد : ok mama
موزه استانست تتحرى وحليلها انها بترد البيت .....
ركبن البنات السيارة وانصدمت موزه يوم قالت حصوه حق الدريول انه يسير وافي سنتر ........
زعقت موزه زعقه : نعم!! لا أمي رديني البيت
حصه : عبد الواحد ما عليك منها سير سير ابويه وافي .
عبد الواحد : ok mama
حطت حصه ربيعتها في الامر الواقع وساروا وافي.... في الدرب سألت موزه حصه
موزه : حصوه الناقه ؟؟؟ شو لج بوافي بانصاف الليالي
حصه : اريد اطالع الساعات شوبارد إلي نازله توها في السوق عندج مانع ؟؟
موزه : يالله .......من متى قمنا أنسير أنطالع السوع في وافي حدج سوع سوق نايف ويا ويهج ..
حصه: نعم ؟؟؟؟؟؟؟؟انا البس سوع سوق نايف انا أصلا سوق نايف ماعرفه
ضحكت موزه وعقب قالتلها : علينا..؟؟ نسيتي الخلقان مالت سوق نايف اللي عجيتيها عج في الفريج
حصه : شب شب اسكتي ...ولا تراني ما بعشيج
موزه : لا اميه كله ولا يفوتني عشاج اللي يقول بتعشيني في مطعم قصر الهند
حصه : الحيين ممكن تكرميني بسكوتج ؟؟
ضحكت موزه وسكتت لأنها ما بغت تعاشي ويا ربيعتها.. وصلن البنات وافي ونزلن من السيارة ودخلن وافي ودشت حصه محل السوع وطالعت السوع وعيبنها واايد لكنها ما خذتها لانها يايه تلقي نظره بس.. وطلعن البنات من محل السوع وتمشن برغبة حصه طبعا وهن يتمشن شافت موزه الدكتور اللي يدرسهم في الجامعه : شوفي شوفي مستر دونالد ..
حصه : وين
موزه : في الكوفي شوب ويا مرته وعياله
حصه : يلا نسير انسلم
موزه : لا استحي
حصه سحبت موزه غصب وساروا
في الكوفي :
حصه : hi sir ....how are you ?
موزه: hi sir
الدكتور دونالد : hi girls ...how is your vacation
وطبعا لان موزه تستحي ولان حصه فالحه في الإنجليزي أكثر وويها لوح ردت :
wonderful sir we miss you:
ضحك الدكتور لأنه عرف ان حصه يالسه تتمصلح وياه ..وهيه تتحراه مستانس منها
ومن جذبها .!..( وحليلج يا حصه ) ...
خلصوا من السوالف ويا الدكتور وروحن يتمشن وموزه ناجعة من الضحك على حصه لان الدكتور فهم حركاتها ...
تمشن البنات وعقب يلسن في كوفي شوب يشربن شي يا(( الويتر)) وحط المنيو جدامهم وبعد دقيقتين رجع :
-فيني آخذ الطلب ماتموزيل ..؟
حصه اتخبلت ويلست اطالع ويهه: اييه فيك
ومارامت موزه اتيود عمرها من الضحك وضربتها حصه من تحت الطاولة اتسكتها لان اللبناني يالس يترياهم يخلصون
اللبناني : ايه مدام شو بتريدي ؟؟
حصه : اييه ...بدي كابتشينو ازا بتريد ..
اللبناني عيبه ويلس يسولف ويا حصوه
موزه : لو سمحت ابا شاهي من غير شكر
اللبناني : ايه ولوو مدام لأنك سكر ما في لزوم جيبلك سكر ما هيك ؟
موزه : لو سمحت ما يخصك .
اتفشل اللبناني وسار واحترم نفسه ....بعد دقيقتين يابلهم الطلب واحد فلبيني... شكله استحى على ويهه بو دم ثجيل قالت موزه في خاطرها ...
يلسن يسولفن البنات واستوت الساعه10:45 ... سارت حصه أتحاسب وانصدمت يوم شافت الريالين اللي شردوا الريال اللي ازعجهم عرفها جمال واشر حق خالد يطالعها ابتسمت حصه وردت عند موزه اللي كانت توها واقفه ويلستها حصه ...
حصة : شوفي هناك الريالين اللي شردوا هالخايس اللي لحقنا في صحارى
موزه: وين ؟؟؟
واشرتلها حصه بعينها وهم كانوا يالسين يطالعونهم بس بدون ما يوضحون
حصه : يالله شفتي اشحلاته ربيع اللي نازع الولد ...
موزه: أنا شفت الولد علشان اشوف ربيعه ؟؟!!
حصه :- انزين ما يودتج طالعي
رفعت موزه عينها صوب خالد وجمال وشهقت شهقه خفيفه يوم شافت خالد ...وقالت في خاطرها يالله يهبل
لاحظت حصه النظرات وقالت :
:- يا بنت وين سرحتي ؟؟
موزه : ها ....ماشي الغالية
حصه : شفتي شقا يهبل اللي متعصم بو لحيه خفيفه .
موزه : .................................
حصه : اتشوفين الحلو اللي عداله هو عنترج اللي دافع عنج
هنيه موزه رفعت راسها اطالع ..المتعصم ربيعه يعني المتغتر هو عنتر على قولة حصه ما شاء الله عليه ...ويلست موزه اتفكر الين ما انتبهت انه يالس يطالعها ...
واستحت موزه ونزلت راسها بسرعه ..
جمال يلس يناقش موضوع حصه وحظه الحلو لخالد بس خالد كان يفكر بموزه استغرب من عمره هو في حياته ما يلس يفكر ببنيه بهذي الطريقه ..
رن تليفون موزه وطالعت الرقم وكان أخوها سعيد ..ما عرفت شو تسوي اذا ردت بينازعها وإذا ما ردت بعد بينازعها .. تمت محتارة لين ما مطت حصه عنها التليفون وردت
حصه : الو نعم ؟؟
سعيد: ا ( عرف سعيد إنها حصة واستحى يرد )
حصه : الو؟
سعيد: احم احم ... اشحالج حصه ؟
ردت حصه بلهجه جافه : بخير .
سعيد: موزه وياج ؟
حصه : هيه نعم عندك مانع ؟؟؟
سعيد: لا لا بس كنت اتطمن
حصه : اوكي بااي
وقبل حتى ما سعيد يرد سكرت التليفون بويهه
فرت التليفون بويه موزه : اندوج
موزه : خييبه ....حصوه ويا ويهج حرام عليج !
حصه : حرمت عليج عيشتج ..!
موزه : الولد يحبج وشيه اتسوين ؟؟؟
حصه : حبه برص ... خلي حبه حقه ما اباه !
موزه : لازم ما تبينه هذا طرزان جدامج ..
حصه : أي طرزان ؟
موزه : أي طرزان بسم الله عليج ....اقصد اللي جدامج .
حصه : هيه فديته والله
موزه : لين الحين محد يعرف ليش اتضاربتي ويا سعيد حبيبج ....حبيب الطفولة
حصه : روحج قلتيها حبيب الطفولة وهذا من الماضي ...والحين ممكن تغيرين السالفه
موزه : على راحتج ..
وبجذيه شلن البنات عمارهن وطلعن من وافي ونظرات خالد وربيعه ما خلتهم بحالهم
بس خلاص تعبت اذا حابين اتعرفون شو استوى اقروا الجزء الثالث اتمنى ان يكون الجزء الثاني بالمستوى المطلوب مع السلامة .....لا تنسون اقروا الجزء الثالث ..

الجزء الثالث
في السيارة :
موزه : أقوول ...ما عرف كيف نسيت اقولج بس أنا واحد تقدملي اسمه منصور
حصة : مبروك حبيبتي ..تستاهلين
موزه : شو مبروك أنت الثانية بعد ..... هذا منصور ربيع أخويه سعيد ..واللي قاهرني أني شفت صورته في الجريدة اليوم في قسم المعاكسين ..
تمت حصة ناجعه من الضحك وكملت موزه :
ما ادري يا حصة أحس أهلي بيغصبوني عليه
حصة : لا ما اعتقد أهلج يسوونها ما شاء الله عليهم ناس عاقلين مستحيل يسوون هذي الحركة الجاهلة
موزه : ما أدري حسيت من نظرات سعيد إني لازم آخذ هذا المغازلجي
حصه : هاهاهاهاهاهاه......
موزه : أنت في عالم وأنا في عالم مالت عليج
حصه : ماعرف شو اقولج ياخويتيه الله يكون في عونج بس صدقيني لو دريت أن سعيد غصبج عليه يا ويله من سواد ليله
موزه : يعني شو بتسوين ؟
حصه : أي شي بس علشان خاطرج يا حبيبتي
موزه : ارجوج حصه لا تخاطرين
حصه : شب شب ما يخصج أنا اللي بتصرف هب انت
وما جذبت حصه هيه ممكن اتسوي أي شي علشان خاطر ربيعتها من أيام الابتدائية موازي اللي تحبها وايد وعمرها ما بتنسى الأيام اللي كانت تي بيتهم علشان سعيد اخوها كانت تحبه وتموت فيه وخاصة يوم كبرت شوي وفهمت الحب .
بس سعيد ضيع حبهم بيديه وبحركته اللي جرحت قلبها..وهو بعد لين الحين بعده ينزف..وحصه ما بيدها حل لازم تنساه وهي متأكده انها بتنساه مع الأيام مع انهم تفرقوا من سنين وما نست لحظه عاشتها وياه .
وسرحت حصه في ذكريات الطفوله ......
حصه لبشكارة عايلة بو سعيد : ميري ...وين ماما موزه
هزت البشكاره راسها : موزوه مافي هنيه
حصه : وين سارت ؟
ميري : موزوه في سير جامعيه ماما اوشه ويا ..
حصه : متى بتي ؟
ميري : انت شو في قوول ؟
حصة : اييه بلاج ما تفهمين ...متى إيجي ماما موزوه من جاامعيا
ميري : انت سو في سوي مسكره مال انا كلام
حصه : ني.. ني.. قومي أنت خليني اطوف انا هب غريبه ..
ودخلت حصه داخل البيت أتدور دفتر الرياضيات مالها لان موزوه خذته تنقل الواجب وما ردته .. دخلت حصة أتدور الدفتر ..وكانوا ثاني ثانوي هاذيج الأيام في نفس المدرسه ونفس الصف وييلسن حذا بعض وفوق كل هذا ما يشبعن هذربان ...
وكان سعيد توه يااي من الجامعه ودخل حجرة موزه اخته يخبرها ان الوالده تبيها
والمفاجئه ان حصه كانت موجوده في الحجره وعاطيه سعيد ضهرها وكانت الحبيبه يالسه مربعه ريلها اتدور الدفتر وماخذه راحتها ....
المشكله ان سعيد ما ميز بين اخته وحصه وتحراها موزه ويا ويهه يا وسحبها من ايدها الآدميه ووقفها، و لان حصه كانت فاتحه شعرها الطويل الناعم يا شعرها على ويهها وغطاه هيه يوم شافت سعيد انصدمت ...هذا شو يسوي .؟؟؟....سحبت حصه ايدها ورفعت شعرها عن ويها ..وهنيه انشلت حركة سعيد وانصدم وما عرف شو يسوي بس في نفس الوقت سعيد ما غفل عن جمال حصه ...وعرفها وحليله من
سنتين ما شافها من يوم كبرت البنت خشوها عنه وما قام يشوفها يحيد كان يلعب وياها يوم كانوا صغار والبنت كانت ملسونه واايد والحين جمال وطول وشعر ورشاقه بعد ...حصه نزلت راسها لان عيون سعيد كانت زايغه واستحى سعيد لانه فشل البنت وهو... الذكي...ما حب يفوت هذي الفرصه وسألها :
:انت حصه ؟؟
حصه : ..........هزت حصه راسها
سعيد : لا يكون مستحيه مني ....لا تنسين كنا ربع يوم كنا صغاريه نلعب ويا بعض .
حصه : هيه صح ...وسارت حصه تسحب شيلتها وحطتها على راسها
سعيد : أيام ها ....
حست حصه ان سعيد كانت عايبتنه السالفه وما كان المفروض انها اتم واقفه تسمع سخافاته بس هيه كانت مستحيه اتقول شي وبعد لان سعيد ما شاء الله عليه يهبل حبت انها تيلس اتشاهده ... ويلس يخبرها عن سنته الأولى في الجامعه واندمجوا في السوالف والضحك لدرجه انهم يلسوا على الغنفه اللي في حجرت موزه ... وعطاها سعيد رقمه لانه تخبل عليها ولان .....
وشوي وتدخل موزه وهنيه نقزت حصه من مكانها منصدمه .....شو بتفهم ربيعتها
موزه : سعيد ؟؟؟..............حصه؟؟؟؟؟؟؟؟؟؟...شو تسون ؟؟
سعيد ................
حصه :.........................
وطلع سعيد من الحجره بسرعه وهو منزل راسه
موزه : شو كنت اتسوين ويا سعيد ؟؟
حصه :....ماشي ...بس كان يعلمني على الكمبيوتر ترى ابويه اشترالي واحد اليوم
موزه : والله زين زين
وبجذيه نست موزه سالفة حصه وسعيد ... بس حصه وسعيد ما نسوا سالفتهم
وبما ان حصه بنت ابوها وامها الوحيدة... تنفذ طلبها واللي هو "مبايل " ...
وطلبت حصه مبايل علشان تكلم فيه سعيد على راحتها ومرت على علاقتهم سنه ومحد درى عنهم بشي ...وكبر حبهم مع الأيام .
موزه: حصه وين سرحتي
حصه انتبهت لربيعتها اللي كانت تزقرها وصدت صوبها :
حصه : خير الغالية
موزه : بلاج حبيبتي وين سرحتي
حصه : لا لا ماشي بس كنت أفكر
موزه : هيه ...أتفكرين ...استغربت بعد انا منج انج تيلسين هاديه ..يلا عاد انا الحين وصلت البيت .. في أمان الله
حصه : في أمان الكريم ..
***************
دخل خالد البيت واستقبله عند الباب علي و عبد الله عيال أخوه خميس ، شل عبد الله بيد ومسك علي باليد الثانيه .. ولاحظ ان البيت شبه خالي ... طلع برع يدور هله وشافهم متيمعين كلهم برع ..حس خالد ان في شي هب طبيعي مستوي.. سلم ويلس
عايلة العامري كانت كلها موجودة ..أخته ميره و عنود وأخوه منصور وخميس ومرته وأبوه وأمه .
سألهم خالد : شو عندكم ما شاء الله متيمعين ؟؟
ام خالد : شو فيها يعني ما تبانا نتيمع ؟
خالد : لا أمي افا ...فهمتوني غلط ..بس نادرا ما أشوفكم متيمعين لا تقولون ما في سبب
منصور : خلوني انا بقوله
خالد : ها أنت الثاني بعد شو عندك ؟؟
منصور : لو تسمح احترمني انا أخوك العود
خالد : أخويه العود ..على الشو؟؟؟ إلا فرق سنه ..!
منصور: بس بعد تراني أخوك العود... فاهم ؟
خميس : اتعوذوا من الشيطان احسلكم
خالد ومنصور : أعوذ بالله من الشيطان الرجيم
خالد : حضرة الأخ بتقولي ولا لا ؟؟
منصور : احم احم ... اعلنلكم وبكل شرف إني بعرس ..
خالد : هاهاهاهاهاه شوفوا منو ناوي يعرس ؟؟!!!!!!!!!!
منصور : نعم وليش بلاييه انا ولد حلو وسيم هب ناقصني شي والحمد لله وكل البنات يتمنوني ..أنت بس تغار
خالد : هاهاها.. اغار منك يالاهبل ؟؟؟
منصور : ما برد عليك وبحترم نفسي
بو منصور : الي يشوفكم الحين يقول يهال مالروضه ..
خالد : السموحه أبويه ....منصور ..خلاص... خلاص
منصور: أنزين ...
خالد: اقوول .... ومني هاي سعيده الحظ اللي بتاخذها .. وبتغصص عليها حياتها ..
منصور: هه و بعد ..ما برد عليك وبحترم نفسي لأنك .....
خالد : بس بس.... بسير بفك عمري منك ...يلا في داعة الله
وطلع خالد من عندهم ركب سيارته وسار ييلس على بحر الممزر وكان الجو عجيب وكله هوا ما انهم كانوا في بداية الصيف وحمد ربه على هذي النعمه ... كان خالد ولد رومانسي ويحب هاذي الأشياء الرومانسيه والهدوء والطبيعه .. لكنه ما يبين هذا الشيء لأي احد باسم الرجولة ... 10 دقايق ويرن تليفون خالد ويعكر عليه الجو شاف الرقم وكانت هاذي أخته عنود ...
خالد : الو ؟؟
عنود : هلا خلودي ..وين أنت ؟؟
خالد : ما يخصج شو تبين ؟؟
عنود : بسم الله ؟؟؟!!!!! كليتني .... ماشي بس أمي تسألك إذا كنت تبيها تخليلك عشا ؟؟؟ ولا.. لا ...
خالد : لا شكرا ما ابغي
عنود : عفوا ..هاهاها..يلا باي
خالد : بااي ...وكمل خالد اليلسه ...
بعد 15 دقيقه تقريبا وكانت الساعة وحده وشي ...يرن تليفون خالد مره ثانيه بس هاذي المره هب أخته عنود المتصلة ...
شاف خالد الرقم وتأفف ...وقال في خاطره " يا الله ...هب وقته تتصل هاذي بعد يا ويها ..شو تبا الحين " وما كان لخالد إلا انه يرد لان صوت التليفون كان مزعج ...
خالد : الو؟
أمل : الوو؟؟ حبيبي اشحالك ؟؟
خالد وابتسامه زائفه على ويهه : الحمد لله بخير .. وينج من زمان ما اتصلتي
أمل : هاهاها...حبيبي ...أنا اللي ما اتصل والا أنت لا يكون عينك على وحده ثانيه ؟؟هاهاها...
خالد :؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ها لا لا شو تقولين حبيبتي أنا ما احب غيرج ومستحيل قلبي في يوم من الأيام بيحب إنسانه مثل ما حبج ..( ترومون على هذا الصاروخ !!!)
امل : علييه ؟؟ واللي كلمتهم قبلي .. راحوا بلوشي ؟؟
خالد : كانت أيام طيش بس انا من عرفتج عقلت ..حبيبتي صح يمكن قبلج كلمت وايد بنات بس الحين ما في إلا انتي ..( يا ناس الصاروخ على وشك انه ينفجر من سرعته )
امل : هييه...حبيبي ... نسيت أقولك
خالد : قوولي حبيبتي
امل : احبك !
خالد : ............. من قالت امل هذي الكلمه يت على باله البنت اللي شافها اليوم
( اقصد يا حلوين موزه ) وتم يفكر فيها وكان يحس بالقهر من اللي صفعها كيف يتجرأ يمد ايده على هاي ...هاي ..الملاك ...بس فكر في نفس الوقت انه محظوظ لأنه كان قريب منها ولانه لمس ويها ...
امل : خلودي ...هاهاها...حبيبي وين سرحت ...؟
خالد ما انتبه لها وكان بعده يفكر بالعيون الوساع اللي شافها اليوم ...
امل : خالد ؟؟؟؟ لا يكون ذوبتك ؟؟؟؟؟؟؟؟؟هاهاها
خالد : ها؟؟
امل : وين سرحت حبيبي ؟؟
خالد : لا لا ما شي سلامتج
امل : انزين ما جاوبتني على اللي قلته
خالد : ها؟؟ هيه ..خلاص موافق على راحتج
امل : أنت شو يالس اتقول ؟؟ انا أقولك احبك.. وأنت تقولي موافق على الشو ؟؟
(وهنيه الحبيبه امل حرجت وانقهرت من برود خالد وحست انه هب طبيعي )
خالد : امل اقولج برمسج بعد ساعة ..بتتريني
امل : اكييد شو هذا السؤال بعد
خالد : اوكي ...مع السلامه
امل : باي
وكمل خالد يلسته على البحر وفي هذي اليلسه شلت تفكيره البنت الغريبه (موزه).
وبعد ساعة رجع خالد البيت ومن التعب رقد ونسى يكلم امووله( حبيبته).. هه ..
والحبيبه سهرت تترياه على أعصابها وطبعا اتصلتله بس الحبيب كان حاط مبايله على السايلنت ..:..( تستاهل هاهاها )
المشكلة إن خالد بيحصل هزبه منها وما نعرف لين الحين شو بتكون النتايج ...هاهاها بس انا اعرف النتيجه ..تبون تعرفون ؟؟؟ اقروا الجزء الرابع والسموحه إذا طولت ويالكم ....مع تحيات الكاتبة .....

مرحبا...شخباركم؟؟ انا الحين بنزل الجزء الرابع ..بس بصراحة انا وايد زعلانة منكم ..لاني ماشفت تفاعل منكم لاتعليقات ولا انتقادات .اخاف القصة مب عايبتنكم بس..المهم انا بنزل الجزء الرابع واتنمى منكم انكم تتكرمون يالطيبين وتعطوني رايكم لان رايكم يهمني ويشجعني وبعد اتمنى اني اشوف تفاعل منكم وزيادة في عدد القراء ..واسمحولي اذا طولت ..وهذا هوه الجزء الرابع..
الجزء الرابع
اليوم الجمعة نشوا الشباب ..خالد ، منصور، وخميس والابو عادل ...يسيرون يصلون صلاة الجمعة في المسيد ...وهناك شافوا ابو سعيد وسعيد اللي هو اخو موزه خطيبة منصور ولد عادل ..
سلموا الرياييل على بعض وسوالف تييب سوالف .......... وتي فكره عجيبة في راس بو سعيد :
أبو سعيد : يا بو خميس تفضل واتغدى عندنا في ضيافتنا ..
بو خميس(عادل ) : لا يا بوك .... ما تقصر هب حابين نثقل عليك .
بو سعيد : افا يا بو خميس ما كنت أتوقع اسمع منك هذا الكلام الحين انا زعلت ولازم اتراضيني ..
بو خميس : السموحه يا حبيبي ...كيف اقدر أراضيك؟
بو سعيد : بسيطة ............تقبل الدعوة وتي تتغدى عندي وارضى عليك
ضحك ابو خميس وعياله وياه ووافقوا اييون بيت هل العروس يتغدون عندهم ..
في بيت بو سعيد..:
سعيد : ان شاء الله عيبكم الغدى؟؟...و سامحونا على غدانا البسيط..
خميس : الحمد لله عيبنا وما قصرتوا عساها نعمه دايمه
الكل : آمين .......
استأذن سعيد وطلع من الميلس عنهم وكان ساير عند أخته موزه ياخذ ردها بالنسبة للزواج من منصور .. وطبعا سعيد كان يبي الموافقة ومستحيل يقبل الرفض ..
دخل سعيد حجرة موزه بعد ما دق الباب
سعيد : اشحالج موزه ؟
موزه: الحمد لله بخير .. خير ان شاء الله شو يايبنك هنيه
سعيد : يعني ممنوع اخو يدخل حجرة أخته
موزه : لا هب هذا قصدي ...بس دخلتك غريبة وملامحك أتقول ان عندك موضوع
سعيد : هيه .......أنت ما جذبتي ..عندي موضوع ......
موزه : خير
سعيد : خير ...خير ...انا بس حبيت آخذ ردج بالنسبه لموضوع الزواج من منصور
موزه : لا
سعيد : شو لا بعد ؟؟؟؟؟؟؟؟
موزه : لا يعني هب موافقة على الزواج منه
سعيد : وش عنه ؟؟
موزه : شو بلاك أنت تي البارحة أتخبرني انه يباني واليوم تبا الرد خلني أفكر
سعيد : ولين متى بتيلسين أتفكرين أنت؟
موزه : بيلس أفكر لين ما اقتنع بالاجابه يا سعيد ...وبعدين لا تنسى هذا زواج هب لعبه ..
سعيد : شو هاي الفلسفة ...ايه أنت لا تفشليني جدام الريايل .. تراه منصور يتحراج موافقة ... تبين اتفشليني وتقولين لا ...
موزه : هيه ...اقدر هذا مستقبلي ..انا هب لازم أوافق علشان أرضيك وما أفشلك جدام الريايل .. وتراه هذا منصور هب كفو ريال
سعيد : جب جب .. هبابج يالخايسه ..! لا تطلعين رمسه على الريال الطيب .
موزه : اييه شو هذا الريال اللي ايي يخطب ويطلب الرد اليوم الثاني ؟!
سعيد : أصلا هو مرمسني من 3 أسابيع وأنا الحين بعطيه الرد .
موزه وهيه تحس إنها بتنفجر من القهر :وشو بتقوله ؟؟؟
سعيد : هه .........أكيد موافقة
موزه طلعت تركض عند أمها تخبرها ان سعيد بيجبرها على منصور بس سعيد قبضها من ايدها قبل ما توصل عند أمها .. ولأنها ذكيه استخدمت سلاح ثاني وهو الصراخ ويت أمها تربع
ام سعيد : غربل الله عدوك يا سعيدوه شو يالس اتسوي باختك ؟
سعيد : ما اسوي شي بس يالس اادبها
ام سعيد : ليش شو سوت ؟؟
سعيد : بنتج لازم اتوافق على الزواج
هنيه ام سعيد ما عرفت شو تقول طالعت سعيد وبنتها محتاره ويا منو توقف .. شوي وتقول لبنتها موزه :
موزه غناتي اسمعي .... ليش ما تفكرين بالموضوع
انصدمت موزه صدمه كبيرة من موقف أمها ..أمها طول حياتها كانت واقفة وياها بس ليش الحين تخلت عنها ..أو هذا اللي حسته موزه وما قدرت أتقول إلا:
خلاص يا أمي ...إذا أنت راضيه ..أكيد انا بكون راضيه ( وطبعا مثل ما هو واضح موزه ما قالت هذا الشيء من خاطرها ) ..
خلصت موزه كلامها وسارت حجرتها بسرعة علشان محد يشوف دموعها ....
سار سعيد الميلس وهو فرحان لان كلمته بتضل كلمت ريايل واللي كان خايف منه انها تسوي ضرابه في البيت وترفض الزواج نهائيا وييلس ابوه يدافع عنها ... وطبعا
يسير عند ربيعه منصور ويقوله ان البنت ما وافقت .. بس طبعا انتوا تدرون ان هذا الشيء ما بيستوي لان موزه ما حبت انها تزعل أمها وترفض ودام ان الأم تشوف ان منصور بيكون مناسب ..هو بيكون مناسب لها ..
في الميلس :
كان سعيد يالس حذا منصور وشوي ويعلن ان موزه وافقت وانهم يقدرون يملجون في أي وقت يبونه ...
وتخبل منصور ويلس يسولف ويا الشباب هب مصدق انه بيعرس ( الريال ما ينلام البنت حلوه وهو مغازلجي معروف و أخلاقه عكس أخلاق أخوه خميس )
.....موزه كانت أتصيح وسبحان الله حست ربيعتها حصة فيها واتصلت لها تسألها عن حالها وسمعت صوتها المبحوح وعرفت ان ربيعتها اتصيح وسكرت موزه التليفون، لبست عباتها، وشيلتها على راسها ويت بيت يرانهم اللي هم هل موزه .. ضربت حصه الجرس بس محد فتح الباب ..".هذيلا ليش هب راضين يفتحون الباب تراني مت من الحر "
اتصلت حصه لموزه تطلب منها انها تفتح باب الحوي ..وأول ما سكرت حصه التليفون انفتح الباب وكان سعيد ... وتحول ويهها من الويه القلق للويه المكشر ..طبعا سعيد كانت حالته حاله مستانس ان أخته بتعرس وانه شاف الحلوة حصه اللي يحبها واقفه جدامه ...
سعيد : هلا حصه .... اشحالج ؟
حصه : بخير ...اف ما في غيرك يفتح الباب هني في هذا البيت
سعيد : لا في بس ليش ما تبيني افتح الباب ؟؟ أتخافين علي من ضربت الشمس في هذا الوقت ؟؟
حصه : مالت عليك .. أي ضربت شمس اتصيبك انت ..انت إلا واقف من دقيقتين هنيه وخايف من ضربت الشمس وأنا شو اقول ..؟ وحليلي خايسه هنيه من الصبح !!
ضحك سعيد عليها
حصه : سعيد شكلك هب طبيعي اليوم بلاك ؟؟
سعيد : لا ماشي بس مستانس ... أختي بتعرس
حصه : أي أخت ؟؟؟؟
سعيد : شو أي أخت ؟؟؟؟؟؟؟؟؟ موزه ربيعتج ...أختي ..أختي ..بلاج
حصه: نعم ؟؟؟؟؟؟؟؟؟؟؟؟؟؟؟؟؟!!!!!!!!!!!!!!!
سعيد : خيبه ...بلاج أميه بسم الله
حصه : شو أتعرس بعد ؟؟ ليش ومن متى ؟ هي قالتلي البارحة انها هب موافقه كيف غيرت راايها ؟؟
وهنيه سعيد ما قدر يجاوبها هب علشان شي لا تخافون ترا ويهه لوح .. السبب هو ان موزه وصلت ..خذت موزه ربيعتها ودخلتها الحجره وفتحتلها الخريطة واشتكت من الوضع اللي هيه فيه ، وحليله موزه تعاطفت وياها وايد ... وغمضتها دموع موزه الصديقة والأخت والحبيبه مستحيل هذا يكون مصيرها وهي طبعا بادور على حل وبأي طريقه ... بعد ما هدتها شوي استأذنت منها علشان أترد البيت لأنها وعدت أمها انها ما بتتأخر .. وصلت موزه حصه عند الباب وشافت سيارتين واقفه عند باب الحوي ...رنج و نيسان اليديد .. وما كانت هذي سياير البيت ..منو ممكن يكون عندنا هذا الوقت هيه لايمت الباب بس شافت حد يفجه في ويها ... فردت على ورا .. بس هب من الباب بس من الصدمه .....لان القدر مستحيل يكون بجانبها والحظ مستحيل يلعب دوره في هذي الحياه بهذي الطريقه ... والصدفة ...معقولة الصدفة اتسوي هذا الشي ؟؟؟؟ هاي الحاله اللي عاشتها موزه في ثواني سببها ان القدر جمعها بالشخص اللي في بالها ... عنتر على قولة حصه ... وهذا الشخص اللي يلست أتفكر فيه واايد البارحة .. بس هو شو يسوي في بيتهم ؟؟؟ لا يكون لحقني البارحة ... هذا شو يبا داخل البيت علينا جذي ؟؟
ابتسم الريال(خالد) في ويهها وسار الميلس ... خالد كان في سيارته اييب تليفونه وشاف طبعا مس كولات من أمل بس ما اهتم ... بس كل شي في هذا الدنيا الحلوة خلته يشوف الانسانه اللي عيبته البارحة واللي دافع عنها ( فديتها تستاهل ) يلس خالد يفكر ... عيل هي من هذا البيت ....... هذا من حظي بهذي الطريقه اقدر اوصللها بالحلال ... ام يا سعيد طلعت هااي القمر أختك .. المشروع القبل بيكون أني آي اخطبها .. وهذا اللي خلا خالد يسرح في عالم ثاني بعيد عن المكان اللي نحن عايشين فيه ...( ترا خالد لحد الحين ما حط في باله ان موزه خطيبة أخوه )
خميس : خالد ؟؟ خالد ؟
خالد انتبه .. وشاف ان الوقت مر وهم لازم يرجعون البيت ..ورجعوا .
موزه خذاها التفكير في خالد اللي شافته في بيتها ... سعيد قال ان منصور وهله كانوا عندهم يتغدون يوم سألته ...يعني هذا الولد يستوي لمنصور .." لازم يكون أخوه أو ولد عمه شي من هذا القبيل" ...قالت موزه.
خالد ركب النيسان ماله وسار ييلس في الكوفي اللي في مركز البستان واول ما استراح على الكرسي رن التليفون ..وكانت طبعا أمل ...
خالد : الو ..
أمل : الوو ..؟خالد ؟
خالد : هلا والله بالطش والرش والماي ورد اللي في الغرش
أمل : ههه..شو هذا الاسستقبال البارحه ما ترد علي ما تريد تكلمني والحين ..ما عرف شو يالس اتقولي اونك عاد
خالد : شو اوني؟؟ ..........سوري حبيبتي بس أنا انشغلت البارحه وايد ..ربيعي ياني الفليل يبا أغراض وسرت وياه وعابلنا وكانت حالتنا حاله ويوم رجعت كنت ياي اتصلج بس ما كان في رصيد وبغيت اطلب من البقاله بس كانت امبنده أتعرفين الفجر واتصلت حق راع الكافتيريا بس قال انه ما بييب لانه مافي سيارة قالي إذا تبي بطاقة تعال روحك خذها ( صاروخ الحبيب كان في سابع نومه )
أمل : وليش ما سرت الكافتيريا ولا سيارتك ما فيها بترول بعد ؟؟؟ ( حطته في موقف يستاهل )
خالد : ها؟؟ مايا على بالي سوري حبيبتي انت تعرفين إني كنت تعبان
أمل : ام ...انزين خلاص هذا كله علشان احبك
خالد : شو هذا ؟
أمل : بسامحك !
خالد : هيه ..........فديت ر وحج والله
أمل :لا ..لا ..فديت روحك انت
خالد : ..................
أمل: خالد ؟؟؟ وياي انت ؟
خالد : ها ؟؟هيه هيه وياج حبيبتي
أمل : شو تسوي ؟
خالد : ما شي يالس أطالع المنيو ...لحظه شوي ...excuse me iwant one iced tea please .... yes ...ok
أمل : خلودي اقول حبيبي أبا أشوفك ..
خالد : هيه حتى انا
أمل: صدق ؟!
خالد : هيه بس انا وايد مشغول حاليا وما اقدر اشوفج
أمل: إلي يبي الصلاة ما تفوته
خالد : ......اقولج اتصلي بي ...ولا اقولج بتصلج بعد شوي
أمل : اوكي باي
خالد : باي
وكمل خالد" الآيس تي" ماله، وياه ربيعه جمال ييلس وياه في الكوفي وسولفوا ورجع كل واحد بيته بعد ساعة ونص واتفقوا انهم يسيرون السينما مع بعض ويشوفون فيلم نيكول كيدمان اليديد ..

ولاتنسون عطوني رايكم فهالجزء.. لان رايكم يهمني..
الجزء الخامس
موزه كانت يالسه في الصالة اللي تحت ويا أمها وكانت تحس بالقهر وما اتهنت بالمسلسل المكسيكي " روزاليندا " وما عرفت شو استوى بينها وبين فرناندو ها كله لأنها يلست تسمع أمها شو تقول حق أم منصور ... وفهمت إنهم بيقربون عندهم يشوفون العروس الخميس الياي .. شو تسوي تشرد ولا تنتحر ..استغفر الله ... تعوذت موزه من الشيطان ودخلت حجرتها أول ما سكرت أمها التليفون من أم منصور وقالتلها إنهم بييون وما بغت تسمع أكثر .
في حجرتها يلست موزه تفكر ... ليش هي ما تقبل حظها وتشوف كيف ممكن أتكون حياتها مع منصور .. يمكن بيعقل عقب الزواج .. بس الريال اللي شافته في صحارى واللي شافته في بيتها اليوم الثاني .. هو ...لا لا مستحيل شلت موزه كل الأفكار اللي في راسها ويلست تحاول تقنع نفسها بمنصور لان مافي غير هالحل .. ولا بتعيش وياه حياة تعيسه طول عمرها .. وهيه إذا خذته تقدر تغيره .. هالأفكار كلها مرت في راس موزه ومارست على اجابه ...توافق عليه في قلبها وترضى ولا لا ؟؟ ..
ولا اتم رافضتنه طول عمرها ..
سمعت موزه دق على باب حجرتها وقامت تسير تفتحه لان أمها عند الباب
موزه : نورت الحجرة .. خير أمايه في شي ؟
أم موزه : لا غناتي بس حبيت ارمسج في موضوع
موزه : اتفضلي أميه ...قولي شو عندج..
وخذتها موزه تيلسها على غنفتها وتسولف وياها وتعرف قصد هذي الزيارة رغم إنها تعرف شو السالفة في قلبها وعن أي موضوع بتتكلم أمها ...
أم موزه بعد مالفت ودارت في الكلام ..
- يا بنتي ...شو اللي يخليج ترفضين منصور مع انه ولد طيب وما عليه كلام.ولا قصور ...هذا ولد خليفه العامري
- انزين يا أميه انتي كيف اتقوليلي إن هذا ولد خليفة العامري أنا بتزوج أبوه ولا قبيلته ؟؟.. أنا تراني بنت سيف الفلاسي وبلاني بعد ؟؟
أم موزه:والنعم يا بنيتي ...اسمعيني إذا انت هب مقتنعة..انتي يوم بتاخذين الريال وبتتعودين على تصرفاته بترضين واضمن لج انج بتحبينه وبتحطينه في عيونج
موزه : أنا أحط هذا المغازلجي في عيوني ؟؟؟واحبه بعد؟؟ أميه تراني كنت كل يوم أشوفه موقف عند باب الجامعة يطالع البنيات .. والله ما يستحي ومرمس نص بنات الجامعة وقاص عليهم .. وفوق كل هذا شفت صورته في الجريدة في قسم المعاكسين ...
ام موزه : شوي شوي على الريال ... المفروض انج تكونين عاقلة وتفكرين ..تراهم كل الريايل شرات بعض يلعبون يوم يشبعون يعرسون ... ومنصور هب غير عنهم .
موزه : ......... بس أنا ما شفت حركات على أخوه خميس ما شالله عليه سمعت عنه كلام طيب ويرفع الراس ..
ام موزه : هيه ما شاء الله عليه ريال بس شو اقولج تراه هب سهل بعد ..
موزه : شو قصدج ؟؟
ام موزه : ترى مرته كانت حبيبته قبل لا ياخذها.!
موزه : حبهم أكيد كان نظيف وحقيقي .
ام موزه : اللي أنا اقصده إن هو بعد مر بمغامرات عاطفية مثله مثل غيره وابوج بعد أيام الشباب واخوج سعيد بس هو يتحراني ما اعرف عنه شي اللوتي بس أنا ما في شي ينخش عني كم مره يلس حذالي يرمس وحده وما يدري إن لغبها واصل عندي
موزه : هاهاهاهاها.... والله يا أمي انج سوالف بعد.
ام موزه : هيه يا حبيبتي بس محد يطيع ييلس وياي ويسمع .
موزه : هيه والله فوتنا على عمارنا شي فضيع وسوالف ما تنمل ..
ام موزه : شفتي عاد ...بس حبيت اقولج باختصار إن الولد شكله طيب و حاولي تقتنعين من قلبج .
موزه : إن شاء الله
ام موزه : تراني أبا أشوف عيالج ..
موزه : وسعيد ؟؟
ام موزه : لا تخافين عليه بييه الدور هو بعد .
موزه : ههه .... بسير اخبره .
ام موزه : خبريه ... أنا الحين بسير ميلس الحريم وبسولف وياهم وبتقهوى وبرد.
موزه : الله يحفظج
كلام ام موزه خلاها تتأثر أكثر وخلاها تفكر بطريقه جديه .. وتطلع ايجابيات الزواج من منصور .... وطبعا حصلت ايجابيات لكن السلبيات كانت موجودة لكنها في النهاية وافقت وقررت إنها أتخبر سعيد يوم بيرد البيت ... وأمها بعد لأنها متأكدة إنهم بيفرحون ........وبالنسبة للولد الغريب ( عنتر ) مثل ما سمته
بتنساه .... اقصد بتحاول إنها تنساه ... لأنه أول غريب ياخذ عقلها......... وقلبها
اتصلت حصة بربيعتها وخبرتها إنها تباها ضروري ...وسارت موزه تبدل ملابسها علشان أتسير بيت ربيعتها حصة ... خلصت موزة .. شلت تليفونها وطلعت عند باب الحوي شافت الخدامه إذا تذكرون ميري .. يايه من برع شكلها سارت تعق الزباله في الدرام الكبير زعقت عليها موزه :
ميري ....
ميري : شو؟ انتي شو تبي ؟؟
موزه :...لا تعالي اضربيني بعد..بشاكير اخر الزمن.. سيري سكري مكيف الحجرة لأني نسيت اسكره وإذا يت ماما قوليلها إني بيت حصة ...اوكي
ميري هزت راسها وهذا يعني إنها وافقت على التنفيذ ام راسين ..
سكرت موزه باب الحوي وشافت جدامها نيسان بترول اليديد وما كانت السيارة غريبه ..وهذي هب سيارة هل حصة ....يلست تذكر...هيه هاي السيارة اللي شفتها يوم شفت" عنتر" عند باب الحوي ...اه فديته والله
وقفت موزه من الصدمة يوم شافته داخل السيارة وسيارته بدون مخفي وهي أصلا ما بغت اطالع منو فيها لو ماحست بنظرات تلاحقها .. " هذا شو يبغي ؟"
نزلت عينها من المستحى بس ما رامت اتيود ابتسامتها ..الخجولة ...
( والله لو يعرف إنها أتسميه عنتر جان ما وقف عند باب بيتهم ولا حتى من بعد شبرين )
دشت موزه بيت حصة وحمدت ربها إن بيتهم هب أبعيد وبس يبعد كمن خطوه ..
سلمت موزه على حصة وقالتلها إنها شافت عنتر البارحة واليوم وطبعا عطتها التفصيل الممل
حصة : وما شفتي طرزان ؟؟!!!
موزه : أي طرزان أنا أحيده عايش في الغابة ويا القردة
حصة وهي ماده البوز شبر: ههه ..لا تضحكين .. عبلوه انت تعرفين منو اقصد؟؟؟
موزه : منو؟؟( وطبعا موزه كانت تستعبط علشان تقهر ربيعتها )
حصة : اه منج ...ربيعه الحلو
موزه : هيه لا ما شفته
حصة : اف حضي نحس
موزه : اقول
حصة : قولي
موزه : شو السالفة الضرورية اللي قلتيلي آي بيتج علشانها
حصة : أي سالفة ؟ ....هيه كنت أقص عليج علشان تيين بسرعه
موزه : مالت عليج
ويلسن البنات يدردشن وطبعا دشن الشات وسولفوا ويالعرب ..
أما خالد اللي كان برع يتريا يلمح طيف موزه اتصلت به أمل بس ما رد عليها عمدا ..وشوي يتصل جمال .. ورد خالد
خالد : الو ؟
جمال : الو ؟ وين دارك؟؟
خالد : خير ان شاء الله
جمال : ايه ..وياويهك يالخاين ما قلت بنسير السينما اليوم
خالد : اوف ...يالله نسيت ما عرف كيف ما يا على بالي
جمال : لازم حبيبي شي شاغلنك
خالد : هيه وبخبرك ونحن طالعين من السينما
جمال : اوكي يلا تعال اترياك في جراند
خالد : اوكي خلاص أنا في الدرب اترياني في الكوفي اللي تحت اوكي
جمال : اوكي مع السلامة
خالد : مع السلامة
*************
سار خالد عند جمال في جراند وخبراه بالتفاصيل اللي صارت البارحة واليوم ( اللي اقصده الموقف اللي شاف فيه موزه وإنها من أهل البيت اللي بيخطب من عندهم أخوه منصور ويت في بال جمال سوسه وحب انه يقولها لربيعه
جمال : بس ما يا على بالك إن البنت اللي بيخطبها أخوك هي نفسها البنت اللي شفتها في صحارى ؟
خالد تم مندهش .......ليش هذي الفكرة ما يت على باله أبدا .. حمد ربه إن ربيعه نبهه ... لازم يسأل أهله عن البنت اللي بياخذها منصور من بيت سيف الفلاسي
خاف وايد من هاذي الفكرة لدرجه انه ما اتهنى بالفلم وما كان في خاطره يسير ييلس على بحر الممزر ويا ربعه يوم عزموه اعتذر ورد البيت يفكر في موزه البنت اللي في خاطره بس ...على الأقل يعرف اسمها ..اسمها بس ... لازم يعرف أخوه منو بياخذ من هاذاك البيت ... طالع خالد الساعة وكانت 12:30 تقريبا ...اتململ وطلع من فراشه لان النوم طار من عينه ....( ما ينلام الريال ... يالس يفكر فيها )
وسار يدور على أمه ناوي يسألها عن البنت اللي بياخذها منصور وما كان يهمه شو اللي بيي في بال امه يوم بيسألها عن هالشي في هالوقت المتأخر ... وسار خالد عند امه و شافها اتصلي قيام الليل ويلس يترياها لين ما تخلص وخلصت الأم واستغربت من يلست خالد في هالوقت عندها
خالد : أمي بسالج سؤال
ام خالد : خير إن شالله
خالد : كم بنت في بيت سيف الفلاسي ؟
ام خالد : ليش السؤال ؟؟
خالد : بتجاوبيني ؟؟
أم خالد : هم أصلا ثلاث بنات وبنتين منهن عرسن وحده بجت اللي خطيبة منصور .
هنيه حس خالد إن ريله بتنشل بس حب انه ما يفقد الأمل وسألها
: انزين في حد عايش وياهم ...مثلا بنات عمهم أو خالهم
أم خالد : ليش تسال حيرتني... في شي ؟
خالد : لا ...لا ...أميه جاوبيني
أم خالد : ما عرف ...ما عرف ...بسير الهم يوم الخميس وبطالع .
خالد : انزين خبريني كل شي بتعرفينه ..
وطلع خالد من حجرة أمه بس الأم ما ارتاحت وعرفت انه في شي هب طبيعي مستوي ..أو ولدها خالد هب صاحي ..
خالد كان بينفجر من الغيظ والأفكار ذبحته والتساؤلات والأشياء الغريبة اللي يت في باله ....هي البنت الوحيدة لا يكون بياخذها منصور؟ وإذا طلعت هي اللي بياخذها منصور شو بيسوي ؟ لكنه تم محتفظ بخيط الأمل لحد ما يعرف كل شي يوم الخميس.
******************
يوم الخميس :
عدلت موزه عمرها ( يعني كشخت.. وحطت مكياج ...الخ ..الخ ) واتخبلوا هل المعرس عليها ..صح إن شعرها مب طويل لكنه حلو ...وجمال رباني ..ورشاقه واخلاق ..ودين ..يعني بالنسبه لام منصور ( المعرس ) الوصفة والمقادير تناسب اهل البيت في العروس .
ويلسوا يرمسون الحريم ويلست وياهم ....العروس .... اللقب اللي لازم تبدأ موزه من اليوم تتعود تسمعه . وبالفعل تكرر على مسامعها وايد ... واستحت العروس .
خالد في البيت يتريا أمه على نار علشان يعرف الاجابه ... إذا كان في بنات غيرالبنت اللي فخاطره في بيت سيف الفلاسي .. ومنو اللي بياخذها منصور ..
حددوا هل المعرس والعروس يوم الملجه اللي بتكون بعد 3 أسابيع تقريبا ..
وبعد ما تعشوا عندهم روحوا العوامر بيتهم وخالد واقف عند باب الحوي وحليله من أسبوع ما رقد عدل وهو يفكر ... البنت هاذي بيسير يخطبها إذا ما كانت من نصيب منصور.
والصدمة كانت انه مافي بنت غيرها في البيت لا بنت عم ولا بنت خال ..ولا هم يحزنون .... مافي إلا موزه .
أنصدم خالد وايد وهذا الشيء خلاه حزيين ما ياكل ولا ينام ... بس يفكر بالبنت المجهولة اللي حباها وتمناها ..واللي بتكون من نصيب أخوه . ومحد عرف شو سبب الحال اللي هو فيه خالد ... وما قام يرد على اتصالات أمل لأنه مب متفيج لسخافاتها .. وحتى جمال ما طلع وياه ولا كلماه بالتليفون.. يعني باختصار يا ناس الولد حكر نفسه بعيد عن العالم من الحزن .
أكيد بتستغربون ليش يسوي هذا الشكل لبنت ما يعرف حتى اسمها .... هذا كله لأنه حباها ... ومن أول نظره واسرته ...لكن خبر زواجها حزنه لدرجه إن الريال اللي نسى شكل الدموع ..دمعت عينه من الخسارة اللي حس فيها .
ومر يومين على أحزان خالد ...وموزه اقتنعت بزواج منصور لأنها بنت مغلوبة ومافي حل غير انها توافق .
الأحد ...الظهر ...على الغدى .. عايلة العامري متيمعه على الغدى وأخيرا فرحوا إنهم شافوا خالد اللي عازل نفسه من يومين عن الناس والحين ظهر من حجرته علشان يتغدى وياهم ... فرحت أمه اللي ما كانت أتعرف سبب زعل ولدها .. مب بس الأم كل حد في البيت ...والناس اللي يحبونه بعد .
على طاولة الاكل :
منصور مندمج ياكل ..خميس ياكل بهدوء وما يخصه بالعالم ومرته تأكل عياله ...وميره وعنود يالسات ياكلن ويهذربن ...أما خالد ما دخل لقمه في حلجه لأنه منقهر يالس يشوف أخوه مستانس يا كل وهو ميت قهر ويالس يقطع عمره من داخل .. وأم منصور وأبوه ياكلون ويناقشون موضوع البشاكير ومعاشاتهم ...
ميره أخت خالد الصغيرة وعمرها 12 سنه سالت خالد :
- خالد ؟؟ ليش ما تاكل ؟؟
خالد طالعها بنظرات أتقولها من غير ما ينطق ( جب ما يخصج يالفضوليه ) والأخت فهمت والحمد لله وردت :
- اميه ..بسم الله ...ما يخصني ياريتني ما سالت ..عوذ بالله
خالد : ممكن تاكلين وأنت ساده لغبج ؟
هزت راسها وكلت بسرعه وروحت وبعدين لحقتها العنود اللي هي الأخت الثانية وعمرها 15 سنه وخذت وياها عيال خميس أتذاكر لهم قبل ما يطالعون spacetoon. تعرفهم إذا ما ذاكرت لهم قبل التلفزيون ما بيقومون يذاكرون وبيلزقون مجابلينه .
كان المفروض خالد ينش يسير حجرته لكنه يلس يسمع الموضوع اللي فتحه منصور ويا هله .. وكان يسأل عفرا مرت خميس عن موزه .. لان عفرا كانت تدرس في جامعة زايد وسمعت عن موزه من ربيعاتها اللي في الجامعة وكانت تخبر منصور عنها ... الفرحة الوحيدة اللي دشت قلب خالد هي ..انه سمع كلام طيب عنها ....واخيرا عرف اسمها ..موزه ...الله .. ويلس يكرره في قلبه ..موزه ...موزه ...موزه ....الخ .
هنيه منصور فج حلجه وقاطع تفكير خالد
منصور : خلوود...؟ شو رايك أميه أتدور لك حرمه ونعرس رباعه ؟
خالد : جب ...جب ... يالخايس ما يخصك فيني ...
منصور : خيبه !!!
يوم هدا الوضع شويه
منصور : أميه .... الغالية فديتج أبا أشوف موزة..
خالد كان يفور في قلبه بس محد حس بالقهر اللي هو فيه لأنهم منشغلين بفرحة منصور ....
ام منصور : بتشوفها إن شاء الله ولا يهمك الغالي ...بس انت اتريا اشويه لين يوم الملجه ..
خالد في خاطره ..." هاذيلا جادين وايد يعني هب اطنازه ؟؟ اه يالقهر ضاعت مني البنت "
ام خالد : وليدي ....ليش ما توافق على فكرة منصور ؟
خالد : ها؟؟ أي فكره ؟
ام خالد : مسرعك إلا نسيت؟ ..أنكم تعرسون رباعه .
خالد : لا..لا..لا.. ... ماابا أعرس ..( وقف خالد ) أميه لو تسمحين لا تدورين لي على حرمه لأني ما بعرس .
ودخل خالد حجرته وصك على عمره الباب ويلس ياكل عمره من القهر .... وموزه من الصوب الثاني كانت اتسولف ويا حصة على التليفون ... وطبعا مستانسه ..وخالد حالته حاله .... ما بقول إن موزه هب حالتها حاله لكنها امبينه للناس إنها طبيعية...موافقتها من عقلها بس مب من قلبها ...
هذا هوه الجزء الخامس وهذا اللي صار فيه..شو تتوقعون بيصير فالجزء السادس؟؟منصور بياخذ موزة؟؟وشو سالفة حصة ويا سعيد وشو اللي كان امبينهم ..؟اذا تبون تعرفون كل هذا اقروا الجزء السادس مع تحياتي ..

بليز لاتطولي الغيبة تراني متشوقة اعرف النهاية
وخلي الردود بعد اكتمال القصة عشان ماتتقطع!!

يعطيك العافيه اختي
وانا مع اختي سكون الليل
لاتتأخري علينا حتى لانفقد الترابط
شكرا لك
تحياتي

عزيزتي
في المشاعرض
أرجو منك تنزيل الأجزاء بسرعة
لان القصة تبيخ
إذا طالت الأجزاء
وعلى فكرة ممكن تنزلي قصة
لحمران النواظر الصراحة عليها قصص جنان
وللمعلومية أنا قرأت
قمر وخالد و ولد العم ونظرة حب
فاأتمنى تكون غيرها
ومشكورة

مرحبا اشحالكم الغالين...عساكم طيبين ..السموحة لاني طولت عليكم ومشكورين كل اللي يالسين ينتظرون الجزء اليديد..ان شالله يعجبكم..وان شالله اكون عند حسن ظنكم..
الجزء السادس
بعد أسبوع ......
اتصلت حصة حق موزه اتقوللها إنها تبا أتسير الجمعية ... والزبده تعالي يا موزه ويايه الجمعية ....
وطبعا موزه ما تروم أتقول حق ربيعتها لا ... أتحيد يوم تبا أتسير وياها امكان من غير نقاش تتلبس وتي بسيارتها بعد اللي يسوقها دريولهم عبد الواحد بعد .... استأذنت من أمها وكان سعيد يالس وياها وأول ما قالت إنها بتسير الجمعية بغى يفج حلجه ويعترض لكنها الذكية حطت اسم حصة على طول ..وطبعا النتيجة إن الأخ سعيد الفلاسي ما رفض ... ووافق وعرض انه يوصلهم بسيارته بعد لكن العرض ما كان جدام الأم ...( وحليلك يا سعيد )
والأخت موزه ما وافقت لان الحبيبة حصة بتمر بسيارتها ........... وسارن البنات الجمعية وهناك كانت المفاجئة :
دخلن حصة و موزه الجمعية وكل وحدة شلتلها سلة و أتمشوا بين الرفوف يحطن اللي يبنه ... ومنو شافوا هناك ..؟؟
الأخ منصور خطيب موزه ... موزه أول ما انتبهت قالت لحصة إنها شافته والفكرة الجهنمية اللي يت في بال موزه إنهن يتغشن ويشوفن شو بيسوي الأخ منصور ...؟!!!( أصلا حتى لو ما اتغشن منصور ما بيميزهن ) ..
وكان الحوار اللي امبينهم :
موزه : حصووه ..شوفي منو هناك
حصة : منو؟؟ لا يكون سعيد اخوج لحقنا ؟
موزه : جان زين لو أخويه سعيد ... لا حبيبتي هذا منصور العامري .. خطيبي
حصة : وين ..؟ وين ...أبا اشوفه
موزه : عن اللقافة اصبري اشويه خل نتغشى ونشوف شو بيسوي ..
حصة : هيه والله فكرة عجيبة
تغشن البنات وكملو " الشوبينج " في الجمعية وشوي وتزيغ عين الأخ منصور .. شي اسود يمشي ... عباه وشيله ... ما أخليهن في حالهن ..
بس منصور فكر شوي وراجع نفسه ... " أنا ملجتي بعد أسبوع شلي أبهن ؟؟ لا لا ... خلها أتكون آخر مرة يا منصور " ( قص عليك الشيطان يا منصور ) ..
وبالفعل لحقهن وتمت موزه ميته من القهر ... شو اتسويبه ؟؟
منصور يا وقف جدامهم بعد ما لحقهم ويأس ...
منصور : هلا والله بالحلوين .
موزه انفجرت من القهر وما قالت شي .. صدت وسحبت حصة وياها وسارن يخلصن أغراضهن ...
منصور : افا يا بنات عطونا ويه ..( شكله مصر يضايجهن )
موزه وحصة تمن ساكتات ويمشن ولا جنه حد وراهن ..
منصور : ما عليه انتي بس اتصلي على 44....666......
موزه : صدق انك ما تستحي يا منصور
منصور : أنا ما .......تعالي أنت كيف عرفتي اسمي ؟؟
حصة : يالاهبل لأنها خطيبتك .
منصور ما تتصورون كيف كان موقفه وما عرف وين يودي ويهه .. الله يعين بتفضحني جدام هلي ...
موزه لحصة : خلنا أنسير أنحاسب
وخلن البنات منصور واقف منبهت باللي صار
حاسبن وطلعن من الجمعية ...
في السيارة بدت التعليقات وحصة طبعا هي اللي بدت لأنها أم اللسانين ولان موزه من القهر اللي هيه فيه ما رامت ترمس صدق انه ما يستحي .".أنا ما صدقت أوافق عليه ايي يغازل في الجمعية بعد ..؟ " ...(.الحين بس يحلم إن موزه تفكر إنها أتوافق على منصور )
حصة :صدق أنه ما يستحي !
موزه : ......................( وكانت تنتفض من الغيظ)
حصة : موزوه ..لا يكون أتفكرين انج تاخذينه ؟
موزه : يخسي ويهبي الخايس
حصة : لازم أتكلمين هلج على اللي صار
موزه دمعت عينها : .....شو اقولج يا حصة كلمتهم ولا ما كلمتهم ما تفرق عندهم .. هذا سعيد أخويه راسه يابس ومصر إني آخذ منصور العامري ..
حصة : مالت عليه من ريال هب كفو
موزه ما رامت أتقول شي لأنها كانت أتصيح ..
حصة أتقطع قلبها على ربيعتها موزه ويلست أتفكر بحل يمنع زواج موزه من منصور ...
وصلت موزه البيت واستغربت إن حصة تنزل وياها .". يلا عادي نيلس انسولف بعد وش عليه "... بس غريبة إن حصة خلت الدريول يترياها مع إن بيتهم يبعد كمن خطوه والدريول بعد ما بند السيارة شكلها بتيلس دقيقتين وبتروح
حصة : موزه ... اقدر اكلم اخوج سعيد شويه ؟؟
موزه : سعيد ؟؟؟ ليش ؟؟
حصة في موضوع بيني وبينه أبا اكلمه فيه .
موزه: أنزين تعالي داخل مب حلوة تكلمينه برع ما أبا حد يشوفكم
حصة دخلت ويا موزه داخل وعقت موزه عباتها وشيلتها وسارت تزقر أخوها سعيد .... خمس دقايق تقريبا وينفتح باب الحجرة ..
حصة : ما تروم أتدق الباب ؟
سعيد وهو شاق ويهه من الابتسامة: أوه ...سوري ..بس ما صدقت يوم قالت لي موزه انج تبين تكلميني في موضوع
حصة : هيه في موضوع ... اللي هو .. سعيد ..أنت .. ما عرف شو أقولك ؟.. أنا
سعيد : خير إن شاء الله ما عليه الغالية خذي راحتج وقوليلي
حصة : شوف أنا ما بلف وأدور بكل اختصار أنا ما أباك أتزوج موزه من منصور
سعيد : هه ... وليش يا عيني ؟
حصة : أنا هب قاعدة اتطنز .
سعيد : ادري ..بس لازم في سبب
حصة : مليون سبب
سعيد : عطيني الأسباب المقنعة لو تسمحين ..
حصة : أولا اربيعتي ما تباه والزواج منه بيكون مصيبة وهيه إذا وافقت بتحفر قبرها بيدها ..
سعيد : و ثانيا ؟
حصة : اليوم لحقني أنا وموزه في الجمعية ورقمنا بعد ..
هنيه لون سعيد اتغير اشوي لكنه واضح انه ما حب ان هذا الشيء يبين لحصة بس حصة كانت تعرفه عدل .. وتعرف إنها أحرجته .
سعيد : لا ...
حصة : شو لا؟
سعيد : يعني ما وافقت على إن موزه ما تاخذ منصور..لأنها بتاخذه وهيه تضحك.
حصة رفعت صوتها من الانفعال : أنت ليش شيه اتسوي بأختك هيه هب يالسه على راسك .
سعيد احمرت عينه ( حرج الريال ) وحصة توترت وخافت من ردت فعله .. وكان ميود عمره لان اللي جدامه حصة ولا كانت بتكون ردت فعله مختلفة ... بعد ما هدا شوي
سعيد : وإذا أنا وافقت مثلا شو بكسب من هذي الصفقة ؟
حصة : مصلحة أختك.
سعيد : مصلحة أختي في زواجها
حصة قالت من غير ما تفكر:شو رايك تتزوجني ..بس الشرط انك ماتخلي موزة تاخذ منصور؟
وحطت حصة ايدها على فمها وندمت على اللي قالته بس بعد حصة حبت أتشوف النتيجة
سعيد كان منصدم بعد.. أخيرا وافقت حصة ..
سعيد : بتتزوجيني..؟ إذا على جيه ...خلاص أنا موافق إن موزه ماتاخذ منصور.
( ما صدق الريال ) .
حست حصة الشامسي إنها في ورطه كبيرة بس نجحت في إنها تمنع منصور من تزويج موزه على حسابها وموزه تستاهل لأنها كفو صديقة ...
سعيد : خلاص يا حصة اللي تبينه بيستوي وأنا اليوم بكلم أهلي علشان يكلمون اهلج وباجر بني أنخطب .
حصة : خيبه .....ليش مستعيل كله عندك حار بحار
سعيد : يعني متى تبينا أنعرس مثلا ؟
حصة : أنا هب يالسه اتطنز ..
سعيد : أنزين جاوبي علي....
حصة : بعد ثلاث ...أربع ...أو خمس شهور .
سعيد : هيه ...أتصدقين حتى أنا بكلم منصور في الموضوع بعد ثلاث ....أربع ...أو خمس شهور .
حصة : ها ؟؟؟؟ لا لا شو هذا بعد .....أف خلاص يا ريال كلم هلك اليوم وتعالوا باجر أتقدموا واللي ناقص بعد إني املج هذا الأسبوع .
سعيد : ومنو قال غير هذا ؟
حصة : لا حرام عليك سعيد .
سعيد حرج وقاللها : شوفي إذا بتضحين علشان خاطر موزه خلي التضحية كاملة .
حصة انبهتت وما رامت أتقول شي وطلع سعيد من الحجرة .
موزه دخلت الحجرة من بعد سعيد وحليلها كانت تترياهم في الصالة ومن حسن الحظ محد كان هناك
موزه : حصة شو عندج ويا سعيد ؟
حصة ما رامت أتقول شي وطلعت من حجرة موزه وسارت تركب السيارة وردت البيت وتمت موزه مستغربه سعيد طالع محرج من حجرتها وربيعتها أتصيح شو عندهم ؟؟ وخلوا موزه محتارة .. اتصلت موزه بربيعتها بس كانت حصة غالقه مبايلها .. ودقت على سعيد الباب بس ما فتحلها ... وتعجبت منهم موزه وما رامت أتقول شي غير إن الله يهديهم .
سعيد كان هب مصدق أي شي صار في العشر دقايق اللي طافوا ..." أخيرا حصة وافقت على الزواج مني " . كانوا أهم عشر دقايق في حياته لأنها بتغير حياته وبتحقق حلمه اللي بدا يكبر فيه من يوم عرف حصة وخاصة يوم شافها وهي كبيرة يلس يتذكر الموقف اللي حصل وكيف كانت علاقتهم والطريقة اللي كانت أتكلم فيه سعيد نص الليالي .." فديتها والله " ( ما عرف أي عالم وصل الحين الله يعينه في حبه )
بس سعيد اتضايج يوم أتذكر الموضوع اللي خلاهم ينفصلون .. وكان من سنة تقريبا
... كان سعيد يالس حذال أمه يرمس حصة على أساس إنها ربيعه .. وكانت أمه في نفس الوقت ترمس أختها ( خالة سعيد ) والعيوز يالسه تتفق ويا أختها إنهم ايوزون سعيد من بنت خالته وطبعا سعيد ما كان منتبه لأنه في عالم ثاني مع حبيبته حصة .
وخلصت الأم من التليفون واتفقوا ووقعوا على كل شي .... وسعيد خلص من حصة بس ما شبع من سوالفها ..
أم سعيد : سعيدان ...؟
سعيد : آمري فديتج ..؟
أم سعيد : توني كنت أتناقش ويا خالتك سلامة عن موضوعك ..
سعيد : وش عنه يايبين طارييه عيايز آخر الزمن ؟؟( قالها بطريقة طنازة ويا أمه )
أم سعيد : عيايز آخر الزمن يبن ايوزنك.
سعيد : ايوزني ؟؟؟ ومني سعيدة الحظ؟
أم سعيد : بنت خالتك خولة
سعيد : خولة ؟
أم سعيد : هيه خولة بنت مزيونه وش حلاتها ... ما شاء الله عليها السنة بتخلص الثانوية العامة ( يعني من سن حصة )
سعيد : ............ما عرف شو اقولج يا أميه بعدني صغير على الزواج .
أم سعيد : عمرك عشرين سنة ما شاء الله عليك ريال وبعدين نحن يالسين أنحجز البنية وعقب ثلاث سنوات أو أربع عرس .
وانتهى الحوار مع الأم وسار سعيد حجرته ما يعرف شو يسوي هو يحب أمه بس ما يبا يزعلها والبنت اللي يحبها هي حصة ... يلس سعيد يفكر وايد .. وبعد نص ساعة اتصلت حصة
حصة : الو ؟ سعودي حبيبي
سعيد ابتسم لأنه سمع صوتها الناعم يحرك فيه أشياء وايده
سعيد : هلا حبيبتي ...
حصة : اهلين ... اشتقتلك وايد
سعيد : حتى أنا ...
حصة : بلاك حبيبي ..؟ صوتك متغير فيه شي ؟؟
سعيد :..................................
حصة : حبيبي سعيد قولي شو فيه ؟
سعيد خذ نفس كبير وقرر انه يقول حق حصة لأنه ما كان يحب يخش عنها شي ويصير اللي يصير ..
حصة سمعت كل شي بكل هدوء ..وبعد ما خلص سعيد طلبت رايها في الموضوع
سعيد : ما ادري يا حصة ؟
حصة : كيف ما تدري ؟
سعيد : أنا باخذها لأني ما أحب إني ازعل أمي ..بس أنا يا حصة اح...
قاطعته حصة : بس ...بس خلاص .. عرفت اللي أباه يا سعيد
سعيد : حصة ؟؟ أنا
بس سعيد ما سمع غير صوت الخط مقطوع........ ويلس محتار ما حب إن حصة تزعل .. وكلم موزه وقالها عن العلاقة اللي كانت بينه وبين حصة وطلب منها إنها تجمع امبينهم .. وكلمت موزه حصة اللي كانت حالتها حالة ..
حصة : وين الحب وين وعوده كلها طارت في الهوا في الدقيقة اللي سمع من أمه إنها بتخطبله .. اخوج سعيد هذا ما صدق أمه تحصله وحده علشان ياخذها وطبعا ما بيرفض لأنه ما يبا ياخذ وحده كانت ترمسه بالتليفون .. وهنيه انهارت حصة ويلست أتصيح على حبيبها اللي باعها بسهولة .. وحاولت موزه إنها أتهديها لكنها ما رامت قلب حصة كان متقطع .. وموزه كانت تشفق عليها .. وأخوها سعيد ما رحم قلب ربيعتها الحساس .. مسكينة ( والله ما تستاهلين يا حبيبتي حصة )
وموزه يوم واست ربيعتها وخلصت ردت البيت ونازعت سعيد وأول مرة موزه أتشوف سعيد بهذي الحالة لا يتكلم ولا ياكل وموزه تمت محتارة امبينهم أسعيد كان يحس بالذنب وحصة مجروحة ..وموزه محتارة في صف أي واحد منهم توقف سعيد أخوها وحصة ربيعتها الروح بالروح ..
ومرت الأيام وقربت امتحانات الثانوية العامة نجحت موزه ويابت حصة دور ثاني في الرياضيات والجغرافيا .. ما لامتها موزه لأنها شغلت نفسها أتفكر في سعيد .. وهذا شي بسيط من اللي صار لحصة يوم انفصلت عن سعيد .. كانت دايما حابسه عمرها في الحجرة ويا كثر الأيام اللي غابتها عن المدرسة و ما كانت تاكل وخسرت 9 كيلو جرام هي روحها ضعيفة وهذا زادها زيادة .. وعاشت حالة اكتئاب .. موزه وايد زعلت من ربيعتها لكنها ما أتخلت عنها أبدا ...وياما عاتبتها على اللي اتسويه بعمرها
وكم مرة حاولت إنها أتخليها أتكلم سعيد لكنها كانت عنيدة أم راس يابس وما بغت هذا الشي ..
وبالنسبة لزواج سعيد من خولة بنت خالته سلامة .. اتغير راي خالته سلامة لان ولد عمها أتقدم لها ووافق الابو عليه وبجذي ما خذ سعيد خولة وياهي فرحة له ولحصة وموزه بعد ... وحاول سعيد في كل فرصة يشوف فيها حصة بالصدفة انه يقولها لكنها ما كانت تعطيه ويه وطرش موزه تقوللها انه ما بياخذ خولة وكان رد حصة
: طبعا ما بياخذها لأنها بتاخذ غيره مب لأنه قال حق أمه انه مايباها .. موزه لا تيبيلي طاري سعيد ولا ما بيي بيتج مرة ثانية .
( وهذي كانت السالفة اللي فرقت حصة عن سعيد وخلت حصة ما تشتهي سعيد )
وهذي نهاية الجزء السادس أتمنى انه أعجبكم واتريوا الجزء السابع لأنه حلو .. وعد مني ..

الجزء السابع
بعد ما خذت الذكريات سعيد وسرح بافكاره سار على طول يكلم أمه في موضوع زواجه من حصة حبيبته الغالية اللي ردت الفرحة لقلبه..إذا أتزوج من حصة بيكون اسعد إنسان في العالم .
سعيد سار عند أمه في الحوش ييلس وياها ويكلمها في الموضوع ..
سعيد : امايه حبيبتي اشحالج ؟؟ وباسها على راسها .
أم سعيد : هلا بولدي حبيبي ..شو تبا ؟
سعيد : ما شاء الله عليج يا أم سعيد تعرفين إن ولدج عنده شي ..
أم سعيد : هيه نعم لان هذي أول مرة تي تيلس وياي في الحوي
سعيد :ههه... أنزين ...قبل ما أدش في الموضوع وينه أبويه ؟
أم سعيد : أبوك سار ويا الدريول سوق السمج اييبلنا سمج البيت خالي يا ولدي وأنت تعرف ..أباك اتوديني الجمعية عقب المغرب .
سعيد : إن شاء الله من هاا العين قبل ها العين .. ما تامرين الغالية ...بس الحين ممكن أدش في الموضوع يا ست الحبايب .
أم سعيد : تفضل هات اللي عندك .
سعيد : فديتج والله ... أمي أنا بعرس واباج أتسيرين اتخطبيلي باجر عند العرب
أم سعيد :..تعرس؟؟! هذي الساعة المباركة بس مني هذي اللي بتاخذها .
سعيد : سعيدة الحظ ... حصة .. حصة الشامسي ربيعة موزه ..
أم سعيد : خوش ابنيه يا سعيد ... إن شاء الله .
سعيد : فديتج يا أحلى أم في العالم
أم سعيد : يالله هذا كله علشان حصة
سعيد ضحك واستانس و شغل سيارته وطلع من البيت ما كان يتوقع إن أمه بتوافق بهذي السهولة لكن ظنه كان مب في محله ..
ما عرف سعيد وين يسير وتم محتار .. يلس يفكر شوية وعقب تفكير قرر انه يسير السيتي و يتصل حق منصور ايي ييلس وياه ويسولفون ونسى ان امه تباه يوديها الجمعية... وبالنسبة للموضوع اللي طلبت حصة من سعيد انه ينفذه واللي هو يعتذر من منصور وما يقبله ريل لأخته ..أجله سعيد لوقت ثاني
منصور ما صدق العزيمة أتلبس وطلع وسار السيتي سنتر .. وطبعا بو ويهين ما استحى وفكر إن موزه يمكن أتكون مخبره سعيد عن الحركة اللي سواها منصور في الجمعية ..
وصل منصور السيتي سنتر ويلس يتذكر الأيام اللي كان يواعد فيها في السيتي "والله أيام ولا بتعود " .
سعيد كان يتريا منصور في ستاربكس اللي في دبنهامز وأول ما وصل منصور يلس شوي وسار يطلبله فربتشينو بالكاكاو . منصور يرن تليفونه ويطلع خالد أخوه
منصور : ها خلوود ؟
خالد : وينك ؟
منصور : في السيتي ليش ؟
خالد : في السيتي ؟ شو هالصدفة ؟!..أنا بعد هنيه توني طالع من السينما جمال عازمني وحليله ..
منصور : لازم وحليله قاص على الريال تراك ..لحظة شوي بحاسب ..دفع منصور عن الفربتشينو وسار يلس ويا سعيد اللي كان يالس يشرب قهوته .. الو خلوود ؟
خالد : وياك ..وياك
منصور : ما شي يلا باي
خالد : خيبه ...الناس أتقول مع السلامة ..فامان الله ..الله يحفظك ...في داعة الله ..شو باي بعد أتحسب عمرك اونك أمريكي ؟
منصور : مع السلامة ..وسكر الخط .
يلسوا الشباب يسولفون اللي اقصدهم منصور وسعيد .. ودشوا السينما وطبعا خبر سعيد منصور انه بيعرس بما انه صديقه العزيز .. وفرح له منصور ..والحين نرجع لخالد وجمال اللي يلسوا في " كوستا " كوفي شوب بعد ما طلعوا من السينما .. وحضروا نفس الفلم اللي حضره منصور ويا سعيد .
خالد : ما اعرف شو أقولك كيف بتحمل أشوفها كل يوم جدام عيني يوم بتغدي مرت أخويه ..كيف بتصرف ؟
جمال : لازم ترضى بالواقع وتنساها ..مثلي يعني أنا كل يوم أتخبل على بنت وأقول لا ما يخصني أبيها واليوم الثاني أسوي نفس الشكل مع بنية ثانية .
خالد : أنت تتحراني مثلك . لا ياخويه هذي البنت ما عرف شو سوت فيني ؟
جمال : شوف ..إذا مكتوبه لك بتاخذها وإذا لا ....ما بتاخذها يمكن بتحب مرتك أكثر .. أصلا أنت يوم بتعرس وبتشوف حرمة جدام عينك بتنساها في لحظة وبتعيش حياتك في سعادة وهناء مثل ما يقولون .
خالد : أنت أهبل ..... يوم بتعرف معنى الحب ما بتقول هذا الكلام
جمال : ما روم على اللي يحبون
وبالفعل خالد حب موزه ...
الحب مشكلة فظيعة بتجرح الشخص اللي يحب إذا كان من طرف واحد. وهذا اللي حس فيه خالد لأنه مب متأكد من حب موزه أو بالاحرى ما عنده فكرة إذا كانت هذي البنت تفكر فيه حتى ..
مب بس خالد على هذا الحال ...كل شخص يحب من طرف واحد والثاني ما يحس باللي يحس فيه ولا يدري بالليالي اللي يتعذب فيها ويسهر أو الناس اللي قاطعهم وأشغاله اللي تراكمت .. و.. ,و... بس لأنه حب هذا الشخص.
وخلنا الحين نرجع للأحداث ...
زقرت أم حصة بنتها أتكلمها ... لبست حصة شيلتها وطلعت تشوف أمها شو تبا منها ..
حصة : أميه شو عندج ؟
أم حصة : وعليكم السلام ...
حصة : السموحة الغالية ...السلام عليكم ..
وردت الأم على السلام..
حصة : خير ؟
أم حصة : أنا بدش في الموضوع على طول ..ترا سعيد الفلاسي اخو موزه يبا ياخذج.
حصة استعبطت..:سعيد؟!!...يبا ياخذني انا؟؟ أنت شو رايج ؟
أم حصة : الحين هم ياين يبوني أنا ولا أنت ؟.
حصة : إذا انتوا وافقتوا أنا بوافق
أم حصة : أنا كلمت ابوج ونحن ما عدنا مانع الريال ما يعيبه شي .
حصة :...م... خلاص يا أميه على جذي أنا موافقة
حصة استغربت وايد ما توقعت هي الثانية إن أمها توافق يعني ردت فعلها مثل ردت فعل أم سعيد اللي وافقت على طول على حصة .. يعني أتغيرت الخطط لأنها أتوقعت إن أمها ما بتوافق بما إنها وحيدتها ... وخلاص بتضطر إنها تتعود على فكرة إن سعيد بيكون زوج المستقبل .
***************
اليوم الثاني بالفعل سار سعيد ويا أمه وأبوه يخطبون حصة رسمي .. ويا فرحت سعيد لأنهم وافقوا .. وحددوا الملجه اللي بتكون بالخميس وأما الخميس اللي بعده بتكون ملجة موزه من منصور .. وبنشوف إذا سعيد بيلغيها ولا لا ..
ورجع سعيد البيت وهو فرحان استغربت موزه من حال أخوها سعيد أول مرة أتشوفه جذي ...يلا.. الله يسعده إن شاء الله ..زواج المحبين جذي يكون عيل ...يا حلاته
بس موزه ما غفلت عن موضوع إن حصة بعد رفضها لسعيد وكرها له إن تقبل الزواج به وليش اجتمعت بسعيد وطلبت إنها أتكلمه في بيتهم ؟؟
ويا على بالها منصور أف منه ... وبعدها الحركة اللي سواها البارحة في الجمعية تقهرها بس ما كان بيدها حل ..ويا على بالها " عنتر " اللي كان موجود يوم يا
منصور يتغدى عندهم ويا أبوه وأخوه خميس وهي الين الحين بودها إنها أتعرف شو يستوي لمنصور .
احتارت موزه ... يالله ليش أفكر فيه الحين وهو أكيد عايش في عالم ثاني ما يخصه فيني ... وانا أفكر فيه ..احسلي أخليه في حاله الريال وما يخصني فيه .
يوم الأربعاء :
مرت حصة على موزه علشان أتسير صالون فلورا تتحنى ... وشافوا في الصالون مرت خميس عفرا وعرفتها موزه لأنها كانت ويا أم منصور يوم يو الحريم يوم الخميس اللي طاف عندهم، سلموا البنات على عفرا ويلسن وياها يسولفن بما إن الصالون كان مزدحم يلسن يترين الدور ويسولفن ويا عفرا :
عفرا : شو عندكن يايات هنيه ؟
موزه : ترا ملجة ربيعتي باجر .. واتصلت أمي أبكم البارحة تعزمكم ما خبرتج أم منصور ؟
عفرا : هيه خبرتني ... ما يا على بالي ...هيه وانتن يايات تتحنن هنيه
موزه وحصة : هيه ..
عفرا : وأنت يا موزه بتتحنين ؟
موزه : هيه ...ليش؟
عفرا : ترا ملجتج الأسبوع الياي وما بيروح الحنا من ايدج لين الأسبوع الياي ...واللي اقصده هو إن أحسن اتأجلين الحنا لين الأسبوع الياي أو أتسوين شي خفيف علشان خاطر ربيعتج .
موزه : هيه ... قلتلها ..بس هيه أصرت إني أتحنى
عفرا : هيه وحليلها .
حصة زقرتها المحنية وسارت .. ويلست موزه اتسولف ويا عفرا ..
موزه جربت اتلف وتدور علشان أتعرف شو يقرب عنتر لمنصور ..
موزه : منصور وخميس هم عيال خليفة العامري الوحيدين ؟
عفرا : لا .. عندهم بنتين عنود وميره ..وولد اسمه خالد اصغر من منصور بسنة تقريبا .
موزه " يعني اسمه خالد ..بس لحظة..خالد يطلع اخو منصور؟؟؟وهنيه كانت صدمة موزة ويلست تفكر..ااه يادنيا .معقولة صغيرة لهادرجة يطلع الريال اللي حبيته اخو خطيبي؟؟.. ويلست موزه تكرره في خاطرها اسم خالد ..وسرحت لبيعيد لين ماسألتها عفرا..
عفرا : موزه ؟ فصلتي لج فستان حق الملجه ؟
موزه : .ها؟؟..لا..بعدني.. باخذلي جاهز
عفرا : بتاخذيلج ..؟ أنت شو يالسه تتريين مفروض يكون فستانج معلق في الكبت ألحينه
موزه : إذا حصة اللي بتعرس باجر ما خذت لها أنا آخذ ؟!
عفرا : ما عليج منها وبعدين ربيعتج متى بتاخذ لها فستان ؟
موزه : اليوم المغرب بنسير وياها الغرير بندور لها على فستان
عفرا : هيه.. زين.. زين .
واتحنت حصة وعقبها موزه بس كان حناها خفيف وايد وعقب ردن البيت قشن الحنة ويلسن ويا بعض لين ما أذن المغرب ...صلن وسارن الغرير .
وهناك لفن المحلات ايدورن فستان حق حصة .. وآخر شي حصلت حصة فستان سماوي ناعم بكل اختصار حلو ويناسبها .
وهم رادين في السيارة ..
موزة:حصة اتصدقين؟
حصة:شو؟
موزة:تذكرين عنتر ؟
حصة:هيه بلاه؟؟انتي بعدج تفكرين فيه؟
موزة:لا مب جي...بس تعرفين منو طلع؟
حصة:ها؟؟منو؟؟
موزة:طلع اخو منصور خطيبي...
حصة:ها؟؟احلفي...موزوة ماصدق..لا لا مستحيل..
موزة:والله يا حصة..انا انصدمت مثلج ويمكن اكثر..ماعرف شو اقولج..
يوم الملجه سارن البنات ( موزه وحصة ) صالون منى علشان اتسويلهم شعرهم ومكياجهم ..
وخلصن الساعة سبع المغرب تقريبا يلست موزه ويا حصة في حجرتها وحصة كانت خايفة ومترددة ..
والأخ المعرس سعيد بيطير من الفرح وهو مب مصدق عمره ابد ... ويلس يسلم على هله اللي يو يسلمون عليه وكان أبوه ومنصور ربيعه وياه .. وبعد ساعة استوى سعيد ريل حصه على سنة الله ورسوله وطبعا لازم يخلون المعرس يشوف عروسته دخل سعيد على حصة وكانت موزه يالسه ويا حصة.. ودخلت أم حصة ويا سعيد وفي أيديها المدخن .. طلعت موزه وبعدها أم حصة وخلوا حصة ويا ريلها سعيد ...
كانت حصة ميته من المستحى .. وسعيد كان يطالعها من فوق لين تحت جنه أول مره يشوفها
حصة : سعيد ؟
سعيد : عيون سعيد ..
حصة : لو تسمح لا تطالعني بهذي الطريقة الهمجية اللي يقول طول عمرك عايش في الغابة .
سعيد : هاهاهاها...والله إن دمج خفيف
حصة : كلمت منصور ؟؟
سعيد ضاعت ابتسامته بين ملامح ويهه ...كيف ما يا على باله هذا الشي وهم بيملجون الأسبوع الياي ..
حصة : سعيد ؟؟؟ ما جاوبتني
سعيد : ها؟؟ لا
حصة : شو لا ؟
سعيد : أنا آسف حبيبتي ما يا هذا الشي على بالي أبدا
حصة حرجت وما عرفت شو اتسوي بسعيد
سعيد : خلاص حبيبتي ولا تزعلين بكلمه باجر
حصة : احسلك يا ....سعيد
ابتسم سعيد في ويهها عقب حط سعيد أيده على شعرها واتغيرت ملامحه
سعيد : حصوه ؟
حصة : نعم ...؟
سعيد : وين اختفى شعرج ؟
حصة حطت أيدها على شعرها تتحسسه واستغربت من سؤال سعيد
حصة : سعيد بلاك...؟ شعري على راسي .
سعيد : أنت حاطه باروكة ؟
حصة :سعيد ؟
سعيد : أنا أحيده شعرج طويل ...وينه ذاك الشعر
حصة : خبرك عتيج يا سعيد ....... شعري من زمان قاصتنه .
سعيد : ليش .؟؟؟ حرام عليج .
حصة : لا مب حرام .....شو أسوي لاعت جبدي .
سعيد: أنا أخاف جبدج تلوع مني بعد .!
حصة قالت من غير ما تفكر : مستحيل ..
سعيد ابتسم وما صدق وحصة ندمت على اللي قالته
سعيد : صدق ؟ يعني بعدج تحبيني ؟
حصة : ..........................
سعيد : عادي حبيبتي ..لا تجاوبيني لأني اعرف الجواب .
وعقب دخلت أم حصة وياها أم سعيد وموزه ويلسوا يسولفون وشويه وروح سعيد علشان يباركوله الريايل ...
وبجذي أتكون هذي ملجة حصة وبتيلس حصة تتريا مصير ربيعتها .. يلست حصة تضحك يوم اتصلت فيها موزه علشان اتقوللها إن سعيد يبا يكلمها ...
حصة : آآآآآآآآسفه ..ما أبا
موزه : فات الأوان يا حبيبتي ... لان ربيعتج الذكية عطت ريلج رقمج ..
حصة : افف منج يا موزوه ..
موزه : اقبلي بالأمر الواقع
حصة : أمري على الله
موزه : هاهاها....قصيت عليج أنا ما عطيت سعيد الرقم بس الحين بسير يلا مع السلامة وسكرت موزه الخط وربعت عند سعيد تعطيه الرقم.
( أكيد بتقولون إن سعيد يعرف الرقم لأنه كان يرمسها بس حصة غيرت الرقم )
ويالله استانس سعيد .. ما كلم حصة بس طرشلها مسج لأنه ما حب انه يزعجها في هذا الوقت المتأخر وكان المسج "بهديك قلبي بس دير بالك عليه ...بس مب علشان هو قلبي ..علشان أنت فيه "
وفرحت حصة من هذا المسج وما طرشت لسعيد مسج وكانت تتعمد هذا الشي لأنها أتعرف انه بينقهر ..وبالفعل أنقهر وحليلك يا سعيد ..
وبتتشوفون اللي بيصير في الجزء الثامن إن شاء الله إذا تابعتوا القصة
مع تحياتي ....