قصتي عجيبة حاولت أتزوج بكل الطرق لكن

1. صباحكم رحمة وعبادة . وجمعتكم مباركة بإذن الله


2. وقتله ترى يا شيخ هذا كله صار بعد ما تقدملي تراني ما أعرفه من قبل


3. وسكت بعدها وما نطقت بكلمة.

السلام عليكم ورحمة الله وبركاته

صباحكم رحمة وعبادة . وجمعتكم مباركة بإذن الله

تعرفت على منتدى الفراشة النسائي بالصدفة لما كنت أبحث عن قصص وتجمعات للمتفائلات من البنات . فسلجت فيه وترددت كثر أني أكتب موضوعي .
بس قبل ما أكتبه أحب أقولكم رغم اني وضعي صعب وقاسي جدا ً لكن سبحان الله وبحمده عندي صبر كصبر الجبال ما يهزه ريح . عندي تفائل ولله الحمد كأني يوم زواجي تحدد وهذا كله راجع لفضل الله تعال . ما عندي دموع خلاص دموعي جفت (بكل ما تحمله الكلمة من معني).
قصتي بإختصار أنا بنت عمري 29 سنه جامعية . وموظفة وعندي أختين وأخين . وعايشة مع الوالدة . طبعاً أخواني كل واحد شاف طريقة وبدأ حياته واستقر . انا في البيت الكل في الكل خواتي معتمدين علي اعتماد كلي في كل شي وأمي أكثر صرت أنا الأب والأخ . ما في موضوع يصير غير لازم قصة أمل ترتبه وتظبط لهم . وكنت سعيدة لاني أخدم أهلي وأبر أمي .
حياتي كانت سريعة شوي بعد ما تخرجت من الجامعة بعد أخر امتحان وقبل حفلة التخرج اشتغلت في وظيفة حكومية . وايقاع الحياة كان سريع لكن عاطفة الأمومة بداخلي كبيرة وكنت أشوف صديقاتي من أيام الثانوية ينخطبون ويتملكون ويتزوجون . ما أكذب عليكم يا بنات أنا كنت حاسه اني نصيبي راح يتأخر ما أدري دايما أحاول أطرد هذي الفكرة من راسي بس سبحان الله أحس رب العاليمن له حكمة في ذلك يمكن على شان أكون مستعده للأيام القادمة , وطعباً كأي بنت كنت وايد أتحسس لما أروح الاعراس وحفلات الملكة والزواج . وقضيت سنوات من حياتي في بكاء غير طبيعي وانا نايمة وانا اسوق وأنا أشتغل. لكن بعد كان عندي أمل كبير جدا جدا اني في يوم من الايام بلبس الفستان الأبيض وبتزوج وبيكون عندي طفل لكن المشكلة اني امي من النوع الغير اجتماعي مافي حد يعرفنا أبداً غير بس الجيران والناس القريبة منا ولو انحطت في موقف مع الحريم وكانت جالسة معاهم ما تعرف تثبت حضورها وتتكلم يعني خجولة وانظوائية . وللأمانة كل السنوات الي طافت ما كنت قريبة من ربي فقط أصلي الصلوات المفروضة وأقرأ القراءة لحد ما جت سنة 2007 حسيت فعلا اني لازم أساعد نفسي شوي في موضوع الزواج . جربت كل شي ممكن تتخيلونه الخطابات , مواقع الزواج , حتى صديقة أمي حست اني القطار بدأ يفوتني فراحت معاي هي وأمي لمكتب زواج لكن كان احساس الله يذوقة لأحد . لكن الغريبة اني ما في أحد اتصل فيني من مكتب الزواج تخيلو .
انخطبت مرة لواحد أصغر مني بسنتين . حاولت أقنع نفسي فيه واني الرجل ما يعيبه عمره ولا دراسته . المهم جاء أبوه بعد ما كان رافض علشان يتكلمون رسمي وبعد ما راحو اتصلوا لأمي وقالولها اني أبوه مش موافق لاني بنتكم سمراء ومش حلوه . سبحان الله ما جذب المثل الي يقول رضينا بالهم والهم ما رضا فينا .
أختكم قصة انتظار جامعية وموظفة وإعلامية وحضور إجتماعي.
وصاحبنا العريس ثالث اعدادي ومتورط ويا زوجته السابقة الي سحرته , يشتغل في الجيش ولا يعرف يتكلم ولا يوزان الامور .
وطبعاً على طول انسحب بكل بساطة لانه ما يبى يخسر ملايين أبوه الي راح يحرمه منها لو تزوجني .
طبعاً انا ما زعلت لاني واحد بهذي المواصفات حرام أعطيه مساحة من تفكيري أصلا . لكن تورط معاه لحد ما وصلنا للشرطة والمحكمة .
صار يضايقني بمكلماته ومسجاته . لحد ما وصل لمكان شغلي وصار يضايقني بالاتصالات ومثل ما تعرفون تلفون المكتب اذا رن لازم نرد عليه ما ينفع نطنش . ومسجات تهديد وكلام ما ينسكت عليه . وكل هذا ليش يقولي أنا عمري ما ارتحت لأنسانة مثل ما راتحت لك وحاسس انك انتي الوحيدة الي راح تسعديني . لكن أبيكي توقفي معاي ونقبلي الزواج بالسر بدون علم أبوي والوضع بيتعدل وأكيد راح يرضى طبعاً أنا رفضت.
والله ما أنسى هذا اليوم رجت البيت بدري واعترفت حق أمي على الي صار وأني أبي أشتكي عليه في الشرطة لانه اتهمني في عرضي وشرفي ويشوه صورتي في دوامي . أمي المسكينة قالت شوفي أخوكي يروح معاكي المركز اتصلت فيه وقالي روحي وانا جاي .
وفعلا رحت وفتحت بلاغ وكنت واضحة جدا جدا وعندي الدليل الي هو مسجات واتصالات لمكتبي في العمل.
وطبعاً تعرفون وضع البنت في مركز الشرطة ونظرات الظباط لكن هذا كله ما همني . كل همي أرد كرامتي وأخذ حقي .
وصل أخوي ويا ريته ما وصل حول الموضوع عليا وطلعني أنا الغلطانه وقالي قدام الظباط انا مالي دعوه فيها خليها تتابع موضوعها اهني وفي المحكمة بروحة . ما تتصورون هذي الكلمة كيف دمرتني قطعتني شتتني . ليش يا قصة انتظار تنادين أخوكي وانتي تعرفين انه سلبي وحضورة ما راح يفيد .
تخيلوا بعد ما قال هذي الكلمة وطلع صرت ولا شي قدام الظباط مع العلم اني أخوي رتبه عالية وبكلمة منه كان الموضوع انحل واتصلوا في هذا الشخص وفهموه غلطة ورجعولي كرامتي .
لكن صرت مثل قطعة اللحم والكل يبي يقطعها . لكن سبحان الله ربي عطاني قوة غير طبيعية . أنا الي قلب حنون وعاطفية وهادية سحبت الكرسي وصرت أصرخ وأرد الكلمة عشر وأهزئهم لاني اهني أنا جاية أشتكي والمفروض تساعدوني مش توقفون ضدي . (الله لا يسامح يا خوي يالي عطيتهم الفرص يقطعوني)
وصار الظابط يقولي لو ما احترمتي نفسك وإلاراح أرميك في السجن . صرت أرد عليه الكملة بعشر كلمات وأقولة وليش تنتظر يالله أشوف ارميني في السجن . وأدق على الطاولة وأفر الأقلام . اتعرفون كيف لما تكونون مظلومين وتروحون تبون تشتكون ويظلمونكم أكثر انا ذقت من هذا الكاس .
وغيروا كلامكهم بعد ما عطيتهم الدليل من المسجات ونسخة من المكالمات الصادرة لخطوط التلفون في مكتبي قالولي . الشخص الي انتي جاية تقدمين فيه شكوى راح يشتكيكي وبتكونين في موقف صعب طبعاً هدفهم اني يخلوني أتراجع عن الشكوى .نهاية الكلام قلتلهم حولوني على المحكمة عند الشيخ أنا اهني مالي تفاهم معاكم .
رحت البيت وخبرت أمي بالي صار وصارت تدعي على أخوي وتقولي أسمعي أنا ما خلفت غيرك أنتي أنتي كنتي طول عمرك سندي وظهر وعزوتي وكل شي وأدري انك مش محتاجة وقفة أخوكي معاكي لانك طول عمرك انتي توقفي معاه فلا تنتظرين منه شي . تخيلو هذي الكلمة أثرت فيني صح أنا دايما كنت أسمعها من أمي لكن في هذاك اليوم كام لها تأثر غيرب وكان الجو صيف وكنت من كثر الدموع والنواح والصياح وجهي أحمر مثل الدم يبغي يطلع من عيوني . أمي لما شافتني صارت تصرخ وتصيح وتولول وزادني هم على هم . لاني أمي من النوع اذا شافت دموعي تنهار فما بالكم بوضعي هذا.
ولما دخلت أخذ دوش الماء بارد وأنا جسمي مثل النار الحمام صار كله بخار وضباب.
لكن رب العالمين رحيم بعبادة تخليوا يا بنات وأعترف فيها ما كنت قريبة من ربي بس مجرد الصلاوة الخمس والأذكار حتى الاستغفار ما كانت أستغفر . لكن ربي وقف معاي
وفعلا بعدها بأسبوع كان موعد أول جلسة .
طبعاً لما عرفت اني القاضي سعودي قلت خلاص انا رحت فيها وانتهيت لانكم تعرفون شو معناة اني البنت تروح تشتكي في المحكمة .
نادو أسمائنا ودخلنا وكان بيغمى عليا من الخوف وطلعت وحدة كانت قبلي فقالت لي ديري بالك لا تتكلمي كثير وخلي كلامك محدد وواضح .
وفعلا سبحان الله ربي لين قلب الشيخ علي لما شافني بنت بروحي فقالي وش تبين يا بنتي الملف الي قدامي واضح فيه انك قدمتي بلاغ على هذا الشخص والأدلة موجودة ضده ومافي شي ضدك ولله الحمد .
اهوه قال هذي الكلمة يا بنات وأنا أبا أصيح وأصرخ بأعلى صوتي . مسكت نفسي وقلته:-
اهوت اتهمني في شرفي وعرضي وهذي قذف محصنات .
تهديدات المسجات الي موجودة عندك في الملف
والأهم كرامتي في وظيفتي سوء سمعتي

وقتله ترى يا شيخ هذا كله صار بعد ما تقدملي تراني ما أعرفه من قبل

وسكت بعدها وما نطقت بكلمة.

بعدها قالي انتظري بالخارج شوي . قلبي طاح في ريولي ورحت أنتظر بعد حوالي الساعة إلى ربع طلع عريس الغفلة وجه يترجاني أسقط حقي لانه مستقبلة راح يضيع والموضوع فيه قذف محصنات وجلد وغرامة . يا بنات كانت أروع لحظة بحياتي حسيت كأني حد جاب ماء بارد وصبه على راسي . وفكرت لحظة وقلتله لا والسلام عليكم وروحت .
أكيد ما راح اتنازل بهذي السهولة وبيني وبينكم كل الي فكرت فيه كيف أربيه علشان ما يحاول يأذي بنات الناس مرة ثانية .
روحت البيت ونمت نوم غير طبيعي بعد تعب جسدي ونفسي حوالي أسبوعين بس للأسف فتحت عيوني في المستشفى لاني صار لي هبوط حاد في الدورة الدموية وأنا نايمة وكنت بروح فيها لولا لطف رب العالمين . وفعلا عريس الغفلة صار يتصل على أخواني ويترجاهم أسقط حقي خليته بهذا الوضع لفترة مش قصيرة يتعذب شوي وأسقط حقي لكن أصريت أخذ الغرامه لاني نيتي أتصدق فيها وبعد علشان يدفع من دم قلبه .
على فكرة هذا الموضوع محد يعرفة بعد الله وأهلي غيركم حتى أقرب الناس لي وصديقاتي لكن حبيت أفضفض وان شاء الله لي عوده مع قصة ثانية من قصص حياتي .
إنتظروني في طريقة عمل البسكويت الهش في منتدى الحلويات . ترى شوكلاتة اسمي في منتدى ثاني
عزيزاتي اليوم جمعة أبواب السماء مفتوحة أتمنى تدعولي دعوة حلو بظهر الغيب اني الله يرزقني بالزوج الصالح وينولني الي في بالي ويجمعني معاه في الحلال يارب عاجلا غير آجل . ولا تنسون فيه ملك يقول ولكي بالمثل .
السموحة طولت عليكم .