قصتي مع الخادمة والله فشله

شغالتنا يا كرام مهبوله الى ابعد حد يعني لما نشوفها جايبه الشاهي نعلن حالة الطوارئ ونزل البزران للملاجئ
لانه عادي عندها تشيل 13 بريق شاهي بيد و10 دلال قهوة بيدها الثانيه وتمشي صافطه الطبلون يعني كنها تصاقط ظلالها
انا اقول لامي احس انها مسكونه بجني كان يشارك في اختراق الضاحية
تصدقون شرينا جهاز تعلقه معها علشان امي لما تبيها تناديها بالجهاز بس للأسف علشان سرعتها صار الجهاز ما يلقط الارسال
يعني لو تبي تعذبها خلها لا تتحرك بس ثواني
وبعدين عادي تناديها وتسالها عن شي ما تدري الا هي رايحه ومخليتك.... مو تطنييش لا بس دباشه
انا احس انها ما قد شافت بشر ولا تدري وشلون يتعاملون مع بعض
تقدرون تقولون انها مهبوله وفي روايه اخرى سبيكه
المهم انا صار لي معها موقف قوي
مرة وانا راقي لغرفتي مروق وادخل غرفتي وانا من عادتي اني ادخل غرفتي وبعدين اعطي الباب كعب قوي واصكه واقفل غرفتي
واطلع جوالي واجدعة على المخده مع انه دايم يطيح ورى السرير واتورط ادوره
وافسخ ثوبي واحطه في مكانه المعتاد اللي هو اجدعه على الارض
بعدين اشيل فنيلتي واصفطها لين تصير مثل الكوره واشوتها على المعلاق قصدي الشماعه <<<< خلونا نتميلح عند البنات
بعدين سروال السنه <<<< اموت واعرف ليه سموه كذا ...
عني ما يبقى على الا سروال النص
المهم حمامي الله يعزكم جوا غرفتي
المهم يوم فسخت ثوبي قعدت قدام المرايه اتميلح نفسي واكلم روحي وانكت شوي وامسك المشط واتخيله مكروفون واغني الاماكن يعني قمة الطرب
واستعرض عضلاتي والعب كراتيه مع صورتي بالمرايه .. واكلم نفسي بالمرايه واقول يا ملحك يا ناس
وبقية الحركات اللي انا دايم اسويها بشرط ما يكون عندي احد
عاد انا دايم انهي حركاتي هذي بقفزه على السرير وكنت دايم وانا انط اقول دوق فليب <<< هذ اسم اللي كان يسوق كريندايزر <<< ايقالك شرح الحين
عاد وانا ناط وبين السماء والارض حانة مني التفاته <<< الله اخيراً قلت حانه من زمان وانا ودي اقول هالكلمه
المهم يوم حانة مني التفاته للحمام وش شفت
صليحه <<< اسم شغالتنا .... واقفه بوسط الحمام وماسكه مكنسة وسطل وهي منصدمه
قلت لها صليحة خير وش عندك .. زي العاده ما ردت رجعت مرة ثانيه بالاشاره اسالها وش عندك كل هذا وانا بين السماء والارض ما بعد وصلت السرير <<<< ما يكذب ابد
وجلسنا اناظر بعض اللي يشوفنا يقول والتقى الحبيبان وانا ودي اخذ المكنسة اللي معها واكنس البهاق اللي بوجهها
ثم امسك راسها وادخله بوسط السطل اللي فيه مويه علشان اشوف من وين ينسم راسها
واصرخ عليها يا دبشه ليه ما تكلمتي وعلمتيني انك هنا
وكالعاده كنك تكلم جدار
المهم لاني عارفها دريت انها يوم سمعت صوتي انهبلت ولا درت وش تسوي
وبذهانتها الخارقه قالت بقعد هنا ومو شايفني .... لعنبو دارك ودار مخك << مثل خطير
عاد انا قعدت اتذكر وش كنت اسوي يلعن ابو الفشيله بس اللي مهونها علي قلت اشوى اني ما فسخت كل شي
كان انا اللي بطلب من اهلي يسفروني انا مو هي
المهم اني قلت لها خلاص امشي اطلعي وانا ابي افتح باب غرفتي اسمع امي جايه لغرفتي وتناديني
يا سلام على الحظ
انا والشغاله بغرفة نومي والغرفة مقفله وانا كاسي عاري ما علي الا سروال نص
يعني امي لو هي عمياء بيروح علطول بالها لذاك الشي
يعني التهمة لبساني لبساني
علشان تعيشون معي الموقف
انا ما علي الا سروال نص والشغاله جنبي واقفه ,,,والباب مقفل وورى الباب امي
وانا اعرف امي ماراح تروح الا اذا فتحت الباب
في هاللحظه .... خطرت في بالي فكرة انما ايه ما تخرش الميه
لي اخو يدرس برى وامي تموت فيه واذا دق تركض امي ركض كأنها بنت جايتها رسالة جوال خ
فقفزت على السرير واخذت الجوال ودقيت على بيتنا ورد على ولد اختي من تحت قلتله انا خالك بدر وين جدتك بسرعه انا اكلم من برا
فقام البزر يصوت لامي خالي بدر بالتلفون
امي اول ما سمعته يصوت تلخبطت وقامت تقول يوه قله انها فوق وصارت تمشي وتدور التلفون اللي فوق وهي تقول اف وين ودت التلفون هالشغاله
وانا في نشوة الفرح لنجاح خطتي الجهنميه اذا بصليحه <<<< مرة ثانيه اسم شغالتنا
اذ بها يوم سمعت امي تقول (وين ودت التلفون هالشغاله) اذ بها بأعلى صوتها تقول... فوق مكتبه يا ماما
انا من قوة غبائها والحركة اللي سوتها ما استوعبت الموقف قعدت لحظات علشان مخي يتعرف على هالموقف بس ما لقى اي موقف مشابه قد مر عليه يعني سبق مو صحفي سبق غبائي لهالشغاله
الادميه ذي ذكائها خارج التغطيه الا مخها منتهي الصلاحيه هذي طفرة في الدباشه
المهم انا صرت ما اسمع لامي صوت مدري هي سمعت الشغاله والا لا
يوم جت المصيبه
وانا واقف عند الباب اتسمع والشغاله جنبي
اذ بصليحه تمسك عروة الباب وتبي تفتحه فرمقتها <<<< حلوه رمقتها ذي صح خ
المهم رمقتها بعيني يعني وش تبين قالت لا بابا افتح الباب لا بابا حرام لا باب ايش يبغى انت لا بابا انا حرمه كبير انا حرمه فيه بيبي حرام بابا
ياسلام الاخت فاهمه غلط تحسبني اسوي كل ذا علشاني ابيها
مدري اضحك والا اصيح والا وش اسوي فيها
من زينك انتي ووجهك اللي كأنه رسمة ولد بالروضه عيون يبيلها كروكي علشان تلقاها وخشم افنس كأنه محول غاز
يلعن شكلك لو تطب علينا الهيئه اخذو علي تعهد وانتي سجنوك مؤبد وراح يسوولي انا كشف حمل مو انتي <<<<< قويه شوي خ
المهم الآدميه مصره تفتح الباب وما دريت الا هي فاتحه القفل وامي جنب الباب تقول ,,,, صليحه!!!! صليحه انتي هنا
وقبل ما تفتح امي الباب دورت بسرعه سروال السنه ولقيته على الارض وامد ايدي باخذه .<< ... في هاللحظه فتحت امي الباب
ولا لقيت تصريفه لوضعي وانا ماد ايدي للارض باخذ سروالي الا اني لا ارادياً قلت
اله اكبر <<<<< ايه سويت نفسي اصلي واسجد خ
وش اسوي ما لقيت اي تصريفه وبعدين ما ابي امي تسالني عن شي فاحسن شي اسوي نفسي اصلي
المهم اني في نفسي اقول يارب انها ما تلاخظ اني اصلي وانا شبه عاري
امي دخلت وتنحت شوي بعدين قالت للشغاله وش قاعده تسوين لكن كالعاده الشغاله اكلت تبن وسكتت وطلعت
وقفت امي شوي وانا قاعد اصلي واقول في نفسي اشوى انها ما انتبهت اني متفسخ
المهم شوي الا و يوم قالت لي اجل تصلي هاه !!!!!!!!!! وانا اللي ابلع ريقي مو بس ريقي الا حتى اللوز بلعتها
قالت اجل تصلي,,,, زين بس ترى القبله غرب وانت تصلي شرق
وطلعت وصبخت بالباب بقوه
يوه انواع الصدمات ياربيه وش اسوي
واقعد افكر يارب وش اسوي والله اني مظلوم <<<<< واقعد افكر وافكر ,,,,, قلت احسن حل الصراحة واللي يصدق يصدق واللي مو مصدق لا يصدق
ولا انتبهت لنفسي الا بعدين طول فترة تفكيري وانا قاعد اكمل صلاتي خ
المهم لبست ملابسي ونزلت ورحت لامي وهي من هول الموقف قاعده تتنافض وتحتري ابوي
يوم جيت صرخت بوجهي لا تكلمني ولا تلمسني ابعد
قلت اسمعي
الصدق مجراه والكذب مفراه
قالت وشو
قلت الصدق منجراه والكذب مفتراه
قالت وش تقول انت
قلت اف الصدق زين والكذب شين وشوله الفلسفه
وقعدت اقولها كل اللي صار واحلف ايمان واقسم بالله
والحمد لله لان امي واثقه فيني صدقتني
بس مدري ليه سفرو الشغاله بعد يومين <<< الى الحين ما فهم انهم سفروها لانهم ما صدقوه خ
بالنهايه احب انصح اخواني الشباب انتبهو تتفسخون بغرفكم وعندكم شغاله اسمها صليحه <<<< متعوب عليها النصيحه خ
وه بس لو فهيد كان اهون والله
منقول بمعنى = ملطوش ... ههه