قصتي ودعواتكم لي

السلام عليكم حبيباتي
اليوم انا حابة اقولكم قصتي بحاول قدر المستطاع اختصر وابي منكم دعوة حلوة بتفريج همي وينولني اللي ببالي..
قصتي بدت قبل ثلاث سنوات تزوجت وساكنه فوق خالتي ام زوجي طبعا ام زوجي مطلقة وعندها ولدين اللي هم زوجي وولد لها عايش برا السعودية
..اخو زوجي اكبر من زوجي وشخصيته حقاني جدا مايحب الغلط وماعنده نفاق او مجامله يطقها بالوجه انظلم كثير بحياته بسبب طبعا الطلاق عمي وخالتي مايعرفون شي اسمه حنان وانعكس على عيالهم وصارت قلوبهم قاسية
زوجي غير يسكت ومايدافع عني حتى وهو يدري اني مظلومة واذا زعلت اكون انا الغلطانه وامه تعبانه ولازم اراعيها وبتعرفون اللحين السالفة ..
خالتي اول ماتزوجت طيبه وحبوبه معي بس لاحظت انها تبي تمشيني على كيفها ماتبيني اروح لكذا وماتبيني اجي كذا تبيني على كيف كيفها ..
وكنت ماشيه معها وابقولكم وش كنت اسويلها طبعا هي ملتزمة وكانت تحب السهر فتخيلوا تسهر عندي وانا عروس وقت ميخالف لو امي اللي طفشانه وش بسوي بوسع صدر امي بس طولته كل يوم على هالحال وانا لاحظت ان فيها غيره لانها بس تتكلم عن قمصان النوم
المهم هي ماتحب تدفع فلوس ابدا يعني بخيلة شريتلها جلابيات لان اللي عندها منهريات متقطعات وتفشلني ويقولون ولدها بخيل ومايعطيها بصراحة وخاصة عند اهلها واي شي نعطيها تبيعه
ومره عطيتها مفرش من مفارشي لانها طلبت واحد مني واستحيت اردها ومصختها كل يوم طلب واذا عطيتها الشي قالت مو زين ماعندك غيره وطبعا ماترجع الاول ..
جا زواج اختها وهذي اختها اكرمت زوجي ووقفت معه وقفه ماوقفتها امه بزواجه مني عطته وفرشت البيت ماقصرت نهائيا معنا ..
ويوم جيت اروح للزواج رفضت قالت فيه اشياء حرام بالزواج ومن هالكلام وانا فستاني كم طويل وستير الحمد لله وحاطين طق اسلامي طبعا انا التزم الصمت بكل شي معها ورحت للزواج ولاحظت على زوجي حزن بعد ماجينا..
ومن بكرا نزلت لخالتي بسلم عليها لانها بالعادة نكلم بعض ولقيتها تبي تطلع قلتلها هلا ياخاله قالت هلا هلا وصكت الباب بوجهي
وبدت معاناتي ودعاوي وتصريخ وكلام ينقال وماينقال وماشفتها من ذاك الوقت اللي هو من رابع شهر من زواجي الين اللحين الا بعزا
تخيلوا اول مادرت اني حامل تدعي علي تقولي عساك ماتفرحين فيه وعساك وعساك
ويوم ولدت مازارتن ولاشافت حفيده 5 شهور الين زوجي خلاه تشوفه اخذه ودخلوه عليها تحسبونها حنت عليه لا والله زادت زادت زادت غيرتها تخيلوا تغار من طفل
وانا والله العظيم ماعمري رديت عليها ولارفعت الساني او اقولها شي واقبلها بابتسامه وماعمرها شافت مني شي حتى هي اذا حلفوها الناس قالت ماشفت عليها شي بس اغار حتى امي كلمتها وقالت انتي شايفه على بنتي شي مقصره معك بشي وحلفتها قالت لا وقالت انها بس تغار
وغير الفضايح عند الجيران اذا صرخت علي بالحوش ودعت علي والله اني ابكي بكي والله يقطع القلب يوم انا حامل يرتفع ضغطي وادخل المستشفى بسبتها ويوم صرت بالثامن رحت لاهلي علشان افتك منها
تخيلو شافتني بالحوش بالغلط وانا فاتحة عيوني وانا اذا طلعت من البيت اغطيها وهي شافتني داخل البيت قامت تصارخ علي وقالت بصوت عالي كل امة محمد تسمع خل السفلة زوجتك تغطي عيونها <<<<وين الالتزام اذا كانت الفاظك كذا
وتقول وانا اسمعها لزوجي قوم روح ((تكرمون يابنات )) لكلبتك تخيلتوا يابنات
غير انها تقولي ياخبيثة انتي وامك ومن هالكلام
ويوم توفى زوج اختها رحت وعزيتها وهي المره الوحيدة اللي شفتها فيها طول هالمدة تخيلوا عند الناس فرحانه فيني واول مارجعنا البيت رجعت لاسطوانتها
واللحين لنا سنتين و6 شهور ماشفنا بعض الا بالعزاء فقط ولانكلم بعض تخيلوا اهديتها وكل شي بس كرامتي ماتسمحلي خلاص انهت
والشهر اللي فات زعلت على زوجي يايطلقني والا بتزعل عليه وطبعا زوجي سال الشيخ وقال لاطاعة لمخلوق في معصية الله زوجتك ماقصرت معك لاتظلمها
تخيلوا زوجي اذا قالتله امه اي شي من سب او اي شي مايدافع عني يسكت كانه راضي وانا انقهر ليش مالي قيمه عنده وهي تتمادى
وجا ولدها الثاني واذا سمع امه تكلم عني هاوشها وقالها ماسوتلك شي احترميها لاتحبينها بس لاتاذينها مع ان زوجي ملتزم واخوه لا
ادري طولت عليكم بس شي بقلبي وان ماطلعته بنفجر ابي نصايحكم العملية
و الدعاء ماخليته والحمد لله والقيام والاستغفار بس ابي حلول عملية الله يجزاكم خير ولاتقولين طنشي انا وصلت حدي منها احس كل يوم انهان اكثر من اللي قبله وكل الناس يسمعون
ابي وشلون اتصرف معها واوقفها عند حدها ؟؟
ووشلون اتصرف مع زوجي علما اننا ساكنين ببيتها وذالتنا فيه بس اذا قال ولدها بنطلع قالت بزعل عليك وقعدنا بذله .
وزوجي اذا تهاوشنا على هالموضوع لازم انا اراضيه والا مايرضى من قساوة قلبه
هو طيب وحبوب بس يقهرني اذا زعل ولايدافع عني مابيه يتهاوش هو وامه بس ابيه يخليها تحترمني او لاتسبني قدامه
وانا ماجيب طاري امه نهائيا وعلى فكره اهله كلهم خواله وعمانه يعشقوني مره
ونسيت اقولكم شفتوا خالته اللي جهزت بيتنا تخيلوا جتني بالكوشة تقول اصبري وتحملي تحسبني داريه عن امه وانا مادري وش السالفة