كل مطلقه تدخل تعطيني رأيها

السلام عليكم ورحمة الله وبركاته
مادخلت هالقسم وكتبت هالموضوع الا لاني محتاره جداً في وضعي,, وابغا اتخذ قرار وماابغا اندم,, فحبيت اخذ راي كل مطلقه وبكل صراحه عطوني رأيكم..
انا تزوجت ولسى ماكملت سنه وماحملت,, المهم انه في بداية زواجي كنت اشك بزوجي تصرفات جدا غريبه,, ومعاملته اغرب..
المهم انه اكتشفت بالاخير انه يدخن حشيش ,, انا انصدمت وبكيت وخفت لانه ابويه وامي تعبانين بالقلب وابويه اكثر من مره جاته جلطه خفت اتكلم واقولهم واكون سبب في تعبهم..
اخر شي يوم شفت الوضع بداا يتأزم وزوجي مرره ماصار يعطيني وجه يتهرب مني عشان مااصارحه,, توكلت على الله وخبرت امي وابوي.. قالو لي اللي تبغينه رح نعمله.. استخرت اني اتطلق وخلاص قلت لاهلي بتطلق ,, جا زوجي وقاله ابويه وقال خلاص خير ان شاء الله,, اليوم الثاني بعد ماصحيت قالت لي امي عمتك كلمتني تبغا تكلمك,, قالي ابويه اتصلي وكلميها,, اتصلت عليها وكلمتها وجلست تبكي وتقولي ارجعي وربي بيتغير وهوه بنفسه يقول برجعها وبتغير معاها,, طلب فرصه وقلت لابويه وامي انه طلبني فرصه وانا رح اعطيه فرصه,, ابويه انبسط وارتاح قالي انه يومين ماينام عشان وضعي,, والسكر عنده ارتفع,, المهم اني رجعت والامور كلها تمام,, وزوجي تغير معايه 180 درجه صار يهتم فيني الحمدلله ويحاول يسوي اي شي يسعدني,, بس قبل اسبوعين او ثلاثه اكتشفت انه يدخن من ورايه حشيش اول ماصارحته قالي انه ناوي يتركها وقالي انه هوه رح يتركها عشان ربي اول شي وعشان نفسه ,, بس يبغاني اصبر وادعي له,,
وانا الحين بين مد وجزر,, مره افكر اقول بخليه وبطلق منه,, ومره اقول مارح اطلق ,,
اذا شفت الدخان انقهر وابكي ,,معاملته جدا حلوه وطيب معايه لاخر درجه وعمره مامد يده عليه اوتلفظ بكلمه وسخه بالعكس ماشاء الله ,, اخاف اتركه واطلب الطلاق واجني على نفسي لانه كلنا عارفين كيف نظرة الناس للمطلقه,, وغير كذا اخاف اتطلق واتزوج غيره وتجي معاملته معايه سيئه او اخذ واحد متزوج ,, وغير كذا خايفه اجني على امي وابويه لانهم يسألوني عن اموري واقولهم كلها تمام لاني اخاف عليهم وهمه مره تعبانين,,
عطوني رايكم بكل صراحه في الطلاق ,, وهل صار ندم بعد الطلاق؟؟
,, وايش الاهون الطلاق ولا الصبر عليه والدعاء له بالهدايه علما انه هوه ماشاء الله انسان جدا طيب؟؟
وجعل الله لكل من ترد من كل هم فرج ومن كل ضيق مخرج.. الله يسخر لكم كل ماتتمنون.. يارب ياكريم