الفراشة أصبح فتيات Ftayat.com : يتم تحديث الموقع الآن ولذلك تم غلق النشر والمشاركات لحين الانتهاء من اتمام التحديث ترقبوا التحديث الجديد مزايا عديدة وخيارات تفاعلية سهلة وسريعه.
فتيات اكبر موقع وتطبيق نسائي في الخليج والوطن العربي يغطي كافة المجالات و المواضيع النسائية مثل الازياء وصفات الطبخ و الديكور و انظمة الحمية و الدايت و المكياج و العناية بالشعر والبشرة وكل ما يتعلق بصحة المرأة.
shooola
23-05-2022 - 07:21 am
  1. همسة لكل فراشة مشتركة :


السلام عليكم ورحمة الله وبركاته
بصراحة لي فترة مسجلة ونسبة المواضيع المعقولة للأسف ماتتجاوز ال 20% مو القصد إن الباقي كذب!! لا أبد بس إحنا بنات ما أتوقع إنه حلوة نعرض نفسنا لخطر العمليات والأعشاب والبلاوي الزرقا !!
هذا النظام راح ينتهي كل 3 شهور واللي حابة تكمل تكمل طبعاً كلن على حسب حاجته للإنقاص
للمشاركة معانا تعالي وقولي رأيك وإذا عندك إعتراض حاضرين للحلوين وحطي وزنك الحالي ووزنك الهدف ( يعني المثالي )<< الحالي = 79 الهدف بإذن الله = 54
على العموم خطتنا ,,,
مزاياها :
واقعية 100%
عيوبها :
تحتاج صبر وفي لحظات ممكن تصابي بإحباط !!!
بس ماعليه اللي يجيها هالإحباط تجي هنا بتلقا دعم إن شاء الله وترجع أحمس من قبل <<جبتي التايهه خ
شرايكم يافراشاتي الحلوات التختوخات نخش في الجامد خلاص ؟؟
اوكي
طبعاً راح نبدأ من السبت وكل خميس بجي احط لكم الاسبوع الثاني
الميزان اليوم وزي اليوم يعني كل خميس اشوفكم محضرين هناا كل إللي خشت معانا
أول أسبوع
راح نمشي على نوعين يعني تختاري احد النموذجين واذا طفشتي أنقلي للي بعده لو تبي ترجعي للأول اوكي نو بروبليم
نموذج ( أ ) << حشا اختبار مو نظام غذائي خ
الفطور
2 توست حب او بر + 1 شريحة جبنة << مو لازم قليل دسم او كامل مافرقت على جبنة
كوب حليب بارد << نفس الشي كامل قليل دسم مو كارثة
5 ملاعق كورن فليكس
الغداء
اي نوع شوربة تفضليه طبعاً يكون مطبوخ بطريقة صحية بعيداً عن الزبدة واللحوم والشحوم
اصابع سمك او نوجت دجاج مطبوخ في الفرن << يعني لا للقلي
صحن صغير خيار وطماطم وخس وجزر << المهم مو أقل من نوعين
ربع رغيف خبز حب او بر
العشاء
شابورة العشرة حبوب للرجيم
زبادي ( يضاف للزبادي كمون + فلفل اسود + زعتر ) وكله حسب الرغبة طبعاً بس لزيز جربوه
نموذج ( ب )
الفطور
فول
ربع تميس بسكوت
ملعقتين لبن زبادي
الغداء
تونه
صحن سلطة ( طماطم , خيار , خس وجز )
ربع رغيف حب او بر
العشاء
تفاحة , برتقالة , كمثرى , يوسف افندي << حسب تواجد الانواع
وسأوافيكم بالاسبوع الثاني في نفس هذا اليوم
وراح أكمل بإذن الله لو وحدة بس سجلت معايا لن أتوقف عن تشجيعها وتشجيع نفسي

همسة لكل فراشة مشتركة :

  • الرجيم غير قاسٍ فلا تستغربوا لأن المثل يقول " أول الغيث قطرة " يعني لاتستعجلوا على رزقكم ,
  • طبعاً متوسط الانقاص مايقل عن كيلو ومايزيد عن 3 في الأسبوع الأول وكل وحدة وطبيعة جسمها ,
  • الرياضة راح نبدأ فيها بعد أسبوع إن شاء الله تعالى ,
  • لا للقلي ولا الرز ولا البطاطس ,
  • اختاري يوم واحد فقط يكون مفتوح ومفتوح مو يعني تفلي ابوها فل لا يعني تصرحي لنفسك تاكلي رز او بطاطس قطعة شوكليت او جاتوه دون افراط ولاتفريط ,
  • كل يوم لابد من شرب 3 اكواب شاي اخضر دون سكر ولا تروبيكانا ولا كاندريل ,
  • لا للبيبسي ولا الكولا الدايت ولا الماكس ابد لحد يضحك على نفسه يقول أنا أشرب دايت مايسوي شي تراه ضحك على الدقون ,
  • لا وحدة تتشطر وتهري نفسها عشان لاتنفلت يوم ولا احد يقدر يمسكها فالضغط يولد الإنفجار لأن هالرجيم ما هو إلا تصحيح عادات سيئة ترسبت في روتين يومياتنا فلابد من التغير الجذري ولكن هوناً على أنفسنا ,

بإنتظار التفاعل فراشاتي العزيزات !!
خالص تمنياتي لكم بالصحة والعافية وراحة البال ....


التعليقات (9)
دلع طفوله
دلع طفوله
موفقه حبيبتي بس اني ملتزمه مع مجموعه ثانيه دمتي بحفظ الله

Beautiful Girl
Beautiful Girl
أوكي أنا معاج ياعمري ...
و أن شالله راح أستمر معاج لين نصير عصاقيل
و أختي تري 54 ضعيفة حييل .. أختي 58 و تبي تمتن !!!
وزني :- أحم أحم 81
الوزن الي أبيه :- 60
و أن شالله راح أسوي النظام بحذافيرة
بس حبيت أسأل
ربع تميس بسكوت
شنو يعني ؟
و أن شالله ماراح أخربط بالأكل ..
مشكورة أختي و جعله الله في ميزان حسناتك ..
تحياتي ..

shooola
shooola
اهلا وسهلا دلع طفوله
مشكوره على مرورك والله يتمم لك على خير ياارب

shooola
shooola
اهلين بيوتيفل قيرل
أسعدني جداً تواجدك وانضمامك ويسلمو على التشجيع وانا معاك في الوزن بس هذا يعتمد على الطول انا طولي 160 يمكن اختك اطول ماشاء الله
والتميس عندنا في السعودية هو العيش اللي يجي مع الفول زي عجينة البيتزا فهمتي علي؟؟
وحياك مرة اخرى وكل يوم راح اتفقدك موجوده أو لا وبليز أي تخبيص تعالي فضفضي عشان اخترع انواع العقاب عليك <<< قامت تموون خ

Beautiful Girl
Beautiful Girl
والتميس عندنا في السعودية هو العيش اللي يجي مع الفول زي عجينة البيتزا فهمتي علي؟؟
لحد الحين مو فاهمه >< أنزين شلون أسوية !!
وحياك مرة اخرى وكل يوم راح اتفقدك موجوده أو لا وبليز أي تخبيص تعالي فضفضي عشان اخترع انواع العقاب عليك <<< قامت تموون خ
ههه تمونين حبيبتي ..
أوكي راح أقولج وعاد أنتي قرري شنو العقاب >> راح تتعبين لول ...
دقايق و أشووف شنو وزنج المثالي ...و أختي مو طويلة حيل طولها 164 ..

shooola
shooola
ههه
حبيبتي لجل عين يكرم نظام وربي
خلاص بدل التميس اللي سوالنا قصه خذي ربع رغيف خبز اسمر او بر او شريحة توست
وهذا التميس بس كتبته انا عشان هو الخبز التقليدي اللي ينأكل مع الفول
أنتظر الوزن المثالي ومشكوره يالغلا

Beautiful Girl
Beautiful Girl
وزنج المثالي :-
أذا كانت بنيتج صغيرة :- 54.4
و أذا متوسطه :- 59.4
و أذا كبيرة :- 64.4
و طبعا البنية تنقاس عن طريق الكتوف و الخصر يعني أذا كان عضمج ملموم و صغير يعني عندج خصرر ضعيف حييل تكون بنيتج صغيرة
و اذا كانت عادية لا صغيرة ولا كبيرة طبعا تكون متوسطة ..
و أذا كنتي عريضة مافي خصر و كتوفج عريضة .. تكون بنية كبيرة

shooola
shooola
** تذكرت شي بنات الموية الله يعافيكم لازم تشربون مايقارب 3 قوارير صحه عشان يساعدك في التخلص من السموم اثناء الريجيم وغير الريجيم والله يعطيكم الصحة يارب ويديمها عليكم

Beautiful Girl
Beautiful Girl
شولا ..ههه خلاص عرفته هذا الخبز الي كليناه بالطايف عندكم ... واو عجيب برووحه يمي ..
عندي خلطته و حده بالمنتدي عطتني الخلطة جزاها الله خير ..
و حبيبتي تري ما بينا شكر خلاص صرنا خوات ...

51طريقه لتخفيض الوزن
ريجيم الحلبة الناعمة بالعسل الأسود لزيادة الوزن