كيف تخلي زوجك يصالحك

1. السلام عليكم

السلام عليكم

اللي متزاعله مع زوجها وتبغاه يراضيها تجرب هذي الحركات لأني جربتها مع زوجي وجابت نتيجة بأنه صالحني وترجاني أرضى عليه ولما رضيت عشاني في مطعم وثاني يوم جاب لي هديه..
1/أول شي استغلي بطنه بأنك تطبخين له الأكل اللي يحبه ووطبعا يلاقي الاكل جاهز دايما لما يجي من دوامه وأقعدي كلي معاه لكن كلي شوي وخليك ساكته يعني حسسيه انك مالك نفس في الاكل وإذا كنتي جاعانه يا كلي قبل لا يجي أو كملي أكلك في المطبخ بدون ما يشوفك وتكشفي نفسك.
2/ أهتمي بكل شي يخصه يعني ملابسه تكون دايما مغسوله ومكويه والسرير دايما يكون مرتب والبيت كمان يعني حاولي تهيئين له الراحه مع ان الشي هذا صعب وانتي زعلانه منه لكن بيخليه يحس بتأنيب الضمير بأنه مزعلك وأنتي منتي مقصره معاه في شي.
3/ كوني دائما نظيفه ومرتبه وريحتك حلوه وخاصة وقت النوم والبسي شي مايكون مكشوف ومغري مره يكون مكشوف شوي يعني مثلا قميص نوم بدون اكمام لكن مايكون خيط ومعري الصدر مره ولا يكون خفيف ولاتنسي العطر وخاصة النوع اللي يحبه وإذا جيتوا تناموا لا تنامي إلا بعد ماينا يعني كوني جنبه في السرير لكن اقعدي أقرأي كتاب أومجله أو امسكي الجوال قلبي فيه المهم سوي أي حاجه تحسسه انك منتي مهتمه بوجوده جنبك علشان مايفهم من من اللبس والعطر انك قاصده شي وإذا بدأ يداعبك ويسويلك حركات من اياها بدون مايكون قاصد يراضيك حاولي تصديه لكن المشكله إذا كان يبغى حقه فيك ساعتها الله يعينك مع اني ما اعتقد إن في رجال يجي زوجته وهي ماهي راضيه عليه قبل مايراضيها أما أذا نام وطنشك نامي لكن تأكدي انه كان يفكر في انه يصالحك وخصوصا إذا كان يتقلب قبل ماينام .
4/ طبعا هذي الحركات كلها سويها وانتي زعلانه يعني لا تكلميه ولا حتى تطالعي فيه إلا من تحت لتحت وأذا قعد مثلا يحكي لك سالفه اسمعيه لكن لا تردي ولا تطالعي فيه (على فكره كلامه لك من بعد ما كان مايكلمك أكبر دليل على إن هذي الطريقه بتجيب نتيجه لكن استمري عليها ) وإذا احتجتي انك تكلميه لانك تبغي مثلا مقاضي للبيت او أي حاجه ضروريه كلميه بإختصار وإذا حاول يجرك مثلا في الكلام علشان تكلميه حاولي تقطعي الكلام وتقومي من عنده إلا إذا كان يكلمك علشان يراضيك في البدايه ادلعي عليه شوي علشان مايحس انك ماصدقتي انه يراضيك واقعدي عاتبه وبأسلوبك وشطارتك في الكلام حسسيه انه الغلطان وفوق هذا يزعلك حتى لو ماكان كذا وبعدين ارضي عليه على فكره هذا الموقف انسب وقت انك تطلبي منه الي تبغيه لانه يبغى رضاكي وما راح يرفض لك طلب وكل وحده وشطارتها.
ولاتنسوا ان المشاكل هي ملح الحياه الزوجيه واحيانا تجدد الحياه وتكسر الملل لكن انتبهوا (كثرالملح يفسد الطبخه)
وأنا في انتظار تعليقاتكم والي عندها أسلوب ثاني تقول لنا علشان نستفيد والله يصلح كل زوجين متخاصمين.