كيف تعاملي المعقد من الحريم اسعفوني

السلام عليكم ,.
كيفكم حبيباتي ؟ انا زي ماتشوفوا شريط موعد الزواج بتوقيعي ,. مملكة
اللي صار اني ملكت من شهر واسبوع تقريبآ ,.
اللي شفته بزوجي انه انسان معقد من الحريم ,.
من حكاويه عن جدته ام ابوه وحريم اعمامه ومراة ابوه ,.
الانسان هذا مخه مقلوب فوق تحت
من قواية الحريم ,.
قلتله مرة (ياعمري لمن حتعرف اهلي وطريقتنا حتنفجع من الفكرة اللي فراسك عن الحريم)
كان يقولي (طيب نشوف .. الله يعين) ومرات كان يقول ( الله يعيني عليكي ) < دا رد بالله
والله يا بنات يحكيني حكاوي عن اهل ابوه صدمني فيها ,. انا اهلي مرة طيبين .. وحريمنا ماعندهم هذا الحد من القواية ..
وانا قلتله انا اضيع بينهم يا فلان ,. والله ما حاعرف ارد عليهم ,.
هو صار يقولي لا تخافي والله ما اخليكي تختلطي فيهم ولو اتقال كلام عنك كله فوجهي ,.<يعني مطلوب لو احد غلط عليا اسكت مثلا ؟؟
قلتله لا انا راح ابكي وما اعرف ارد بستناك تدافع عني وترد
++++++++++++++++++++++
المكالمة اللي راح احكيكم عليها : كان بيوعدني ما يخليني اختلط فاهله ابدآأ ,.
طبعآ انا مقدرة دا الشي منه ,. بس صرت اقوله متأكد ؟ هادول اهلك ؟ وانا الغريبة ... ؟؟
يقول ايوة ما اخليكي تشوفيهم ..
قلتله يا فلان ولا اولادي ,. هادول عقدوا عيالهم انا ما ابغى اولادي يتعقدوا ,.
وهادي عشرة عمر مايجي يوم تغصبني اختلط فيهم ؟؟
هو يقول اوعدك ماتشوفيهم فالسنة الا مرة ولا مرتين ,.
++++++++++++++++++++++
ملاحظة : ابغاكم تفرقوا بس العقدة من الحريم مو قصدي يحقر المرأه وكدة ,
لا هو انسان ماشالله عليه متفتح ما عنده تخلف في المعاملة ولا تفرقة ,.
++++++++++++++++++++++
اللي صار امس كان يكلمني وبيحكيني على سبب انفصال امه وابوه وانا بغرفة النوم -
فجأة دخلوا اخواتي وضحكوا على منظري ,.
طبعآ تعرفوا البنات .. تخيلوا فجأه يكون هدوء ويجيكي صوت ضحك بنات ؟
متخيلي كيف علو الصوت
هو الا والا يعرف سبب الضحك على باله اني فاتحة سبيكر واخواتي بيسمعوا ,.
عشان لاي سبب اخذ نصايح منهم ولا اي حاجة من خزعبلات الحريم ,.
قلتله لا تخاف ياقلبي .. انت تحسب احد جنبي ؟ لا ابدأ وربي هم برا الغرفة ,.
سكت وقالي لا بس يحق لي تكون في خصوصية معاكي
قلتله ايوة اكيد والله ماكانوا بالغرفة ..
سكت لثواني ...
وقالي وليش بيضحكوا <يعني لسا مو مقتنع ولا مصدق ,.
قلتله حبيبي زي مالك خصوصية معايا هم لهم خصوصية برضو
راح سكت
++++++++++++++++++++++
طبعآأ يا بنات انا تعبت من تلميحاته وكلامه المشفر ,.
عسى تكوني من الحريم اللي يغيروا ديكور البيت عشان كلام فلانة وعلانة
عسى تكوني من الحريم اللي كل فلوسك ع الاسواق
عسى تكوني من الحريم اللي كلامهم كثير
عسى تكوني من الحريم اللي يشمقوا
عسى تكوني من الحريم اللي ينقلوا كلام ...
عسى وعسى وعسى مالها اخر
واحيآنآ يجيبها بطريقة مشفر ,.
++++++++++++++++++++++
فاضطريت بعد ماقلتله اخواتي لهم خصوصية ,. قلتله
يا قلبي اخواتي ضحكوا على منظري عشان انه يعني فترة رومنسية وبكلم زوجي ,.
وبقولك هي من الاخر كدة يا فلان ,. انا بعيدة كل البعد عن صنف حريم اهل ابوك ,.
قاطعني وقالي (لا تجرحي)
قلتله انا ما بجرح .. بس لازم اقولك الكلام بالصريح عشان تفهمني لاني تعبت من الكلام المبهم والمشفر
لنا شهر احاول افهمك مو راضي تفهمني ,.
لو انا يا فلان قوية .. كنت ماقلتلك خايفة من اهلك ,.
كنت استنيت الزواج يعدي وعادي اختلط بجدتك اللي مو قادرين عليها واستناها تغلط عليا
عشان اردلها رد ساخن ...
تخيلوا بس خلصت الجملة دي قفل فوجهي ,.
++++++++++++++++++++++
انا يا بنات كنت مستخيرة قبل الكلام دا في الفجر ,. اني افركش الموضوع ,.
وهادي تاني استخارة استخيرها خلال الشهر هذا ..
طبعآ اللي صار بكاني وقمت رحت لاخويا وقلتله اللي نقص من المهر وصرفناه حطه من عندك
وكلمه وقوله انا ابغى انفصل ,.
++++++++++++++++++++++
دحين بسألكم بالله ...
واحد اهله اقويا بالطريقة هادي .. اكمل فالموضوع ولا انفصل من اولها احسن ؟
وعنده عقد كومايات كومايات .. لدرجة يقارني فكل شي ... هل ممكن اشيل العقد هادي منه ؟
انصحوني وعجلوا ,. والله نفسيتي زفت
ولا تنسوني من دعواتكم الحلوة