كيف نجيب اعلى الدرجات مهم مهم مهم

1. نصائحي رح تكون للعلمي والادبي على حد سواء..


2. اياام الامتحانات

بسم الله الرحمن الرحيم..
طبعا انا حطيت هذا الموضوع من واقع تجربة شخصية وحبيت افيد فيه جميع الفراشات وخاصة فراشات الثانوية العامة..
اولا انا متخرجة من ثالث ثانوي علمي حصلت فالترم الاول على 99 والثاني على 98 من مدرسة حكومية وبدون الاستعانة باي مدرسة خصوصية..
وحصلت في مادة الرياضيات في اختبار الوزارة على27 وثلاث ارباع من 30 وكنت من الطالبات اللي حصلوا على اعلى الدرجات في المحافظة والمجموع النهائي كان 98 من 100 ولله الحمد..
الان انا بالسنة الثالثة فالجامعة والى الان تقديري العام ممتاز والحمد لله ..
طبعا قلتلكم هذي المقدمة مو مفاخرة والعياذ بالله بس عشان تتشجعون وتعرفون ان الانسان يقدر يسوي اي شيء اذا حطه في باله وصمم عليه..

نصائحي رح تكون للعلمي والادبي على حد سواء..

اول شيء التحضير المسبق للدرس هذا اكثر شيء يفيدك وانا احس انه افضل بكثير من المراجعة السابقة للدرس ..
يعني امسكي الدرس وخليه على شكل اسئلة واجوبة وتوقعي المدرسة راح تسال اي سؤال وحاولي تحطين له اجوبة نموذجية واذا امكن جيبي معلمومات خارجية يعني جهزي نفسك للدرس عشان تكونين نشيطة ومستعدة للدرس ومتحمسة له لانك فاهمته مسبقا وبكذه راح تفهمين مع الاستاذة اكثروتحفظين اسرع...
اضافة الى انه ثقتك بنفسك راح تزيد لانك مستعدة لاي سؤال وصدقيني ماراح ترجعي تذاكريه ثاني ووقت الاختبار راح تمرين مرور الكرام زي الاخ هذا خ
حتى في مادة الانجليزي ترجمي كل كلمة وكل درس اول باول وحاولي تحطين الكلمات في جمل مفيدة عشان تثبت في ذهنك ..
انا مااستغرب من اللي مايترجمون الكلمات ولا يحاولون يفهمونها وفي الاخير يقولون الانجليزي صعب اكيد صعب اذا انتي مانتي فاهمة ايش معاني الكلمات ..
وتساعدي انتي وزميلاتك كل وحدة تمسك وحدة وتترجمها ولا تقولون مضيعة للوقت صدقوني لما تترجمين بنفسك تحفظين الكلمات ومعانيها اسرع..
وفي التعبير اذا جيتي تحفظيه قسميه الى عدة اجزاء يكون كل جزء يتكلم عن فكرة معينة واربطيها باي شيء عشان تحفظين اسرع ووقت الامتحان اذا جيتي تعبرين اكتبي الافكار بالعربي بالمرسم وابداي عبري عن كل فكرة وصدقيني ان شاء الله ماتنسي شيء..
في اختبار الانجليزي خلى الاشياء الخارجية زي القطعة والمحادثة اخر شيء وابداي باللي تعرفينه وهذا الشيء عمميه في كل المواد..
اما بالنسبة للرياضيات فانا عن نفسي كنت اخصصلها وقت معين مثلا من الساعة 3 فجر للساعة 6 وكنت اول افهم الدرس واجيب امثلة واتدرب على حلها كثير لان الاكثار من حل التدريبات يخليك اسرع في الحل عند الاختبار واذا غلطتي في حل مسالة ارجعي وحليها مرة ثانية وثالثة عشان تثبت الفكرة بذهنك والاحسن انك تقراين السؤال وتحاولين تحلينه باللي تعرفين من دون ماتطالعين في الاجابة واعتبريه سؤال جاك في الاختبار واذا حليتيه تاكدي من الحل واذا طلع غلط ههه لا تزعلين احتمال اشارة او عدد سهيت عنه اعطاك الناتج خطأ اهم شيء المحاولة..
لا تجمعون ملخصات كثير وملازم مالها داعي عشان ماتربكك وحاولي تحلينها اول باول كل درس دوري على الجزء الخاص فيه يعني لا تخلونها للاختبار عشان ماتربككم ..
عن نفسي كنت ماخذ الا اسئلة الثلاث او الاربع سنوات الاخيرة واحلها واتاكد من حلها عند الاستاذة يعني ماكثر وما احاول اجاوب على سؤال الا اذا كانت اجابته موجودة او متاكدة منه عند الاستاذة عشان اتطمن اكثر..
اكتبوا الملاحظات اللي تقولها الاستاذة مهما كانت صغيرة بالمرسم بجنب الدرس يعني قوانين قديمة ومهمة اكتبوها ولا تستهونون بشيء..
واجباتك حليها بنفسك واعتبريها اختبار لك ولا تعتمدي على احد ابدا ابدا اولا بالمحاولة راح تفهمين اكثر واذا حليته وطلع صح راح تزيد ثقتك بنفسك واذا طلع غلط وصححته الاستاذة ماراح تنسينه وبيثبت في ذهنك اضافة انه ربك راح يكافئك على امانتك بالتوفيق,,
طريقة المذاكرة اكيد تختلف من وحدة للثانية شوفي اللي يريحك ولا تتعبين نفسك بشيء مانتي مرتاحة فيه يعني عن نفسي كنت احب اذاكر بالليل واحب اخذ فترات راحة فيه ناس اعرفهم يذاكرون بالنهار وبمدة اسرع لكن نفس المستوى يعني كل واحد يختار اللي يناسبه..
ممكن تتنافسي انتي وزميلتك في الاجازة الاسبوعية من اللي يذاكر احسن ويعطي اكثر بس يكون تنافس شريف مو وحده تحسد الثانية انتبهوا..

اياام الامتحانات

ايام الامتحانات وانتي تذاكري وقبل ماتدخلين الامتحان حطي في بالك انك راح تجاوبين على كل الاسئلة وراح تبدعين في الاختبار وتبهرين استاذتك بتفوقك وذكائك..
اقراي الاسئلة سؤال سؤال وابداي رتبي افكارك بعدين حلى وخلي اجابتك مرتبة ومبدعة عشان الاستاذة تحس بانك فاهمة ولا تقراين الاسئلة دفعة وحدة عشان ماتنصدمين باي سؤال والاسئلة الصعبة خليها للاخير وعادة راح تحلينها لان العقل في البداية يكون خامل وبعدين ينشط تدريجيا الى ان يصل للذروة وفي هذا الوقت تكونين وصلتي للسؤال وحطي اضافتك فيه ولا تخلينه فاضي بس حاولي تكون اجابتك مقنعة ومنطقية ..
اذا خرجتي من الامتحان لا تسالي فيه ابدا ابدا وانسيه انا كنت اهرب من البنات وكانوا يعرفون فمااحد يسالني وحتى لما الاستاذة تجي تحل كنت استاذنها واخرج برا لاني خايفة ياثر علي في المادة الجاية يعني خلاص ذاك الوقت ماينفع تسالين فيه بالعكس ياثر عليك في الامتحان الجاي واذا استلمتي الدرجة اسالي ذاك الوقت عشان تستفيدين من الغلط..
حاولي تدخلين الامتحان ومعاك ساعة (ساعة يد طبعا خ) عشان تقسمين وقت الامتحان وتخلين وقت للمراجعة وحل الاسئلة اللي تركتيها ولا تعطين السؤال اكثر من وقته..
حسنوا علاقتكم مع المعلمات ولا تخلون احد يغلط عليكم وحبوا موادكم وحبوا انكم تبدعوا فيها وكذه راح تعطون فيها اكثر..
خليكي ايجابية وسهلي امورك ورفهي عن نفسك ولا تحرمينها شيء ونامي زين ولا تصعبين على نفسك ولا تحطمينها وانتبهي تقيسي تجارب البنات الفاشلة على نفسك وحاولي تبعدين عن البنات السلبيات ولا تاخذي بكلامهم ولا تجاربهم ابدا ياليت تتخلصين منهم ههه .
اخيرا الثقة بالنفس والتوكل على الله وحب الاتقان والابداع ..
انا اتمنى من المشرفات تثبيت الموضوع لاني اراه جدا مفيد وفي الاخير اي وحدة من الفراشات عندها اضافة لا تبخل علينا فيها ..
تمنياتي بالتوفيق للجميع ..
طبعا الكثير انا ماقلتله لاني ابغى اخلي مساحة للفراشات عشان يضيفون باللي عندهم ..
عام دراسي موفق باذن الله..