لا بارك الله بالعرس وساعته

1. بسم الله الرحمن الرحيم نبدا


2. :::::::::::::::::::::::::::::::::::::::::::::::

هذه القصه قريتها في منتدى ثاني وحبيت تقروها غريبه شوي

بسم الله الرحمن الرحيم نبدا

اشرقت شمس يوم جديد وصار مكتوب في التقويم يوم الخميس .. وبديت استعد لشوفة المعرس حبيبي << اقول الركاده زينه ..
قمت من الساعه 3.30 الفجر .. ومن يوم قمت وانا ادور وادور مدري وش اسوي مره انبطح على بطني ومره انسدح على ظهري ومره ادخل على الحمام اللي في السطح واحوسهم وأطلع .. ومره امسك القطو حقي وانتف شنبه .. والله ذاك اليوم مدري وش جاني .. حسيت اني أجرمت في الناس .. ما بقى أحد ما سلم من شري .. ويوم جت الساعه بعد صلاة العصر عاد مدري كم تجي الساعه انتم ابخص .. قلت خلاص لزمن لزمن اتروش الحين واستعد .. رحت دخلت الحمام .. بعد ما اخذت معي العده .. ودخلت تحت الدش .. وأخذت قطرات الماء تتساقط على جسدي المخملي .. وانا استمتع بكل ذرة ماء تسقط عليه .. آآآآآآآآآآآآآه ما أجمل ذالك الشعور .. والله ياني خشيت جو حسيت كني في لندن ماسكتن يد حبيبي وجالستن اتمشى انا واياه تحت قطرات المطر .. واخذت الشامبو وحطيته على شوشتي الحريريه .. وجلست افرك وافرك .. وانا ما احس بنفسي .. والله ياني استاثمت في شعري ..
وبعدين أخذت الفوطه ولفيتها علي وطلعت من الحمام ..
قسم بالله يومني مريت عند المرايه بدون شعور قمت اصفر واقول ياهوه ياقمييل ايه الحركات دي ..
ورحت وتضبط يوم خلصت نزلت مع الدرج يوم وصلت للدور الارضي .. رجعت ورقيت مره ثانيه .. وعودت ونزلت همن رقيت وعلى هالحاله .. تخبروني عروس لازم اتدرب على صعود وهبوط الدرج عشان الزفه ..
وبعد ما نزلت للدور الارضي لقيت امي كاشختن بشيلة المنيخل ولابستن ذاك الرشرش .. وطالعتن تسننها دلة السيف .. قامت امي ناظرتني والدموع تغمر عينيها .. وقالت لي .. الله يحرستس يا بنتي .. تفو ماشاء الله .. حرام عليتس يمه توني متروشه وتتفلين علي وانتي خابرت سعابيلتس هي أساس التلوث اللي حاصل في الكره الأرضيه ... يابنيتي هذي عشان العين .. تمونين يمه .. اقول بس وين المعرس ما بعد وصل .. الحين بيجي وانا امتس بس هاه لا أوصيت خلتس ثقل .. قمت وطقيت لها الصدر وقلت ماعليتس يمه بنتس قدعه تعجبتس والله لأجننه بثقلي <<< ايه هين .. وجلست اتفرج على سبيس تون لين رن الجرس .. يوم فزيت وقمت احوس في الصاله .. يمه يمه الحقيني المعرس وصل .. يلعن ام الفله خلاص بدينا بالعد التنازلي .. وشو عده حالمتن لينتس في مصارعه حره عشان تقولين عد تنازلي .. وبعدين وين اللي بتركد .. أي والله صح نسيت .. وحاولت اني احبس شعوري ومشاعري وقمت وتمسكت بالكنب عشان ما اقوم .. شوي الا ويدخل علينا ابوي ويقول وين غرور .. قمت انا ورفعت اصبعي .. << مدري طرت على بالي ذا الحركه تذكر ايام الابتدائي .. قال ابوي يله وانا ابوتس تعالي ادخلي عليه خليه يشوفتس .. يوم قام العرق يصب صب مني .. وحسيت اني قمت ارجف .. ورجولي معد شالتني .. وقمت أتأتأ في الكلام .. المهم أخذت العصير ورحتت اقدمه له طبعا انا من يوم دخلت وعيوني في الارض ما رفعتها .. يوم وصلت له الا نص العصير منكب في الصينيه من قوه الرجفان الحمد لله والشكر ارجف تسن ماسكني كهرب خط 220 وعطيته العصير واخذه .. وجلست عندهم شوي همن قمت .. ويوم جيت اقوم وأتذكر كلام مناير وخططها الشريره وتذكرت نقطة الاغراء عند المشي .. وقمت أمشي بمياعه تسني الغزال .. حتى اني سمعت ابوي جالسن يتنحنح مدري ليه .. ويوم وصلت للصاله قمت الهث كني كلب توه لاحق له قطوه.. قالت امي هاه بشري .. يمه وش شايفتي رايحتن اولده عشان تقولين لي بشري .. بس تصدقين يمه حسيت انه جازلي .. مدري حسيت قلببي قام يدق بقوه.. هاو وش ذا الحتسي.. ؟ والله اني صادزه
يمه احس انه أطخم .. تحسين!! ليه انتي ماشفتيه .. تبين الجد يمه لا والله ما رفعت عيني بعينه .. لأنتس خابرتن بنتس الامني شفت واحد أطخم بدون شعور تتصافق عيوني في بعض وأطلع حولا .. ماله داعي يشوفني تسذاا .. ..
ايه الله يوفقتس ويقلعتس عنا ونفتك منتس ومن غثاتس .. مقبوله منتس يمه .. بكره بتتحسفين .. وبتقولين وين غرور وين أيامها .. خلاص معد به أحد تذبون عليه .. وخلاص معدبها حايمتن سبدكم .. افرحي يمه .. بترقصين في عرسي .. وانتي ماسكتن في يدتس أمهات خمس وتقولين للطقاقه ..طقو في آل فلان << آل فلان ذي عايلتنا .. وتنسفين الجدايل .. هههاي .. الحين وراتس تضحكين .. مدري يمه تسني أشوفتس وانتي في عرسي .. تهابدين مع العجز وتسوون عرضه .. هههاي .. اها بس اقطعي واخسي وش ذا الهرج ..
بعد ربع ساعه ... دخل علينا ابوي وهو مبتسم .. وكانت هذه أول ابتسامه أشوفها على خشة الشايب .. لأن آخر ابتسامه شفتها على خشته كانت يوم يفوز الهلال على الدوري الياباني << رجاءا لا تدققون .. وقال ابوي مبروك كلوش .. تخيلوا أبوي ذا الشايب المهستر قام يزغرط .. والله ياني كنت مسويتن لهم زحمه في البيت كلن يبي الفكه مني.. أمي من الفرحه قامت خمت ابوي وقامت تحب حب فيه يوم حمرت خدود أبوي .. وانا تحسبوني يوم شفتهم تسذاا صديت .. لا والله الا فتحت عيوني عشره على عشره .. يوم قال ابوي لأمي مهوب الحين يا بنت الحلال بنتس عندنا .. يوم التفتت علي امي وقامت تأشر لي بيدها هذيك الحركه اللي يعني الوعد بعدين .. يوم شفتها تسذا شلت عمري ورحت لغرفتي .. وجلست أتخيل اني حامل .. واني حاطتن يدي على بطني .. يؤ يؤ لحظه خلوا هالتخيل بعدين مهوب وقته الحين .. جلست افكر وش لون أصمم فستاني << منتيب عاقله يااسمتس ايه .. وجلست على كنبيوتري وارسلت ايميل لإيلي صعب .. وقت له ابيك تصمم لي فستان زواج بيعإد .. همن رحت وخمدت ..ZzZzZzZz
وبعد كمن يوم جتني أمي .. عاد هالمره منيب معلقتن على شكل أمي عشان الدشير ما يفرحون .. وقالت لي غرور خالتس تقول .. أي خاله عندي 12 خاله مشاء الله جدتي الظاهر انها حالفتن تجيب درزن بنات ودرزن عيال قبل لا تموت .. غرور .. ماقد جاتس ذا الملاس على جبهتس << الله يهديها امي جايتني وهي معها الملاس متحمستن مع الطبخه .. الحين انتي وراتس مطيوره ..؟؟ للحين في طفاقطتس ..يمه خلاص طيب ماله داعي ذا الكلام ..اخلصي علي وش تبين وش عندها خالتي .. خالتس ام رجلتس تقول متى ودتس تتملكين .. يمه يقولون دق الحديد وهو حامي .. خليهم يجون الحين .. نعنبوتس كل ذا شفاحتن على الرجل .؟ يمه بالله عليتس وش تلوميني عليه .. انتي ادرى بحياتي .. خلاص انتم ما تبوني وانا ما ابيكم فكوا قيودي .. وش تبون بي .. اسمعيني بس خلاص بقول لها يجوننا يوم الخميس .. الله الخميس كثير يمه .. نعنبوتس مافيتس صبر ..؟ آآآآآآآآآه بس الله يصبرني .. خلاص طيب ..
وفي يوم الخميس استعدينا للملكه .. وظفينا بيتنا .. الله بيتنا صار نظيف أخيرا ..وحطينا العقود على البيت .. واخواني راحوا للحلاق حلقو وتشخصوا .. وامي حطت لها ديرمه على براطمها .. وحنت شعرها قبل بيوم عشان يروح الشيب ويصير برتقالي .. عاد ابوي لايفوتكم .. راح للحلاق وحلق اللحيه وحدد الشنب وصبغته .. ..... .... وانا جتني مناير تظبطتني ..
يوم جاء المغرب شرفوا أهل المعرس .. وصارت هيصه وزنبليطه .. وجيتهم وانا طاقتن الزين وكل من شافني قال ماشاء الله .. وبعد كذا جاني ابوي وهو شايلن دفتر هذا كبره .. وقال لي غرور خذي اكتبي شروطتس همن وقعي .. وأخذته منه وانبطحت على بطني وحطيت الدفتر في الارض وجلست أكتب من هالشروط .. وفي الاخير قمت وبصمت .. وعطيته لأبوي ..
وتعشينا همن راحوا الناس وما بقى الا هو .. جاني ابوي وقال لي غرور يله وأنا أبوتس روحي اجلسي مع رجلتس .. يوم فقيت خشتي .. والله يبه يعني خلاص آخذ راحتي معه .. ايه بس يله روحي شوفيه يحتريتس .. ورحت ودخلت عليه .. هاي .. يومنه شافني فز من مكانه .. وكانت تعلو محياه ابتسامه ساحره .. رحت وجلست قباله .. يقالكم اني مستحيه .. وقال لي غرور .. قلت لبيه .. يوم سمعت منه تنهيده لفتت انتباهي وخلتني ارفع عيوني .. يوم ناظرت وش أشوف .. تدرون وش اول سؤال سألته .. قلت له انت سعودي . .؟ قال شدعوه .. قلت مدري وراك اشقر .. ؟ ونظيف أحس فيك عرق لبناني .. يومنه ضحك .. فديت هالضحكه .. وقال لا يا قبي انا سعودي ابا عن جد .. المهم أخذتنا السوالف .. وما حسينا بالوقت .. والله اني ما انسى ذاك اليوم .. بس فيه شغله لفتت انتباهي .. كل شوي يدق جواله .. مدري من ذا اللي يدق عليه .. المهم انا مادققت على هالنقطه لأني واثقتن فيه .. يوم جت الساعه اربع الفجر عطاني كرت وقال هذي كل ارقامي كلميني اوكي .. قلت اوكي ..
يوم جا يطلع قلت له .. رامي ماودك تطبعها على خدي ... وسويت نفسي مستحيه .. قال الله آبوا اللي يردك يا شيخه ... ومطخني .. مع خدودي هذيك المطخه .. والله انه مهوب عاقل .. ما استحى سعودي ما عليه شرهه ما صدق على الله يلاقي له حرمه .. وراح لبيتهم ..
رحت للصاله وانا أناقز كالعاده واغني .. خروفي خروفي لابس بدله صوفي له قرنين ....الخ الأغنيه .. ولقيت امي جالستن تصلي يوم خلصت قمت اهف هف عليها بالكرت اللي اعطاني اياه وأقولها شوفي .. يقالكم اني بقهرها .. قالت وش ذا؟؟ قلت رقمني .. قات وشو .. ليه في سوق انتي يرقمتس .. صدز انتس قرويه يمه الناس تطوروا صاروا يجون للبيوت عشان يرقمون .. بس عاد اسمعي مالي دخل ابيكم بكره تودوني لمحل الاتصلات .. وش هوله بعد عساتس بتشترين بيجر .. بيجر .. الحمد لله والشكر .. القراوه مشكله .. اقول روحي نامي اصرف لتس .. وباتسر يصير خير..
ويوم جا عصر يوم الجمعه << ما تلاحظون اني خربت معد صرت اقوم الا العصر .. تدرون ليه لأني ظمت الرجال .. رحت لم أخوي .. وقلت له سعيدان قم ابيك توديني لمحل الاتصالات وش هو له بعد ياكثر طلباتس .. ما بعد شفت شي يالزيدي .. قم ودني بروح أشتري جوال ابو كاميرا .. ؟؟ العن ابو كاميرا مرتن وحده .. عما عما والله اني طحت بعايلتن كلهم ينظلون .. خلاص ما ابي منك شي .. لا لا خلاص تعالي بوديتس .. ورحت انا واياه وشرينا الجوال .. و يوم ركبنا السياره وانا داعستن خشتي في الشاشه وجالستن افكر وش احط اسمي في البلوتوث .. ياربي وش احط ..؟ وأخيرا طلعت باسم .. وحطيت ( فاهيه بس داهيه )
المهم دقيت على رامي .. وحاسيته .. وصار كل يوم يجينا ويتكي عندنا لين الفجر .. ويرسل لي بلوتوثات .. وانواع الوناسه والفله (طبعا قصه لاتصدقون )..
ويوم جا ذاك اليوم حددنا يوم الزواج . وقلنا بنخليه يوم الاربعاء ليلة الخميس .. وقلنا بنسويه في الفيصليه .. ودقيت على الطقاقه وحجزتها .. وما زلنا ننتظر يوم الزواج ..
وعلى فكره كلكم يا أعضاء ومشرفين ومهندسين نص كم معزومين على العرس .. ولا تنسون تراه الاربعاء ليلة الخميس ..
قريبا .. ليله زواج غرور ورامي ..
ملاحظه : ممنوع اصطحاب الاطفال والمغاتير ..
الرجاء ابراز البطاقه عند الدخول ..
وعلى فكره ترى الزواج خليطي << كيفي هماني انا اللي كاتبتن القصه خلوني اتخيل على راحتي ..

:::::::::::::::::::::::::::::::::::::::::::::::

جاء يوم الاربعاء .. وقامت الطقاقات يطقون ويغنون .. والمعازيم شرفوا .. وامتلت الصاله وكان من الحضور .. الشيخ جوفنتوس , مطفوقه , ام السعف والليف , توب قيرل , ق ل ق 666 , مضيع بيتهم , اصقعني , ولد الهاص ., برعي . عبسي . صدى الكيرم. ام سلهامه << ترى هذي هي وصدى لقيتهم صافين مع الطقاقات يحمون الطيران .. وغيرهم من الاعاضاء ..
وقاموا يغنون يرقصون ويشكشكون .. وطلعت مواهب الاعضاء في الرقص .. ودقت الساعه الثانيه عشر .. وسكرت اللمبات واشعلت الشموع وصاحت الطقاقه .. يا حريم تغطوا المعرس بيدخل وترى فيه تصوير .. وبعد كم دقيقه فتحت الستاره وسلطت الاضواء على العروس الفاتنه غرور .. وطلعت السندريلا على أنغام اغنيه واتمخطري يا حلوه يا زينه ... وبدأ التصوير والمشي حبه حبه لين وصلت للكوشه اللتي كانت متزينه بأجمل الزهور .. والشموع .. وجلست السندرييلا غرور .. وبعد دقايق .. تسمع الطقاقات .. اذكروا الله يالحاضرين .. همن بدت تطق .. طقا طقا طقا طمبق طمبق .. يا لالاله . يا لالاله .. كل آل فلان قصرهم عالي كل النشاما يدلونه .. ...واغنية ..آل فلان هم أهل الجود والراي السديد .. ودخل المعرس ودخلو معه أخواني وجلس جنبي وسلم علي ابوي واخواني .. همن قالت لهم امي ارقصوا وقامت الطقاقه تغني . . وبعدين قمت انا وزوجي وركبنا الروز ورحنا لفندق الفور سيزنز .. ودخلنا للغرفه .. واول ما دخلنا .. دق جواله وقال هلا زوجتي .. قلت في نفسي .. حبيبي خير وش السالفه ..؟
وبعد عشر دقايق قفل الخط .. وقال لي يله ما ودك تلبسين .. قالت هاه الا .. قال يله انا بدخل الحمام واذا خلصتي طقي علي وعلميني .. يومنه ضاق صدري .. وقلت وراه ذا مهوب مثل الناس خابرتن المعاريس ما يصدقون على لله يدخل هو وزوجته للغرفه عشان يلاطفها وذا بيتوزى في الحمام ..؟ وبدلت ملابسي .. ولبست قميص نوم لونه احمر .. لأن المثل قال : اذا كان حبيبك ثور البس له أحمر ورحت وحطيت من عطر يقولون انه مثير .. ورحت وطقيت عليه الباب .. قلت له حبيبي .. انا خلصت بس محد رد علي واطق مره ثانيه .. حبيبي ..حبيبي .. قلت خلني اصير قوية وجه وافتح عليه الباب .. وفعلا سويتها وفتحت الباب .. لقيته واقفن فوق المرحاض وخايف .. طاريت عيوني فيه وقلت وش فيك .. انزل .. قال لا مقدر .. وش اللي ما تقدر فيك شي .. وقربت قام صرخ .. لا انتبهي فيه صرصور عند المغسله .. صرصور ؟؟! الله يخلف عليك امحق من رجال تخاف من صارور .. لا انا ما اخاف بس اتقرف .. يا حياتي .. وينه بس .. واخذت الزنوبه وطراخ وكانت نهاية الصارور على يد زنوبتي ..قلت له يله الصارور ومات يله اطلع قال طيب شوي اببدل ملابسي واجي .. يوم طلع من الحمام وهو لابس شورت لونه موف وشرابات قصيره فيها خط موف .. بصراحه استغربت من شكله .. طلع من الحمام مدرعم وطب على السرير ولا كأني موجوده .. نعنبوا الا حساس اللي فيه ابن الكلب حطمني .. انا يصير كذا فيني .. وفي ليلة عرسي بعد .. لهالدرجه ما قدرت احرك فيه شي ..؟ رحت اسحب رجولي .. وانسدحت جنبه على السرير وكان معطيني ظهره .. رامي .. رامي نمت .. التفت علي وقال لا .. وش ذا اللي يلمع على شفايفك ..؟ عسى مهوب روج ..؟ هاه روج لا لا هذا انا تو حسيت براطمي ناشفه وحطيت عليها شوي سعابيل .. ايه اشوا على بالي بعد .. وقلب وجهه وعطاني مقفاه وناام ..
جلست انا وحيده كالعاده .. جلست استرجع ذكريات الطفوله .. وطلعت فوق راسي رسمة غيمه شفافه تدور داخلها الاحداث .. تذكرت يوم كنت صغره .. كنت آخذ سروال أخوي السنه وانشبه في راسي يقال انه شعري صار طويل .. واتذكر يوم كنت آخذ زبيريات ابوي والعب بهن تسنهن تلفون .. وتذكرت يومني اروح للبقاله وانا حافيه .. اشتري عسكريم ابو نص وعلك ابو طقعه .. وتذكرت بعد احلى ايام الطفوله اللي كانت برفقة ولد جيراننا الدحمي .. يوم تذكرته طلع لي قلوب فوق راسي .. تذكرت اني احبه .. وكان اذا جاء عندنا بالبيت وفصخ نعاله عند الباب اروح أخذهم والبسهم .. واتخيل اني هو .. الله يا زين الذكريات .. وانا في اعماق ذكرياتي سمعت صوت اثار فيني الفزع .. والتفت لقيته رامي .. الله يقرفه ذا المخيس .. وع ع ع وش ذا الريحه بعد من اولها روائح كريهه .. الشكوى لله يا غرور اصبري و تحملي ..<<< هذي نفسي تقول لي
جاء بكره الظهر .. وقمت والتفت يمين يسار ما لقيت احد .. وين راح ذا القرد .. لحول .. رحت فتشت الغرفه كلها ما لقيت احد ... بعد ربع ساعه .. دخل المعرس وهو فاقن خشته .. وقال لي اقول يا غرور .. نعم .. روحي اجلسي في الغرفه الثانيه .. خويي جا يزورني .. يزورك خير .. ليه حالمن لينك في المستشفى يزورك .. اقول اسمع انت واياه .. ترانا في شهر عسل .. خلك رجال وتسنع لأسنعك ... تراني عطيتك وجه بزياده .. اسمع لكم عشر دقايق وبعدها بيصير علمن ثاني .. طيب خليها ربع ساعه .. قلت عشر دقايق فاهم .. طيب طيب ..
ورحت جلست في الغرفه الثانيه .. وشغلت الدش وجلست اتفرج على قاة المجد .. زمينهم يجيبون شي يوسع صدري .. شوي واسمع اصوات غريبه هاو وش ذا ..؟ لا يكون بس دخلت عليه اللي تنظف وحجرها في قرنه .. يسويها ذا الوصخ .. وقمت وفتحت الباب شوي شوي .. وطليت عليهم .. الله يلعنه ذا الخني** وجع وجع وانا اقول ليه ما يعطيني وجه ليه ما يقررب مني .. ليه وليه وليه .. اثره طلع من قوم وجدي .. عنا الله آبوه على آبو من رباه ذا السلقه .. واقوم واخربها وافتح الباب وادخل عليهم .. قال لي خير خير قلت خير بوجهك .. انزلع انت وتسلبك ذا اللي معك .. الحين انتي وشلون تطلعين عند الرجال بدون ما تتغطين .. رجال انت قلت رجال ... ذا الجنس الثالث الحين ينتغطا عنه .. قم بس الله يصلحك انت واياه لا اوريكم وشلون الرجوله .. قم قامت عصبك وتحنت ركبك .. لعن الله آبو من جمعكم يالدشير .. والا اسمع اجلس انت وسلقتك وكلموا شغلكم .. وانا بروح لبيت اهلي وورقتي تجيني باتسر .. وآخذ الخاتم وانطله على خشمه واروح البس عباتي واطلع ..
وركبت لي لموزين ووصلت لبيت اهلي واروح واتعلق في رقبة ابوي .. الحين انت وشلون تزوجني من مره .. هاه ليه ما سألت عنه وعن اخلاقه .. والا بس تبون الفكه مني .. حسبي الله عليكم .. لكن عقب هذي خلاص يكون في علمكم انا ورقتي بتجيني بكره .. وخلاص .. حرمت احبك احبك ما تحبنيش .. وزواج ما فيش .. سمعتواا..
يله بروح لغرفتي اكمل الاكس اوو X , O
منقول بس أنشالله يعجبكم
أبي أعرف رايكم بالموضوع
هالله هالله بالردود