لا جيت اسولف عن الذكرى بماضينا يضيق فيني الكلام بسبة العبره

لآ جيت أسولف عن الذكرى بماضينا
يضيق فيني الكلام بسبة العبره
ولآ جيت اسولف عن أولنا لتالينا
يضيق فيني المكان اللي على كبره
يا فرحة العمر يا ذكراه نادينا
من خلق ذيك السنين الموحشه الغبره
اللي عليها رمينا كل امانينا
حتى فقدنا الأماني بقلة الخبره
واللي عليها معاني الشوق تدعينا
صوت المعاني حزين ويحتوي نبره
أحلامنا اليخت والذكرى موانينا
نرسي عليها مع الأيام للعبره
و الحاضر المر ضاقت به فيافينا
بعيوننا الكون كنه (سم هالأبره)
أخاف الأيام لا مرت تنسينا
حب ٍ دبور السنين العوج تختبره
نعد الأيام لكن ما تعدينا
معها تعبنا ولا ندري وش الدبره
على طريق الموادع تشر إيدينا
واللي على خبرنا ما هو على خبره
قلنا نتصبر عسى هالصبر يكفينا
يا صبر أيوب في بلواه يا صبره
هذي مواجع عليها الوقت ممدينا
من يوم قدت قميص الصبر من دبره
و الحافي أعظم عسى الله لا يورينا
مكروه الأوجاع و الهوجاس من سبره
(غول المأسي) إذا ما مر يشقينا
نحسب حسابه مع الأيام نعتبره
وما كل من صابنا بالكون يخطينا
و ما كل كسر الخواطر ينفعك جبره
أحيان الأشواق لا قامت تمنينا
من (مهد) الإحساس تاخذنا إلى (قبره)
منقول