لايفوتكم رأي رجل فيما يخص الزواج ههه

الزواج
شسمه
ماتلاحطون يالربع نسبة الطلاق مرتفعة من تالي
ولو امعنا النظر برضو حصلناهم ماكملوا السنتين او السنة والنصف
الا وابو الشباب .. معصب وهو لابس سروال السنة
والركب هالسود .. ومطلقها
وتجيك هي ماتاثرت الموضوع عادي عندها
بس تذكر المسلسلات انهم يطيحون يصيحون لما يقال لهم طالق
فتنسدح ع اقرب مرتبة
وتقول طلأني يالهوي
ناسيه انها سعودية ..
،،
،
انا بحسب خبرتي وتطقسي وسؤالي وبحثي وكل ابو شيء
وبعد تفكير عميق .. استمر قرابة الدقيقتين
ارجع اسباب الطلاق للأمور التالية
النقطة الأولى :
قل الوعي لدى الزوج والزوجة
وعدم تحمل المسؤولية والتدريب عليها
يعني يجيك الزوج مايعرف وش معنى بأطلق إنسانه ..
بكل سهولة يظن ان الطلاق أول حل من حلولة
ولما تسالة .. ليه طلقت البنت .. يقول لك مهيب حلوة
تفو عليك
توك تكتشف انها مهيب حلوة الحين ..!!
واذا مو حلوة .. يعني الجمال هو كل شيء في الزواج ؟؟؟
صحيح الجمال مطلب وأمر كويس .. لكن لما تتزوج البنت وتخلص الي براسك
وتمل .. وتحس بالمسؤولية .. تروح تقول باطلقها ..
وتدور لك اقرب مخرج عشان تعلل سبب طلاقك .. وتقول مهيب حلوة
ولا مهيب ذربة .. ولا عينها اليمنى فيها شعره
ولا حبة خالها في جبهتها .. وقسم اسباب لو امعنا النظر فيها نجدها مررة مررة سامجه
وتاليتها بنت مسكينة ممكن تعيش طول عمرها بدون زوج .. بسبب تصرف احمق
وعدم نضوج عقلي ..
،،
،
بعدين فيه نقطة احب انوه عليها للعوايل الي يقولون سلوم وهياط وماادري ايش
الدين سمح بالنظرة الشرعية .. ليش تحرمون الزوجين من النظرة الشرعية ؟؟
عادات وتقاليد وخرابيط دامها تخالف الشرع .. طز فيها
بعض هالعادات والتقاليد .. خربت مستقبل ناس .. وجاب العيد في ناس
وانتم تقولون عادات وسلوم وماادري ايش
،،
،
نصيحة لكل شاب وبنت .. شوفوا الشوفة الشرعية تراها وربي لها منافع كثيره
خصوصا انتم يالبنات
لاترفضون لما يطلبون الشوفة الشرعية
ع شان لما يتزوجك ويبدى يهياط .. تقولين له انت شايفني يالخايس وقابل فيني
ومقتنع .. لما اخذتني توك تقول هالكلام ...!!
حتى الشباب .. ع شان الشاب المتهور مايجيه ابليس ويقول لوك شايف البنت كان ماتزوجتها
فيحجونه اهله .. ويقولون انت شفتها ياغبي ..
لحظه بارقص شوي احس اني معصب
ايه نعود لمحور حديثنا ونقول
ان غياب الوعي لدى الطرفين .. ممكن يتسبب في تدمير حياة بأكملها
ليه مايكون هناك دورات ملزمة لكلا الطرفين مدتها مثلا شهر
على يد خبراء كويسين ... قبل الملكة ..؟؟!!
يعني مثلا مثل ماهو الفحص قبل الزواج .. يصير فيه دورة مدتها مثلا شهر او اسبوعين
ياخذها كل الطرفين .. توعيهم اكثر وتثقفهم أكثر
ليه مايكون منهج طيب دراسي في الجامعة ؟؟
والله ان خدمته بتعم الكثير ..
المهم مانبي الزواج يكون طقها والحقها يااخوان في ظل وجود هالدشوش والقنوات الفضائية
تشوف هاللبنانيات طابة في طحين وركبتها بيضا
وتجلس تقارنه بزوجتك مثلا لان جسمها كانه ثوب طرار مرقع
كل مترين فيه لون مختلف ( طبعا الامر مبالغ فيه )
جد جد .. ترى القناعة كنز لا يفنى
والواحد يدعي ربه ان الله يرزقه القناعة
لانك مستحيل تتزوج اجمل وحده بالدنيا .. ومستحيل برضو تاخذ اقبح بنت بالدنيا
فكل تبن .. واقتنع ببنت بلدك لبى قلبها
ذرابة وزين وامانه وصدق ووفا وجمال اللهم لك الحمد
النقطة الثانية :
وهذي اخص فيها البنات بشكل كبير
تجيك البنت .. ست الحسن والجمال
وتظن ان الزواج ليلة وردية دائما وابدا
تظن ان الزوج اربعة وعشرين ساعه يبوس ويغازلها ويمدح في فستانها الاخضر والاحمر
تظن انها لما تطلع من بيت اهلها بتفتك من المشاكل والهموم وتبدى الحياة الرومنسية
والطلعات والسفريات الخ
،،
،
يابنتي الحياة الزوجية .. فيها مشاكل مثل مافيها رومنس
تمر احيانا مشاكل بسيطه تحصل بين الزوجين
تجيك الزوجه تضف شطنتها خلاص ملت
تقول وش هالحياة الي كلها مشاكل .. وهي ماصار في الشهر كله الا هالمشكلة
الي ابي اوصل له ان البنت والولد لازم يعرف ان الحياة الزوجيه ضروري يصير فيه بعض الخلافات
البسيطه .. مثلها مثل اي حياة ..
يعني لا تدرعمين وتحسنين الظن واجد في الحياة الزوجية .. ثم لما تعيشين التجربة
تقولين اوف مليت
ثقي تمام الثقة .. انك بتمرين بعقبات في الحياة الزوجية .. حاولي تتجاوزينها بكل سهولة
مثلها مثل اي حياة في الكون لابد من المشاكل الي تمر بين الطرفين
،،
،
وانت ياايها الرجل
ترى الزواج مهوب كله جنس وبس
بعضهم بزر .. كل همه ليلة الدخله ..
ولما خلاص يطفش ويطيح الي براسه .. يبدا يتمشكل مع الضعيفة
ومايعرف ان الزوج فيه مسؤوليات كثيرة .. وحياة جديدة
اهم شيء التخطيط المناسب لهالحياة .. وصدقوني بتعيشون بسلام وامان
،،
،
عندي والله كلام واجد .. لكن عاد تعبت وانا اكتب
خابر ان كلامي ماراح يزيد في معلوماتكم حاجه لانكم تعرفون بهالامور كلها
وانا اتعلم منكم
لكن من باب الفضفضة وكذا
وخروا بس
منقول من ايميلي بس كلامه رهيب