له له يابنات الفراشه زعلتوني منكم متأثره من باب الحاره

أخباركم مع الشوربه والسمبوسه ومبروك عليكم رمضان والله يتقبل منا
صيامنا وقيامنا ..
في موضوع زعلني منكم يابنات الفراشه وكل يوم أقول بنزل موضوع
لكن أنشغل والحمد لله الآن فضيت وقولت ياللا هذا وقتوا ...
كلامي حيكون بإختصار عن أسلوب الرد في المواضيع بأسلوب يرفع ضغط
اللي مايترفع ضغطه ..
تجيكي بنت الله يعطيها العافيه منزله موضوع من الألف للياء كامل مكمل
وتجيكي ردود اللهم ياكافي ...
قريب كنت أقلب في مواضيع أفعى دايما أحب أقرأ مواضيعها لأنها مفيده وأنا أحب أقرأ في الخلطات
وحتى حور الجنان الله يشفيها دايما أقرا مواضيعها المهم
في موضوع للأفعى كانت تتكلم عن رغوة البن لمن نغليه الرغوه عاد انا انبسطت لأني محتاجه
مثل هالخلطات وأجلس أقرا في الردوود أغلب الردود
كيف يعني رغوة البن
أفعى ممكن تنزلي لنا صوره
مافهمت اش قصدك بالرغوه بس هيا ماتلطع رغوه
أنا شكلي سار كدا بنات ماتعرفوا رغوة البن تغليه تطلع رغوه تاخذي الرغوه حقه
تجي زي الفقاعات الصابون لمن نغسل به جسمنا ماتطلع رغوه زي كدا ...
وبالرغم من ذلك الأفعى شرحت لهم ماباقي الا تنزل لهم صوره رغم انو حتى لو نزلت
صوره انا متأكده برضو بيسألوا ..
وغيروا وغيروا وغيروا ودائما ألاحظ حور الجنان الله يشفيها تعاني من هذا الشيء
السؤال ينعاد مليون مرره...وكذا عضوه كمان بس صراحه مايجي في بالي أساميهم
لكن عشان حور وأفعى معروفين هنا بالمنتدى من كدا فاكره اسمهم
يعني مافيكم حيل تقروا الردود وهيا الآدميه بعد ماتعبت ونزلت موضوعها
لا أجلسي كمان أقري الردود وجاوبي على 50 سؤال يكون جوابه نفس الجواب
انتي نفسك لمن يجيك اخوكي او ابنك او او او .. الخ وخصوصا لمن يكونوا صغار
يعيدوا السؤال مليون مرره باللهي أسألكم بالله ماتطفشوا منهم
يابنات ليش ماتقروا الردود بتتعب عيونك وانتي تقري ياحرام
وصاحبة الموضوع عادي عيونها لو انعورت مايهمك شيء أهم شيء انو اتجاوب
على سؤالك ..
يابنات بقول لكم شيء كل وحده تبغى تنزل خلطات تفيد فيها بنات الفراشه
اذا تدور على راحة بالها ترد على السؤال اذا انسأل مره وحده
وان جات عضوه وسألت نفس السؤال لاتردي عليه ولمن تشوف وحده منا
انوا صاحبة الموضوع ماجاوبت على سؤالها تعرف انو سؤالها انذكر قبل
والردود العجيبه الغريبه المثل يقول قل خير أو اصمت ماعجبكي الموضوع
لاتردي ماحد جابركي يابنت الناس لا لازم ترد اذا ماردت مايبرد قلبها
يابنات الأسلوب في الرد وين
لمتى بنظل كدا
والمشكله الكبرى ياليت بعد هذا كله نسويها الخلطه ونستعملها وان استعملناها فتره
بسيطه وبطلنا وغيرنا لخلطه ثانيه يابنات التزموا بخلطات معينه شوفتي منها فادت شعرك
خلاص خليها هيا خلطاتك لطول العمر . .
وفي شيء كمان حز في خاطري كثير والله لو اني مكان الأفعى الحنونه
أسيب المنتدى بكبره ولاعاد أعطي أحد خلطات وأفيده وأروح بخبرتي أبيع
خلطات أكسب ملايين الخير اللي من وراه تعب ماأبغاه ...لكن هيا عشان حالفه انها ماتبيع
خلطات وانها بخبرتها في الأعشاب تفيد البنات بدون مقاابل
أنا أقولكم القصه موضوع التجمع حق الجزء الأول وكان عددنا يمكن 20 عضوه
وكل وحده ذكرت مشكلتها وأعطتها الخلطه اللي تناسبها والأسأله تتعاد
من ثاني في موضوع التجمع وهيا برضو تجاوب يعني البنت تعبت
وكانت طالبه شيء بسيط من البنات انو لمن ينتهي موضوع التجمع
كل عضوه تنزل برنامجها في موضوع ... ووين اللي نزلوه يمكن هم 6 بس من 20
اللي نزلوا وين البقيه
هيا التزمت وجاوبت بكل أسألتكم وفي النهايه طلبت منكم طلب ومالقيت طلبها اتنفذ
وياليته شيء صعب شيء ماياخذ حتى 5 دقايق مقارنة باللي سوته لكم
أنا ممكن إني أذكر أساميهم هنا ولكن أنا حهملهم ليين بعد رمضان يمكن مشغولين مع رمضان
أما لبعد رمضان لا أنا ولا الأفعى الحنونه مسامحينهم لأنو صراحه الأفعى تعبت
أسأله في الموضوع ورسايل تترسل لها وو .. الخ وهيا تجاوب عليهم كلهم
وفي النهايه بإش انتوا جازيتوها ..بس بينها وبينهم رب يحاسب
وبإذن الله بنات الجزء الثاني يفرحووها ويتلزموا بكل شيء ونشوف مواضيعهم
أما اللي اللي التزموا من بنات الجزء الأول ونزلوا مواضيعهم فالله يعطيهم ألف ألف عافيه وهذا أنا أدعي لهم وأنا صايمه ...
سألتكم بالله يابنات وين نلاقي في هالزمن وحده تجي تساعدكي بدون مقابل
مافي كل شيء سار بمقابل وان ساعدتكي بدون مقابل يجي يوم وتذلك
عالمساعده دي وتقولك فاكره يوم اللي سويت لك وسويت لك صح واللا لا ..
وترا على فكره أفعى مره مالها دخل بالموضوع هذا ولا جات وقالت لك نزلي
موضوع واشتكي لانو لو تبغى تشتكي وتعطي تهزيئه للبنات كانت سوت اخس مني
لكنها انسانه خلوقه ومشت الموضوع بدون ماتعطيه اي تفكير عشان ماتتعب
والله ثم والله يندر وجود أمثالها وأمثال كل بنت هيا بنفسها جابت الخلطه وجربتها على نفسها
وأعطت أخواتها عشان تساعدهم .. والله يسعدهم ويرزقهم كل مايتمنوه زي ماأعطونا
اللي نتمناه من شعر ناعم وبشره صافيه.. ومن جد لو أجلس أدعي لها الأفعى من اليوم
لبكره ماحكون وفيت لها حقها لأنو شعري في تحسن كبير وين أول ووين دحين وأنا
في استمرار مع كل جديد لها وحستمر على جدولي اللي أعطتني هو لمدة لاتقل عن سنه
وحعتبرها مده علاج لشعري وأجيكم بعدها إن شاء الله وأقولكم وش سار بشعري ..
وكلامي اللي في بداية موضوعي طبعا ماأخص فيه كل بنات الفراشه لأنو في بنات
ماشاء الله عليهم ^_^ ..