ليت الزمان يعود قصتي الاولى الجود الكويتيه

بسم الله الرحمن الرحيم
السلام عليكم ورحمة الله وبركاته
انا ماهمني الفرح ولا للحزن مشتاق بس ليه يادنيا اذا بضحك تبيكني
( ليت الزمان يعود )
قصه رومانسيه حزينه
أحب اقول ان هذي اول روايه لي طبعا اهي كويتيه ... اتمنى انها تعجبكم وبعد اتمنى ردودكم عليها
تحياتي : الجود الكويتيه
اول شي اعرفكم بالشخصيات :
الجده نوره زوجة الجد محمد الله يرحمه جابوا ولدين وبنت .
الولد الكبير ناصر زوجته عليا ساكنين مع الجده جابوا :
فهد : عمره (23سنه) طيوب وحبوب ويدرس هندسه
رهف: عمرها (17سنه) وهي نحيفه حيل يعني باللغه العاميه نتفه بس هي حلوه كثير
شوق: عمرها (15سنه) تدرس بالمتوسط وهي فيها صفه مو حلوه وهي الفتنه
الولد الثاني علي زوجيه وضحه جابوا :
نوره : عمرها (26سنه) متزوجه ولد عمتها حمد وعندهم بنوته صغيرونه اسمها ارياف عمرها 5 شهور
منيره : عمرها (20سنه) تدرس بكلية التربية الاساسيه تخصص اقتصاد منزلي وهي محيره حق ولد عمها فهد
سلطان: عمره (10سنين) يدرس بالابتدائيه
نوف: عمرها (سنتين)
البنت الاخيره رفعه زوجة صلاح ولد خالتها جابوا :
حمد:عمره (28سنه)
سعد:عمره (24سنه)ويشتغل في شركه
ساره:عمرها (19سنه) وايد حلوه بيضه حيل ونعومه وجسمها روعه وشعرها اسود وطويل (بطلة القصه )
دلال:عمرها (16سنه) تدرس بالمتوسط وتموت في بنت خالها شوق
@@الجزء الاول @@
في بيت الجده قاعده اتريق مع عليا زوجة ولدها ناصر
الجده : يابنيتي ماقومتي عيالج مابقى شي على صلاة الجمعه
عليا :عجزت وانا اقوم فيهم مو راضين
شوي وينزل زوجها ناصر مع ولده فهد
ناصر : هذا انا يمه قومت فهد و الباقين اللحين يقومون
الجده : ماشالله عليك ياولدي محد يعرف لهم إلا انت وشلون قومتهم يامك ؟
ناصر وهو يضحك : رشيت عليهم ماي وفزوا من نومهم متروعين
عليا: يمه عيالي لا يلبسهم شي حرام عليك
فوق بنفس الوقت بغرفة رهف
رهف : يوه يا ربي الواحد ما يقدر ياخذ راحته حتى بالعطله . شوي ولا يدق تلفونها وشلته : رشا انا اللحين مو فاضيه لج دقي بعد شوي
رفيقتها رشا : لحظه لحظه شفيج يالمطفوقه
رهف : قلت لج اكلمج بعد شوي يله
رشا وهي تضحك :يله يله باي
اما شوق راحت اتسبح وهي قاعده اتحلطم
في بيت علي
منيره: يمه نوره متى بتجينا صار لها اسبوع ما جاتنا
سلطان: الله الله اسبوع يالظالمه توها كانت عندنا قبل يومين
منيره : وانت شكو ولا اشرايك اسولف وياك انت ونوف
سلطان : لا حبيبتي انا ما اتنزل واسولف ويا بنات
منيره: اقول اسكت اسكت بس وشدعوه انا ابي اسولف وياك
الام :خلصتوا ولا بعد ترى صجيتوا راسي ... وهي اتطالع سلطان يله انت قوم توضى وروح المسجد
سلطان : اصلا انا قاعد انطر ابوي عشان اروح وياه
منيره وهي تضحك : ياحبيبي ابوي رايح من زمان مسوي نفسك بار
في بيت البنت رفعه
رفعه : بنات ترى العصر بنروح عند جدتكم
دلال : صج .. والله مشتاقه حق شوق
ساره :عاد من زين سوالفكم كلها عن الممثلين و المغنين وانا احب هذا وانا اكره هذا ..يالمراهقات
دلال : وخر عنها العاقله حبيبتي ترى انتي بعد بعدج مراهقه
ساره : على الاقل مراهقه عاقله مو مثلج
بيت الجده بعد صلاة الظهر في غرفة رهف
رهف مسكت تليفونها قاعده اتدق على رفيجتها رشا
رهف : الو
رشا : نعم يالمزعجه
رهف :تكفين منو المزعج اللحين .. في احد يدق الساعه 11 ولا الجمعه بعد
رشا : خلينا اللحين إلا ما قلتي لي شخبار احمد
رهف بعصبيه : اسكتي يالحيوانه لحد يسمعج
رشا: لا تخافين ترى ما عندي احد
رهف : زين
رشا تحاول تستفزها : بس زين
رهف :شتبين اقول لج يعني
رشا : كل شي
رهف : هذا احنا كل يوم نتهاوش رشووه زهقت منه ما عندج غيره ؟؟
رشا : حلوه هذي ماعندج غيره حلاو اهو !!
رهف :تدرين انا الغلطانه اللي داقه عليج على بالي عندج سالفه
رشا وهي تضحك : خلاص حبوبه لاتزعلين اضحك وياج .. وما عندي غيره كلهم انا حجزتهم ههه قزريها عليه
قصة رهف واحمد :
"رهف كانت مشتركه بباص وانتوا تعرفون اللي يشتركون بباص لازم الشباب يلاحقونهم احمد هذا كان دايما يلاحقها وهي مو معطيته وجه بس ما خلاها كان كل يوم يلاحق الباص اللي هي فيه
ليما اخذت رقمه هو من البدايه كان يكلمها عادي بس بعدين صج حبها "
العصر في بيت الجده
رفعه توها نازله من السياره هي وبناتها كان جايبها ولدها سعد
الجده : هلا والله بالغاليه
رفعه وهي تسلم على امها : اشلونج يمه ؟؟
الجده : الحمدلله
بعد ماسلموا البنات ...
رفعه:يمه وين عليا ماشفتها ؟؟
الجده : والله ما ادري عنها اكيد انها فوق
ساره : انا بروح فوق عند رهف
راحت ساره فوق ودقت الباب على رهف ودشت اول ما دشت رهف صكرت تليفونها بسرعه
ساره : شفيج ؟ ليش صكرتي تليفونج ؟
رهف تبي تغير الموضوع :ولا شي ..وراحت سلمت عليها : تعالي اقعدي حياج
وبعد ثواني دق تليفونها مره ثانيه قعدت ساعه اتطالع التلفون واتطالع ساره
ساره : شفيج ردي ؟؟
رهف بارتباك : لا هذي رشا مالي خلق اكلمها
ساره : زين يمكن تبيج ضروري ؟؟
رهف : لا ادري ما عندها سالفه
ساره : براحتج ...
وبعد المغرب اجتمعت العايله كلها
الجده تكلم سعد : يمه متى بتتزوج شوف شعرك بيَض وانت موراضي ؟؟
سعد وهو يضحك : الله يهداج يا جده توني شباب كبرتيني
الجده بجديه : انا اكلمك من صجي شوف كل اللي بعمرك تزوجوا
سعد : يله على ايدج دوريلي انتي
الجده بعصبيه : انا اكلمك يا ولد صج مو اتغشمر وياك
سعد بابتسامه : وانا بعد من صجي دوري لي
امه وضحه وهي تيبب : قلولولولولولولولولولوش هذي الساعه المباركه يمه جعلني اشوف عيالك ان شالله
سعد : آمين ويطول بعمرج ... وانا ابي بنت عمي ملاك
وبعد تقريبا اسبوع سعد كلم ابوه وراح هو وياه لعمه ووافقوا عليه واخطبوله ملاك وتحدد العرس بعد شهرين بالصيف
@@الجزء الثاني @@
في اليوم الثاني في الصبح
بالتحديد بالكليه
بالكفتيريا ساره ويا رفيجتها غاليه
ساره : أوف ما تصدقين شلون طفشانه من البيت
غاليه : ليش ؟ عسى ما شر ؟
ساره : شسوي سعد وماجد على طول برى ودلال يا تشوف التلفزيون يا تكلم بنت خالي شوق
غاليه : ولا يهمج لا تضايقين روحج .. شرايج تجيني اليوم في البيت
ساره : اشوف بكلم ابوي واشوف منو بيجيبني
غاليه : حياج الله
ساره بابتسامه : الله يحييج
الثانويه بالفرصه
رهف : اقول لج لاعت كبدي منه هو ويا فلافله على طول يزعل كنه حرمه
رشا : يالخبله يزعل منج لانه يحبج
رهف : اقص ايدي اذا كان في شاب يحب بنت كلهم يقزرونها علينا واحنا المساكين مصدقين
رشا : وانتي شوراج اذا كنتي فاضيه وزهقانه كلميهم واستعبطي عليهم.. تقضين وقتج
رهف : على قولتج
بالمتوسط
شوق : امبييه دلول هذي اول مره اهرب من الحصه خايفه
دلال : صج انج ياهل .. حبيبتي لا تخافين عادي الكل يهرب
الاخصائيه طالعتهم من بعيد ونادتهم من وراهم وهي ترفع صوتها : اللي هناك تعالوا
شوق بخوف : كنه في احد ينادينا من ورى
دلال وهي تمشي بسرعه :امشي سوي روحج ماتسمعين
شوق : لحظه بشوف منو !!
الاخصائيه : تعالي تعالي انتي
شوق : امبيه تنادينا بات مان (الاخصائيه)
دلال : عز الله رحنا فيها
شوق : حسبي الله عليج كله منج
الاخصائيه : شتسوون
دلال : كنا بنودي دفاتر الرياضيات
الاخصائيه : لا والله وينها الدفاتر
دلال: !!!!
شوق بترقعها : وديناها و كنا رايحين للصف >>> واجد تصير معاي
الاخصائيه : لا حبيبتي هذي الحركات ما تطوف علي يله قدامي اكتبكم تعهد يله
وكتبوا تعهد اهمال ورجعوا لصفوفهم
في بيت الجده
الجده و فهد ورهف وشوق قاعدين بالصاله
الجده : رهف انتي موتقولين عندج امتحان بكره ليش ما تروحين اتذاكرين
رهف : تو الناس جده بشوف المسلسل
فهد : اي تو الناس الساعه اللحين سبع ونص وما درستي شنو امتحانج بكره ؟
رهف وهي تحط ايدها على راسها تتذكر وتقول : بكره ام علم نفس
فهد : حتى ما تدرين شنو علبج قومي قومي خلي منج الخرابيط يله قومي ادرسي
رهف وهي تقوم : اوف خلاص لا تصجون راسي كاني رايحه
شوق قامت وقعدت عند التلفون : الو
رفعه : هلا ببنيتي
شوق :عمتي اخبار دلول ؟؟
رفعه : توج شايفتها بالمدرسه
شوق : قصدي اخبارها بعد التعهد ؟
رفعه : اي تعهد ؟ وكان عندها ولدها ماجد
شوق : ليش ما قالت لج ؟
رفعه : لا
شوق خافت تقول يمكن دلال ماتبي تقول : خلاص عمتي مع السلامه
رفعه : مع السلامه
ماجد: من اللي عنده تعهد دلول صح ؟
رفعه بتردد : اي .. الله يوفقك ياولدي لا تضربها
ماجد بعصبيه وهو يقوم : يعني تنطرين لين تنفصل انا اوريها
قام وهو ينادي اخته من تحت : دلول دلول
طالعته دلال من فوق : خير ان شالله شصاير ؟ ليش تصارخ ؟
ماجد بعصبيه : شمسويه اليوم في المدرسه ؟؟
دلال بخوف وقالت اكيد ان شوق قالت لهم : ما سويت شي
ماجد وخلاص قام يطلع دخان من اذونه من العصبيه وهو يصعد على الدرج بسرعه : بعد تكذبين انا اوريج يالكلبه
دلال وهي تركض رايحه لغرفتها بسرعه وقفلت عليها الباب وقعدت تبكي من الخوف لان المعروف عن ماجد ان عصبي كثيروكم مره يطقها من كثر تعهداتها : والله ما سويت شي
ماجد وهو يصرخ : اجل ليش مكتبينج تعهد
دلال وهي تبكي : عشاني طلعت من الحصه
ماجد وهو يتوعد : هين بس اطلعي و الله لكسر راسج
دخل عليهم صلاح هو وعكازته : وش ذالصراخ
رفعه : لا تشغل بالك يله تاخرنا الساعه ثمان
صلاح : يله انا في السياره
سعد وصل ساره لبيت رفيقتها
سعد : الساعه تسع بالضبط بجي
ساره : اوكي بس دق علي زين ؟
سعد: زين يله
ساره : باي
نزلت من السياره طقت الباب وفتحته الخدامه ..
واول ما دخلت لقت غاليه قاعده في الصاله
غاليه : حيا الله من يانا هذي الساعه المباركه
ساره : الله يحييج وساعتج ابرك
غاليه : منو اللي يابج ؟
ساره : أخوي سعد
غاليه : إلا ما قلتي لي متى عرسه
ساره :بعد شهرين ..تقريبابالصيف
غاليه : الله يوفقه
ساره : آمين ... تعالي وين امج ما اشوفها موجوده ؟؟؟
غاليه : امي عند خالتي اخذي راحتج مافيه احد بالبيت حتى اخوي عبدالله قلت له لا تجي إلا عشر
في بيت الجده على الساعه تسع إلا ربع
في غرفة رهف كانت تكلم تليفون
رهف : اقول لك والله كنت اكلم رفيقتي
احمد بعصبيه : لا والله ساعتين وانا ادق كل يعطيني انتظار
رهف : ليش يعني تشك فيني ؟
احمد : انا ما اشك فيج بس ...
رهف : خلاص ماله داعي اتكلم انا فهمتك اللحين عدل وشلون تفكر انا لازم اصكر اللحين يله باي
احمد : .............
ناهض رفيق احمد من كانوا صغار ويحبون بعض حيل وما يخشون عن بعض شي : شفيك معصب
احمد : زعلتها
ناهض وهو يضحك : منو هذي بعد ؟؟
احمد : في غيرها
ناهض يتطنز : واجد
احمد : شوف انا مالي خلق لمصخرتك .. ابي اراضيها شلون ؟
ناهض : انت آمر ولا يهمك
احمد : ابيك تكلمها وتقول لها ان مو قصدي اشك فيها
ناهض باستغراب : طيب ليش ما تقول لها انت ؟
احمد : ادري انها ماراح ترد علي
ناهض : خلاص عطني رقمها .
احمد عطاه الرقم
ناهض : ............
احمد : شفيك دق عليها اللحين
ناهض يضحك : يا رجال شفيك تركد بعدين ادق عليها
في حدود الساعه التاسعه و الربع
في بيت غاليه
ساره : سعد طول ولي اللحين ما دق علي
غاليه : تو الناس ما صار له ربع ساعه اكيد اللحين ياي بالطريج
ساره : بس جهازه مغلق ما ادري ليش
غاليه : لا تشغلين بالج الحين بيدق عليج
جات الساعه تسع ونص ... عشر إلا ربع ... عشر لي اللحين ما جا
ساره بخوف : هذي اول مره يسويها دايما يجي بالوقت المحدد
شوي ولا يدخل اخو غاليه عبد الله ماشالله عليه يخبل لونه برونزي وعيونه عسليه وطويل وجسمه روعه كان لابس دشداشه وشماغ واو شكله رزه عبد الله ما كان يحب يلبس وعمره 24
البدلات اللي طايحين فيها الشباب هالايام
عبدالله شاف البنت اللي قاعده وعرف انها رفيقة اخته غاليه
عبدالله : السلام عليكم
غاليه : وعليكم السلام
ساره بخجل ونعومه وهي منزله راسها وعليها شيلتها : وعليكم السلام (كانت تقول بقلبها يا فشله اللحين الرجال بيقول هذي قعدت ماعاد قامت )
عبدالله ظل واقف
غاليه استغربت منه وهي تقول بقلبها هذا شفيه تصلب : عبدالله ياهوه شفيك تصلبت
عبدالله بعد ما انتبه : احم احم عن اذنكم
بعد ربع ساعه ساره اجهشت بالبكى : ما قلت لج اكيد صاير شي انا حاسه سعد اول مره يسويها فيني
غاليه تحاول تهديها : طولي بالج حبيبتي اذا تبين تروحين اقول حق عبدالله اخوي يوديج
ساره : لالا تبين اخواني يذبحوني
غاليه : انا بروح وياج
شوي ويدق تليفونها كان رقم بيتهم
ساره : الو
دلال كانت تبكي بالم وتصارخ : انتي وينج
ساره والخوف بدى يظهر عليها : شصاير قولي ؟
دلال وهي تبكي : امي وابوي
ساره تبكي : اشفيهم تحجي ؟
دلال : ..... (تبكي )
ساره : دلول شفيج قولي لي شفيهم امي وابوي ؟
دلال تبكي وتتكلم كلام مقطع : .. ما .. ماتوا بحادث
ساره : ..............(كان يرن في اذنها كلمة ماتوا ماتوا ماتوا من الصدمه ما قالت شي طيحت التليفون من ايدينها وسكتت )
غاليه لاحظت شكل ساره وكان على راسها علامة استفهام كبيره : ساره .. ساره ..حبيبتي شفيج ؟؟؟
بعد خمس دقايق استوعبت ساره ان اهلها ماتوا وفجأه قعدت اتصارخ باعلى صوتها صرخت الم .. حزن .. حسره
غاليه وهي تضمها ومخترعه : شفيج ؟؟ ساره ؟؟ردي علي؟؟ تكلمي ؟؟
كان عبدالله فوق سمع صوت الصراخ قال اكيد في شي كايد طلع من غرفته مثل الصاروخ يبي يشوف شالسالفه