ماخبرتكم عن أسراري في التعطير صح

نهاركم أزكى من المسك والعنبر...نهاركم سعادة وراحة بال.. .
كتبتلكم ذأه الموضوع...لأنو مافي أحد ماسألني عن ريحة عطري...حتى اللي أخذتهم العزة وماسألوني...سالوا من ورايا...ويعلم الله اني بحياتي ماقاوحت أو لفيت ودرت بالاجابة ...
وأنا أكيدة انكم ماعليكم نقص...ولا انكم محتاجين لتوجيه وتعليم...بس حبيت أشارككم...وأوفي العهد اللي عاهدت فيه نفسي...اني ماأخبي أيّا فايدة حتى لوكانت زغيرونة...
أول شي بخبركم عنو...انو نوعية الأكل لهادور كبير...
أنا نباتية...أحب الفواكه ( ماشاء الله لاقوة الا بالله)...ومن صغري وتلاجة أهلي ماتخلى من العصائرالفرش...بالذات الجوافة والفراولة والجزر...
أنا والطبخ واللحوم والبهارات أعداء...
وشرب المويابكثرة ينظف الجسم من السموم والافرازات...
والله يابنات كنت أيام الجامعة آخذ شور بسرعة وأروح...وزميلاتي يسألوني اش اللوشن اللي تستخدميه؟؟؟وأنا والله ماأكون حاطه ولا شي...
جربوا بس اسبوعين...وشوفوا كيف...بس شمي يدك أو افركيها راح تتفاجئي من الريحة...حتى شعرك لو حركتيه بيدك كأنك معطرته...
لو ركزتي ع أكلك...حتى العطور حتطلع معاكي مميزة...
هذي أول أسراري...وجات ربانية من غيرتعمد...
بالنسبة للتعطير الخارجي...
مؤمنة باختلاف الأذواق...عشان كذا راح أكتب عن ذوقي الخاص...لاتعتبروا حكيي انوضد أذواقكم...هو مجرد ذوق شخصي...
أول نقطة أنا ضدها وأبتعد عنها...هي اني أستخدم الست تبع العطر كامل...مثلا لوكان العطر معاه سبراي وباودر ولوشن و و و ...ماأستخدمهم كلهم...
صح انها راح تقوي العطر وتظهره...بس في المقابل راح تخلي الريحة واضحة معروفة وتبين انها عطر...والناس راح يعرفوا انو انتي بتستخدمي العطرالفلاني...
واللي أنا أسويه اني أستخدم روايح متشابهة...مثلا لوكان العطربارد أستخدم البودر والسبراي واللوشن بنفس درجة البرودة ومتقاربة...لأنها بالأخير كلها مع بعض راح تديكي ريحة مميزة...وناعمة...بعيدة عن الصداع اللي يسببوه كثير من الحريم...<<< ترا والله أعاني من ذأه الشي لاتلوموني...
ثاني نقطة مستحيل أسويها...اني أستخدم عطر باريسي بالصباح...
صح في عطور باريسية للنهار وعطور لليل...بس مو عاد بالصباح ع الساعة 7!!!!!!!!!؟؟؟؟؟؟؟؟؟
أكره العطورالشرقية والعودأكتئب منو...ماأحب العطوراللي تجي ع ريحة حلاوة أو نكهات...ولاالعطور المبتذلة الواضحة...
ماأعترف بالعطورالقوية...ولاأعترف برش العطر أكثر من مرة...وتكرار الرش كل ماتمر فترة من الوقت...
حكتبلكم الطريقة اللي اتعودت عليها من زمان...
بعد الاستحمام بأيّا شورجل...
أرطب كامل جسمي بلوشن بيبي جونسون الوردي...وقبل لايجف اللوشن أوزع بودرة اترنتي من أجمل...
آخذ نقاط من المسك الأبيض من العربية...تراه أفضل بمليون مرة من مسك القرشي...وأمسح فيه الآباط وتحت الصدر وبين الأفخاذ وحول السرة...بدون ماأكثر بس شي بسيط...
بالصباح أستخدم ( السبراي)...لأنو أخف وناعم بنعومة الصباح...وأنصحكم بالسبراي اللي بمكياجي...خوذوا اللي يناسبكم...واللي أحبه وأستخدمه هو بكوكتيل الزهور...
ونصيحة ابعدوا عن السبراي اللي ببدي شوب...لانها مرة قوية وثقيلة...وتكتم ع نفسك ع الصباح...بجد أحكيلكم تراها تصدع...
ام في طريقة ثانية...بس هذي أسرارها كثيرة...وصارلي عليها فترة طويلة...واللي لاحظت...اني كل ماأسويها يسألوني عن ريحتي...بشكل ملفت...
استخدم لشعري بلسم البيرتو بريحة التوت البري...قدماأحكي عن ذأه البلسم ماأوفيه حقه...
ولجسمي شور جل أروما مساج من دوف...بعدماأجفف جسمي...أمسح كامل الجسم بمناديل الأطفال...وأفضل شيبز...
أرطب كامل جسمي من الرقبة لأصابع أقدامي بلوشن بد تايم من جونسون...( اللي يجيبوه باعلان حكاية ماقبل النوم)...
وبنفس الطريقة قبل لايجف اللوشن...أوزع بودر اترنتي من أجمل...
استخدم سبراي فيم فرش ل.............!!!
عندي تولتين من زهور الريف...( ذأه سري الكبير)!!!
وحدة خليط من سويت كاميليا مع شجرة الشاي...والثانية خليط من قلامور قيرل مع شجرة الشاي...
لما تروحي لزهور الريف وتطلبي منه يخلطلك الدهنين سوا...خليه يخلط النسب شويّا شويّا...ألين ماتوصلي للنسب اللي تناسبك وتعجبك...
تراهم مميزين ويجننوا...وسعرالتولة 30ريال...يعني بلاش بالمقارنة مع ريحتهم...
كل مرة أستخدم واحد منهم...آخذ منه نقاط وأمسحهم خلف شحمة الأذن وتحت الصدر وحول السرة وبالثنايا......
وسبراي كمان من زهور الريف...وهو خليط من عطر الريف وعطرمايا...ونسبة مايا قليلة مرة بالمقارنة مع الريف...
وسعرالسبراي 70ريال...
بالمسا أسوي نفس هذي الخطوات مع رشة من عطر باريسي...ومن عطوري اللي ماأستغني عنها ألين البنفسج...
جربي وشوفي كيف راح يتخبلوا الناس ع ريحتك....واللي تحب الروايح الباردة الناعمة اللي كلها نظافة وتميزوغموض راح تعجبهاالطريقة...
في خطوة وهي الاستحمام كل صباح وقبل النوم...مانسيتها...بس اتجاهلتها عمدا...لأني متأكدةانو مافي أحد يبدأ يومه أو ينام بلا شور...
لي طرقي الخاصة بالسهرات والمناسبات والزيارات...راح أذكرها بموضوع ثاني باذن الله...
بعدهذي الريحة الحلوة...انتبهي تمري برجال أجانب...تذكري ان الجسداللي عطرتيه نهايته راح يكون وجبة دسمة للدود...
منقول