مالي غيركم استشيره بدون مشاكل امانه ردو

1. الموضوع ومافيه

السلام عليكم
كيف حالكم يافراشات عارفة اني طفشتكم كل فتره اجيكم بمشكله بس صراحة مالي غيركم استشيره بدون مايصير مشاكل وقصص توجع الراس او احد يشمت فيا ويتريق عليا

الموضوع ومافيه

انا قبل ما اتزوج كنت عايشه عيشه رفاهية ودلع مع انه وضع اهلي المادي متوسط بس كنا كل شي نطلبه نلاقيه والاهم من كدا كان ابويا يعطينا المصروف بس مايسألنا وين ودينها ولا كم حوشنا حتى العيديه ماله فيها ان شاء الله نحرقها هدي فلوسك وانت حرة وانا اتعودت على كدا وصرت اعتمد على نفسي فكل شي واجمع فلوس واشتري كل شي
الان انا صارلي سنه ونص متزوجة والحمد الله زوجي مو حارمني من شي مع انه برضو المستوى المادي متوسط بس والله شايلني من عن الارض شيل بس اقوله جاي على بالي كذا ولا نفسي فكذا وانسى اني قولت الاقيه عندي كأنه عندي المارد والمصباح
بس الفرق بين عيشتي ايام اهلي والحين انو زوجي يكره ويموت ولا يكون معايا فلوس (انا ربه منزل) بمعنى موضوع المصروف انسيه .العيديه لما تيجيكي اشتري الي تبيه والباقي منها يرجعلي حتى مباركة المولود من دحين يشرط عليا انه هوا ياخدها ويجبلي فيها الي نفسي فيه يعني مثلا نفسي فقطعة دهب غاليه ياخد المباركة ويكمل عليها ويجبيلي المهم مايكون معايا فلوس
وهدا الشي ماتعودته عليه انا اتعودت الي ابيه اطلع من جيبي واجيبه ماحد يقولي شي بس برضو الصدق الي ابيه هوا يجبلي اياه زي ماقولت فالاول
صراحة لو قولت هدا الموضوع لحد من قريباتي هتصير تقولي كيف وماترضي وهتسوي فيها الفهيمه
صراحة لما افكر فهدا الموضوع ويكون نفسي اقوم اتقاتل معاه واقوله ابي مصروف وعيديتي وانا حرة فيها ارجع اقول ايش لازمه الفلوس دام انه مو حارمني من شي بس اطلب واتمنى حتى لو جات فتره وماطلب شي يجي ويقولي نفسك فشي اجيبلك شي ماتستحي اطلبي
وفي نقطة مهمه لما اخرج لحالي بيعطيني فلوس بس لما ارجع من المشوار ارجعهم له
فيابنات ايش رأيكم امانه قولولي اروح اتقاتل معاه واقوله عيديتي لي انا وانا حرة فيها ولا اشتري الي ابيه واعطيه الباقي من سكات؟؟؟؟؟؟؟؟؟
على فكرة انا بقول يمكن الحاله الي عند زوجي سببها عقده من امه لأنها كانت تشتغل وفلوسها ليها لحالها تتصرف فيها على كيفها ودايما يصير مشاكل بينها وبين ابوه بسبب هدا الموضوع
طلبتكم لا ترودني