محتاجة مساعدة اخواتي المخطوبات المصريات في اسرع وقت الله يخليكم

الفستان على العريس دة العرف السائد وكمان علية الجزمة والكوافير دة الوضع فى الريف والاقاليم اما لو كنتى من المدن فالشبكة كلها على العروسة بما فيها الفستان وانا شخصيا كان الفستان على حسابى انا واليلة كلها بتاعت الشبكة وكمان اخواتى كلهم نفس الشيئ الشبكة بما فيها على العرووسة

tفستان الزفاف عليه هو والكوافير كمان هو ده المفروض لكن فستان الخطوبه وكده عليكي انتي
بس لو مثلا خطيبك مش هيقدر يجبهولك ماتوقفيش الجوازه لانها كلها مظاهر وهاتيه انتي
ربنا يوفقك

حبيبتى كما قالوا لكى اخواتى الغاليات العرف السائد ان الشبكه دائما بما فيها الفستان والكوافير والحفله على العروسه اما حفل الزفاف والستان والكوافير فى الزفاف كله على العريس ووفقك الله ومبروك ياقمر.
ام عبدالله

انا فى خطوبتى العريس هو اللى ادالى فلوس الفستان كهديه منه وطبعا فى الفرح الفستان عليه وكل حاجه عليه

اختنا الحبيبة .. مثلما ذكرت الأخوات قبلا فإن فستان الخطوبة والشبكة يكون على العروسه والزفاف على العريس .. بس برضه كل شئ بالتراضي وما تخليش الحاجات البسيطة دي تعمل اي مشكلة المهم ان يكون الانسان اللي هتشاركيه حياتك كويس ويتقي الله فيكي ...

زي ما قالولك الاخوات قبلي ... حسب ما اعرف الخطوبة بتبقا على العروسه مش العريس ...
انما يا عزيزتي متخليش الشكليات دي تهدم حاجات و مشاعر اسمى من كده ... فلوسك هيا فلوسه و المهم المشاعر و الروح
و ربنا يسعدك يارب

يا يابنات مش عارفه اشكركم كلكم ازاي
كل واحدة فيكم ربنا يبارك لها ويجزيها خير علي ردها عليا
المشكلة يابنات ان الموضوع كبير شوية.........وهي فعلا مجرد شكليات وبيني وبينه مفيش اي تكليف.......لكن!!!!!!!!!!!!!!!!!!!!الناس الكبيرة بقي الاب والام سواء عندي ولا عنده ......وللاسف ده بيقول مش علينا وده بيقول مش علينا لذلك قلت استشيركم
ادعو لي يابنات ربنا يتمم لي علي خير ونعدي المرحلة ديه بقي

اختي الغالية
نصيحة التروي مطلوب طالما فيه مشاكل "علينا وعليهم ! " لان الاصول معروفة ولا يتكلم فيها اثنين ..
بشكل عام الخطوبة فستانها على العروسة وشعرها والمكياج وكله ,, واذا متفقين انه هو من سيقوم بعمل الفرح كله اذن تقومي انتي بعمل الخطوبة كلها ,,
لكن الان ونظرا لان الدنيا تغيرت والامر لا يسلم ! يعني تعملي خطوبة ولا يحدث زواج ,,فاغلب العائلات تقول 50 - 50 , بمعنى الخطوبة مناصفة ثم الفرح مناصفة بالنصف تمام وطبعا الشبكة والفستان عليه غير الشقة و المهر ,,الخ ..
تحياتي ...

جزاكي الله كل خير اختي بنت النيل....الاصل في مشكلة علينا وعليهم اختلاف الوضع الاجتماعي واختلاف المكان......فبياخدوا باللي بيريحهم من عادتهم وياخدوا اللي بيريحهم من عادتنا ...يعني مش مستقرين علي حاجة للاخر
العريس نفسه قال استحملي لحد ما نخلص من وجودنا تحت سيطرة العيلتين وبعد كده لما هنبقي مستقرين ماديا ولوحدنا تاكدي ان محدش هيفرض علينا حاجة.لذلك انا محتارة جدا ومش عارفه اعمل ايه
ثانيا هم فعلا قالوا الفرح مناصفة بينا وبينهم ..لكن الشبكة عايزن يحطوها كلها علينا!!!!!!!
اعمل ايه يابنات اعترض وارفض ولا امشي اموري بيني وبينه؟؟