مدرسة اهليه بجدة تمنع بناتي من الدراسة بسبب تاخر الاقساط

1. وبتركم مع هذا القرار الصادر وانتوا احكموا

السلام عليكم ورحمة الله وبركاته
انا بصراحه مو عارفة من وين بابدأ بموضوعي هذا بس من جد اكتب وانا كلي قهر على بناتي
والسبب بناتي مستقبلهم راح يضيع من مدرسة اهلية وعلى قولتهم عالمية بجدة ,,,
السالفة ومافيها انا عندي بنتين مسجلتهم بمدرسة ( .......... ) ومادفعت لهم قسط سنتين و على اساس يواصلون
دراستهم اديناهم شيكات بس مؤجله وبعد ما استلموها قاموا يتحججون بانهم مايدخلون المدرسة نهائي الا
لمن نسدد الاقساط لهم كامله وصاروا يأنبون بناتي قدام صحباتهم ويهزئونهم وغير كذا منعوهم من تسليم الكتب
وحرموهم من توفير الطاولات والكراسي بالله الشي هذا يرضيكم ؟؟؟
اول يوم من الترم الثاني راحوا وطبعاً ماقصروا فيهم قاموا بالواجب وزيادة لدرجة بناتي صاروا يبكون ويقولون ليه يا ماما والله خفنا !!
واتغاظيت وسكت واتصلت على اخت المديرة شخصياً وكلمتها جوال وشرحت لها كل شي وقلت خلي المحاسب
يتكلم مع زوجي عشان يرتبون طريقة الدفع والاهم انه لازم بناتي يدامون لان حرام مستقبلهم يصيع بسبب الفلوس
وقالت ابشري وراح ارد عليك وطناش واليوم طبعاً من الاسبوع الثاني من الدراسة واول يوم السبت قلت لازم يدامون بشوف ايش يصير ,,؟؟
والساعة 7,30 المحاسبة متصله وبكل استهزاء تقولي ليه بناتك مداومين احنا قلنا مايجون قلت لها وباحترام حرام مستقبلهم يضيع بسبب فلوس راح تندفع
اليوم ولا بكرة وكاش الين ابوهم يخلص شوية اجراءات والله يا بنات ماخلتلي فرصه اتكلم حسيت نفسي بانفجر
طبعا صرت اكلمها بنفس الاسلوب اللي تكلمني فيه تقولي نتصل عليكم وجوالاتكم مقفله انا بفهم كيف مقفله وهيا متصله فيني وانا راده عليها ؟؟
غير كذا تقول انا برسلكم رسايل ويجيني انكم استلمتوها واقولها ما جاني شي وتقولي انا عندي انك استلمتي يعني تكذبني غصب
اسلوب واطي مثلهم
واخرتها صارت تهدد بالشيكات المؤجله اللي عندهم وانه المحامي اشتكى زوجي بالحقوق وانه راح يتصرف
والله يا بنات تقولون ماخذه فلوسها هيا !!
ولا ادتني فرصه اني اتناقش معاها صرفتها وقالت امشوا خذوا بناتكم وقفلت
اذا جينا بنتكلم بالمنطق وكل واحد يقول الصح من ناحية تاخر الاقساط مايمنع الطالبة من تكميل دراستها
ثاني شي مو من حقهم يحرمونهم من كتبهم و مقعدهم الدراسي .
ثالث شي بالاول والاخير كذا ولا كذا راح تندفع فلوسهم كامله فمالهم حق با هانة الطالبة
الوحده تروح لهم اول مره يشيلونها فوق راسهم لانهم عارفين انها راح تدفع على الاقل 11000 الف للتمهيدي
غير الابتدائي والمتوسط والثانوي
تعليم جدا فاشل المهم ينجحون الوحده وهيا وين والنجاح وين يبعون كتب مادة الانجليزي ب 600 ريال
وفوق هذا المنهج صعب لدرجة وديته عند معلمين ماخذين التوفل بالانجليزي ويقولون احنا مو فاهمين شي
ولمن اروح لهم يقولون جيبي لبنتك مدرس يذاكرلها وانتي ايش فايدتك ؟؟
والمصيبه انه يشجعون البنات على عمل بازارات او عمل اطباق خيريه << حطوا 100 خط على خيريه
وياخذونها ويبعونها على الطالبات وياخذون الفلوس كاملة من الطالبات والله يا بنات ما ظلمتهم انهم يفتشون
جيبو البنات اذا كان فيها فلوس ويسحبونها ويقولون هذي تبرعات للدادات مساكين محتاجين الواحد لمن يبغى يساعد
يساعد بكيفه مو بالقوة
واخرتها يطلبون من بنات المدرسة كلهم يدفعون 5 ريال عشان يشترون كيكه بمناسبة من المناسبات حقتهم
لو نحسبها 5 ريال من كل طالبه وشوفوا كم طالبة وكم راح يطلع وراح يشترون فيها كيكه .... معقولة يا ناس ؟
بصراحة اللي يدخلها غني يطلع منها فقير والله هذي الصراحه والله ينعم على الجميع
لا تعليم يستاهل حتى لمن ينجحون يدونهم الممتاز بكل سهولة طيب لو صح يستحقون وين شهادات الشكر
لا حوافز يشجعون فيها البنات من هدايا بمناسبة تحسن مستواهم كل همهم الرحلات كل اسبوعين طالعين
رحله ولا تقل عن 50 ريال وتعالوا شوفوهم المعلمات وين والبنات وين انا ماجبت شي من عندي انا جالسه
اتكلم عن اشياء شفتها بعيني والله بيحاسبني فيها
والاسواء من هذا كله يكونون بحاجه الا معلمات وطبعا يقولولكم السعودة بالاول وكل ما جاتهم سعودية صاحبة خبرات وكفاءه
يرفضونها لاي سبب من الاسباب وابسطها الراتب والزم ما عليهم الواسطة و بنات جنسهم يشغلونهم
والله لو اجلس ااتكلم من هنا لبكرة واقول فيهم من سيئات ما راح اخلص اشياء واشياء
بس كل مافي الموضوع وقاهرني بناتي مستقبلهم راح يضيع والله حرام عليهم حسبي الله ونعم الوكيل
والحين قدمنا خطاب للرئاسة العامة يوم الثلاثاء وخير قالولنا تعالوا الثلاثاء ونشوف ايش يصير

وبتركم مع هذا القرار الصادر وانتوا احكموا

منع المدارس الأهلية من حجز ملفات الطلاب المتأخرين في سداد الرسوم مؤشرات على هجرة طلاب التعليم الأهلي إلى «الحكومي»
من مصادر مطلعة أن إدارة التربية والتعليم منعت المدارس الأهلية من الاحتفاظ بملفات الطلاب المتأخرين في دفع الرسوم المستحقة عليهم، وهو التوجه الذي انتهجته وزارة التربية والتعليم منذ العام الماضي، باعتبار أن الأمور المالية لا علاقة للطالب فيها، وأن حل هذه المشكلات يجب أن يتم من طريق جهات أخرى.
من جهته، كشف المدير العام لإدارة التربية والتعليم للبنين في جدة عبدالله الثقفي، عن وجود مؤشرات تدل على هجرة أولياء الأمور من المدارس الأهلية إلى الحكومية.
وقال الثقفي في تصريح إلى «الحياة»: «من الصعب تحديد أسباب عزوف أولياء الأمور عن التعليم الأهلي واتجاههم نحو الحكومي، خصوصاً وأن كلاًّ من هذين القطاعين يقدم طرقاً مختلفة في أساليب التعليم».
وأضاف: «في فترة من الفترات اتجه الكثير من أولياء الأمور إلى المدارس الأهلية لأسباب عدة، منها: قلة عدد الطلاب فيها، وقرب المدرسة من المنزل، إضافة إلى تقديم مميزات ترضي ولي الأمر»، لافتاً إلى أن تطور البرامج في التعليم الحكومي أسهم في استقطاب الطلاب إليه، وخصوصاً برامج التقنية، واللغة الإنكليزية، وتطوير مستوى أداء المعلمين، ما جعل التحسن في هذا القطاع ملحوظاً بشكل كبير».
ونفى الثقفي قصور المدارس الحكومية عن تطبيق برامج التعليم المتطورة، مشدداً على أن غلاء المعيشة ليس سبباً في الرجوع إلى المدارس الحكومية، مستشهداً على ذلك بأنه توجه بدأ منذ سنوات عدة، نتيجة تحسن وتغير مستوى الأداء في هذه المدارس.
وكان وفد من مركز الموهوبين في تعليم الرياض زار مدارس دار الفكر، والأندلس، ومركز الموهوبين في جدة أول من أمس، بهدف استعراض تجربة رعاية الموهوبين والتعليم التعاوني، في حضور مسؤولي قسم صعوبات التعلم ومركز الموهوبين في المدارس، والذين شددوا على أهمية تطبيق التعليم التفاعلي، المعتمد على الجوانب العملية والتقنية في إيصال المعلومة وترسيخها لدى المتلقي.
وأشار المدير العام لمدارس دار الفكر عبدالقادر البكري، إلى أن المدارس تؤكد على التحصيل المتوازن مع التطبيق العملي، واستقطاب الطلاب الموهوبين، من خلال تقديم منح دراسية لرفع مستوى التحصيل في مختلف المراحل الدراسية بنسبة 80 في المئة، عبر البحث والاطلاع والجوانب العملية التطبيقية التي يمارسها الطلاب في معظم المواد، إضافة إلى التركيز على التحصيل طوال العام ليشكل نسبة 80 في المئة، فيما يمثل اختبار نهاية العام 20 في المئة فقط، ما رفع مستوى الاستيعاب لدى الطلاب بعد اهتمامهم بالمواد على مدار العام.
وقريب راح انزل لكم اسم المدرسة اللي يقولون عنها عالمية واول من يتكلم فيها معلمتها بالسوء واغلبهم
صديقاتي عشان تتاكدون
والله يفرجها ويسهلها على كل مسلم يارب