مشكلتي ماعندي جرأه

السلام عليكم ورحمة الله وبركاته
انا مدري من وين ابتدي ولا وين المشكله
لي سنه وثلاث شهور متزوجه ومبسوطه مع زوجي ع الآخر
(الله لايغير علينا ويسعدكم)
وموضوع الحمل ناسيته حتى يوم يبشروني صاحباتي اللي تزوجوا
بعدي بشهور طويله بحملهم افرح ولا احس بأي شي
وزوجي كل ماجاء طاري العيال يقول بدري ولاعمره فاتحني بالموضوع

• امي تحن علي تلمح روحي اكشفي فلانه راحت هنا وعلانه هنا

هنا ممرخه زينه وهنا دكتوره شاطره بس اطنش واقول بدري
بس لي شهر خايفه والموضوع صار شاغلني صحيح ماتعرضت
لضغط من اهله بس صاحباتي اسئلتهم زي السكين احس اني لي
عشر سنين متزوجه صرت اتحاشاهم وزوجي بعد يسولفلي بتريقه
عن ربعه في الدوام يسألونه من شهرين بعد زواجنا
ماشرف ولي العهد؟؟؟
خايفه تمر علي السنه الثانيه ومايصير حمل
وقلبي متولع على طفل وزوجي مو هامه الموضوع ومستحيه اقوله
بروح اكشف مع العلم اني مره تحججت بتعب الدوره ورحت
سويت تحاليل الغده وهرمون الحليب الحمد لله سليم
بس اللي خوفني الاسباب الثانيه للتأخر البطانه المهاجره ارعبتني
وغيرها...
خايفه اقوله بنروح ويزعل او ياخذ على خاطره
ياليت تفيدوني وخصوصاً اني ودي اروح الاسبوع الجاي بعد دورة
هالشهر طوالي شلون افتح له الموضوع
ياليت تساعدوني بمشورتكم