معاناه ههه

خاص للمتزوجين
ورقة المقاضي ..!!
ياعالم قسم راحت حياتي اوراق صغيره .. جيوبي مليانه .. كل ظهريه وبعد
صلاة العشا طيب يازوجتي العزيزه فيه شي اسمه دمج .. رئاسة تعليم البنات بكبرها
دمجوها .. ماتدمجين انتي ورقة مقاضي الظهر مع ورقة مقاضي الليل ونفتك من هالقلق اليومي
المشكله وشي .. المشكله اني اقرا طلبات مالها داعي بس مجبور اجيبها ..
دراق / طماط/ بقسماط/ برغل / واخرتها مانلقاعلى السفره الا كبسه وان سوينا نفوسنا
كنديين حطينا فجل ههه طيب هالبقسماط والصولجان وبقية الاسامي الصعبه لمين طبعاً
لخواتك اذا جوا يوم الربوع وانا ياغافل لك الله طقني الجوع مع ابوشايع وابوعبدالله وان سوينا فيها
فجور وكاش ارسلنا حنيف يجيب بروستد وتهاوشنا على الثوم ههه والمدام مع خواتها يتنعمون
من خيري ومن تعبي ومطامري في البقاله مع ورقة المقاضي مره سويت فيها ذكي وبعد ماقضيت
لزوجتي يوم الربوع قلت بروح للشباب .. واطب على المدام بدري واحصل خواتها عندها وتوهم
حاطين العشا …يلعن ام الكارثه .. اخيرا شفت ورقة المقاضي صدق .. لقيتهم حاطين
سفره بدايتها في المقلط ونهايتها عند ساكو اللي ورا حلبان الى درجة انهن حاطين سيكل جنب السفره
علشان اذا وحده بغت صحن من طرف السفره يمديها تجيبه .. والقا لوحه مكتوب عليها
( السلطه 60 كلم ) ههه قسم بالله مافيه شي ماهوب على السفره ماناقص
الابطل بلاك .. ههه
المشكله ان زوجتى تعاملني على اني ابلة تدبير وعندي خبره وانا والله ما افرق بين الملوخيه والكزبره
تقوم تكتب لي مره في الورقه كيلو كنافه كذابه ههه قسم تروعت وش ذا الكنافه الكذابه
انا اعرف الصادقه يوم اعرف الكذابه .. واروح البقاله مالقيتها اتصلت بصديق قال رح لمحل
حلويات .. واروح وانسى اسمها واقول لراعي المحل عطني كنافه نصابه ههه ناظرني
بأحتقار وعطاني اشكل بدل مايعطيني كنافه .. في الاخير رحت عنده وقلت ياخي معليش انانسيت
اسمها بس انها كنافه ماهيب مضبوطه يعني كنافه كافره وبتروح النار ضحك قال قصدك كنافه كذابه
قلت ايه هذي بنت الكلب ابي منها كيلو .. زحمه وكنافه كذابه واخرتها قطعة خبز لاعبين
علينا وحاطين عليها شيره ههه ..
وكله كوم ويوم خذت اختي في المدرسه طريقة عمل المكرونه بالبشاميل سرى يومنا ماغير ناكلها
الى درجة ان ابوي اضافها في دفتر العايله لانها صارت جزء من العايله ووحده مننا الله يحفظ
الوالده .. ورقة المقاضي حقتها ماتتغير علشان كذا مانرميها انا حاطها في المفضله لانها هي نفس
الطلبات كل يوم بصل/ طماط/ رز/دجاج/خبز/ واذا بغت تسوي نفسها كيوت استبدلت البصل
بثوم واذا ملينا وبغت تجدد فيها حطت الرز قبل البصل والخبز قبل الطماط والله اني عشت عمري كله
وانا نفسي اكل شي جديد وخاصةً ذا اللي يقولوه اومليت الى درجة اني سكنت في فندق مره علشان لقيت
في القائمة اومليت مادريت انه بيض الله يلعنهم المشكله ماعندهم رحمه .. درجة الحراره في عز
الصيف الف وانت تطامر من محل الى محل وبمعية سموك ورقة المقاضي لو تجيب العثيم كله وتنسى شي
بسيط قامت القيامه ولازم ترجع وانت اصلاً شرير ولاعمرنا شفنا منك شي يابخيل .. وياعيني
على استخدام التقنيه .. ورقة المقاضي صارت من العصر الحجري الحين تجيك المقاضي مسج
على الجوال والله اني ابغا اصيح اذا قريت رسايل جوالي ورسايل جوال اخوياي العزوبيه .. كل
رسايلهم ( عندما تشرق شمس يوم جديد اذكرك .. ) ( كفاني ان جنح الليل يغشاني ويغشاك )
( الله على الجمس لولا وراد الستين ) << رسالة داخله بالغلط خويته ابوها شريطي ههه
وانا تعال شف رسايلي ( حليب سريلاك .. ) ( ارجع بدري نبي مويه ) ( وانت جاي جب
اعواد اسنا ن ) اعواد اسنان في نص الليل الله من الاعذار بس وماقطع قلبي ونكد علي حياتي الا اذا طلبوا
تسالي .. تجيب برنقلز قالوا نبي جحا .. تجيب بنكهة الكاتشب قالوا نبي بالخل والليمون ..
تجيب رقاق الورده قالوا نبي رقاق غوار .. تجيب صلصه قالوا نبي ماجي ..بس خل عنك والله صار
عندي خبره ولاخبرة رابحه وانا والله من اول كنت احسب البندوره هي البطاطس ههه
مناسبة هالموضوع اني رحت اليوم بعد صلاة الجمعه ومعي كالعاده رفيقة دربي ورقة المقاضي طولها
حوالي 7.12 متر ويوم دخلت العثيم والقا زحمه وانا اللي تصعب علي نفسي واتمرد واشق ورقة المقاضي
وارسل للمدام رساله اقولها اني تمردت وقطعت الورقه … جزاها الله خير
تفهمت الموضوع بشكل حضاري وهذا انا اكتب لكم الموضوع من مقهى ههه
منتهى الرومانسية السعودية ( لاتفوتك ) ..!
عالم الرومانسية للرجل السعودي لاينتهي أبداً … قصص مضحكة جدا
لا يخفى على كثير من المتزوجات منكم حاجة الزوجة لتعبير او همسة اوحتى نظرة حنان ورومانسية
من زوجها العزيز لكن ساعات تكون هالحاجة اصعب من لبن العصفور وابعد من المريخ بسبب طبيعة
بعض ازواجنا المماليح …وعزة نفسهم اللي تخليهم يعتقدون ان التلميح بالحب هو ضعف وتصغير
من قدرهم وانا بصراحة ما الومهم …الوم سياسة (ياعيباة وياخزياة )اللي خلقت رجال الثلج
اللي عندنا .
1 – صديقتي زوجها سافر لدوره في عمله وطقتها الرومانسيه وتروح وتحط له ذيك الهديه اللي
تعبت بتغليفها وتحط له بكل بدله رساله وورد مجفف وتقعد المسيكينه على أحر من الجمر تنتظر ردة
الفعل والكلام الحلو اللي بيقوله لها الا يوم جاء وعيونه تتقادح من الشرر (أبوك ياللغه )وزعلان
ويرمي علي كلمه خلت الدمع يكور بعينها .. قال : وش اللي سويتيه خليتي أصحابي
يتريقون علي كل ما البس بدله الا الاوراق طايحه منها قالوا وش فيك ياابو الشباب صاير كنك عامل
بلديه ماغير تلقط في الاوراق والا الهديه الحمدلله اني شفتها قبل ماحد يشوفها وحطيتها في السياره ..
ومافتحها الايوم رجع البيت .
2 – في ولادتي الاخيره جاني نزيف وجلطه وبعد الولاده جلست في العنايه والدكتور يقول
لزوجي اذا تحب زوجتك انسى الاطفال اقل شي 5 سنوات لين تستقر حالتها يوم بديت اصحصح
من البنج وكنت اتألم عمليه ونزيف والقاه فوق راسي وطمن علي وبكل رقه قال قولي امين ..
عاد انا فرحت قلت أكيد بيدعي لي ان الله يعافيني واني ازوج بنتي او ان الله يخليني له قلت انا آمين .
قال جعل ما تدور السنه الا انتي هنا في هالغرفه جايبه بيبي ثاني خ
قلت ياخي تجمل اصبر على الاقل لين يطلعوني غرفتي اما تدعي علي وانا في العنايه تبيني السنه
الجايه فيها ..!!!
3 – زوجي محطوط على الصامت مادري يوم ولدته امه صااح او لا مع اني ماضنيت انه صااح
خ البس اتزين اصبغ مره شقرا مره حمرا مره احط برونز بنتي ام ثلاث سنين قالت ليه يامام انتي
سودا خ وزوجي مافي اي ملاحظه او تعليق ودايم اقوله اقص شعري؟ اقلد هالحريم يمكن يحس
يقولي لا ..لاتقصينه ابزعل عليك وهو شكله بعد يقلد الرجاجيل خ ميير ذاك اليوم ارووح اقصه
او بمعنى اصح اعرمه قصير مره واسوي هاي لايت وطول الطريق متحمسه اقول في نفسي الله يستر
لايزعل يوم قصيت شعري ..يوم وصلت البيت وادخل لين الشيخ ماسك الريموت ويقلب فيه واجي
وانا مرتاعه واجلس .. الرجال ماحكى احسبه زعل الله يخلف على قلبي خ اثاريه مانتبه
لشعري كله مير تتناقز العنز بوجهي من الزعل وانا اللي التفت عليه واهد فيه انت ماتحس ماتشوف علمني
ماتعب نفسي واتزين لك حرام الخساير خ قال لا بالعكس انتبه قلت طيب ياخي شجع امدح
لو كذب قل رايك ..!
توكم مابعد جتكم المصيبه ..
عقبها بكم يوم كلمني وانا برا البيت قال وينك قلت في المشغل انا اقصد مشغل خياطه هو يحسب قصدي
كوافيراول مادخلت مع الباب قال زوجي الله وش هالزين وش هالحلاوه انا طارت عيوني واطير اركض
للمرايه اشوف وجهي ليني شهبه لهبه حتى الكحل مهوب في عيوني والشعر لازق في الراس عقب النقاب
وارجع له وانا ماش ماني مستوعبه قال لي بصراحه نيو لك مره حلو ابو الشباب مستمر في النصب قلت وشو
انت وش تقصد اي تغيير انقلب وجهه قال انتي وينك من شوي قلت في المشغل رجع لون وجه يرد قال ايه
محلوه وش سويتي قلت ضوقت فستاني خ طمر دخل الحمام مادري ليه عاد هل بطنه حله خ
او ماله وجه يشوفني او من الروعه .
4 – مرة شريت شموع والله انا نفسي ماقتنعت بس صديقتي كانت معي بالسوق ولزمت علي أشريها المهم
بعد ماعلمتني طريقة توليعها ووين أحطها بغرفتي <<<<<< أخبرها إذا طفا الكهرب وبس ..
عطرت الغرفة وولعتها دخل أبو الشباب وعلى طول ولع اللمبات كلها المشكلة ثريتي ام خمس وقال ليش مولعتها
هو الكهرب كان طافي !!
لاعادت عليها من شموع ومن رومانسية قلت لا بس أجربها هي تشتغل ولا لا <<<<<< امحق رد حاشا
صارت جهاز مو شمع .
5 – وحده تبي تسوي ليله لوباقي ليله على ما قالو…وحاطه شموع وحاله يوم وصل سبع البرمبه..وإلا
يقول الله يقطعك خنقتينا بثاني أكسيد الكربون .
الأخ مدرس علوم …تقول من عقبها حلفت وقلت التوبه….!!
6 – وحدة اعرفها ..كانت في بداية زواجها من 10 سنوات ناقر ونقير مع زوجها بسبب صغر سنها
وطيشها …وبعدين شوي شوي مع العيال والسنين عقلت المرة وخفت مشاكلهم وهي حاسة بهالتغيير وفرحانة
بهالنضج اللي وصلت لة وتبي زوجها يلاحظ …يلمح ….يحس …عمك اصمخ وهو اكيد انة حاس
بس عقدة التعبير مانعتة ..) المهم ..ماش شافت الرجال ما جاب خبر قامت تلمح له المرة ..وفي ساعة
صفا ..جت مشخصة وقعدت تميلح عندة وتسبل هالعيون وتتلصق ..قالت :ماحسيت ياحبيبي بشي متغير في
حياتنا ؟؟(تستدرجة الضعيفة قال: وشو مثل ايش ؟؟(مازال الطناش سيد الموقف )قالت :يعني ماحسيت
بتغيير ..؟؟(مازالت تتأمل ) قال:مدري .. مثل وشو ؟؟(غيٌر عن ايش ) .. قالت :يعني
ما حسيت شي تغير فيني مثلاً؟؟؟؟(ملت من التلميح وجابتها على بلاطة ) قال:فيتس انتي ؟؟؟؟؟(بدا يفكر
ويهوجس ….وهي مازالت الإبتسامة شاقة وجهها ..وعيونها تبربش …وتتميلح …تنتظر الجواب
الشيق …(ليتها طاحت على براطم طخومة قبل تسأله)
قال:م ….بطنتس عرعر .!!
فجأة .. زالت كل معالم الفرح والتميلح من خشتها …وبدأت الدمعه تفحط في مقلتيها ..
..لا تعليق
7 – جارتى كانت والدة جديد وجلس زوجها يتفكر بالولد ليه عيونه كذا وفمة على مين يخرع ورا اسود؟
وخذ يعدد اقبح الخصال واخر شئ التفت على الام وقال ما كنه يشبهك ..! تقول لنا لحظة قالها مت
صياح وهى نفاس .
8 – موقف رومنسي مع زوجي العزيز كنا مسافرين برا وقاعدين نتمشى بمكان رايق وهادي ومافي احد
غيرنا قام يتلفت بعدين قال ترى مافيه الا انا وانتي انا تحمست قلت اكيد بينتهز الفرصه عشان ياخذ راحته معاي
ولا يقوللي كلمه حلوه ولا اي شي.. قال لو قتلتك هنا والله محد بيدري عني !!!!0
9 - حبيت اعترف لكم بشي خطير بعد 14 سنه زواج قالي زوجي انا احبك والله قالها وشفايفه ترتجف
وياله اطلعت حشى كانها سياره مغرزه .
0– انا لي 4 سنين وانا احفر بزوجي لعل وعسى اطيح على بئر الرومنسيه عنده لكن للحين ما طلع
شئ شكلي بلقى بترول من كثر الحفر ..وياما وياما انصدمت من ردوده وياكثرها تخيلوا مره
كنت مسويه ليله رومانسيه بدون ما يدري وحركات المهم كنت حاطه اوراق لازم يجمعهم علشان يوصل للمكان
اللي انا فيه يعني يبيله ابو عشر دقايق على ما يجمعها ويوصلني ..انا سمعت الباب فتح ورحت على طول اشغل
الشموع على اساس انه لسى بيدور على الاوراق شوي الا طويل العمر داخل علي بالغرفه انا طبعا قلت له وش جابك
وش تتوقعون الرد تخيلو .. وش رده لما سالته وش جابك ليش خربت
يا شينك ……..الخ
قالي ابي الحمام ابي …….(يعملها بالعامي والعامي القصيمي )0
انا وقتها اغمن عليه اغمن عليه وش ذا البيت فيه 6 حمامات ضاقت على هالحمام ولا يشوف شكلي قميص
نوم وكشخه وشموع وفواحات وورود واخرتها ب.. بس
جد كانت صدمه قويه ووقتها كنت توي ما كملت 6 شهور زواج تخيلي قعدت اصيح وعلوم بس ..!
ملطوش