معقولة تسويها يا سلطان

نبذه عن سلطان !!!!!!!!!!!
سلطان شخص مؤدب جداً جداً ...........
وهادئ حيل ..........
يفرض على الكل احترامه رغم صغر سنه ..........
يحمل قدر كبير من الرومنسيه وطبعا اكتشفت هالشئ من هدوئه واحترامه للغير ..........
إنسان اخلاق بمعنى الكلمه...........
شخص ملتزم _ والدليل انه مايتفرج الا على المجد _
علاقتي فيه ماتتعدى السلام .........
كونه ولد جيراننا ..........
ياما حاولت اكسر حاجز الصمت اللي فيه ........
بس مافيه فايده مصّر على السكوت ..........
كل ما احاول افتح معه نقاش يرد بكلمه او كلمتين _في مامعناه انه مايبي يحكي_ فأضطر للسكوت حيرني بطبعه ............
يعني ماتوقعت ولاحتى تخيلت انه ممكن في يوم من الايام يسوي اللي سواه اليوم .............
طيب نجي للسالفه ............
في البدايه اتصلت جارتنا أم سلطان امس وقالت لامي انها عازمتنا في بيتها يوم الاثنين ..........
ولا تنسين البنات ...........
قالت امي ان شاء الله طبعا قالت لي امي عن العزيمه ........

• لانها عارفتن مصالتي في اللبس و انها لازم تجلس ساعه تناديني تحت على بال ما انزل_ -عشان كذا صارت تقول لي عن العزايم قبل بكم يوم والمشكله انه مافيه فايده -_

نرجع للسالفه ........
وين وصلنا .........
ايه قالت لي امي ان الاثنين معزومين عند جارتنا أم سلطان.........
قلت بكل برود .......
طيب ......< يبيها بوقس يطير ضروسها ذا اللي فرحانتن بها ..........
بعدين استوعبت سالفه العزيمه .........
وش عندها اأم سلطان عازمه ........
قالت امي والله مدري عنها تقول انها بتنادي اهلها ..... ... _ ياحبيلها امي لين قامت تهايط _
المهم جى الاثنين ..........
ولا اهتميت للعزيمه ابداً ...........
يعني مافكرت وش البس ولا وش اسوي شعري وكذا .........
وامي تسالني وش بتلبسين ........
قلت وش عندنتس متحمسه .......
قالت ابد يمكن يجون اهلهم وكذا وتدرين هم اغراب يعني لازم تكشخين عندهم _ لحد يقولي خطبه وما خطبه ترا امي كل ماجينا نطلع اجتماعات ودوريات لازم تسالني وش البس وتهتم في لبسنا واشكالنا وكذا_
المهم .......
قلت انا اي شي .........
قالت امي اخلصي علينا ترانا بنمشي المغرب < رحمتها اميمتي قلت ان شاء الله < طبعا ابو طبيع
لبست وكشخت وتمكيجت _ طبعا بس كحل وروج وبلاش خفيف _ < ( ترا بس هذي الاشياء الشويه لا تقولون لاني احب الطبيعه لا غلطانين لاني ما اعرف احط غيرها )
المهم ......... _ ماتحسون هذرتي واجده _
طبعا صارخت علي امي ........
وانزلي جعلتس وجعلتس ......
وانا طيب يماه شوي شوي < ودي من يعجنّي _ الله يعظم اجرها الوالده ويصبرها على ما بلاها _
نزلت بعد جهد وعناء وبعد تبحح الاحبال الصوتيه حقت امي جتني كم دعوه على الطاير لبست عبايتي وصلنا بيت الجارةالعزيزه .............
استقبلتنا أم سلطان ورحبت وهللت _

• طبعا قبل لا ادخل المجلس وقفت نص ساعه قدام المرايه - اللمسات النهائيه -دخلت لقيت مابعد جى احد .... ........................

وبعدين .......................... << وصلنا لمربط الفرس ......................
مرّ سلطان من قدام الباب وشافني وقف بلم قعدت اناظر فيه يعني وش تبي ..........
مشى ....... كمل طريقه ........... انا التفت ....... رجعت اناظر الباب لقيته يطل
يطل ويوخر .......... يطل ويوخر ........ .........
ماخبرته راعي حركات بزرانيه ......... انا جتني الضحكه .........
قلت وش فيه ....... كل ذا خاقن مع سحري وجمالي ..... هذا وانا ماجتهدت بالكخشه ......
طبعا سفهته ومعد ناظرت الباب ... ابيه يستحي ويذلف ..... مع اني كل شوي اشيك بعيني الثانيه والقاه للحين يطلطل
موب صاحي انهبل على اخر عمره
شوي ............................
إلاّ ......................... .................
ايه سواها .................................
سواها يارقاله ...................
غمز لي
انا في هاللحظه بلّمت تجمدت كل معالم وجهي
وش يبي من حياته ذا .................
يغمز لي ابن الإيه .................
بعدها قلت لا يابنت تعوذي من ابليس يتهيأ لتس ........... ولا هو لا غمز ولا شي .............
حاولت اصدق نفسي وقلت ايه من قال انه غمز .......... هذا الشيطان يهيئ لي حركات بايخه .... يبي يفتني < برا تكفين
المهم رجعت اناظر الباب لينه واقف ويسوي نفس الحركه ............... بعدها تدرون وش سويت
ههه. ................. التفت وفقعت ضحك خ
وعلى ذا الحاله كل ماشفت الباب لينه واقف ويغمز يحول الولد شكله توه متعلم ذا الحركه من دشير الشوارع وجاي يطبقها علي ههه
على فكره
سلطان ترى عمره 5 سنوات تقريبا .....................
وزي ماقلت لكم ............. ماعندهم الا المجد ............. مدري من وين جايب ذا العوايد الشينه
وش رايكم بهالتصرف .............. وبعدين ماتلاحظون ان عيالنا زايده قلة ادبهم هالايام .............
طبعا مو بس سلطان .......... فيه واحد غيره ..... بس ذا الثاني الله يسلمكم مايتعرض لي
والله دنيا حتى صرنا نخاف من البزران .......... الله يستر من الجاي
النهايه
الموضوع منقول للفرفشة