مقصر مهمل بخيل كذاب و المحترم زوجي

1. انا متزوجة من 5 سنوات وعندي بنتين الاولى 4سنوات والثانيه 5 شهور


2. زوجي انسان مقصر معاي من جميع النواحي المادية والمعنويه


3. والله اني اكتب وقلبي كأن احد قاعد يضغط عليه احس مختنقه


4. طولت عليكم وطمعانه باراءكم ومشورتكم

السلام عليكم ورحمة الله وبركاته
مرحبا يا اخواتي
انا طايحة بمشكله الله يبعدها عنكم جميعا
المشكله تتعلق بعلاقتي مع زوجي
قبل ما اكتب الموضوع اكتشفت فيه شي دمرني من داخل ولما شفت اللاب توب مع بنتي اخذته منها وقررت اكتب موضوعي عل وعسى الاقي منكم المشورة او حتى دعوة من قلب

انا متزوجة من 5 سنوات وعندي بنتين الاولى 4سنوات والثانيه 5 شهور

زوجي انسان مقصر معاي من جميع النواحي المادية والمعنويه

من الناحيه الماديه مايصرف علي ولا عالبنات بالشكل المطلوب "مع ان ربي موسع عليه وسيارته مرسيدس بانوراما وعنده مشاريع وتدخل عليه ارباح كثيره غير راتب وظيفته ولا عنده ايجار لان العمارة تبع ابوه ولا في فواتير كهرب ولا مويه ولا تلفون لكن مع كل هذا كل شهر اضطر اتسلف من امي او وحده من خواتي"
مصروفي ومصروف البنات ومقاضي البيت كلها على ظهري ماتكفينا الف ريال شهريا!!
وانا طالبة جامعه وادرس انتساب وايام اختباراتي اروح بيت اهلي عشان امي تساعدني عالبنات واقدر اذاكر ولايفكر يطل علينا اسبوعين كاملين حتى حليب بنته يقول تصرفي دبري لها ويكون مامعاي فلوس واضطر بكل خجل اتسلف من احد اهلي وارسل سواقهم يجيب لي اللي مره يرضى ومره يستلعن
الفتره اللي راحت بنتي الصغيرة مرضت مرض شديد ودخلناها العنايه لكن في اسوأ مستشفى بالوجود لانه كان اقرب مستشفى عالطريق يرميني والبنات ويمشي لان في صفقة فلوس تنتظره واضطريت اتمرمط في عز البرد فالمستشفيات مع البنات لحالي!! ماشفت انعدام مسؤولية بهالشكل
ولما جا اخوي يتطمن تفاجأ لما شاف المكان وكلم زوجي وسوالنا خروج على مسؤوليتنا وودانا مستشفى ثاني
ابسط حقوقي محتاجة خدامه الشقه كبيره وابي احد يساعدني عالبنات شوي خصوصا ايام اختباراتي لكن لاحياة لمن تنادي راح جاب لي خدامه مدري من وين جابها لي ومن اول اسبوع اضربت عن الشغل وراح سافر دبي يبي يشتري سياره جديدة وخلاني اتورط معاها لحالي لدرجة اني خفت على بناتي ورحنا بيت اهلي
اثاث الشقه يفشل وناقص من اول ماتزوجت ماكملناه لي 5 سنوات مقدر اعزم اي احد في بيتي لانه غير مهيأ عالاقل اقوله ابي اشتري طقم طنب جديد للمجلس ويطنشني ولايسمعني حتى
ياما امرض وترتفع حرارتي ويشتغل فيني هواش وصراخ كأني غلطت بحقه لما مرضت ويتركني بحوستي ويمشي بره البيت حتى المستشفى يقول خلي احد اخوانك او سواق اهلك يوديك
وطبعا مايحتاج اقولكم عالسهرات اليومية الى 2 و 3 بالليل ومرات تكون من طلعته الصبح ولا اشوف الا الفجر
لكن قررت اخذ موقف صارم معاه وواجهته وقلت ترا هالوضع مقدر اصبر عليه واتحمله اكثر من كذا! تقصير واهمال وبخل وانعدام مسؤولية ولامبالاة وعصبية وعدم احترام وكذب ووعدني قبل يومين بس انه بيتغير ووقفت معاه وقلت بساندك بس حسسني انك مستعد تتغير لكنه ماوفى بكلامه واتوقع انه كان بس يبي يسكتني ويفتك من حنتي
كل اللي قريتوه فوق انا مستعده امشيه واعديه واتغاضى عنه
لكنه يا اخواتي شرف البيت قبل شوي نص سكران!! والله من دخل عرفت ريحة المشروب لان ماشاءالله ابوي كان معطينا خبره فيه الله يهديه
والله اعلم وش كان مسهره للحين يعني شرب ويمكن في بنات بالموضوع الله اعلم والمشكله اني لما اواجهه يقعد يبتسم ويقول من القهر اشرب!! اي قهر؟!!
اقسم بالله مسكت اعصابي عشان وجود بناتي وقفلت عالموضوع مع ان بنتي الكبيره حست ان في شي

والله اني اكتب وقلبي كأن احد قاعد يضغط عليه احس مختنقه

ولله اني ماقصرت معاه بشي البيت دايم نظيف وريحته حلوة والبنات دايم مرتبات وهذا بدون خدامه ولا اطلع من البيت ولااسواق ولا عزايم وحفلات دايم بالبيت او بيت اهلي ومعطيته حقوقه كامله من ملابس ودلع والحمدلله ربي رازقني الجمال والترتيب واي شي يشتيه او اكله على باله ماخليها بخاطره يوم عشان محد يطلع لي ويقول اكيد انتي السبب!
انا مدري وش اسوي لكن مستحيل اسكت الى هنا وبس سنين لي ساكته لكن خلاص مقدر اسكت اكثر كذا السكر عندي مرتفع والى الان طلعت لي 3 ثعالب بشعري وانا عمري 24
اذا مو عشاني عشان بناتي ومستقبلهم ونفسياتهم
انا مابي اتطلق منه لعدة اسباب اولا اني ابيه ثانيا بيت اهلي مايتحمل رجوعي مع بناتي
ولا اقدر افاتح ابوي بأي شي من هذا لان تفكيره شوي قديم وصعب التفاهم معاه وامي مسكينه تعبتها من كثر ما اشتكي منه لكن مابيدها شي
والله اهله اوادم ويخافون الله مدري كيف طلع منهم هالرجال
انا افكر افاتح ابوه بالموضوع باسرع وقت لكن قلت بكتب لكم اول اكيد بتفيدوني اكثر

طولت عليكم وطمعانه باراءكم ومشورتكم

انا مو عادتي اكتب او اتكلم عن اسرار بيتي لكن للضرورة احكام وهذا الوقت اصعب وقت مر علي فأرجوكم لاتخذلوني وانا انادي اي وحده عندها خبره او مرت بتجربه انها تكتب لي يمكن بكلامها يكون لها الفضل في تغيير مجرى حياتي.