مهر بنته ريال

مهر بنته ريال ..!
أقرأوا معي هذي القصة ..
تقدم ( سعود ) لخطبة ( ريم) ..
هي رفضت في البداية بحجة إنها ودها تكمل دراستها ،
لكن أمها وأبوها أقنعوها في الأخير ،
لأن الولد أخلاق وإنسان مستقيم ووظيفتة محترمة ،
ومن عائلة كبيرة والكل يمدح فيه ويتمناه لبنته...
المهم جاء وشافوا بعض الشوفة الشرعية ،
وأخذوا موعد من أبو ريم علشان يجي مع أبوه ،
ويتفاهمون على باقي الأمور الروتينية...
.. جاء الموعد المحدد ..
وحضر سعود مع أبوه وأثنين من أعمامه ،
ومعهم المهر ...
قام أبو ريم وفتح علبة المهر ،
وطبعا" كلها من فئة ال (500ريال) ،
طلب منهم ريال واحد فقط ..
إستغربوا ..؟؟!!
أعطوه الريال ،
أخذه .. وقال هذا مهر بنتي ..
رجّع الباقي إحنا نشتري رجّال...!!!
عجز (سعود) وأهله يقنعون أبو ريم ،
فاستسلموا واخذوا فلوسهم ومشوا ،
مرت الأيام وقرب موعد الزواج ،
وابو ريم عوض ريم المبلغ اللي رجعه وزيادة ،
وجهزها أحسن جهاز ،
وجهزت نفسها وجت ليلة العرس...
أول مادخلت ريم على عريسها إستقبلها بمزحة وقال:
(هلا ياأم ريال !!!)
البنت طاح وجهها ساعتها بس عدتها ..؟!
صعبة تسوي مشكلة من أول ليلة...
ومن ذاك اليوم وسعود ماتعدي ريم من عنده إلا يعايرها بالريال ..
بعدين تطور الموضوع وصار يقارنها بكل شي بريال ..
لين قال مرة:
(تشوفين علبة البيبسي هذي؟!
تراها تسواك ؟!
كلكم بريال خ ؟!!!)
وكمل ضحك وهي تغلي...
بس ريم كانت كتومة ،
ماتحب تشكي لأحد حتى أقرب الناس لها أمها...؟!
ومرت الأيام وهو مايناديها إلا أم ريال أوعلبة البيبسي ؟! ...
هو مايقصد يهينها بس المزح الثقيل الله يكفينا من شره ..
المهم راحت لأمها مرة ،
وأمها كانت ملاحظة عليها إنها متضايقة من شي ،
فحلَّفتها تقولها وش فيها... ؟!
بعد محاولات كثيرة من الأم ،
فضفضت لها ريم وهي تبكي ،
وقالت لها الشي الوحيد اللي منكد عليها حياتها...؟!
وطلبت من أمها إنها ما تجيب سيرة لأبوها...
لكن الأم قالت:
( لا يابنتي أبوك غلط ولازم يصلح غلطته
وياما قلت له إن هذا يقلِّل من قدر بنتك مايرفعها ،
لأن الناس الحين يقيّمون بعض بالفلوس بس ماسمعني...
خليه يشوف وش سوى... ؟!
إنتي يابنتي لك كرامة وإحنا مابعناك... ؟؟
تطمني وخلي الموضوع علي ..)
وراحت طيران لزوجها وهي تغلي ،
بتنفجر من القهر وحكت له السالفة...
أبو ريم إنهبل من اللي سمعه ..؟!
وحلف ماتطلع ريم من البيت إلا راد لها إعتبارها...
جاء سعود بيآخذ زوجته على العادة ،
بس ريم ماطلعت طلع أبوها بدالها وسلم عليه ،
وطلب منه ينادي أبوه وأعمامه يجون يتقهوون عنده ،
وإنه بعد المغرب راح يكون في إنتظارهم ..
الولد ماشك في شي ،
راح ونفذ اللي قال عليه أبو ريم ،
وجاب أبوه وأعمامه...
إستقبلهم أبو ريم وجلّسهم في المجلس ،
بدون ما يحسون بشي ،
طلع أبو ريم من جيبه ريال ،
ونادى ولده الصغير محمد وقال له:
(محمد روح للبقالة وجب لي علبة بيبسي...؟!)
الرجال إستغربو وضحكو فيما بينهم على تصرف أبو ريم ،
أما سعود ماوصلته الرسالة لسه...
جاب محمد البيبسي وحطه على الطاولة ،
شوي قام وطلع ريال ثاني ،
نادى محمد وإرسله يجيب له علبة بيبسي ثانية ،
سعود بدا يوجعه قلبه... كنه شم ريحة تلميح...؟!
جا البيبسي وحطه أبو ريم جنب الأول ،
وسوى نفس الشي مرة ثالثة ،
وجاب بيبسي ثالث وحطه مع الباقين ،
وقال :
( الله يحييكم ..الحين أقدر أقولكم ليه أنا مناديكم ،
أنا أخذت منكم مهر بنتي ريال واحد ،
بس ولدكم ما قدر هالشي وقعد يعايرها بعلبة البيبسي...؟!
أنا الحين غيرت رأيي ،
أنا بآخذ بنتي ، وإنتم خذو بدال ريالكم ثلاث علب بيبسي ،
هذا قيمة مهركم؟)
الرجال مايدرون وين يودون وجيههم من كلام ابو ريم ،
تفاجأوا وفشلهم سعود بعمايله ،
أما سعود الله أعلم بحالته شوي ويغمى عليه ،
هو كان يتميلح وريم تبلع ،
بس ما توقع إنها بتكبّر الموضوع...؟!
أبو سعود قال:
(والله مالي وجه أقول شي ،
بس ليتك تمسحها بوجهي ،
أما سعود أنا بتفاهم معه ،
وبنتك على راسي من فوق ،
ترجع بيتها معززة مكرمة ،
وأضمن لك إنه ماراح يعيد اللي سواه)
رد عليه أبو ريم :
(كلامك على عيني وعلى راسي يابو سعود ،
بس والله ماتطلع بنتي من بيتي
إلا بثلاث مئة ألف ريال مهر ..
زيها زي غيرها ،
أنا يوم رفضت أول مرة آخذ الفلوس ،
توقعت أنها بتكبر بعينه ..؟!
لكن مع الأسف حصل العكس ..؟! )
طبعا" الجماعة ما قدرو يقولون شي ،
إلا إنهم شافوا هذا الشي من حقه وحق بنته ،
وجمعوا المبلغ وقدموه للبنت ..
وكذا ما عاد فيه شي يضايق ريم ..
بس ( سعود ) ماعاد له عين يحطها بوجه أبوها.....
( تزوجها بعلبة بيبسي ورجعها بأكثر من ربع مليون ..؟! )
منقول