ندمانه ماأدري فيه أمل يرجع زوجي

1. مساء الخير


2. كيفكم اخواتي العزيزات . . جالسه اكتب وقلبي يتقطع من الحزن والندم

مساء الخير

كيفكم اخواتي العزيزات . . جالسه اكتب وقلبي يتقطع من الحزن والندم

أنا متزوجه من 5 شهور.. رزقني ربي بزوج طيب وخلوق وحنون ومحب لأبعد الحدود .. ياربي لك الحمد كما ينبغي لجلال وجهك .. لكن أنا وحده ماقدرت النعمه واخاف ربي ياخذها مني .. اشترطت زيي زي اي وحه غيري سكن مستقل .. ووافقوا وتم الزواج وخرجوا اهله من بيتهم عشان ظروفه ماتسمح له يستأجر شقه ورواحوا لبيتهم الثاني اللي في مدينه ثانيه . قبل شهر رحت انا وزوجي جبناهم عندنا على اساس يجلسوا عندنا فتره ويروحوا واتفقت انا وياه نصبر ونتحمل هذولا اهله مهما يكون . بحكم انهم تعبانين بالسحر امه وابوه . وامه تعبانه نفسيا .. لكن مع الايام صرت اتضايق من حركات امه واخته معايه لدرجة كنت ابكي دم عند زوجي وكان واقف معايه دايما .. لكن كنت مرات اتضايق ودي يطلعون او انا اطلع من البيت لان الوضع كان جدا صعب .. مع العلم ان امه وابوه جدا طيبين بس صعب التعامل معاهم .. كنت اشكي احيانا لامي بيني وبينها .. وكانت امي بحسن نيه تحكي لابوي بدون علمي .. طبعا هو تضايق من الي يصير لاني قبل الزواج قلت له كلمه مااظن ينساها .. والله مااسامحك لو مااشترطت لي السكن لاني كنت اخاف من اهله ومشاكلهم اللي وصلت لفراشي انا وزجي .. امس ابوي اتصل علي قال انا جاي اكلم زوجك يطلعك شقه لحالك .. حاولت افهم ابوي ان زوجي ماعنده الا 1300 شهريا وين يقدر يستاجر والا يصرف علي والا يساعد اهله .. قال انا باكلم زوجك وابوه .. قلت لا انا اكلم زوجي وانا قصدي والله يعلم اني اهدي الموضوع ..ناديت زوجي وحكيت له .. قلت ماابغى احد يدخل بيننا لا اهلي ولا اهلك واحنا نحلها بيننا بدون مشاكل لاني اعرف تدخلات الاهالي ماوراها الا حساسيات بيني وبين زوجي .. وكنت اخاف انها توصل لدرجة اني اكرهه ويكرهني .. اتفقت انا وياه انا نهدي الموضوع انا اهدي اهلي وهو يكلم اهله .. بس الله يهديه راح قال لابوه كل شي وانا ماالومه حبيبي لان نفسيته تعبانه عشان راتبه ضعيف ومابيده شي .. ابوه زعل مني وامه كمان زعلت وكلموا ابويه وتفاهموا وعمي فهم ابوي انه طالع من البيت من بكره .. المهم انا وزوجي حالتنا تغيرت وتعبت والله وانا احاول اراضيه .. قسم بالله صرت اتمنى بس اشوف ضحكته . حرام مسكين مايستاهل يقول انتي واهلك تهينوني لاني فقير وابويه تعبان معاق . ندمت على كل شي ماابغى حاجه من هذي الحياه الا رضاه عني .. طفشت من نصايح امي ومن نصايح ام زوجي .. ماوراها الا الهم والنكد .. ابغى حبيبي يرجع لي زي ماكان لاني مااتحمل عيشتي وهو بهالشكل .. بكيت عنده ترجيته .ز اعتذرت لاهله وقلت لهم لاتطلعوا من البيت .. ياناس من طيبته يقول انتي ماغلطتي هذا حقك .. وانا مازعلت منك انا كاره نفسي بس . وكلها يومين وارضى لاتشيلي همي ..
بنات الله يسعدكم اللي عندها حل او نصيحه تفيدني لاتبخل .. وماشكواي الا الى رب العالمين .. لكن ماخاب من استشار وانا اعتبركم اخواتي والله قولوا لي اش اسوي .. لااحد يقول انتي غلطتي لاني اعرف غلطتي وندمت .. بالله ادعوا لي ان حبيبي يرجع لي لاني مااقدر اعيش بدن رضاه عني وضحكته اللي انسى بها الدنيا