نصيحة لا احد يتوهق مثلي

1. من اوله لاخره شك يروع يجيب المرض


2. >>>>>>بالله وش اقول مافيه الا جملة وحده حسبي الله ونعم الوكيل

السلام عليكم ورحمة الله وبركاته
صباح / مساء الخير
راح ادخل في الموضوع على طول ..
قدر الله ورحت سوق الاندلس بالرياض وقلت اخذ لفه على المشاغل لاني ناويه افصل فستان الفرح
اراد الله ودخلت كم محل ومن ضمنها اوف وايت عند مدام ليلى
حسبي الله عليها الله ينتقم لي منها عاجلا غير اجل
المهم اخترت الموديل اللي كنت ناويه عليها واتفقنا ورسمت لي احلام وردية
وش بتستخدم من اقمشة
وكيف بتنفذ
وكم بتسوي من عينة
وبروفه للبطانه وبروفه قبل التسليم
وانواع الكذاب
اتفقنا على 5500 شامل القماش + التسليم بعد شهرين
ومن هنا بدأت معانتي >> قسما بالله انها خارجه من قلبي
المهم اعطيتها 2300 بناء على طلبها وانا على نياتي
وقالت البروفه قريب وهي تسحب علي شهر كامل وتتصل بعده واروح اسوي البروفة وطبعا الطلب المعروف اهم شي الفلوس واروح من ذكائي اعطيها 2000 زيادة
على اساس التسليم بعده بشهر ويبقى 1200 لكن اتت الرياح بما لا تشتهي السفن
وبعد بروفه البطانه
تمتد فترة السحبه لتصل الى شهرين وتوقعوا وش متصله تقول تعالي سوي البروفه الاخت ضيعت بروفة البطانه وعادتها بعد شهرين
>>> بصراحه بدون تعليق
احسبوا معاي الحين لنا 3 شهور ننتظر الفرج
بعدها انشغلت بالاختبارات والدراسة وما عاد سألت وقلت تشتغل براحتها
بعد 3 شهور يجيني الاتصال المرتقب البرنسيسة ليلى بتتصل علشان اسوي بروفة قبل التسليم
من جد فرحت فرحه وقلت الحمد لله فرجت بعد 6 شهور انتظار
بس الله لا يوريكم الصدمه يوم شفت الفستان مدري وش جاني تبلدت المشاعر تحبون اوصف لكم
ولا 1% من الموديل اللي انا طالبته على العلم انها بروفة قبل التسليم يعني مافيها مجال
القماش تل ابو 10 ومشكوك شك هنود

من اوله لاخره شك يروع يجيب المرض

>>>>>>بالله وش اقول مافيه الا جملة وحده حسبي الله ونعم الوكيل

طبعا انا اعترضت هنا وقلت مستحيل اخذه بهذا الشكل هي قالت اوكي راح اعيده >>>والله لو هي واثقه من شغلها كان ما وافقت تعيده (( وجهة نظر)) وقالت بحكم اني كنت معجوقه بين لبنان والسعودية الماما تعبانه !! وانا وش ذنبي
المهم قلنا نصبر لعل وعسى تفلح هالمرة وما معنا الا الصبر اكثر من نصف المبلغ معاها
رجعت لها بعد كم يوم علشان نعيد الاسطوانه ونتفق وش ملاحظاتي وغيره
طبعا هنا تغيرت الشيخه وقالت تبغى زيادة في المبلغ >> من جد شين وقوي عين
ورفضت اني اجيب قماش من برى وقالت اصلا ما يكفيكي 15 م من جد سلامات 15 م المشكلة ما فيه عرض انا نحيفة مرة والذيل طوله متر وحتى لو سمينة ما توصل 15 م طاقه كاملة >> من جد تستهبل
المهم وصلنا لباب مسدود هي تبغى زيادة فلوس وانا مستحيل ازيدها على شغلها المعفن وفي نفس الوقت رافضه القماش اجيبه من برى على الاقل اضمن خامه راقيه
>> والله اني طلعت وانا الدموع اربع اربع من جد قهرتني حسبي الله عليها ما صار فستان فرح
والى يومكم هذا لا حس ولا خبر
ربي الشاهد وحده على كل كلمة كتبتها وان شاء الله اخذ حقي منها في الاخره خيرا وابقى والله ينتقم لي منها عاجلا غير اجل وتشوف اللي شفته في اغلى ما تملك
والله ما كتبت الموضوع علشان اتشفى منها بالعكس ما كنت حابه اكتب علشان شي واحد
انا ما احب قطع الارزاق بس المومن لا يلدغ من جحر مرتين وانا ماني حابه وحده منكم تمر بنفس تجربتي سواء معها او مع مشغل ثاني
اسالي وتروي واستخيري وبعدين توكلي على الله ولا تعطون مبلغ كبير خلوا ثلاث ارباع المبلغ وقت التسليم
واشكركم على وقتكم اللي قضيتوه علشان تقرون قصتي