هلبات كثيرات قبل الفاينلات ساعدوني

1. السلام عليكم ورحمة الله وبركاته

بسم الله الرحمن الرحيم

السلام عليكم ورحمة الله وبركاته

اكتب مشكلتي بالتفصيل الممل لعلي اجد حل لها باسرع وقت ممكن لاني تعبت والله تعبت وصرت انا والدمع اخوان قدام الناس قويه وقدام نفسي ولا شيء انسانه محطمه بمعنى الكلمة
انا ولله الحمد والمنه منذ صغري كنت طالبه متفوقه بين الجيد جداً والامتياز حتى المرحله المتوسطه والاول والثاني ثانوي وفي الثالث ثانوي بدأت بالتراجع وحصلت على تقدير جيد مع ان حلمي كان كليه الطب او قسم الحاسب ولكن طموحاتي ذهبت ادراج الرياح اخذت دوره في الحاسب الالي ونجحت فيها ولله الحمد بتقدير امتياز وحصلت على وظيفه بنفس السنه اللي تخرجت فيها من الثانوي و وتفوقت بشغلي واخذت دورات وحصلت فيها على امتياز وكنت ابكي لو اخذت جيد جداً تقويمي امتياز ولله الحمد والمنه حتى سنتي هذي
مشكلتي اني التحقت بجامعة اهليه وببدايه الدراسه حصلت على تقدير جيد جداً مرتفع وفي المستوى الثاني تقدير جيد جداً في المستوى الثالث بديت اخبص صرت اجيب راسب وفي نفس الماده يعني انجح في مواد صعبه الا هذي مانجح فيها لازمتني على اربع اترام ومازلت اعاني منها جبت مدرسات ودرسوني اياها ومافيه مشكله عندي على ان اللغه مهي صعبه انجليزية بس القرمر والريدنق والتعبير هذي عجزت منها والله اني حاولت حرمت نفسي من السفرات الكل يستانس بالاجازات وانا ماسكه الكتاب ما اطلع من هنا ولا هنا حاولت احفظ الكلمات ماقدرت افهم من الشرح بس احفظ ماقدرت مشكلتي ماعرف احفظ يا افهم والا اضيع مجالي اللي اخترته حاسب وبرمجه لانه يناسبني كثير
اليوم اختبرت وجبت درجه تسد النفس وجلست طول الوقت ابكي مع اني والله لي اكثر من شهر وانا اذاكر وادرس واترجم بس لاتقولون احفظي والله عجزت احفظ
اختباري بعد شهر يا اكمل والا اكبر الوساده واريح دماغي
بس بكذا احلامي راح ادفنها مثل ماتدفن النعامه راسها كل شيء تسكر بوجهي الا باب الرحمان سبحانه
انا ماني صغيره او مراهقه ولله الحمد وصلت مرحله اعرف وش ابي وماكملت الا اني ابي اثبت لنفسي اني ممكن اعطي باي وقت بس ذبحني الانجليزي
للمعلومية دراستي مافيها ولا ماده بالعربي وماني متزوجه وماعندي اي مسئوليات غير الوظيفه والدراسه ومعتزله الدنيا كلها بخيره وشرها
يارب احد يرد علي ويساعدني
يارب تفرج له وتسهل امره اللي بيدلني على الطريق الصح