والله اني أحبك رغم كل الظروف قصة من تأليف ذربة المعاني

1. ام ناصر: ما عليه نص ساعه وبنكون زاهبين .


2. يلست ام ناصر تسحي شعر بنتها (شمسه عمرها 8 سنوات )


3. سلطان : تونيه ياي من عنده وأحيده يرمس في التيلفون .


4. قبض سلطان مطر بييده وقاله : يالله يالله بنظهر وخل عنك هالرميسات ...


5. بخش : موجود طال عمرك ..


6. سار بخش صوب صندقه صغيره وياب منها جدر عود ..

الجزء الاول
في يوم من أيام اجازة نص السنة ..وبالتحديد يوم الخميس الساعة 8 ونص الصبح .. أبو ناصر كان توه راد من شيشة البترول معبي سيارته .. يبون ايسيرون ايقيلون في البر ويا هلهم ..
نزل بو ناصر من سيارته وهو يدندن بأغنيه ميحد حمد ....(انته عيني وانته شوفي والبصير .. والقمر لي زان به دعج الليال ...وانته نسمات الصبا وانته العبير ..وانته نوري وانته السحر الحلال ....)
ام ناصر: يالله بصباح خير ..الناس يسلمون أول ما يحدرون البيت انته حادر مستهوي .
ابو ناصرابتسم وكمل الاغنيه سوا عمره ما يسمعها : ( وانته شوقي في معاليج الضمير ..والولي عند الشقى وانته العلال ..فقت من نومي على طيف مثير ..زاير خطاف في صحوت خيال .........)
ابو ناصر: خلينا يا شيخه والله متولهين على المقيل في السيح من متى ما سرنا .
يلس على الكرسي ومسك الريموت كنترول وبدل على الجزيرة ....وألتفت يرمس حرمته : هاه خلصتي انتي وعيالج والا بعدكم .
ام ناصر: شوه خلصنا!! ....عيالك لين الحين ما اتزهبوا .
ابو ناصر: شوه يتريون لين الحين ..متى يبونا انهير!! ...الحين نحن الي علينا العزيمة ولين الحين ما ظهرنا .

ام ناصر: ما عليه نص ساعه وبنكون زاهبين .

يلست ام ناصر تسحي شعر بنتها (شمسه عمرها 8 سنوات )

ابو ناصر عنده 4بنات وولدين ..البجر ناصر وعمره (24 ) وهذا يشتغل في ابوظبي ويظوي يوم الاربعاء ويهير يوم اليمعه ..يعني ما يتم في العين وايد ..ومريم وتركت ناصر عمرها ( 22) درست في جامعة الامارات سنة وعقب ودرتها ,خاطبنها (راشد ولد خالها ) وعقبها ميثه (19 ) وهي البطلة في قصتنا..ابوها مدلعنها وايد وايحبها اكثر عن اعياله الباجيين ..وهيه حبوبه وايد, تدرس شريعه وقانون في جامعة الامارات , عندهم بعد حمد (16 )في صف اول ثانوي وشمسه الصغيره الي قلنا عمرها 8سنوات ولطيفه (4 سنوات )........
ابو ناصر :بيكون ما نسيتوا شي من السامان .
ام ناصر: ما اظنيه نسينا شي .. البارحه بتنا لين نص الليل ونحن انقفض فيه .
ابو ناصر وهو يرمس بنته الصغيره شمسه :شموس حبيبتي سيري زقري الخدامه خليها تي .
أم ناصر : شوه تباها الخدامة الحين ؟؟ .. قابضه مونتها ..
ابو ناصر : ابا اخبرها اتحمل السامان في الكروزر .
ام ناصر : وشعنه بعد الكروزر.؟؟
ابو ناصر : ناصر واخوه ايسيرون في الكروزر .. وانتي والبنات ويايه .
ام ناصر : ناصر ما اظنيه يبا يسير سامعتنه امس ايقول لاتوعوني .. يبا يرقد حليله .
ابو ناصر وبدا يعصب :شوو ما بيسير .. عنبوه بيسلم على اهله وبيفازعنا بعده هناك .. كم مرة نحن انسير انقيل في البر!!..قومي قومي الحين وعيه ..
ام ناصر : ما عليه ما عليه الحين بوعيه .
ونشت ام ناصر توعي ولدها .....
وتدخل الخدامة .........
ميرانتي : بابا انته ايريد انا ؟
ابو ناصر :هيه سوقي السامان السياره .
ميرانتي : بابا انا ما يقدر اييشيل هذا صندوق زيادة كبير .
ابو ناصر : ما عليه انا بسير اشله وياج .
وظهروا وساروا صوب الصندوق ................
ذيج الساع سارت ام ناصر اتوعي ولدها ناصر ...في غرفه ناصر .....
ام ناصر :نصور ابويه نش عاد بسك من الرقاد .
انتبه ناصر : ام اميه شوه تبين؟؟
ام ناصر : ابوك يباك اتخاوينا .
ناصر : انا قايللكم من امس انيه ما بسير وياكم وموصنكم محد ايغثنيه .
ام ناصر : قم يابويه .. ابوك يباك اتسيرفي الكروزر حتنه فيه السامان و..وجان حطيناه في الاستيشن ما بيضمنا كلنا ..ما شاء الله
ناصر عقب ما عق عنه اللحاف وكان معصب حتنهم وعوه من الرقاد : ما عليه الحين انا ناش .
ام ناصر : يعلني ما اذوق حزنك يا الغالي .
ظهرت من حجرة ناصر وكانت سايره صوب حجر البنات ..
ابو ناصر :لا اله الا الله هب صندوق من كبره .. هب ثقل فيه ..تفازعنا عليه انا والخدامه ويالله يالله رمنا له .
ام ناصر : ما حطينا فيه الا الي نباه للعزيمة .
ابو ناصر : وعيتيه ولدج ؟؟
ام ناصر : هيه فديته هبط يتسبح .
يت ميثه الصاله وبكل دلع :صباح الخير... وحبت ابوها على راسها ووايهت امها ..
ابو ناصر : صباحج عسل ..
ميثه : ابويه لا تقول عسل انا ما احب العسل قولي ...صباحج فل وجوري .
ابو ناصر : ههه صباح الفل والنرجس والجوري والورد بكل الوانه ..
ام ناصر : يا شين الدلع يووم ايكم على كبر .
ميثه: فديتني امايه توني بنت 19 .
ام ناصر : انزين بنت 19 تتحرين عمرج ياهل ؟؟ الي كبرج قدهن عرسن وعندهن اعيال .
ابو ناصر : تعالي تعالي ميثاني صبيلج شاهي والا لبن بوش ..خلي عنج خريط امج .
نشت ميثه وصبت الها جاهي وشلته وسارت صوب مريم اختها في حجرتها....
يلس ابوناصر ايطالع التيلفزيون...وعقبها..
ابو ناصر : عيل حمادي وينه؟؟ ..مساعه يوم انا ظاهر كان هنيه .
ام ناصر : هيه فديته ظهر قال بيسير يمشى شويه لين ما نزهب .
وشويه وأنه ناصر ظاهر من حجرته لابس وزار وفانيله ....
ناصر : السلام عليكم .
ابو ناصر+ام ناصر : وعليكم السلام .
ويهوي على رأس امه و ابوه وايحبهم فوق رووسهم ..
ناصر : شصبحتو اليوم ؟؟
ام ناصر : بخير يعلك الخير .
ناصر :دوم ان شاء الله .
ابو ناصر وهو يرمس ناصر :وشعنه امبونك ما تبا اتخاوينا .
ناصر : ابويه تحيدنيه أضوي الاربعاء ..واتريا الخميس عسب اوطي راسي وارتاح .
ابو ناصر :يا بويه نحن ما نتيمع ويا اهلك وعمومتك الا عقب التوفات مرة ..
ناصر :هيه نعم .
ابو ناصر :عيل ياالله يا بويه هيداك تنشر ..كل الي نباه حطيناه في الكريل .
ناصر : ربكم ما نسيتو شي ؟؟
ام ناصر وهيه ناشه سايره صوب حجرتها:لا الغالي سم بسم الله وجدامك الرحمن .
يلس يتريق وبعدين ........... :عيل بسير اتلبس كندورتيه وأخذ سفرتيه وبسبقكم هناك .. الا ما حددتوا وين بتقيلون ؟؟
ابو ناصر :ظنيه الا ينوب صوب المرقاع الي غدف عزبة يدك بكم من كيلو .. عند ذاك العربض الزين ..
ناصر : زين عيل يوم الا هناك .. البقعه زينه ما شاء الله.
نش ناصر عقب ما شرب له كوب لبن .. وهبط حجرته ..شِل سفرته في ييده وظهر ..
ناصر : ابويه شي في خاطرك ؟
ابو ناصر :هيه صدق اخطف على العزبه .. وبتلقى بخش ذابح الذبايح ومغسلنهن ..خله ايحملهن لك ..وخله ايناولك الجدور الكبار ماليل العزايم ........هيه واخطف على الجمعيه وخذ ماي وبيبسي .
ناصر :فالك طيب .
ابو ناصر : فالك ما ايخيب.. دق لخوك خله ايخاويك .
ناصر :جيه وين هوه ؟؟
ابو ناصر : الا هنيه يتحوط .
ناصر : ما عليه .. ويالله حتى انتوا هيداكم تظهرون .
ابو ناصر : اتريا هالحرمات يظهرن .. جنهن سايرات عرس يتعدلن .. هب جنهن الا سايرات السيح .
ضحك ناصر على رمسة ابوه وظهر عنه .
ظهر تيلفونه واتصل بحمادي اخوه وقاله انه الحين بيخطف عليه .
سمعته خته لطيفه الصغيره الي كانت يالسه تلعب يوم كان يرمس حمد .. يت صوبه وقالتله بكل براءه : ناثر ناثر..
ناصر:ها لولو شوه تبين
لطيفه : انا بثير وياك .
ناصر ويتظاهر انه عصبي :ما فيه عليج.. .. انا ما اداني اشل بنات ويايه .
زعلت من كلامه وكانت شويه وبتصيح .
ابتسم الها ناصر وهوا عليها وشلها :يا حلاتها السيره يوم الربيعه لولو .
ابتسمت له ولوت عليه ....
زقر ناصر على ابوه :ابويه بشل لولو بعد ويايه .
ابو ناصر : برايك بعدك بتفكنا من حشرتها
ضحك ناصر على ابوه وظهر وهو شال لولو وساروا صوب السياره ......
في حجرة مريم الي كانت ميثه عندها ..
ميثه :اوب اوب شوه هالحلاة كلها.. حق منوه متعدله هالكثر .
مريم بخبث : حق ريلج تصدقين ؟؟!!!
ميثه :خ بايخه ..ثره رشود ريلي وانا ما ادري؟؟!!
مريم : يعني يوم تدرين انه حق رشود شعنه بعد ترمسين وبعدين ليش اتقولين رشود ؟؟ .. اصغر عيالج لا اصغر عيالج هوه !!
ميثه :لا يدهم ..خ
مريم :ودج وود عيالج لو بو سنيده يدهم .
ميثه :بو سنيده بعد !!! لا والله تطورنا .
مريم : جان يازلج .
ميثه : تحيدين يوم اتمين اتصيحين عند امايه اتقولين ما تبينه .
مريم : كنت خبله وياهل وما عندي نظر .
ميثه : لاه.. الي يسمع عاد انتي الحين عاقل وعندج نظر.
مريم : غصبا عنج بعد عاقل و رزين ....... انزين بتخبرج انتي شوه مهبطنج عندي الحجرة ..لج حايه هنيه
ميثه : هاويه اغلس عليج .
مريم : صكتي صكتي ..... اليوم عشاقج اثنينتهم بيكونون هناك .
ميثه : فديتهم انا ..ههه
مريم : فداج الند .. تضحكين هاه .. يا سفاحة القلوب ..
ميثه :خيبه سفاحه مرة وحده ..
وجان تدخل عليهن امهن :هاه بنات زهبتن والا ...؟؟
مريم : هيه امايه خلصنا .
ام ناصر : عيل لبسن عبيكن الحين بنظهر .
مريم : ان شاء الله .
ظهرت امهن عنهن ........
ميثه : بتخبرج مريوم وين مجله فواصل ما لت هالمرة .. والا شعر وفن مالت أمس ..؟؟
مريم :شوه تبينهن وانتي سايره السيح .؟؟
ميثه : ابا اعد عليكم قصيد في الدرب
مريم : اشوا اتحريتج تبين تعدين قصيد على عشاقج ..خ
ميثه : فقدت ويهج .. انزين وجان عديت عليهم شعليج انتي ؟؟
مريم : شعليه بعد ؟؟ عليه كندوره ..ههه
ميثه وبدت اتعصب : هب منج مني انا مضيعه وقتي ويالسه ارمسج ..بسير البس عباتي ابرك لي (ونشت وقفت عن مريم )
مريم : ههه .. ايه ميثاني ما تبين المجله .
ميثه ترمس اختها وهيه عاطيتنها ظهرها : هيه هاتيها وياج .
مريم :مسرعها رضت .
وتلبسن البنات عبيهن وسارن صوب سيارة ابوهن ..وظهرت عقبهن امهن وهيه شاله وياها دلتها ومجبت السح .
في بيت سيف عم ميثه ............
دخلت فاطمه (خالة ميثه وفي نفس الوقت حرمة عمها )على ولدها سلطان وهوه البجر عمره 21 وعندها ولد غيره (مطر عمره 17)وبنت وحده (نوره 19 ) وهاي ربيعة ميثه الروح بالروح
ام سلطان : هب من عوايدك يا بو مييد اتنش من وقت ؟
سلطان : يا أميه هذا اليوم عنديه اكس بشل ..
ام سلطان : يا بويه منوه هاي وشوه من الشي هيه ؟!!
سلطان وهو ميت من الضحك على امه :فديتج يالعيوز اكس بشل يعني غير ومميز .. وانا هاليوم عندي غير عن كل يوم .. وهاليوم اترياه من زمان .
ام سلطان : اتحريتها وحده من لوثك ..بقوم اسير عند شيبتيه ابرك اليه .. ما ادريبك شوه عندك اليوم اتهاذي وما تدري شوه اتقول .
سلطان :ههه .. انزين يا ام سلطان متى تبونا ننشر ؟؟
ام سلطان : والله يا ولديه الحين جانكم تزهبتوا .. توها اتصلت اليه خالتك وقالت انهم قدهم ظهروا من البيت .
سلطان : يالله عيل غايته .. بتسفر وبظهر ..
ام سلطان : على خير ان شاء الله ......... الا ما وايقت على اخوك جانه خلص ؟؟

سلطان : تونيه ياي من عنده وأحيده يرمس في التيلفون .

ام سلطان : اصبحنا واصبح الملك لله ..(وهيه يايه بتظهر من حجرة سلطان ): ماأدريبكم شوه لاقين فيه هالتيلفون ترضعونه ليل نهار
ضحك عليها سلطان وخذ سفرته ووقف جدام المرايه يتسفر وتم يدندن بأغنيه ميحد حمد .. (هلا يا مرحبا يا حي .. عدد ما تذري الذريان ..وعدد ما هب النسيم .. البارد الغربي يغذيها..وعدد ما هلت مزون السحب وهلت منها الوديان ..وعقب اسبوع نارت الارض ..من عشب ظهر فيها .........
المعروف عن اعيال هادف الشامسي انهم كلهم حلوين .. والحلاه الا فضلتهم .. وأحلى ما فيهم اعيونهم ..ارواحهن يسون الهن بلاد .. سلطان ما كان اجمل واحد فيهم .. بس كان يمتلك سحر وجاذبيه في عيونه نادر ما ينلقن في عيون أي حد ..ودومه انيق ومرتب وما يداني الا الزين .. كان لابس كندوره صوف بنيه ويالس يتسفر بسفره شال ..لانه الوقت كان وقت شتاء ..والجو الصبح بارد..
(سلامي لك هديه .. والتحيه هرج والكتمان ..ومظلوم على نفسه ..ألا يا من يشافيها ..أهيم بحبك العذري ..واحاول سالي السلوان ..وروح الصب مملوكه ..اسيره في دواليها .....)تنصخ سلطان من الخاطر وقال فديت روحج يا ميثه من متى ما شفتج ..أخر مرة كانت من سنتين ت تقريبا ..وبالصدفه بعد .. والله اني ولهان عليج ...و... (ودي بشوفك يالغضي لو حصل لي .. واقدم تحيات من قلب ٍ شفوقي ......)سلطان كان سرحان ويفكر في حبيبة قلبه ميثه .. ..وشويه الا يحدر صوبه مطر ....
مطر : هاه يا بومييد الشيبه محتشر ..هبط عليه في الحجرة وما خلانيه ارمس في التيلفون ..يقول يالله انقفضوا ابطينا على الجماعه
سلطان :ههه انته تولاك الشيبه وانا العيوز .(كان يالس يرمسه ويفتح مضرب الدهن عود ..)
وقف مطر متعيب من سلطان كيف اتسبح بدهن العود .
مطر : حوه ..بسك خليت شي فيه ؟؟ .... لا يكون تتحرى عمرك ولد عبد الصمد القرشي ..؟؟
سلطان : والله ما أحيده من جيسك !!.
مطر : حرام ياأنه الشيبه اليوم تتيه حياطته من هالعطر الي حاطنه .
طالعه سلطان :جيه هم بيخاونا .. ؟؟شعنه ما اتسير هيه وشيبتها ونواري ارواحهم .
مطر :لا ابويه هالايام ما ايروم ايسوق ..ركبته اتعوره .. وبعدين يا خويه الكروزر عفسه بجامبيلاته.. وهم ما فيهم عليهن
سلطان : صدقك والله..وين نواري ماهضلت..
مطر: شتباها
سلطان: ما يابتليه المدخن ..
مطر : اسمع هذا؟؟.. انا اقولك محتشرين يبون ايسيرون وانته تبا تتدخن بعدك ..
سلطان : وانته شعليك خلني اتدخن ..
مطر: الحين بتلقى عيوزك يالسه عدال السياره بدلتها وطاست الجامي .. اليوم بتلقاها من الفير ناشه تخض سقاها .
سلطان : ههه ..احيدها يوم وراها سيره من الفير تلقاها ناشه .. مهلجه عمرها والله( ويلس يرتب سفرته )
سلطان ويطالع مطر : يالله خلصت .
مطر : حشا ساير عرس كاشخ هالكثر وعطرك ايفوح من مسيرت يوم .. هب جنك الا ساير عند اغبرت السيح .

قبض سلطان مطر بييده وقاله : يالله يالله بنظهر وخل عنك هالرميسات ...

وكان بعد من الي بيسيرون ويا الربع العزيمه .. خليفه (خال ميثه )الي حرمته الله يرحمها (حمده عمت ميثه )عنده 3 اعيال ...راشد (23 ) وهو الي خاطب مريم بنت عمته (اخت ميثه )..وعلياء ( 21) وأحمد ( 19) أمهم متوفيه يوم كان عمر احمد 3 سنوات .. اتعيش وياهم عمتهم (وديمه ) هاي كان ما خذنها واحد ظاهري ومطلقنها من زمان ..أتعيش ويا اخوها عسب تلقى السند الي يسندها وايعينها على تربية اعيالها .. وبالمرة اتساعد اخوها في تربية اعياله واتجابلهم عقب ما ماتت حرمته ..
وديمه عندها ولد وثلاث بنات ..حميد وعمره ( 22)وهذا ربيع سلطان وايد ودومهم متخاويين .. وعندها موزة وعمرها ( 20 ) وخاطبنها ولد عمها الظاهري ..والريم (18 ) أول سنه في جامعه الامارات وتدرس بعد شريعه وقانون شرات ميثه ونورة ..ومهره ( 15)في صف ثالث اعدادي ..هاي بختصار نبذه عن عايلة خليفة .. وعايلة وديمه ..
خليفة كان ساير العزيمة في سيارته النيسان .. وشال وياه بنته علياء وأخته وديمه وبناتها ..والشباب (حميد وراشد وأحمد ) سايرين في سيارة راشد ..
وآخر عايلة كانت بتخاويهم هيه عايله سعيد عم ميثه .. وهذا اصغر عمومتها ..وماخذ وحده راشديه (خلود ) وعندهم بنت (أريام 4 سنوات )وهاي ابوها متخبل عليها لدرجه انه ايحب الناس تزقره بو أريام ..وعنده توأم فهد وشهاب عمرهم(سنه ).......
في سيارة خليفة (خال ميثه ).. صاح تيلفون وديمة ..ظهرته ورفعته لموزه ورى تباها اتخبرها منوه متصل ..
وديمة :موزوه شوفي منوه متصل ؟؟
موزة : امايه هاي خالتيه شيخه (أم ناصر )
ردت وديمة على اختها .....
وديمة (أم حميد ): ألو ..
شيخه (أم ناصر ): مرحبا الساع .
أم حميد : لمرحب باجي .
أم ناصر :وشالحال عليكم وعلى خليفه وعياله .؟؟
أم حميد :يسرج حالهم .. كلهم بخير وبنعمه الحمدلله ..أنتوا شحالكم ؟؟
أم ناصر : ما نشكي باس الحمدلله .. عسى ظهرتوا
أم حميد : تونا والله ظاهرين.. يا بوج هالبنات ما ينقفضن .
أم ناصر : وأنا أشد من اصبحت وانا اوعي..نكلميه لين ماوعن.. وبالزور توهن ظهرن .
أم حميد : يا حيكم والله ..
خليفه ايرمس وديمة ...: اتخبريها عن المكان الي عزموا ايسيرون صوبه ..
أم حميد : خليفه يقولج وين عزمتوا اتقيلون ؟؟
أم ناصر : انا متصله أشاروكم ..
وديمة اترمس خليفه : تشاوركم شيخه وين تبون اتسيرون والا ايودونا على هواهم ؟؟
خليفه : والله جان تبون رايي.. هنه واين انقيل دوم ..صوب( ............)وخبره بالمكان
خبرت وديمه اختها عن المكان وعيبهم الراي .. واتفقوا انهم كلهم يتلاقون هناك .. أتصلت وديمة في ولدها حميد وخبرته ..واتصل بو ناصر في خوانه وخبرهم .........
نرجع مرة ثانيه لناصر الي كان شال سامان العزيمه .. وكان بيخطف على العزبة ايشل الذبايح ..وصل ناصر للعزبة ونزل هو وحمد صوب بخش (هذا عامل عندهم من 25 سنه ومن كثر ما عاش عندهم .. ايعرف اطباع العرب وعاداتهم .. حتى انه يتوايه ويا الريايل يوم ايوون العزبه ) .. اتوايه وياه ناصر وحمد ..
ناصر وحمد : السلام عليكم .
بخش : وعليكم السلام .. مرحبا الساع بالشيوخ ..واشحالكم ؟؟
ناصر : بخير وسهاله الحمدلله ..
بخش : يا مرحبا بكم ..
ناصر : وين الذبايح الي وصاك ابهن ابويه .. ؟؟
اشرله صوب جدر عود محطوط قرب الباب .. وسار صوبه بييبه..
ناصر : هيه صح قبل لا انسى .. ما شي جدر ثاني اكبر عن هذا ؟؟

بخش : موجود طال عمرك ..

سار بخش صوب صندقه صغيره وياب منها جدر عود ..

حمل بخش لناصر الجدور في الكريل وناوله كيسه عوده ..مقطع الهم فيها خس وارويد وجرجير من انتاج الي زارعينه في العزبة ..(في هاي العزبه أو نقدر انقول عزبة ومزرعه في مكان واحد .. الي هن من ملك اعيال هادف الشامسي .. امخلفنها ابوهم عليهم .. فيها البوش والهوش والدياي والحمام والبط والارانب .. وزارعين فيها الطماط والخس والجرجير حتى الجت زارعينه فيها .. ما شاء الله تربتهم زينه وعندهم الماي متوفر ..ومرتبينه بطريقه وايد حلوه ..)
ناصر : شي في خاطرك .....
بخش : سلامتك طال عمرك .. موافج خير
ناصر : فمان الله
==================
نهاية الجزء الاول ... لو عيبكم الجزء بكمل .. اتفقنا ؟؟