وصفات شعر عيون مغليها مع صورة شعرها

1. فوائد الخلطة التالية وسجلي عندك :


2. 1 - انبات الشعر. ( وهذا ترى مو سهل تلاقينه )


3. بس للمعلومية والامانة /

وكالعادة جيتكم بخلطاتي السحرية
لأني احب الاهتمام حيل بنفسي ابيكم انتو بعد تهتمون
بس هالمرة للشعر
وصورة شعري بعد عشان تصدقون،،،
ومن الآخر اللي مالها خلق تسوي وتشيل وتحط وتجيب وتودي عشان شعرها وكسولة وتقول يبغالها شغل واخذها جاهزة احسن لا تكملين قراءة الموضوع لان بصراحة هذرة واجد ههه
بس نتايج رهيبة وخلطة بالمجان
واقول اتركو عنكم فلانة عندها خلطة عجيبة والعطار الفلاني عنده خلطة ب 500 وبالنت وحدة مو موثوق منها وتقعد تمدح بخلطاتها من اليوم لبكرة الصبح وبالسعر الفلاني لا والتوصيل بعد يمكن ولا يوصل ،،،
واسمعي مني خلطتي للشعر
وربي مجربة ومو منقول وتعبانة وانا اكتب لعيونكم
بس ما ودي لكم الا كل خير ودعوة بظهر الغيب واللي بينقل خلطاتي ينقلها ماعندي مشكلة بس يكتب على الاقل اسم المنتدى وصاحبة الموضوع عشان يدعون لي
الزبدة طولتها وهي قصيرة

فوائد الخلطة التالية وسجلي عندك :

1 - انبات الشعر. ( وهذا ترى مو سهل تلاقينه )

2- اطالة الشعر وبشكل ملحوظ خلال شهر مابي اقولكم يوصل شعرك للركب خلال شهر ماعندي هالسوالف والكذب اللي مايفيدك بس بيطول شعرك بشكل ملحوظ جدا على هالوصفة ويمكن خلال سنة يوصل للركب هنا اتكلم بالمنطق << ياحبني لي بس
3- تقوية الشعر وبصيلاته من الجذور.
4- لا تقصف ولا تساقط بعد اليوم مع هالوصفة.
5- لا قشرة ولا أي مشكلة من مشاكل الشعر وعلى مسؤليتي ،،
6- نعومة ولمعان طبيعي للشعر لاتحتاجين فرد ولا تصفيف ولا استشوار بعد الان.
الان وبعد ان عرفتي الفوائد تبين الوصفة :
ارسلي لي على الخاص وتوصلك ان شاء الله .
ههه
توك تذمين في اللي يسوون لنفسهم دعاية
لا امزح لا تصدقون
خذو الوصفة وادعولي

بس للمعلومية والامانة /

ترى ريحتها قرف يعني اذا انك متزوجة وزوجك قبالك 24 ساعة وفري على نفسك ولا تسوينها لانك حتى اذا غسلتي شعرك راح تبقى الريحة شوي الا اذا مايهمك فيه وهذا المطلوب وماهمك الا شعرك ههه دبري عمرك
المقاديرتكفيك شهر وزيادة خابرتكم كسولين ماتبون كل شوي تسون الخلطة وفرت عليكم ههه وتعبي لك 3 قارورات زجاجية ولازم زجاجية لأن البلاستيك مع المدة يفرز مادة مضرة بالزيت القارورة تكون بحجم قارورة ماء الورد الكبيرة فضيها ونضفيها
وتعالي معي للمقادير
1- راس ثوم كامل مو فص ثوم انتبهي راس ثوم و كبير نوعا ما واذا صغير استخدمي راسين ثوم
2- فليفلة حلوة خضراء كبيرة.
3- ثلاث ملاعق كبيرة حلبة مطحونة لكل قارورة.
4- قرنفل اللي هو المسمار الحب مو المطحون.
5- قارورة زيت زيتون ولا تعقدينها موشرط الاصلي انا استخدم الوزير.
6- قارورة زيت اللوز الحلو للشعر من العطار ب 10 ريال.
7- زيت السمسم للشعر من العطار ب 10 ريال.
9- زيت الخروع وهذا بالذات جيبيه من الصيدلية لا تجيبيه من العطار واطلبي نوع مركز للشعر يجي مرة ثقيل
الطريقة :
1- اخلطي الزيوت با أناء مع بعض
2- واهرسي الثوم طبعا بعد ماتقشرينه وتغسلينه مع الفلفل الاخضر بالمفرمة لين يصير مفروم فرما ناعما ههه حشى طبخة
3- هاتي القوارير الفاضيه عندك اللي بتعبين فيها الزيت وضعي فيهم كمية من خليط الثوم والفلفل + 3 ملاعق حلبة مطحونة كبيرة لكل قارورة + قرنفل الحب يعني تقريبا قبضة طرف اصابعك مو قبضة ايدك ههه
4- صبي عليهم خلطة الزيوت اللي خلطيتهم مع بعض باناء اخر
5- غطي القوارير بشكل جيد ومحكم وضعيها بالشمس او بأي مكان بحرارة الغرفة العادية لمدة اسبوعين قبل ماتبدين تستخدمينها
والقصد هو ان تتشرب الزيوت بمكونات الحلبة والثوم والفلفل خلال هالاسبوعين فيصبح عندك عصارة زيت الثوم والحلبة والفلفل وكل اللي حطيته واو روعة
ولا احسن عطار ياعيون <<< فديتني
تخيلي معي فوائد هالخلطة بس من قراءة هالموضوع فكيف بالتطبيق
بعدها حطيها بشعرك يوم ورا يوم وشوفي النتايج!!! عجب عجاب
على فكرة عندي خلطة مكملة لها لخلطة احطها في اليوم اللي ما احط فيه هالخلطة بشعري يعني يوم احط ها لخلطة ويوم الثاني احط الخلطة الثانية وبجد قمة الروعة
واذا تبون الخلطة الثانية ماعندي مشكلة ومجانا للي تبي الخلطة التكميلية،،
بس من جد انواع الخياس بس ماعليه شعرك يستاهل منك شوية عناية وتعب وصبر وجهد وربي شعرك بيطلع شعر الهنديات
وبعدين ياكثر الشامبوهات والبخور والعطورات اغسلي شعرك زين وبخريه وهو رطب وحطي شوية دهن عود على شوية مسك وشمي الريحة
للي تبي الخلطة التكميلية زيادة الخير خلطتين ههه :
المقادير :
1- نبتة الصبار اشتريها من المشاتل وخليها بالبيت عندك ترى مفيدة للشعر والبشرة ماعلينا من البشرة الحين خلينا بالشعر .
2- زيت جوز الهند ولا تعقدينها أي زيت جوز الهند بس يكون الاصلي انا استخدم براشوت الازرق حق زينب العسكري ههه
3- زيت دابر املا الأخضر ابو ريحة خايسة وانتبهوا في اصلي وفي تقليد خذو الاصلي مو التجاري .
الطريقة:
1 - احضري زيت جوز الهند واخلطيه مع دابر املا
وضعيه في قدر للطبخ
2- اقطعي نبته الصبار وافتحيها من النص وطلعي العصارة اللي فيها بالوسط بالسكين بالملعقة بالشوكة كيفك المهم طلعي العصارة اللي بوسطها وضيفيها للزيت
وهذي صورة العصارة ::::
3- حطي كل المكونات السابقة على النار للتسخين
4- ضعيها بالخلاط الكهربائي واخلطيها مع بعض لتمتزج جيدا بعصارة الصبار
وعبيها بقارورات زجاجية وتمتعي بأحلى شعر
ملاحظة / ضعي أي خلطة في شعرك لمدة لا تزيد عن 5 ساعات ولفيه بفوطة مبلله دافية او كاب بلاستيك لمدة ساعتين وبعدين شيليه
انتبهي تنامين في الخلطة لان الشعر لازم يتنفس في الليل ،،
اخيرا شوفوا صورة شعري
هذا وتوني قاصته
بسم الله علي وقولوا ما شاء الله
ولاتنسيني من دعوة حلوة بظهر الغيب
الله يحقق لي املي ومطلوبي ويغفر لوالدي
قولوا امين
للأمانة منقول من عيون مغليها بس حيل عجبني الموضوع أتمنى الاستفادة للكل