يا عرايس ياحلوات ابيكم بكلمة

كيفكم يااحلى عرايس
يالله يوم دخلت منتداكم رجعتوني 5 سنوات ورى لاحلى الايام واروع الرومانسيات واحساس الحيااء والخجل <<<<الحين لا حيا ولا مستحى خ
المهم يا حبيبااتي اللي دفعني لكتابة هالموضوع محبتي لكن ويارب يتمم لكم على خير وتعيشوون بسعاده ورومانسيه وفلة حجاج
ندخل للسالفه اللي بقولها لكم وهي وصايا من خلال تجربتي صحيح انها 5 سنين لكن صارت لي فيها سواليف ومشاكل واشياء حسيت اني متزوجه من 10 سنين وطبعا مو كلها من زوجي حبيبي لكن الحين جايتكم بالكلام
طبعا اول شي لا تنسون الاستخاره عند تقدم الخطييب والخيرة فيما اختاره الله
وماراح اقولكم الكلام المعتاد وصايا الاعرابيه لبنتها ههه
طيب بعد الملكه
اهم شي الحياء يابناات ولاتجي وحده تقولي زوجي حلالي و
تدرين ليش لان بااقي ماصار زواج لا تسوي كل شي هالفتره وماتبقي شي للزواج
وتحسبي ان الافكار والخيارات كثيره
لان بعدين مع العشره والتعود مو على طول رايقه ولا تنسي الحمل وعمايله
خلي لك اشياء تسويها وتكوون جديده كليا
كثير من صديقاتي الي ملكوا وكان عندهم عادي يجي لو كل يوم ومابقى شي الا سووه
اتفقوا ان اول يووم ماكان له هذاك الاكشن والحيا والاحساس الفضيع
لانهم متعودين على بعض واكثر شي كان الخووف بس من ليلة الدخله والالم و
وتذكري ان الرجاال يحب اللي تتغلى عليه وماتعطيه كل شي بالساهل
يعني حلو التمنع بدلع وشقاوة
طيب ليلة الزواج
لاتنسي الصلاة في اوقاتها ولاتنسي الاذكار مو مع الحوسه والخوف والتفكير تنسيها لان العين حق
واكيد فيه الكثيرات الي يتمنوا يكونوا في مكانك
لا تظني ان حياتكم بتكون كلها عسل ووناسه
لان المشااكل ملح الحياة ويا زين الصلح ترجعي كأنك عروس
عند الزعل...
تكفين لسانك امسكيه
علشان ماتقولي شي وتجيبي العيد الرجال ما ينسى
اسكتي امسكي نفسك
لان وقتها يصير مبارزة بالكلام وخذ وهات واخرتها بيطلعك الغلطانه
حتى لو كان الحق معاك لكن بزلة اللسان بتقلبي الموضوع ضدك
دمعتك خليها غالية مو على اي شي تنزل لان بعدين بيصير الوضع عنده عادي
الاتفاق انه مهما صار زعل يبقى النوم مع بعض في الغرفه
لا تكتمي على انفاس زوجك وتلزقي فيه وين ماراح وراه خلي له مساحه لاتنسي ان الزوج تجيه الدوره
الشهريه مو بس انتي
{بإختصار خلي زوجك شريك حياتك وليس حياتك كلها}
نجي لاهل الزوج:
دائماً
خلي بينك وبينهم حدود لا تتخطيها حتى لو كانوا حبوبين وطيبين ليش؟؟
لان دوام الحال من المحال تذكري هالشي زين
اسرارك احتفظي فيها لنفسك او فضفضي لاخت قريبه منك او صديقه بعيده
وبعد مو كل شي ينقال لهم
يعني زوجك جاب لك شي قالك شي اهداك شي طلعك مشاك مو تنقزي من الفرحه ماتبقي احد الا تقولي له على بالك ان الكل بينبسط لك
وخاصة اهل الزوج لان الغيره بتكون موجوده وبعد ممكن يكون فيه حسد
اذا رحتي لهم او للجمعات خلي سواليفك عامه عن التلفزيون الموضه احداث عامه مواقف و
انتبهي تقولي شي عن قرايبك عن مشااكل صايره عن فلانه قالت عن مشاكلك الشخصيه عن عيوب في اهلك او زوجك ولو كان عن حسن نية
لان نقالات الكلام كثيرات وياليت ينقال مثل ماقلتيه الا يزودون عليه وكل وحده تنقله تزيد كلمه وتصيرمشاكل كبيره من ورى حسن نيتك وكلام قلتيه في لحظة فضفضه
تصوروا اعرف مجموعه بناتتعرفوا على بعض لأن ازواجهم اصدقاء بعد
واذا اجتمعوا كل وحده تقول عن زوجها اشياء المفرووض ما تنقاال واذا تفرقوا كل وحده قالت لزوجها عن صديقه اسرار ماكان يعرفها عنه وصارت بينهم مشااكل وفرقوا بين الاصدقاء بعد صداقه 7 سنين
بين كل فتره وفتره اهدي امك وعمتك من باب تهادوا تحابوا او في الاعياد
لا تشتكي لزوجك من اهله حتى لو قهروك لانه ما راح يسمع لك وبتنقلب السالفه عليك ومو كل المشااكل تحرز انك تنقهري منها لان حتى وانتي عند اهلك يصير سوء فهم بينك وبينهم
و مثلا لو صارت مشكله كبيره قولي له بدون تعصب وتطلعي اهله انهم غلطانين وفيهم وفيهم
الهدف منها
يكون عنده علم فيها ولا يصير حكي زايد
حاولي تتدربي تكوني حليمه صبوره ودوده صدرك وسيع
لان الحياة فيها الحلو والمر والمشاكل وتربية وامور كثيره متوقعه وغير متوقعه
ويارب يارب يووفقكم وتكونوا احلى عرايس
لكل من مرت هنا