يابنات احسني جبت العيد مره نفسيتي قافله

السلام عليكم ورحمة الله وبركاته
يابناات انا مرره ضايقه وبقوه
اليوم تهاوشت مع امي
مع انها لها تقريبا اسبوع ماصار بيننا احتكاك
وماتقولي شي ولا تهاوشني
يمكن تستغربون بس هذا اللي صاير
تعودت من يومي صغيره وامي تهزء فيني على طول
ويوم كبرت بصراحه صرت اواجهها واقولها ترا كلامك مايعجبني
ومن اسبوع ومالها طاري معاي ابدا<< على فكره ترا ما افطر مع اهلي افطر لحالي بالغرفه عشان امي اول يوم برمضان طردتني من السفره
المهم انها هالاسبوع حتى شغل ولف سمبوسه ماطلبتني قلت سبحان الله يمكن ربي استجاب دعوتي يوم ادعي ان ربي يلين قلبها علي
المهم اليوم صاحت علي قومي نظفي ومدري وشو
انا الليله ماكنت ابي افوتها بالصلاه الليله 27 بس قلت خلاص يابنت بلاش مشاكل وقومي اشتغلي
رحت ونظففت اشياء بعيده عني تحتاج 3 رجال مو بنت
وكل شوي تجي عندي انتي ماتعرفين تسوين وانتي فاشله
عاد انا بالبدايه قلت ان شاء الله بسوي طيب وابشري
بس بعد كذا يوم شفتهاتتكلم علي كثير قلت ترا ورانا صلاه مو بس انتي ترا بالعالم تعبدين رب العالمين
قالت تعبدين ربك وانتي عاصيه وصكت الباب
وكملت شغلي يوم خلصت
شافت المنشفه ماصارت سودا << يعني لازم تصير سودا اثبات يعني للنظافه
قالت الحين نظفتي ؟ وشهوله تنظفين اي كلام وانا يوم انظف تصير المنشفه سودا من كثر التنظيف
عاد هنا انا انفجرت
قلت اذا مو عاجبك روحي عيدي انتي شغلي
ومن قهري حسيت بكتمه بقلبي شوي وانفجر ودعيت علي وعليها وصكيت الباب على نفسي
الحين انا مرره نفسيتي زفت عشاني غلطت عليها
والله ماكان ودي
بس شي خلاص يرفع الضغط ومدري وش تبي مني بالضبط
انا الحين اقول ياربي الحين كيف اصلي واقوم الليل واطلب ربي وانا متهاوشه مع امي
ولاتقولو لي قومي اعتذري منها
امي طبعها مو اعتذار وهالسوالف
هي تكرهني لدرجة اني قمت اشك ان فيه عمل معمول لها او لي
لأنها وربي يابنات ماتداني المكان اللي اكون فيه
وماتتحمل تشوف اي شي يخصني
حتى لو كانت كاسه او فنجان او لبس يخصني
ماتتحمل تجلس بالمكان اللي فيه شي يخصني
انا مقهووره مدري كيف اسوي الليله
ابي اصلي القيام بس احسني غلطت وبنفس الوقت احسني خربت كل الايام اللي راحت وانا ادعي
طيبوا خاطري لو بكلمه ترا الدنيا قافله بوجهي