يدا بيد نحو تغيير جذري

1. اسيبكم مع كم نصيحة كدا و نرجع نتناقش سوا


2. و اعذروني على بعض الجراءة ^^


3. 20- لو كان فايق و رايق جيبي مرتبتين و سوي زي حرف ال T

احلى سلام لاحلى نسوان بالمنتدى
السلام عليكم و رحمة الله و بركاته
طبعا كالعادة يا سعادة تعرفوني احب اتفلسف شويتين
بس اكيد عارفين انه لكم و لمصلحتكم مش لاحد تاني
انا صارلي بالمنتدى اكثر من سنتين و استفدت فوق ما تتخيلو
و تعرفو في ناس مشتركين جدد و في ناس من زمان
بس في اشياء انتي تكوني لاهية عنها و ما تنتبهيلها الا لمن احد ينبهك عليها
موضوعي اليوم يعتبر شبه اقتباس من موضوع سابق نزل بالمنتدى
بيتهالي كان اسمه رسالة من عضوة في المنتدى شي زي كدا
طبعا سواء صاحبة الموضوع او الاخت اللي طرحته
عمري ما هنسالهم جميلهم معايا ابدا
لانهم افادوني بطريقة فوق ما تتخيلو
انا ما حبيت انه يكون جدي بحت لاننا زهقنا من اسلوب الجدية
نبغى نتصرف و نتغير و نفيد و نستفيد بطريقة ع قولتهم كلها الوان و فرفشة
نبغى نكون حبوبات و حلوات و كل شي خرافي في الحياة بس بطريقة تلقائية ما تكوني مجبورة ع شي
لازم تكوني راضية كل الرضا عن التصرف اللي بتعمليه و النتيجة اللي هتجيكي من وراها
انا هكتبلكم كم نصيحة كدا عالطاير و هكتب تعليقي عليها و تجربتي و ان شاء الله تفيدكم اللي بالازرق تعليقي اما اللي بالاورانج فدا اقتباس لموضوع سابق

اسيبكم مع كم نصيحة كدا و نرجع نتناقش سوا

و اعذروني على بعض الجراءة ^^

1- الفرفشة مهمة و البعد عن النكادة يعني حتى لو الروتين عماكم و حتى لو عندكم كومة عيال انتي نفسك ما تبغيه ينكد عليكي فالاولى انك انتي ما تنكدي عليه و ان هو بدا بالنكادة حاولي تمتصي غضبه و تسكتي و تغيري الجو و حبة حبة هو هيفكها و ربي باذن الله هيفرجها عليكم ( طبعا ما بعد الفيس تعليقي ) و بصراحة انا من الناس اللي حساسة و كنت عمال على بطال ازعل بس لقيت الموضوع مو حاوج لدا كله يعني ما حوجت اني انكد على نفسي و عليه و اخرب الجلسة او الطلعة كل شي له وقته و مكانه...
2- الابتسامة الدائمة يعني الرسول عليه افضل الصلاة و السلام قال تبسمك في وجه اخيك صدقة يختي اعتبريها صدقة بلا شغل تبويز و قرف يعني هو طول اليوم زهقان من عمله و عليه كومة اشغال و اصحابه ناس غلسة طول وقته بيتعامل مع شوارب لا تكوني انتي الشارب اللي بالبيت خليكي انثى خلي ابتسامتك تنسيه هموم الدنيا كلها بس لو سمحتي لا تبتسمي عمال على بطال و تحسسيه انه ماخد وحدة هبلة
3- لو خرجتو لازم تنبسطوا الله يستر عليكم بلاش شغل النكد يعني عيشو اللحظة بكل مافيها بلاش تشتكيله من اهله و من فلانة و من علانة خلاص خليكي قلبا و قالبا له و للخرجة
4- لو في الخرجة موضوع ممكن يؤدي للنكد قفليه على طول و ما تفتحيه الا لمن ترجعو او لمن يكون الوقت مناسب يعني لنفرض خرجتو خرجة رومانسية لازم تسبي في اهله او تفكريه باخطاؤه او تغتابي في مدري مين خلاص انسي كل العالم و خليكي معاه هو بس ترى الرجال فين و فين يحنو ع نسوانهم و يخرجوهم خرجة رومانسية طبعا انا الله يهديني كنت احيانا اخرب الخرجة و كذا مرة صارت معايا نخرج مبسوطين نرجع منكدين يعني احيانا يكون منه و احيانا مني بس في كلا الحالتين اختكم بالله ما تسكت عن حقها و دا خلا زوجي فترة يبتعد عني و حسيته كره الخرجة فصرت استخدم اسلوب اجل الموضوع لبعدين و كل شي بوقته حلو حتى لو حسيت الكلمة واقفة بحلقي ابلعها و بعدين افكر فيها لمن يجي وقتها
5- حاولي تلعبوا مع بعض و خليه دايما يفوز عليكي بس ابوس يدك ابعدي عن الدفاشة بلاش شغل المصارعين و الذي منه خليكي ناعمة و في العاب بالهبل منها العاب للمتزوجين بس مخصوص عشانهم و في العاب عادية زي البلاي ستيشن يعني بلاش تكوني صاحبه الرجال بالبيت خليكي انثى و طبعا احنا يالنسوان مع الخلفة ننسى حتى نعيش سننا الوحدة فينا تتزوج تنسى حتى كم عمرها معليه كل سن عيشيه لا تكونو زي العجايز المخرفنين ترى يمل منك و يروح يطالع برا خليكي فرفوشة و حيوية
6- لمن تتقابله في المطبخ سويله حضن خطافي او اذا جاء جنبك بوسيه في كتفه مع ابتسامة اغلب رجالنا اتربوا في بيئة جلفة و جافة ما عندهم شي اسمه مشاعر و عواطف و في رجال تفكيرهم انه لمن يبين لزوجته حبه لها معناته جرح لكرامته و انه هي هتذله " الحمدلله عالعقل " بابا الله يخليه ليا دايما يقولي الرجال زي الاطفال دلعيهم يعطوكي عيونهم ما بالك لمن تعطيهم حنان شوفي ايش هيعطيكي بس اتمنى انه مو شلوتي او كف خ
7- لازم تتعودو على ضمة الليل دي تجدد الحب يعني حلو لمن ينام و يصحى على مشاعر حلوة طبعا الشي دا في طور التنفيذ لانه ابو الشباب عشقه يحضن المخدة >< مدري ايش بينهم خ
8- لازم تدلعيه و تسويله فطور و لا احلى و اذا حابة كمان العشاء انا عن نفسي لا يكلف الله نفسا الا وسعها ما اقدر اسوي فطور متكامل زي الفطور الامريكي بس كل اللي اقدر عليه اني اعمله ساندوش و يجي من صلاة الفجر يلقاه جاهز و لو سمحتي سويه بنفس حلوة بلاش تصحي تسويله الفطور و انتي شوشة منكوشة افتحي نفسه لا تسديها
9- لمن تجي تصحيه من النوم حطي عطر و روحي اتمددي جنبه قبلها ب 5 دقايق و نامي جنبه و خدي يده و حطيها حوالينك و بوسي خده و خليكي ضامته و العبي بشعره و ابدا ما تتكلمي انا جربتها و الصراحة مفعولها حلو لا تفكروا انه هو اول ما هيصحى و انتي عاملتله دا كله هيهجم او شي لا مو شرط بس اقلها هيكون يومه غير و هيكون نشيط و مبسوط جربوها و هتدعولي
10- بوسيه قبل لا يخرج ترى الاشياء دي زي البوس و الحضن لها مفعول اقوى من السحر تخليكي بقلبه و عقله و ما يشوف غيرك ابدا باذن الله لانك محتوياه من مجاميعه
11- لمن تبغي تخرجي خرجة قوليله خرجني الاسبوع دا بس وقت ما انت تكون فاضي و وقت ما انت تبغى تخرجني بس اعطيني كلمة رجال طبعا انا لو عليا كل يوم اخرج خ انا بصراحة ما جربتها لاني من البداية متفقة معاه انه يوم بالاسبوع ليا و نخرج اي مكان نغير فيه جو
12- كوني جاهزة طول الوقت ل ... و حسسيه انه رغبتك زي رغبته و رجاء ابتعدوا عن التمثيل ترى الرجال مهم اغبياء صح احيانا ما همهم الا انفسهم بس برضو يفهموا و يحسوا و الرجال يكره الحرمة اللي تمثل انها مبسوطة و هي لا كدا هيعتبرك انك منقصة في رجولته و هيحاول يدور برا عشان يتاكد هل هو فعلا فيه نقص و لا لا
13- لمن يبغى ينام اتمددي جنبه و قوليلو جاتني افكار شيطانية عشان يحس انك بتفكري في الجنس زيه ترى الرجال ما يحبو المراة الباردة و انتو افهموها
14- حاولي تبدعي في الشي اللي يحبه عشان يعرف انك مهتمة فيه و انك حاسة فيه و عارفته و فاهمته و الا مع احترامي لك انتي اكبر جدار بالبيت لانك ما فهمتي زوجك كويس
15- لمن تتناقشو لازم النقاش يكون بكل هدوء و احترام بلاش نقل ادبنا على بعض و بعدين ضربني و بكا سبقني و اشتكى تروحي تفضحي في الرجال انه شتمني و سب اهلي و مجري ايش و اتاريكي انتي اللي ناكشاه الاحترام اهم شي بين المتزوجين و قبل الحب حتى انا الصراحة مرة كدا و مرة ازعق بصوتي الله يهديني بس في طور المحاولة اني اغير الشي دا ادعولي انتو بس
16- في الجماع غيروا الاماكن يعني بكل البيت ولو سوى حركة و عجبتك المرة اللي بعدها قوليلو سويلي هي
17- لازم تكوني انثى رقيقة حساسة ذكية ترغبي بالجنس زيه مثيرة تعرفي تونسي بلاش شغل الاصحاب و شغل العجايز جددي الله يستر عليكي
18- بالنسبة للاندروير جيبي اشكال مثيرة و مغرية بلاش ملابس جدتي و جدتك فاهميني اتوقع
19- وقت الملل و الفتور اتجنبي القعدة معاه الكثيرة عشان لا تتضاربوا و قوليلو نبغى نخرج بس انت اختار المكان و الوقت و حاولي تشغلي نفسك عنه طبعا كلنا بننقرف في حياتنا مشاكل من جهة مسؤوليات من جهة ثانية و بما اننا نسوان الدورة من جهة ثالثة و الحمل و الولادة كمان فالفتور و الملل شي وارد عشان كدا ابعدي عنه فترة بس مو تبعدي لدرجة تروحي بيت اهلك و لا تنامي بمكان و هو بمكان لا بس اتجنبي القعدة الكثير معاه و خليكي حالك حال نفسك بس مو انظائية يعني لو عندك اطفال اشغلي نفسك بيهم لو عندك صحبات روحي و زوريهم يعني حاجات زي كدا

20- لو كان فايق و رايق جيبي مرتبتين و سوي زي حرف ال T

و جيبي فواحة و حطي فيها زيت مساج و تحتها شمعة و افردي منشفة على المرتبة و قوليله سويتلنا مفاجئة و اعمليله احلى مساج
21- نصيحة لوجه الله لا تنامي بمكان و هو بمكان حتى لو كنتي ولادة لو ايش ما صار خليه معاكي ترى كثر البعد يولد الجفا قالك ابغى انام عند اهلي روحي معاه لكن لا تسيبيه هتكون بالبداية يوم بعدين يومين بعدين اسبوع شهر سنة لحد ما الله لا يقول تفترقوا لانكم بعدتو عن بعض وصارت بينكم فجوة في ناس يقولو نخليها كاجازة عشان نوحش بعض انا بصراحة ما جربتها و لا ابغى حتى لانها نصيحة جاتني من رجال يعني من خالي و من بابا تقدري توحشيه و يوحشك بالف طريقة مو لازم انتي ببيت و هو ببيت و لو كنتوا ساكنين بعيد عن اهاليكم يعني بمدينة ثانية مو مشكلة يا ستي ناموا سوا عندهم او اسهري عندهم للفجر و روحي نامي مع زوجك بفندق بشقة باي مكان
22- مع زوجك خليكي معطاءة بلا حدود و كوني طفلة وقت ما تلعبو زوجة وقت ما تقررو و فاتنة و مثيرة و قت ... و صاحبته وقت ما يكون محتاجك و يكون في ازمة و غير كدا و الاهم خليكي على طبيعتك عشان لو اتصنعتي هتجيكي فترة و تتعبي و هتقولي دي مو انا و هترجعي اسوا من اول و هتخسري كل شي و ممكن يجيكي انفصام بالشخصية خ امزح
23- حريم كثير اعرفهم بعد زواجها باقل من سنة او ممكن ان جملتها بعد طفلها الاول تهمل نفسها و تقولي ما عندي وقت معليه اقولك عندك وقت و وقت كبير كمان لو رتبتيه يعني ما عندك 10 دقايق تتزبطي فيها لابو الشباب تلبسيله احسن و افضل لبس و تتمكيجي لو ان شاء الله بس كحل و قلوس اكيد عندك بس انتي مع احترامي لك عجازة و بعدين تعالي ابكي لمن ينفر منك و يسيبلك البيت و يسهر برا مع اصحابه للفجر
24- بعد اول ولادة حريم كثير تتوسع المنطقة عندهم من اسفل فانتي عشان تتفادي الشي دا روحي دوري ع الخلطات اللي ترجع احسن مما كنتي عليه اول عشان لا تجي بعدين و تقولي عندي هوا و انحرجت من زوجي سوي كول اللي تقدري عليه و اهتمي اهتمي
25- الله يرضى عليكي و على اهلك و قبايلك كولهم >> بابا لمن اقولها قدامي يقولي كانك بتشتمي بس سلامتكم ما بشتمكم اهتمي بريحتك بلاش تكوني زي الخلايق الثانيين اللي شكلها يخبل و جذابة بس تقربي منها افو عالريحة نفسك تشردي طبعا بودي شوب و نكتار و غيره ما خلو شي الله يسعدهم نزلو كل حاجة عشان لا تتعذروا و مزيل العرق خ حطي منه ليل و نهار كدابين اللي يقولولك 12 ساعة حماية اية حماية يا ابو حماية انت احنا اكثر ناس تعرق بحكم اننا رايحين جايين و تشتغلي هنا و تسوي هنا
26- اتفنني اتفنني اتفنني بنفسك عشان نفسك قبل زوجك دلعي نفسك عشان نفسك و عشان زوجك ترى الحرمة اللي تهتم بحالها يطلع شكلها اصغر من عمرها
27- و ان كنتي مليانة يعني نصحانة ع قولتهم و زوجك يحب النحف انحفي بلاش تقولي رضي رضي ما رضي بالطقاق خليه يفتخر انه زوجته نحيفة و لبيسة اغلب النحاف يلقو الملابس اللي يبغوها بسرعة و يكونو شياكة اكثر طبعا ما ننكر انه فيه مليانات برضو شياكة بس احيانا ينكسر خاطرهم عشان في شي هيموتو عليه و مو لاقيين مقاساتهم فدول نقولهم بكل رحابة صدر انحفو عشان تلبسو و تتزبطو بدون احراجات
28- اغلب الرجال هذا اذا ما كانو كولهم يحبو المراة القوية اللي لو كان هو على غلط هي تصححه يعني مو تكون هبلة و مسكينة و اهم شي رضاه لا حلو انك تجادليه بس بالادب مو توقفيلو زي الشوكة بحلقه و كمان يفضل انك تكوني مثقفة مو افضل هرجة عندك تشتمي و تحشي بامة محمد و فلانة قالت و فلانة سوت و زوج مدري مين عملها و فعلها
29- لو زوجك عملك اي شي لو ايش ما سوى يعني شي يفرحك حتى لو كان قليل بينيلو انه الشي دا بسطك بطريقة ما يتخيلها عشان يتشجع و يجيبلك كمان مو تطالعي بنص عين و ترمي الكلمتين دا اللي قدرت عليه
30- في رجال ما عندهم حسن ادارة فاللي تدير البيت هي المراة حاولي تديريه بس ما تكوني بالصورة يعني توجهيه ايش يعمل و ايش يسوي بس انه قدام الناس هو اللي سوى و هو اللي عمل انا ما باقولك نافقي لا بس كمان صعبة يكون زوجك ضعيف شخصية قدام الناس مو حلوة لمن يقولو عنه مراته ممشياه خي الشي دا بينك و بينه
31- الحريم اللي بيشتكوا من طولة يد ازواجهم عليهم يعني طالع ضارب نازل ضارب دي لازم توقفه عند حده من اول مرة لازم يعرف انه وراها رجال و ان كانت يتيمة الله يخلي الحكومة تجيب حق اللي ما ينجاب حقه او تروح لحقوق الانسان والله لا يادبولها هو
32- ابدا ابدا ابدا لا تبيني لزوجك نقطة ضعفك يعني لو كان هو او اولاده نفطة ضعفك داريها و بينيله انك تقدري تعيشي من دونه بس مو كانك بايعاه لا يعني زي التهديد ان هو باعك بعتيه و ما همك لانه في رجال لمن يعرفو انه حريمهم ما يقدرو يستغنو عن الاولاد فيروحو يمسكوهم من يدهم اللي توجعهم تبغيني اطلقك اتنازلي عن الاولاد او ارجعي و ربي اولادك و مالك بيا يعني ياخدهم كسلاح له فانتي ايش تعملي ؟؟ طبعا دي طريقة شفت كثيير سووها و نجحت انك تقوليلو خلي الاولاد عندك انا ما ابغاهم هياخدهم شهر شهرين بالكثير و اخرتها هيرميلك هما عشانه مو قادر ع تربيتهم و عشان امه و لا اخته و لا مراته مافيهم يتحملو مسؤوليتهم
33- ان كنتي بتشتغلي لا تتركي شغلك عشان والله هو قالك لا خليلك دخل خاص فيكي و فهميه انه بكيفك تصرفي منه او لا و انه لا يفكر انه يسال عن راتبك عشان دا شي مو من حقه و انه يصرف عليكي كانه ما عندك دخل و ان كان عندك بزنس او دخل او ورث مع اخوانك لا تبينيله لانه هيطمع طبعا مو الكل الاغلب و اختبريه قبل لا تساعديه شوفي ايش مويته لانه في رجال ياخدو اللي يبغوه و يتنكرو للادمية اللي بنت معاه كل شي من الصفر
34- ساعديه يبر اهله و يوقف معاهم بس مو على حسابك انتي يعني لا يقصر معاكي و لا معاهم و ان حسيتي اهله ما يحبوكي ابتعدي عنهم و اسحبي نفسك بس طبعا لا تحرميهم من اولادك لانهم اولادهم برضو و حاملين اسمهم الا اذا كانو ما يبغوهم فخليهم يروحولهم مرة بالشهر من باب صلة الرحم
35- الافضل تسوي اختبار بوصلة الشخصية لانه جدا مفيد و انا هحاول باذن الله انزله لكم بوحدة من ردودي او مواضيعي المرة الجاية
دا تقريبا كل اللي عندي و لو افتكرت اي شي ثاني ع طول راح اكتبه لكم و اي وحدة عندها اضافة مرحب بيها انها تكتبها لاني زي ما كتبت في العنوان نبغى تغيير جذري
و لا تنسوني من دعواتكم و ان شاء الله تفيدكم دي النصايح زي ما فادتني و اكثر كمان
و لو احتجتوا اي شي او حبيتوا تستفسروا عن اي حاجة انا في الخدمة
و دعواتكم ربي يسخرلي زوجي و يجعله ما يشوف غيري ابدا
و يلا بسم الله نبدا النقاش للي حابة تناقش سواء بنقطة عجبتها او لا
لانه انا ظروفي غير ظروفك غير ظروفها و احنا هنا بنحاول قد ما نقدر نتدارك الاخطاء