يستحق المشآهده والتفآعل تعالي اعلمك عن العلاقه الجنسيه اسرار تذاع لاول مره

1. القصة الأولى


2. القصه الثانيه


3. وسألت زوجي مره :


4. والسؤال اللي محيرني وحابه اعرف له جواب الى متى الاهل يسكتون عن


5. هالموضوع ولا يعلمون أبنائهم؟؟


6. طيب هالمراهق اللي كان طفل قبل سنه وشلون عرف؟؟؟؟

السلام عليكم
راح ابدأ موضوعي بقصتين سمعتها وطبعا في غيرها كثير

القصة الأولى

حكالي هي ولد أختي قبل 3سنين وقتها كان مازال طالب في كلية الطب (مو لأنه ولد أختي معناه انا قد امه يعني عجوز والله توني بنوته وهو اكبر مني بسنين) المهم قال ان مره الدكتور حكالهم قصة وحده جات عنده تبكي وتقول انا لي سنه متزوجه وماحملت واخاف اطلع عاقر ويطلقني زوجي ، ويقول الدكتور هديتها وقلتها للحين الوضع عادي وسوالها تحاليل وطلعت النتايج سليمه قام عطاها حبوب منشطه وراحت ورجعت بعد 6 شهور تصيح تقول ماحملت ومافادت الحبوب،قال لها الدكتور امكن العيب من زوجك لأنه كل شي سليم عندك؟ قالت: زوجي متزوج من قبلي وعنده اطفال !! فكر شوي الدكتور وبعدها سألها كم مره ينام معاكي زوجك في الشهر ومتى قالت عادي هو ينام معايا يوم عندي ويوم عندها، وبعدين قال طيب لما يجيكي زوجك ايش تحسين و ………. بدأ يتكلم معاها في العمق الإ الحرمه طلعت عيونها وقالت وش ذا يادكتور انا زوجي مايسوي معايا كذ!!!
(طلعت خويتنا على بالها الزواج طبخ وغسيل وكوي وتنظيف اما الأطفال ماادري وشلون يجون في اعتقادها الظاهر باللاسلكي) وعاد فهم الدكتور السالفه انها ماتفهم شي في الجماع وطلب منها تجي اليوم الثاني مع زوجها،وجات هي وزوجها وسأله الدكتور :
انت الحين لك سنه وسته شهور وماتخاف ربك تاركها لأنها مو داريه عن شي؟ جاوبه زوجها وقال هي بنت عمي واهلي جبروني اتزوجها وانا مرتاح مع زوجتي الاولى وهذي ما ابغا منها عيال!!! انتهت القصه الأولى.

القصه الثانيه

سمعتها ايام كنت ثاني متوسط بالأصح كنت استرق سمعها انا وبعض زميلاتي من بنات كانوا جنبنا والسالفه انه في وحده ليلة زواجها يوم حب يجيها زوجها قعدت تصيح وتصرخ والله لأعلم ابوي والله لأعلم اخوي وتستنجد قام ردها عند اهلها اسبوع عشان يفهمونها السالفه بعدها كملت حياتها عادي، انتهت القصه الثانيه.
طبعا انا كنت اسمع واكركر ضحك واقول في نفسي غبيه هالبنيه ماتعرف شي لأني وقتها كنت عارفه وشلون يجون العيال الموضوع جدا بسيط تعلمته من كم فلم مصري شفتهم بالسرقه، فكانت الطريقه بعد الزواج يجي العريس مع عروسته في غرفة النوم ويبوسها وينقطع المشهد وتقوم اليوم الثاني عند المغسله تستفرغ ويجيبون امها تزغرط وتقول لزوج بنتها مبروك مراتك حامل؟؟؟؟
بالتالي الحمل يتم عن طريق البوسه (اسم الله على قلبي وذكائي من يومي وانا ذكيه)
ولما صرت اولى ثانوي بالتحديد الترم الثاني كان عندنا حصه في الاحياء وألقى صحباتي يتهامسون وميتات ضحك وفرحانات ورحنا المعمل وانا ماادري عن شي لاني ماكنت احضر للدرس الجديد ،وجات صديقتي قالت تعالي نجلس جنب المتاعيس(هذولي بنات عليهم تريقه ومحشات لليل) وأثره طلع الدرس عن اجهزه معينه في جسم الانسان والمعلمه تشرح وانا مفجوعه وقلبي يرجف وهي تقول في ايش تستخدم هذي الاجهزه وانا مو مصدقه المهم فقت على صوت المتاعيس وهم ينكتون ويكركروا وعرفت ان الحمل شغلته افضع من ما كنت اتصور، وسنه ورى سنه بديت اسمع طراطيش كلام عن الجنس بس كلمات متقاطعه ايام الكليه وعاد انا اركبها في راسي واللي تجي تجي، ويوم قرب زواجي قبل 5 شهور جلست اتنظر احد من اهلي يمسكني ويسمي عليا ويشرح لي او يعطيني معلومات لكن ماحولك احد وقبل اسبوع من الزواج كلمتني اختي الكبيره وقالت انتي طبعا عارفه وش يصير ليلة الدخله (ايه عارفه من الهوا ) المهم في النهايه طلع كلامها انتي عارفه والموضوع عادي و و و……. ماجابت جديد ولا استفدت منها.
اما زوجي الله يسامحه ايام الملكه راح مره زار بابا في معرضه وبعدها كلمني وقال زرت ابوكي وعطيته اغراض لكي ، انا فرحت كنت في السوق ومنتظره متى ارجع واشوف الهدايا وعاد يوم رجعت كان بابا قد وصل ولقيت الاغراض فوق السريرعباره عن باقة ورد و شريط dvdمكتوب عليه العلاقه الزوجيه السليمة في الاسلام وفي الغلاف كاتبين لا حياء في الدين و جايبين اسماء الدكاتره اللي القوا المحاضره وكاتبين تخصصاتهم الفاضحه وياعين على التخصصات اللي يقراها يعرف وش الزبده وعاد اختيني اللي اصغر مني كانوا معايا وقاعدين يضحكوا بس ماعديتها له مسكته بعد الزواج بشهور لما طاحت الميانه وانفجرت عليه وقلت ليش تفضحني قدام اهلي كان انتظرت الين تزورني انت كنت كل اسبوع تجي ترز خشتك او كان حطيته لي في الحوش (لانه اوقات كان يحط لي ورد او هدايا في الحوش او الحديقه ويروح ويدق عليا يقول انزلي في اغراض لكي في الحوش)قام يضحك الاخ وقال الموضوع جدا عادي . بس بصراحه المحاضره روعه وكانت صريحه جدا جدا جدا وتبين ان حتى الصحابه رضي الله عنهم كانوا يسألوا الرسول صلى الله عليه وسلم وزوجاته بعد وفاته في الامور الجنسيه لانها حساسه والجهل فيها خطير

وسألت زوجي مره :

في أحد من اهلك فاتحك بموضوع الجنس سواء قبل الزواج او من زمان؟؟ قال :لا انا تعلمت بنفسي عن طريق النت ومحاضرات كنت احضرها ومن ضمنها اللي في الشريط الموجود عندك ومن جلساتي مع اصحابي، وسألته :طيب واخوك واصحابك؟ قال اخوي كان يقرأ كتب قبل زواجه واصحابي كل واحد تعلم بطريقته الخاصه يعني محد من اهله فاده بشي!!
وأستغربت ليه الوالدين مالهم دور في هالموضوع؟؟؟؟
وكنت اشوف صديقاتي اللي كان بيتزوجون يسألون المتزوجات عن السالفه وهذا ان دل يدل على ان أهلهم تراكينهم يشوفون مصيرهم وكنت اسمع بعضهم يقول عادي زوجها يعلمها!! طيب وهو مين يعلمه؟؟؟؟

والسؤال اللي محيرني وحابه اعرف له جواب الى متى الاهل يسكتون عن

هالموضوع ولا يعلمون أبنائهم؟؟

والحين اعتقد ان اغلب الاطفال صاروا عارفين وش بيصير مع انتشار المقاطع الجنسية في الجوالات ومن المواقع اللي عالنت ورسايل الايميل مع ان اغلب المقاطع المنتشره تدعوا لطريقه محرمه شرعا وتشجع عليها فإذا ماكان عند الابن والابنه معلومات بسيطه من الاهل ماراح يقدروا يميزوا بين الصح والخطأ
أذكر مره جات مقابله مع الشيخ ابراهيم الدويش وحكى قصه واحد من الآباء سمع محاضره يدعوا فيها الشيخ لتثقيف الابناء جنسيا طبعا بحدود المهم راح الاب مسك ولده اللي ماتجاوز 13 سنه واخذه على جنب وبدأ يقول ياولدي ماعندك اسأله خاصه ودك تسألني ياها والولد مو فاهم رجع سأله يعني مافي شي ودك تعرفه مثلا انت وشلون جيت للحياة يعني او .....، عاد فهم الولد وش يقصد ابوه وضحك وقاله: يبه اذا انت ماتعرف شي او عندك استفسار عن هالموضوع قولي عشان اعلمك!!!!!

طيب هالمراهق اللي كان طفل قبل سنه وشلون عرف؟؟؟؟

وأوقات الجهل في الموضوع وعدم توضيحه للابناء أوالتحذير من عواقبه اذا ما استخدم في وضعه الطبيعي ممكن ينتج عنه ان الولد يفعل الفاحشه مع اخته مثل مانسمع هالايام (الله يحمينا) وممكن اخته تكون مو داريه وش السالفه على بالها هذي لعبه جديده لانه ولا احد علمها ان الشي هذا له عواقب أو من نتايج الجهل مثل ماقرأت في قسم القصص في قصه تقول لقوا قطعة لحم في حمام طالبات المرحلة الابتدائيه ويوم كشفوا على لطالبات وجدوا نسبه منهم فاقدين البكاره!!! ليه؟؟؟؟
امكن الشغاله ضحكت عليها والبنت ماتعرف ان في اماكن المفروض محد يقربها او امكن السواق او احد الاقارب وطبعا الاطفال جاهلين والعتب على الاهل
على الطاري اذكر ماما كانت تحذرني انا وخواتي وكنت وقتها في التمهيدي ورسخت في بالي كانت تقول ان البنت اذا قعدت مع أي احد ولمسها في اماكن على طول يطلع في وجهها علامه يعرفونها الناس وياخذوها الشرطه وتدخل السجن،، يعني معلومه بسيطه على قد العمر اللي كنت فيه.
واللي مقبلين عالزواج اذا محد ثقفهم بنسمع اوقات اللي يجيها نزيف واللي تتعقد لان زوجها ما اخذها بالتدريج هذي سمعتها من دكتور نفساني الحرمه خلاص ماتطيق زوجها يقربها لانه من اول ليله عاملها بطريقه حيوانيه ووالله التدريج بكل شي حلو خصوصا اذا خلاها كم يوم تاخذ نفس وتبدأ تستوعب الحياه الجديده وهذي مجربه انه يتركها كم يوم وانا انصح فيها يعني خلاص حلاله ومابتطير فيصبر عليها 3 او 4 ايام الين هي نفسيا تتأقلم.
وانا ما انكر انه فيه محاضرات للمقبلين على الزواج بس وين اللي يروحها
والحين شاغليني كم سؤال مو عارفه لهم جواب:
هل راح يكتفوا الاهل هالايام بالمعلومات الجنسيه اللي عند ابنائهم واللي ما ادري من وين لقطوها ويقولوا خلاص صرنا في عصر التكنولوجيا ومافي احد مغمض هالزمن؟؟
وكم هو العمر المناسب اللي الام تقول هالكلام لبنتها؟؟
م/ن بتصرف