أكلة مرة لذيذة وسهلة وصحية

هذي الأكله معروفة عندنا بالسعوديه وكل بعد محلين محل فول ومطبق
والمطبق أصلها أكله يمنيه بس كثير حلوه وخفيفه وصحيه ومافي زي شغل البيت أضمن لأن زي هالمطاعم الواحد يخاف ما يضمن العماله وشغلهم
بسم الله نبدأ
المقادير :
شدة بقدونس مفروم
شدة كراث مفروم
شدة بصل أخضر مفروم
1 طماط مفروم
البيض على خفة الخلطه يمكن نحتاج من 6 إلى 10 بيضات ويمكن اكثر
رشة ملح وفلفل اسود
2 ملعقة كمون ويمكن أكثر لأن هو الأساس في الطعم
نص كاس لحم مفروم ومطبوخ مع بصل ناعم ورشة فلفل اسود ودارسين وكمون واللحم يكون مجرد نكهه وضروري في هالطبق
عجينة المطبق
نضع البيض والخضار
نضع اللحم والبهار
شفتوا كيف شكل الخليط لازم يكون خفيف مره
لازم تركزون معي شوي حبيباتي
نمسح الصاجه بشوية زيت بعدين نحط طبقه وحده من العجين والنار هاديه مره
ونحط تقريبا ملعقتين إلى ثلاث ملاعق من الخليط لازم شوي وخفيف انتبهوا لا تكثرون مو حلوه تصير ولا توصل للأطراف
وعلى طول نجيب طبقة ثانيه عليها قبل لا تستوي الخلطه ونرفع شوي النار الى ان يتماسك الخليط ويستوي ونمسحها من فوق بالزيت ونقلبها على طول الى ان تشقر ونشيلها
مره سهله وسريعه تحتاج لخفة يد بس
بعد ما تخلص الكميه تقدم مع قطع الليمون ضروري تعصرون عليها ليمون مره تجنن
وتنفع هالطريقه في كشتات البر
وعلى الفطور بعد حلوه تحشونها مسحة لبنه ورشة جبنة موزاريلا وهي على الصاجه وبعد ما تخلص ترشين عليها عسل يصير طعمها مو صاحيه عذاب وعن تجربة