ابداعي فالمطبخ رؤوس الذره كاملع مع خلطتي السريه

مراحب فراشات
كيفكم عسى مرتاحين ومسوطين؟؟
انا اول مره اشارك فهالمنتدي
عسى مشاركتي تنال اعجابكم
اليوك اند الماضي جاني ضيوف فجأه
وماني مجهزه حالي من حيث العشي
زوجي قالي خلي الخدامه تطبخ شي خفيف
بس الخدامه يوم تطبخ ....!!! خلها مستوره
قولت خلاص ما في حل غير اني اطبخ لحالي
ودخلت المطبخ
وطبعا دخلتي للمطبخ دائما وراها ابداع
خليت الخدامه تعجن عجينه خبز النان
وانا تفرغت للباقي
وقولت خليني ابدع شوي وكمان اصور الابداع وانزله في منتداي الحبيب
الاباداع كان في رؤوس الذره الكامله مع خلطتي السريه
المقادير
8 رؤوس الذره الكامله
نرجيل باودر (كوكونات ميلك باودر)
3 حبات طماطم ناضجه نضج كامل
حبه بصله صغيره
ملح
فلفل اسود
فلفل احمر
الطريقه
طبعا طلعت الذره من الفريزر وقطعتهم كل راس 4 قطع وطبختهم فالماي وشويه ملح
بعد ما استوت الذره طلعتهم من الماي وخليتهم ع جنب
خذيت 3 حبات طماطم حمره (شرط تكون ناضجه زين ما زين)
وحبه بصله صغيره
وقطعتهم وخلطهم في خلاطه الكهربائيه
وحطيتهم ف طنجره تحت نار متوسطه
وضفت شويه ماي عليهم
لغايه ما ينطبج الطماطم والبصل زين ما زين
خليه يغلي غلوه بسيطه ثم اضيفي شويه ملح (طبعا الكميه بتعتمد عليكي لما تتذوقيه بس تذكري انه الذره كمان حطيتي فيه ملح لا تكثري)
وشويه فلفل احمر وفلفل اسود
وكمان شويه كركم (لونه اصفر)
وتخلي يغلي شويه زياده
وفي طبق ثاني نخلط النرجيل الباودر وماي وشويه كركم >> محسبه عمري منال العالم <<
نخلطهم زين ما زين
بعد ما يختلط الخليط نضيفه عالطماطم المطبوخه
نخليه على نار متوسطه لمده 10 دقائق
او لغايه ما ينضج الخليط كله
اذا حسيتي انه الخلطه مب لونها اصفر مثل الصوره زيدي الكركم واطبخيه زين ما زين
بعد كذا نضيف الذره المطبوخه
ونخلط بهدؤ لا يتبوظ الذره عندك << على قولت خواتنا المصريات >>
ونحطه على نار هاديه لمدة 5 دقائق ونسكر تحته
وقت التقديم سخنيه شوي وقدميه
وصحه وعافيه عليكم
هذا كان الابداع الي بدعت فيه ذاك اليوم
وهذا كان عشانا
وهذا خبز النان
هو شويه الخدامه حرقته بس كان حلوه ولذيذ
وهذي خلطة البقول على طريقتي مع الطماطم والبصل المطبوخ
بعلمكم عليها فالمستقبل القريب ان شاء الله
طبعا العشى عجب الضيوف
اكلو وشبعو واستانسو
ورجعو بيتهم
عاد انا حصلت هذاك الكلام المزيون من زوجي
الله يخليه لي وما يحرمني منه ان شاء الله
امين يا رب
اتمنى تجربو الوصفه
وتتلذذو بالطعم
وكل ما سويتوها تذكروني بصالح الدعاء
تشاو