ابغى طريقة المرقوق الله يسعدكم ادخلو

ام باسـل

22-09-2022 - 06:59 pm

الله يسعدكم ساعدوني ابغى اسوي غداء لزوجي مرقوق باللحم وما عمري سويته اتمنى تساعدوني

التعليقات (6)

ال جازي

22-09-2022 - 09:30 pm

اولا؛ قطعي بصله واحمسيه مع شوي زيت وحطي معه طماطه وحده مقطعه صغير
ثانيا؛تكونين مجهزه اللحم ومغسلته زين وتحممسينه مع البصل والطماط وتضيفين البهارات كمون وملح وفلفل اسود وتخلينهن مع بعض ينحمسن مع التحريك
ثالثا؛ صبي ماء حار على اللحم تقريبا نص القدر واضيفي اذا عندك كوسه وجزر وفاصوليا وخليهن يطبخن على نار متوسطه
رابعا؛اذا حسيتي ان اللحم بدا يستوي جيبي المرقوق الجاهز اريح لك من اللي يصلح بالبيت وبصراحه انا مااعرف له اللي بالبيت يصلحونه وقطعيه قطع صغيره واجدعيه بالقدر الكميه تقريبا ثلاث قطع كبيره او على حسب حجم القدر وبعدين قصري النار على اخر شي واضيفي دارسن وفلفل اخضر وبس
وبالعافيه

ام باسـل

22-09-2022 - 10:31 pm

ال جازي
مشكوره اختي بس وين احصل المرقوق الجاهز ؟ الله يسعدك وطريقتك ان شاء الله راح اسويها شكلها روعه

روديـنـه

22-09-2022 - 11:32 pm

مثل ماقالت لك الجازي .. اهم شي اللحمه تستوي ..
والمرقوق تلاقينه في العثيم او بنده ..
ولو بغيتي طريقة العجينه اللي بالبيت .. سهله .. 3 اكواب طحين ( مو دقيق ) واعجينها بشوي مويه المهم ان العجينه تصير قاسيه مو لينه .. وخليها ترتاح ساعه وبعدين اجلسي افردي فيها وقطعي وارمي عاللحم ..
العجينه جهزيها قبل تبدين طبختك قبل نص ساعه عالاقل عشان ترتاح العجينه شوي
وبالعافيه ..
دعواتك لولدي عسى الله يهديه ويخفف من شقاوته وتعبه <<< مجننها

ام باسـل

23-09-2022 - 12:33 am

رودينه
مشكوره ياقلبي الله يهدي ولدك وولدي ههه لانه كمان شقي مره يارب يخليك لك ويخليك له

فديت روح منهو روحه

23-09-2022 - 01:34 am

خذي الطريقه : اول شي 3 اكواب طحين بر ورشه ملح وتضيفين المويه شوي شوي الين تصير عجينه تغلفينها بجلاد وتحطيها على جنب بعد ساعه تقطعي بصل وتحطي شويه زيت وتقلبينه الين يذووب وتحطي الطماطم وتحركينه الين يذوب تحطي اللحم مقطع صغير وتحطي بهارات وماجي وملح وكمون وتقلبينه لمدة دقيقتين وبعدها تصبي مويه الين يتغطى اللحم وخليه يتسبك ضيفي الخضار المقطعه (قرع-كوسا-باذنجان-جزر)اللي تحبين وقلبيها ثم ضيفي المويه وملعقه صلصه وخليه يطبخ نجي للعجينه شكليها صغار طبعا يدينك تدهنيها بين وقت ووقت بزيت بعدين تحطينها في النشميه تلقينها عند محلات الاواني وتحطينها قطعه قطعه الين تخلصينها ولما تستوي الخضار تقطين القرصان اربع قطع وتضيفينها وحدة وحدة وتقلبين اللي تحت وتطلعينه فوق الين تخلص الكمية وتحطي فلفل حار وتقصري النار وخليه بس انما ايه جربيه راح تدعيلي وعذرآ عالاطاله

ام باسـل

23-09-2022 - 02:35 am

فديت روح منهو روحه
ادعيلك من الحين الله يسعدك دنيا واخره وراح اجربها ياحبيبتي ومشكوره

اللي عاوزه اكل يجنن لحد البيت←
فطورنا في يوم عاشوراء→