البلا بلا أكلة جاوية اندونيسية لذيذة وبالخطوات

البلا بلا أكلة جاوية ( اندونيسية ) لذيذة وبالخطوات
البلا بلا اكلة جاوية ( اندونيسية ) رهيبة واكثر من رهيبة بصراحة
والأهم والمفيد انها ماتحتاج لشي من البهارات الجاوية اللي دايم تكون عقدة وحائل بين تطبيقنا للأكلات الجاوية
وحبيت اعرضها لكم وان شاءالله تعجبكم
:: المقادير ::
2- جزر
2- كوسة
2- ورقة كرنب
3- بصل اخضر
1- صدر دجاجة
1- قرن فلفل اخضر حار ( اختياري )
:: خلطة البيض ::
5- بيضات
2- ملعقة ثوم
1/2 قالب زبدة
2- مكعب ماجي
1- ملعقة صغيرة ملح + نص ملعقة فلفل اسود + نص ملعقة بيكنج باودر
:: الصوص ::
1,1/2 كاس ماء ساخن
1- مكعب ماجي
4- ملاعق خل ابيض
1- قرن فلفل اخضر حار ( اختياري )
1- ملعقة ثوم مفروم

والحين بقولكم الطريقة مع الصور علشان التوضيح
هذي الخضار وشوفو كيف طريقة تقطيعها
الجزر والكوسا مكعبات صغيرة جداً
والكرنب شرايح صغيرة رفيعة جداً
والبصل الأخضر قطع صغيرة
انا ما اضفت فلفل حار مع الخضار علشان عيالي ولا انا ودي
نخلط الخضار كلهم مع بعض في زبدية بلاستيك
وبعدين نضيف عليهم صدر دجاج مقطع مكعبات صغيرة ومسلوق
بالنسبة لخلطة البيض نخفق البيض بالمضرب اليدوي مع الثوم ونضيف عليهم الملح والفلفل الأسود والبيكنج باودر
ونذوب الزبدة ع النار مع الماجي وبعدين نضيفها للبيض ونخفقهم مع بعض
نضيف خليط البيض على الخضار والدجاج ونلخبطهم مع بعض بالملعقة الخشب
بعد كذا نضيف الدقيق ( الطحين ) ونخلطهم مع بعض
ونتركهم على جنب عشر دقايق مايحتاج وقت اكثر
الحين جا وقت القلي ... اول شي سخني الزيت ووقت ماتبدأي بوضع البلا بلا خفضي النار
تاخذي بالملعقة من الخليط وتحطيه في زيت عميق حار
وتطبطبيها بالملعقة << حلوة تطبطبيها
المهم انتي تتحكمي فيها بضغطك عليها بالملعقة يعني تبغيها سميكة او رفيعة
انا عن نفسي افضلها رفيعة بس هنا ماخليتها رفيعة كثير علشان عيالي
وعلى فكرة بعد ماتحطيها في الزيت خفضي عليها النار علشان لا يتغير لونها
والخضار لسى ما استوت
الحين خلاص قلينا البلا بلا نجي نجهز الصوص
على النار وفي نفس القدر اللي ذوبنا فيه الزبدة والماجي نحط مقادير الصوص
ولاتنسي ان الفلفل اختياري سواء في الصوص او عجينة البلا بلا
نترك الصوص يغلي شوي الين يرتفع الثوم بذي الطريقة
نطفي النار ونشخل الصوص بالمنخل الصغير من الثوم والفلفل
وبالنسبة للصوص ممكن تصبيه عليها او تقدميه جنبها