انتبهوا يابنات الشرقية

بنات وبالذات بنات الشرقية، أكتب لكم عن تجربة سيئة حصلت لي مع مركز نسائي معروف في الدمام وقريب من الكورنيش.. مركز اللمسة الأخيرة، طبعاً معروف هالمركز بديكوراته الفخمة وأسعاره المبالغ فيها! المهم، بحكي لكم قصتي من باب التحذير لأني ما ابي أي واحدة غيري تنحط بنفس الموقف المؤلم اللي انحطيت فيه. في شهر مايو الماضي رحت للمركز هذا عشان أسوي استريتننغ لشعري بمستحضر اليوكو الياباني... مع ان شعري ناعم طبيعي بس كنت حابة انه يكون كله "سيدا" واتخلص من التمويجات مع انها موضة الحين بس انا أحب التغيير واحب اجرب كل شي. طبعاً رحت للمركز هذا من قبل عشان أقص اطراف شعري وكانت أول مرة أدخل المركز عشان اسوي شي فيه. المهم الفلبينية اللي تقص شعري هذاره ومع السوالف ولما درت اني ناوية اسوي (يوكو) في مشغل ثاني، قامت تمدح في شغلها باليوكو وتقول انها الأحسن هنا وان البنات كل ما سووا عندها يرجعون لها مرة ثانية. قلت لها اني أخاف اغامر واني ناوية اسويه في مركز (الرشاقة) المعروف بالدمام لأن اختي وبنات كثار اعرفهم سووا عنده ويمدحونه، قالت لا احنا أحسن من (الرشاقة) وقالت لي ان بنات كثير يجونها من (الرشاقة) عشان تعدل لهم شعورهم بعد ما خربوها (الرشاقة)....استغربت لأن (الرشاقة) شغلهم ممتاز وانا شفت شعر اختي كان روعة لما سوته عندهم!؟ سألتهاعن منتج اليوكو اللي عندهم إذا أصلي فعلاً، قالت أصلي ونجيبه من البحرين وانه أسبوعياً يجيهم كمية من البحرين لأنه بسرعة يخلص من كثر الطلبات اللي تجيهم بالمركز، قلت لها طيب ابي اشوف الشهادة اللي عندكم من الوكيل اللي تثبت انه أصلي ومن اليابان، وابي اشوف العلب واقرا اللي مكتوب عليها لأني حافظة شكلها من الموقع حقهم بالنت، وورتني العلب بس الشهادة ما شفتها وقالت لي بعدين اوريك اياها، واستغربت من شكل العلب لأنهم غير عن اللي شفتهم بالموقع بس هي قالت انهم يحطونهم بعلب مختلفة. وأخيراً قدرت تقنعني اني أسوي اليوكو عندهم مع اني كنت ناوية أحجز عند (الرشاقة) اللي عندهم زحمة مو طبيعية لأنه من جد شغلهم روعة وسمعتهم محترمة بس انا مقروده وحظي الردي خلاني أسمع كلامها مع انها تمدح في شغلها والمركز بقوة ومادح نفسه كذاب بس هي ذكية وعرفت تقص علي وتسوق لنفسها. وجيتهم بعدها بكم يوم عشان اسوي اليوكو ومعاي مبلغ محترم! دفعت آلاف الريالات عشان احصل على اللوك اللي اتمناه وتعبت وانا بالمركز حقهم من طلعت من الدوام بعد الظهر لين الساعة 9 ونص بالليل! لأن التمليس ياخذ 5-6 ساعات وهي بعد طولت شوي. غير ان المركز كان مليان بعوض وطول الوقت وانا قاعدة اكش البعوض ومتدثرة ومغطية جسمي كله وقعدتي وانا متشنجة وخايفة من قرص النامس خلاني ارجع البيت وظهري يعورني وجسمي مكسر من القعدة الغلط! بس أهم شي اني ما رجعت البيت وجسمي كله منتف من البعوض، كنت شايلة هم ان بشرتي تروح فيها خصوصاً ان وراي مناسبات ومو حلوة اطلع للناس وبشرتي كلها بقع حمرا! استغربت ان مركز كبير ودافع مبلغ وقدره على الديكوريشن ما يرشون مبيد حشرات كل ليلة اذا سكروا المحل ولا يهتمون بنظافة المكان وراحة الزبونات!؟ نرجع لموضوع اليوكو حقهم.. أعجز عن وصف مدى الدفاشه اللي شفتها من الفلبينية وهي تسوي شعري. كانت جنتل وهي تقص شعري بس بالتمليس نتفت شعري بالسشوار الفاشل حقها وبعد عورت راسي وهي تغسل شعري كل شوي... قمة في الدفاشه والخشونة!! بس انا كنت صابرة عشان خلاص دفعت فلوس وبدت بشعري وانحطيت تحت الأمر الواقع وخلاص! وبعد لأني كنت متأملة خير اني اطلع بنتيجة حلوة. ولأن حضرتها تعبت وهي تشتغل على شعري نادت اختها اللي تشتغل معاها بنفس المركز وقعدوا ثنتينهم يسوون شعري بالسشوار. وعادي هالشي يصير بالصالونات؛ ان لما يسوي احد التمليس وعشان يخلص بسرعة لأنه ياخذ وقت ينادي رفيقه عشان يسوي معاه، بس اللي مو عادي ان ثنتينهم صدعوا راسي وهم يسولفون مع بعض كنهم ما شافوا بعض من زمان وضحك وقلة حيا وانا صابرة بمكاني، ولما حسوا انهم ضايقوني قالت لي واحدة منهم سوري اذا ازعجناك بس هذي اختي. طيب خير شسوي لك اذا اختك!؟ هذا مكان شغلكم مو كافيه فانطموا واكلوا هوا واكرموني بسكاتكم<< طبعاً هالكلام ما قلته لهم بس بيني وبين نفسي، بعد مو ناقصة انا يخربون شعري اذا حقدوا علي. بس في النهاية خرب شعري من جد! أولاً طريقتهم في السشوار كانت سيئة وكنت احس بشعري يتقطع وهم يشدونه، غير كذا أنا لاحظت انهم لما كانوا يسوون شعري بآلة التمليس استخدموا آلة من ماركة لوريال والمفروض يستخدمون آلة اليوكو الأصلية واللي تجي مع منتجات اليوكو بس طنشت ولا سألتهم ليش. وبعد ساعات متواصلة من الشغل على شعري لين حسيت ان فروة راسي راحت فيها من سشوارهم ولين جاني صداع من دفاشتهم في تغسل شعري والسشوار والقعدة على أعصابي خوفاً من البعوض! بعد كل هذا رحت البيت وانا أحس ان فيه شي غلط لأني شفت شكلي بالمرايا ما كان مرتب، كان شكل شعري مشدود كأنه شعر خالة مملس مع ان شعري ناعم واليوكو أصلاً يملس الشعر بطريقة كنها طبيعية مو مصطنعة!؟.. غير كذا وانا ألمسه وامرر اصابعي داخل شعري ولين توصل لفروة راسي كنت احس بخشونة بجذور الشعر بس سكت وطلعت وانا لا تعليق لأني قلت يمكن الاشيا هذي تروح بعد غسيل الشعر لأن الشعر مفروض يقعد 3 ايام بدون غسيل بعد اليوكو وقلت ان شاء الله انه يطلع أحلى بعد الغسيل. وانتظرت لين مرت ال3 ايام، وغسلت شعري وانا على أمل ان شعري يطلع حلو ومرتب بس مع الأسف نفس الشي! ما تغير شكله! وعورني قلبي على شعري وجاني اكتئاب وكنت بذيك الفترة مسافرة والا كان رحت لهم وتفاهمت معاهم، وخلال ذيك الفترة بدا شعري يتساقط بشكل مخيف ومازال يطيح وكان كثيف والحين ما بقى منه إلا الربع بدون مبالغة! أول لما كنت ألم شعري بوني تيل كان حجمه أكبر الحين البوني تيل ضعيف ومن قدام شعري راح فيها، فراغات خصوصاً من مقدمة الرأس والجذور خشنة بشكل مو طبيعي وما أقدر امشط شعري من الجذور لأني كل ما مسكت المنطقة هذي يطيح الشعر بيدي وواضح جداً انهم حرقوا شعري لأن الجذور صايرة جافة وخشنة بشكل غريب وكل ما مررت يدي أو المشط على هالمنطقة يتكسر الشعر ويطيح، فصرت أخاف ما ألمسه ولا أمشطه واكتفي بتمشيط الشعر من تحت، وهذي حالتي من شهر 5 الين هاليوم. وبعد ما رجعت من السفر قررت اني اروح اتفاهم معاهم واطالب بفلوسي اللي دفعتها وتعويض، وكان عندي احساس انهم ماراح يعترفون بالغلط وصدق احساسي. طبعاً اللي بالمركز شايفين روحهم بقوة كأنهم يديرون صالون بهوليوود! قابلت واحدة شكلها المسؤولة عن إدارة المركز الفاشل، وقلت لها عن مشكلتي واني كنت ناوية أروح (الرشاقة) بس الفلبينية اللي عندكم اللي اسمها (مريم) خربت شعري وشوفي كيف وخليتها تشوف شعري كيف متنتف ومتقصف ووريتها المساحة الفاضيه اللي طلعت لي من قدام وكيف ان الجذور من قدام خشنة ومجعدة مرة ومتشربكه وهذي مو طبيعة شعري أبداً!! وقلت لها ان شعري قبل لا اجيكم كان ناعم ورغم انه كان فيه تمويجات بس كانت جذور شعري ناعمة واذا مشطتها تتمشط عادي والحين صايرة مجعدة وما تتمشط، واذا مشطتها تعلق الفرشاة فيها لأنها متشابكة، وجربت مشط بأسنان وسيعة بس ما في فايدة!! وقلت لها ان شعري يتساقط له فترة وبغزارة، وطبعاً هي وجهها يتقلب وانا أكلمها واشرح لها بس ما رضت تعترف بالغلط ولا تعاطفت معاي، ولما قلت لها ابي فلوسي قالت لا وصعبة ومدري ايش، وبعدين قامت تحاول تقط التهمة علي وتطلعني انا الغلطانة، تقول ليش جيتينا بعد كل هالمدة؟ كان المفروض تجين ثاني يوم، قصدها اني خربت شعري وجيت عشان احط التهمة عليهم، قلت لها انا انتظرت لين اغسل شعري واشوف يمكن يتغير شكله واحصل على النتيجة اللي ابيها وغير كذا سافرت قبل لا أغسل شعري بيوم وما عندي رقمكم عشان اكلمكم من هناك وانتظرت لين ارجع عشان اجيكم، وقلت لها شعري مو طبيعي وواضح انه احترق وانا ابي فلوسي وأصريت على موقفي، ولحظتها جات الفلبينية بعد ما شافتني من بعيد واقفة عند الاستقبال وبعد ما عرفت شكلي وتذكرتني، ولما سمعتني اشتكي وهي تعرف عربي وقفت قدامي بكل قوة عين وقعدت تدافع عن نفسها وتقول انتي أكيد حرقتي شعرك بالبيت أو سويتي فيه شي غلط، ولولا اني ماسكة نفسي ومحترمتهم كان عطيتهم كفين خصوصاً الفلبينية هذي اللئيمة النصابة اللي استدرجتني لين دفعت الفلوس وسويت شعري وبعدها تنصلت من المسئولية وأنكرت خطأها. أنا بعمري ما سويت شي غلط لشعري، ماني راعية صبغات ولا أغسل شعري بشامبو ما يناسبه ولا أستعمل منتجات رخيصة، من صغري وانا مهتمة بشعري، اشتري أغلى وأحسن المستحضرات لشعري ومحافظة عليه، أقص اطرافه المتقصفة كل 6 أسابيع وآخذ فيتامينات وما أمشطه كثير واذا مشطته بنعومة وحرص، وحتى فرشاة شعري ماركة ومصنوعة من الخشب اللي ما يضر الشعر وغير كذا فرشاة شعري مخصصة لمساج فروة الراس. وبعد ماني من النوع اللي يحط مواد كيماوية بشعره واذا غسلت شعري أشطفه بماي حلو واستعمل بعد الحمام سيرم مغذي للشعر. كل هذا وتقول لي اني انا اللي خربت شعري!؟؟ المهم، بعد شد وجذب مع المسئولة وافقت أخيراً على تعويضي.... والتعويض حمام زيت! نعم بكل بساطة حمام زيت! وبعد كل اللي صار لي تعرض علي علاج رخيص وما يعوض اللي راح من شعري!! شفتو كيف؟ لو بأمريكا وغيرها من الدول المتقدمة لو أرفع عليهم قضية أكسب الملايين وأستحق هالشي لأن هذا شعر مو لعبة وشعر المرأة تاج جمالها وشي مو هيّن، بس مشكلتنا اننا عايشين في مجتمع ضايعه حقوق الواحد فيه، ولو تكلمنا من اليوم لبكرة محد راح يسمعنا! حالياً قاعدة أعالج شعري بنفسي وآخذ جرعات أكثر من الفيتامينات عشان أرجع شعري اللي راح بين يوم وليلة! كتبت هذا الموضوع عشان أنصحكم لأني أكره ان غيري يمر بنفس التجربة المريرة اللي تعرضت لها. حابة انكم تتعلمون من غلطتي.. الشعر يا بنات أغلى شي تملكه المرأة واذا حبيتو تسوون شي لا تروحون لأي مركز واختاروا الأماكن اللي لها خبرات وباع طويل في العناية بالشعر، وأهم شي لا تعتمدون على كلام اللي بالمراكز عن أنفسهم لأن كثير ناس معدومين الضمير ومستعدين يحلفون أن منتجاتهم أصلية وانهم أحسن ناس وهم أصلاً يستعملون منتجات مغشوشة ومقلدة وشغلهم سيئ وممكن توهم يتعلمون. بالنسبة لليوكو تراه مو موجود بكل المراكز، صدقوني مراكز كثيرة تستخدم منتجات غير أصلية ويدعون انها اليوكو نفسه. إذا تبون اليوكو الأصلي روحوا البحرين لأن الوكيل الأساسي في الخليج هناك، وفيه مراكز بالسعودية ومستشفيات يسوون الأصلي وعندهم وكالة بس ينعدون عالأصابع، والباقي كلهم تقليد، فانتبهوا وتأكدوا ان المنتج أصلي وتأكدوا ان الآلة اللي يستخدمونها للشعر هي الأصلية حقت اليوكو، وشوفو الشهادة قبل لا تدفعون، من حقكم تطلبون تشوفون الشهادة وعلب المستحضرات، قبل لا تروحون لأي مركز ادخلوا موقع اليوكو الياباني على الإنترنت وابحثوا واحفظوا أشكال العلب والآلة حقته. وأخيراً لا تسلمون شعوركم إلا لذوي الخبرة واذا سويتو سشوار لا تستحون انكم تطلبون واحدة ثانية اذا اللي تسوي لكم السشوار يدها دفشه وخشنة، الحيا ماراح ينفعكم اذا تنتفت شعوركم وشفتو التساقط بكثافة كل يوم. والأهم؛ لا تغركم الديكورات والمراكز الفخمة، يا ما مراكز متعوب على تصميمها وهي مليئة بالعاملات الفاشلات والمستحضرات المقلدة والمكياج اللي منتهي مدته من سنين! ويا ما مراكز متواضعة وأثاثهم قديم من الداخل بس سمعتهم محترمة وشغلهم نظيف وبيرفكت تماماً مثل (الرشاقة) اللي بالدمام وغيره من المراكز النسائية العريقة بالمنطقة. وانا ما أسوي دعاية بس هذا من واقع تجربة لي ولغيري من الأهل والصديقات. كتبت الموضوع هذا كتحذير من باب أحب لأخيك ما تحب لنفسك.. اللهم إني قد بلغت اللهم فاشهد. تحياتي ملطوش من الايميل لعيونكم :ق1: