جهد قليل ووقت وفير لشهر كريم إليكم أسهل الأطباق

السلام عليكم ورحمة الله وبركاته
بارك الله لنا ولكم هذا الشهر المبارك
وأعاننا جميعا ع صيامة وقيامة
وجعلنا من خيرة الصائمين القائمين والمقبولين
اللهم آمين
حبيباتي . .
جميعنا يعرف فضل هذا الشهر
والذي للأسف قد يضيع شطرا كبيرا من وقته
في مطابخنا
لذا وددت إسعافكم ببعض الأطباق السهلة
التي أعملها
والتي قد لا تأخذ منا الكثير من الوقت والجهد
آملة من الله جل وعلا أن يجعل بجمعي لها
مفتاح خيرا لي ولكم
وإليكم القائمة
. . .
أطباق التوست . . .
أولا . .
صينية التوست
تجيبين التوست تقصين اطرافه وتدهنين وجه واحد بالجبن
وتصفينه بالصينيه الوجه المدهون فوق
وبعدين تحطين عليه أي حشوة مفضلة
وبعدين تجيبين مرة ثاني
ة شرايح توست مقطعه اطرافه وتدهنين وجه بالجبن
وتصفين الوجه المدهون فوق الحشوة
يتكون عندك الان ثلاث طبقات
. توست حشو توست .
وبعدين تخفقين لك ثلاث بيضات وملعقة مايونيز وتصبينه فوقه
وتدخلينه الفرن شوي من تحت لين يتحمص
وفوق لين تتماسك طبقة البيض وتتشقر
وممكن تستبدلين المايونيز بملعقة قشطة كبيرة لو ماتحبين المايونيز
وبالهناء والعافية
..
ثانيا. .
رولات البيتزاء . .
جيبي شرايح توست قطعي أطرافه واضغطي عليها شوي
بعدين ادهني التوست بشوي من صلصة البيتزا
وحطي عليها شوي جبن موزريلا
وشوي شرايح زيتون
وشوي شرايح فلفل رومي
وبعدين تلفينه رولات
وتصفينهم بصينيه
وتصبين عليه شوي من خليط الجبن والقشطة
وإذا ماعندك ما تلزم
وتدخلينه الفرن لين يتحمص
وبالهناء والعافية
. . .
رابعا . .
رولات التوست. .
توست مقطعه أطرافه
رشيهم عالخفيف بحليب سايل
وبعدين تضغطينها أو تفردينها
وبعدين تحشينها
والحشوه ضيفي له جبن سايل ومايونيز وطحينه
وبعدين لفيهم رولات
مع الضغط عالاطراف
ووبعدين صفيها بصينية
وادهنيهم ببيض
وبعدين دخليهم الفرن من فوق وتحت لين يتحمصون
وبالهناء والعافية . .
خامسا . .
دوائر التوست. .
جيبي حبة توست
وممكن تدهنينها بجبن سايل أو مايونيز لو حبيتي
وحطي عليها حشو بالوسط
وممكن تخلطين الجبن أو المايونيز مع الحشوه
حسب رغبتك اذا تبينها سادة أو رطبة
وبعدين حطي عليها توست ثانية
وبعدين جيبي اي شي دائري حاد
مثلا كاس بس يكون حجمه كبير
حتي ماتضيع عليك بقايا التوست
واضغطي عليها بالكاس
لين تنقطع وتكون الاطراف مقفلة زين
وبعدين صفيهم بصينية
وبعدين ادهنيهم بخليط الجبن والقشطة
وبعدين دخلي الصينية الفرن من تحت و فوق لين تتحمص
وطلعيها واقسمي كل دائرة نصفين
وبالهناء والعافية
. .
سادسا . .
المربعات اللبنانية . .
جيبي شرايح توست مقطعة الأطراف
وصفيهم بالصينية
وبعدين حطي عليهم طبقة من اللبنة وشوي من البقدونس المفروم وشوية نعناع حسب الرغبة
وبإمكانك استبدال البقدونس بشرايح الزيتون الأخضر المقطعة صغيرا
وبعدين صفي عليهم طبقة توست ثانية
بعدين تكونين مجهزة شوية زعتر مخلوط بشوية زيت زيتون وشوية ثوم مجفف مطحون إن وجد
وترشينة فوق الطبقة الأخيرة
واضغطي عليه عشان يتماسك بالتوست
بعدين حمصيها بالفرن فوق وتحت
وبالهناء والعافية
. .
سابعا . .
توست الجبنة الحارة
أعملي خليط
من أي نوع جبن
سايل أو مثلثات أو كيري أو دوبل كريم
واخلطي معه بمفرمة البصل
مخلل بعد ماتصفينه جدا من الماء
أو مكدوس بعد ما تصفينه جيدا من الزيت
وبإمكانك خلط الأثنين معا
وشوي شطة حلواني المفرومة الجاهزة
أو سومطرا أو حتى فلفل حار
حسب الموجود عندك
وبعدين تجييبين الصينية
وتصفين بها شرايح التوست مقطعة الأطراف
وبعدين صبي الخليط السابق عليها
ومن ثم صفي طبقة شرايح توست ثانية
ودخليهم الفرن لين تتحمص فوق وتحت
وبالهناء والعافية
. .
أصناف الحلى من التوست
أولا
سينبون التوست
شرايح توست تدهنينهم جبن كيري
زي الساندوتش
وبعدين تحمصينهم بآلة التوست أو بالفرن
وبعدين تقطعينه أربع
وتصبين عليه نستله وشوي قرفة
وبالهناء والعافية
. .
ثانيا
الكنافة السريعة..
سوي شوي نشاء ولما يبرد
اخلطي معه جبن أو قشطة طازجة
لا تكثرين النشاء معه بس حق إنه يتماسك
وبعدين جهزي لك بصينية طبقة توست مقطعة الأطراف
ومن ثم صبي ع الطبقة الخليط اللي جهزتيه
بحيث تكون طبقة كثيفة شوي
وبعدين غطيه بطبقة توست ثانية
وحاولي تضغطين عليها بشويش
وبعدين دخليها الفرن فوق وتحت لين تتحمص
وبعدين صبي عليها وهي حارة
عسل مخفف بشوية ماء و ماء الورد
إذا تحبين نكهة ماء الورد
أو شيرة عادية إذا ماتحبون العسل
وبالهناء والعافية
. . .
ثالثا
مثلثات الشوكولاتة
شرايح توست
ولوح شوكلاتة جلاكسي أو كادبوري
وأنا أفضل كادبوري
أرخص وأطعم
أو حبات شوكلاته المتوفر عندك
مايمنع لو حطيتي شوكلاتة هوبي
تحطين حبتين كبار شوي من مكعبات الشوكلاتة
فوق زوايا شريحة التوست
عشان لا جيتي تقصينهم
تكون الحشوة متكافئة
وبعدين تحمصينهم بآلة التوست
أو الفرن بس بالفرن حاولي تضغطين الأطراف
وبعدين إذا تحمصوا
قطيعهم أربع
بعدين رشي عليهم سكر مطحون
أو نستلة وقرفة
وبالهناء والعافية
. .
سبرنغ رول الخبز
جيبي خبز مفرود وقصيه من الأطراف
بحيث تكون عندك طبقتين كل طبقة لحاله
وبعدين قصصيمه زي مثلثات البيتزا
بعدين خذي كل مثلث
وادهنيه ببيض مخلوط مع حليب
وبعدين حطي الحشو من الجنب العريض وسكريه من الاطراف زي السبرينق رول
ودخليه الفرن اذا تبين سعرات حرارية أقل
أو غمسيه بالبيض والبقسماط وأقليهم
وبالهناء والعافية
. .
فتة الباذنجان
باذنجان مقلي وتملحينه وشوي حب حمص معلب إن حبيتي وشوي خس مقطع وشوي شرايح طولية طماط وشرايح طولية خيار
بعدين تحطين فوقه خبز مقلي أو محمص بالفرن
بعدين تصبين فوقه صوص الزبادي + طحينه
بعدين ترشين فوقه صنوبر محمص أو كاجو أو لوز مجروش مع رشة زيت زيتون
وقدميها ع طول
وبالهناء والعافية
. .
مقرمشات فوندو الجبن
فكي شرايح سمبوسه كل شريحتين مع بعض
و قصصيهم أي شكل وبعدين دخليهم الفرن وحمصيهم
ووبعدين صبي عليهم فوندو الجبن..
فوندو الجبن اللي أنا أسويه..
أسيح عالنار
جبن شيدر + جبن سايل+ شوية حليب سايل + فص ثوم مهروس + فلفل اسود
وبالهناء والعافية
. .
كفتة البطاطا
اسلقي بطاطس وبعدين اهرسيه
وبعدين حطي عليه ملح وفلفل أسود وبهارات وبقدونس
ودجاج مسلوق ومنتف إن حبيتي
وشكليه أصابع وغطيه بالبيض والبقسماط
وأقليه أو صفيهم بصينية وحمصيهم بالفرن
وبالهناء والعافية
. .
كفتة الخضار
شرايح ملفوف طولية
شرايح بصل طولية
شوي شرايح فلفل رومي طولية
شوي جزر مبشور
شوي بقدونس وكزبرة شبه مفرومة
شوي ثوم مفروم
شوي بطاطا مسلوقة مهروسة
ملح
بهارات
فلفل أسود
بيضة
طحين
طبعا الغالب يكون الملفوف والبصل والباقي ما تكثرين منه
لأن أهم عنصرين بالخضار الملفوف والبصل
إذا ما وجدت البقية ما تلزم
بعد ما تجمعينهم وتداخلينهم ببعض
مع الملح والبهارات والفلفل الأسود
تكسرين عليهن بيضة أو بيضتين ع حسب الكمية اللي أنتي حاطته
وذري عليه الطحين لين ما تحسين إنه صارت متماسكة ولا تكثرين منه بس حق التماسك
وبعدين أحمي الزيت درجة متوسطة
وبعدين شكلهين ع أشكال أقراص دائرية صغيرة مضغوطة زي شرايح لحم الهامبورجر
عشان ينضج اللي بالوسط
أو صبي الخليط بصينية وحطي معه شوي بكنج بودر
واحرصي تكون سماكته رفيعة ما تكون عريضة أطعم
ودخليه الفرن فوق وتحت إذا ماحبيتي الزيت
وبالهناء والشفاء
. .
البيتزاء المريحة..
تجيبين خبز مفرود وتقصينه من أطرافه بحيث تصير عندك طبقتين
وبعدين تحطين بمقلى البيض
شوي من شرايح بصل وشرايح فلفل رومي وشرايح طمام كلهم نص دائرة ورفيعة اسرع للنضج
وتشوحينهم بشوي زيت زيتون وملح وفلفل أو بهارات وشوي كاتشب
وبعدين تحطين شوي شرايح زيتون وفطر إن وجد أو دجاج إن وجد
وبعدين اجمعي هالحشو ع شكل دائرة بحيث يكفي شريحة الخبز
بعدين صبي عليه بشكل دائري شوي بيض مخفوق تكونين مجهزته للكمية اللي تبينه
ثم اتركيه لين يتماسك شوي
وتكونين مجهزة شرايح الخبز ومدهنتهن بشوي جبن
وتحطين الوجه المدهون فوق الحشو اللي جهز عندك واصبري شوي اضغطي بشويش ع الشريحة لين تحسين انه تماسك الخبز بالحشو
وبعدين جيبي صحن مدور قد الخبز وحطيه فوق الخبزه واقلبي المقلاة ع الصحن
واحرصي إنك تتأكدين إن كل الحشو نزل قبل لا ترفعين المقلاة
يعني إذا مقلاتك متخمشة ورايحة عنه مادة التيفال
حاولي إنك تكونين مكثرة الزيت شوي عشان ما يلصق الحشو بالمقلاة
وبعدين قطعيه بشكل مثلثات البيتزاء
وبالهناء والشفاء
. .
البيتزاء السريعة لذيذة وشهية وسريعة. .
المقادير
علبة زبادي
بيضتين
نص كاس ماء
ربع كاس زيت زيتون
نص فنجال سكر
ذرة ملح
ملعقة زعتر صغيرة
شوي حبة سوداء
ملعقة كبيرة بكنج بودر
كاس إلا شوي طحين
اخلطي الجميع باستثناء الطحين والبنكج بودر
لين يتجانس وبعدين حطي الطحين شوي شوي
وانتي تخلطينه وبعدين حطي البكنج
واخفقي لك خمس دقايق لين تتجانس وتجي معك زي سيولة عجينة الكيك إن كان أثقل خفيفه بماء
وإن كان خفيفة زيدي الطحين
وبعدين صبيه بصينية خليها ترتاح دامك تجهزين الحشو
اللي هو
شرايح بصل وطماط وفلفل رومي نص دائرة ورفيعة
وصبي عليهن شوي كاتشب وسومطرا إذا حبيتيها حارة وجبن سايل إذا رغبتي
واخلطيهن بيدك
بعدين وزعي الحشو ع بالصينية
وإذا عندك حشو لحم أو دجاج بعد حطي شوي ع الصينية
وزيتون أسود وأخضر إذا وجدت عندك
وإذا ماحطيتي جبن سايل مع الحشو
حطي جبن أبيض مالح أو جبن مثلثات قطعيهم مكعبات صغيرة
أو شيدر ابشريه فوقه
ودخليه الفرن تحت وفوق
وبالهناء والعافية
. .
رولات المصابيب..
طبعا أفضل طريقة أسويها للمصابيب هي
فنجال حليب ،فنجال سكر ،ذرة ملح ،شوي بقدونس مفروم، كوبين ماء، بيالة زيت زيتون ، بدون أي خميرة او بكنج بودرة
وبعدين تبدين تحطين الطحين شوي شوي ونتي تخلطينه
لين تصير معك عجينة سايلة زي سيولة الكيك
بعدين تجيبين أي صينية تيفال إذا ماعندك صاجة المصابيب
إن أمكن مقلاة البيض إذا هي كبيرة وماتخمشت وزالت عنه مادة التيفال
وبعدين تصبين ع شكل دائرة كبيرة متوسطة السماكة لا سميكة جدا ولا رفيعة جدا
توزيعنها بمغراف المرق
وتتركينه لين تنضج من تحت بعدين تقلبينه لين تتشقر
و بعدين لما تسوين الكمية المطلوبة
خذي كل مصباب وادهنية باللي تحبين
كاتشب مع جبن أو مايونيز
وحشوة دجاج
وبعدين لفيهن رولات
وبالهناء والعافية
. .
المنتو الكاذبة
شرايح سمبوسة أو شرايح المطبق اختصارا للوقت
تحشينها حشوتك المفضلة
وتلفينهن رولات زي أصابع العروس
بعدين تجيبين صينية وتحطين كطبقة أولى شرايح بصل نص دائرة رفيعة وشرايح فلفل رومي رفيعة
وبعدين تصفينهم فوقه بشكل متراص لين تملين الصينية
بعدين صبي فوقة خليط القشطة والجبن
واللي هو علبة قشطة مع ثلاث ملاعق جبن أو كرتون جبن
وترى كميته ع حسب الصينية اللي عندك
المهم دخليه الفرن من تحت ع نار متوسطة
واتركيه لمدة ساعة تقريبا أو أكثر ع حسب نوعية الشرايح اللي عندك
اتركيه لين تنضج الشرايح وتصير أطعم مع تنكيهة البصل
وبعدين من فوق لين يتشقر ع الخفيف.
وبالهناء والعافية
. .
عجينة البف السريعة
. .
لكل علبة قشطة كاس طحين
وتعجينهم زين
وهذي العجينة صالحة
للمقليات
وميزتها ما تتشرب الزيت
وبإمكانك عمل منها
أصناف حلوة ومالحة في وقت واحد
يعني افردي العجينة
وقصصيها ع شكل دوائر
وحشي بعضها حشوة لحم أو خضار أو جبنة مالحة وبقدونس
وبعضها حشيها جبن كيري أو قشطة طازجة ومكسرات
وعند التقديم شربيها شيرة
وبإمكانك تفردينها وتقصصيها أي شكل
بس يكون صغير مثل قوالب المعمول
وبعدين تقلينها ع طول
وتصبين عليها أي صوص حلو
من اللي ابذكرهم بالقائمة
وبالهناء والعافية
. .
الحشوات السريعة
الصالحة لأطباق
الحلو والمالح
. . .
الموالح
(1)
لكل علبة جبنة شيدر
أربع بيضات مسلوقة
وبقدونس
وتفرم جميعها بفرامة البصل
. . .
(2)
بصل مقطع صغير
وشوي طماط مقطعة صغار
وشوي فلفل رومي مقطع صغير
وفلفل حار للي يحبون المحرق
وشوي زيت زيتون وملح وفلفل أسود
وبعد ما تتشوح وتذبل وتخلص
نضيف لها بيض مسلوق مقطع
وملعقة جبن كبيرة
أو مايونيز
حسب الرغبة
وممكن نستبدل البيض
بمورتديلا أو نقانق أو تونة
لكن نستثني الطماط إذا حطينا تونة
. . .
(3)
نسلق شوية خضار مجمدة لين تنضج تماما
وبعدين نحطها مع خليط بيض
ومعه شوية بقدونس وشبت حسب الرغبة
وشوية شرايح زيتون أسود أو أخضر إن وجد
وشوية بصل مقطع صغير وثوم مفروم
وملح وشوية بهارات وفلفل أسود
وبعدين نصبهم بالمقلاة
ونقلبهم ع طريقة الشكشوكة
. . .
(4)
كوسة مقطعة صغار
وجزر مبشور
وبطاطس مقطع صغار
وبصل مقطع صغير
وثوم مفروم
ونحمسهم بزيت لين ينحمسون وينضجون
ونصب الزيت عنهم إذا هو كثير شوي
بعدين نضيف لهم
ملفوف شرايح رفيعة آذا وجد
ونحط معهم الملح والبهارات والفلفل الأسود
وبعدين نضيف البقدونس المفروم
. . .
صوص الحلو
(1)
كاس سكر
كاس زيت
كاس ماء
4ملاعق بودرة شوكلاتة
4ملاعق حليب بودرة
مكسرات بست أو كاجو أو لوز عادي إن وجد
وجميعهم بالخلاط
واحفظيه بعلبة بالثلاجة لحين الحاجة إليه لأي حلى
. .
(2)
اخلطي جبن ونستلة وقشطة وحطيمه بعلبة بالثلاجة ..
لحين الحاجة إليهم لأي حلى
. . .
حلى سريع لمثل هالصوص
ممكن تحشين تمر ببسكويت وطحينة
وتصبين منه فوقه
وممكن تسوين بف باستري سادة
وتصبين الصوص عليه
وترشين عليه قرفة
وممكن تسوين حلي الأكواب
طبقة بسكويت أو كيك
ثم طبقة من هالصوص
ثم طبقة قشطة مع جالكسي او أي صوص شوكولاتة
زي الصوص اللي قبله
وبالهناء والعافية
. .
وفي النهاية
أتمنى من الله أن أكون قد أفدتكم
كما أتمنى منكم دعوة بظهر الغيب
لي ولصديقاتي اللآتي ساعدنني
وأن يهديني الله ويصلح نيتي وذريتي
وأن يهون علي ولادتي ويسهلها
ويرزقني الطفل الصالح السليم المعافى
:'(
لأني بصراحة كل يوم أصيح من الخوف مع اقتراب موعد الولادة<<<<يقولون كل ماتكبر الحرمة كل مايزيد خوفه :'(
. . .
وياليت اللي عندها أطباق سهلة وسريعة تفيدني هنا
عشان أفيد كل من حولي
والأجر لكم بإذن الله