خلطه من اول مره تفتح لون شعرج وتطوله وتنعمه

السلام هذي خلطه جربه 100 %
ياهي غير لوون الشعر وتطوله وتنعمه انما ايه
تخليه خيال كانه شعر هندي ...........
المهم اترككم مع الخلطه :::::::::::::::::::::
اول شي تييبون 5 علب كريم بوهلي
ثانيا 5 علب كريم ديانا
ثالثا 5 علب كريم ريتن ايه
رابعا تاخذون ربع كيلو ((نمل)) محروق ومطحون ناعم جدا
واربع ((ذيول)) فار ميت بسكته قلبية لازم سكته قلبية انتبهوا
اي موته ثانية بتطلع نتايج عكسية انا مالي شغل
تخلطون المقادير بالخلاط عدل مدل وتحطونهم بعلبه زجاج وتخلونه جنب الابجورة اللي بغرفة سايق بيت جيرانكم يوم وليله
وان شاء الله تصحون الصبح تلقون بياضكم يكسر عين الشمس
ادري بتكفخوني وتطقوني وتشوتوني فناقر
بس بنات والله العظيم حرام اللي تسوونه بروحكم
انااتصفح المنتدى القى بكل عشر صفحات موضوع واحد ولا اثنين اللي نتايجهم معقولة ومكوناتهم ماتضر
الباجي مابقى كريم فيه كورتيزون وزئبق ورصاص ماتلطختوا فيه
والبنات مساكين عيزوا وهم ينصحون فيكم يقولولكم ترى هالكريمات موزينه وتسبب سرطان
ووحدة مسكينه كاتبة موضوع عن كريم بوهلي هالخايس
وهم ماكو فايدة
والله ان بوهلي خلى اباطي حنفية من العرق اللي ينزل
تخيلوا امشي وانا حاطة بأباطي كلينكس وصاكة عليه
0ايام وبعدها بدا يخف العرق
ولا بيض ولا شي
وريحته خايسه ولونه مقرف
موبس بوهلي حتى باقي الكريمات
حرام عليكم حمدوا ربكم على نعمة الصحة وان بشرتكم مافيها بهاق ولا برص ولا سرطان جلد
انا قريت وصفه ومنقولة بأكثر من منتدى فيها كريمات ملوت بهاق وبرص
الله واكبر عليكم شلون تستعملون هالسوالف والله شجعان انتوا
انا لو تنقلب الدنيا مااخاطر
عندي اصير سيلانية ولا استعمل هالسوالف اللي ماوراها الا الامراض
وشفيكم حاطين دوبكم دوب المنطقه الحساسة الا تبونها تلق
بالله ابو الشباب يحاتي يبيض عمره عشانكم؟؟!!!
والله مايدري عن هوى داركم وانتوا مابقى عله ماتحطونها بهالمنطقه الفقيرة المسكينة راحت فيها تزلقت وتنتفت من سوالفكم
شفيه الليمون والجلسرين؟؟ ماكو احلى منه وينعم ويبيض ويوخر ريحة العرق وكل شي
بس انتوا تستانسون لاشفتوا بالخلطة الف اسم كريمات وبلاوي ماتبون شي سهل وطبيعي
وتبون كل شي بيوم وليله
والمصيبة السمرا حاطة ببالها انها بتلقى خلطة تسويها سنو وايت!!!
وين قاعدين شخليتوا حق مايكل جاكسون عيل هالمخبل؟؟
بنات ترى اذا توحد لون الجسم وصارت الاماكن اللي اغمق من اللون الطبيعي
صارت باللون الطبيعي بتحسين انج ابيضيتي
وترى اذا في شي طبيعي يبيض حطي ببالج شغلتين
انه راح يطول على ماتبين النتيجة
وانه لو بيضج راح يبيضج نص درجة او درجة
هذا لازم تكونين حاطته بعين الاعتبار قبل ماتسوين اي خلطة
موتقولين لبا والله انا حنطاويه بصير بيضا
مايصير مايصير
طجلعي من عالم الاحلام
واذا تبين تستعملين الكريمات اللي يبيعونهم تاعطارين والهنود بمحلاتهم اللي مافيها مكيفات والكريمات تحزر عندهم وتخيس؟؟ انتي حرة
بس لاتقولين عقبها صار فيني حكة وحرقه وحبوب وصرت اغمق من اول
لانه نصحناكم وانتوا راكبين راسكم
ترى موشرط الوحدة تكون تلق من البياض عشان تصير حلوة
كافي انج تعالجين بشرتج من الحبوب والسواد تحت العين وترطبينها وتختارين مكياج يناسبج وبس حمدي ربج
ياما بنات بيض وجياكر ولايعة جبدهم من لونهم يبون يسمررون موقادرين لاطلعوا بالشمس تتصلخ بشرتهم
احنا الحمدالله الميلانين اللي ببشرتنا هو اللي يحمينا من الامراض والسرطانات والاشعه الضارة
نقوم عشان سبع البرمبة نسوي خلل بهالمادة ونلطخ بكريمات ماندري شالبلاوي اللي فيها؟؟!!!!
وتلقون سبع البرمبة مسكين ماتكلم بس الوحدة ساعات ماتقتنع باللي عندها
انزين اذا تبون برنامج تبييض
روحوا اشتروا من هالماركات المدروسة مثل جيرلان ولانكوم وكريستيان ديور
اللي يقعدون سنين يسوون اختبارات يالله ينتجون هالكريمات وبدون مواد ضارة وبدون تأثير سلبي
بس انتوا اذا تبون الرخيص والسريع تحملوا النتايج ولاتيون تشتكون وتفترون من عيادة لي عيادة وتبكون عند الدكاترة وتصيحون وتقولون:
((ليت الجلح يعود يوما))
هذي نصيحتي لكم صج انها طويله بس انا حبيت انصحكم واحذركم
وعلى فكرة هذا اول موضوع لي اتمنى انه ماينفركم مني لاني ابي مصلحتكم