رأي بعض الرجال عن حركات بعض النسآء للنساء اللي تطبق افكار النت ولا تفكر

.
.
.
.
الموضوع شفته في أحدى المنتديات وعجبني
وقلت بشوف تعليقكم عليه
موضوعنا اليوم
عن بعض الافكار اللي ماتناسب الزوج
واللي تسويها وحده وهي ماتفكر ولا تدري وش زوجها يحب وش يكره.. يعني شريحه كبيره من الرجال يحس ان هجري الحركه الفلآنيه غبيه..
يعني في حركات معليشش .. بس تكون حقت اطفال..
يعني رجي الببسي وخليه يفتحه .. وان طاش في وجهه انحاشي بدلع
.
.
.
ولا البسي له لبس تنكري .. وحطي له بالونات .. وفراش ينوور..
.
.
.
احضرت لكم بعض تعليقات الرجال
اتمنى تستفيدون...
.
.
.
(1)
ههه ههه
والله يا بعض لحريم فراغ وجهل لاعبن بحسبتهم
مادري استهبال ولا صدق يعني هالحريم الي يفكرون كذا وش تحس فيه ؟؟
يعني لهدرجه ماهي عاجبه زوجها !! ولا زوجها مايحبها ؟؟ ولا تعاني من قل اهتمام الزوج ؟؟ ولا ايش ؟؟
ماعندها ثقه بنفسها وبرضو ماهي مطلعه او مثقفه للحياه الزوجيه ...
يعني زوجها يحبها وراضي عليها ومبسوطين لا تبي زياده تبي مايطلع من البيت
تبي زي ماتشوف بالافلام من حب وغلام وعشق وخرط تبي تشوفه ..
مو شرط الرجال يعبر بالكلام ترانا فاشلين تعبير بس الافعال هي الي تعبر عن راضنا ومحبتنا ...
وياليت الظاهره هذي تنتهي ونفتك منها ومن مواضيعها
.
.
.
.
(2)
آآآآه ياعزتي
شفت الصور تكدر خاطري وجاتني غلقه من اللي شفته !!! والله لو تجيني وحده
من طقة خبال وهبال من ثاني يوم لاف الانوار على جسمها وترحيل لبيت اهلها
ينبسطون عليها !! اجل على السرير انوار الظاهر فاتح كشك تجهيز حفلات موب
سرير انام عليه خ
ولا تجيك ثانيه تسمع بالادغال تقلبي البيت افركانو خ وقسم ان
اقلب غوريلا اتوطى في بطنها من باب اني وحش ههه
اجل ابعوض النقص يوم اني بزر اقعد اراكض ورا شوية ورق بالنهايه القى صحن
سلطه داخله ورقه مكتوب بالعافيه خير !!!
بس تبون الجد فيه عالم كذا تحب الجو الغبي قصدي الجو هذا يعني هم ينبسطون
على الامور هذه فتعتقد كل الناس مثلهم فتنزل الموضوع في منتدى كيف تغري زوجك
خ عشان كذا الرحمه فيهم واجب والعطف ترا والله ارحمهم كثير
فخلوهم يعيشون الجو المخيس بدون ازعاج رجاءً
اجل من بكرة ابشتري خياش واحط فيه زوجتي على اساس اني صدت صيده
وتوني جاي من الصيد وثمن ابرميها رمي بالصاله الين تتفلق واقول احلى صيده
خ قال عرس قال
.
.
.
.
(3)
ههه
الله يخرب بيت ابليسك ..
لا ولن وانا وكان واخواتها وجماعتهم (وبعدين .!؟؟)
يمر علي موضوع بالعقلانيه هذي..
صدقيني هذي مو رومنسيه هذي تمثيليه ..
تجي تقرا وش الدور اللي تسويه وتروح تطبقه من دون ما تفكر
واخرتها تتشكى من زوجها ..
يعني تخيلي مثلا موضوع واحد ينصح الزوج كيف يخلي حرمته خاتم باصبعه ..

• اول ما تحس بالطفش وتبي تسوي رومنسي حط المكيف ع الحار عشان تموت حر

حرمتك وتخلع قليل من ملابسها ههه

• االبس فنيلة مردونا عشان تخق معك .. بحكم ان الرجال خاق مع مردونا ..!

( وهذي النقطه دايم يسوونها الزوحات و تحسب الرجل يميل للاشياء اللي تحبها والعكس)

• بغيت تصفي حساباتك لييه الضرب والشتم ..!

أبد خذها ع جنب ولبسها تي شيرت النصر او الهلال ( ع حسب الفريق الخصم)
وخلها حارس ومزعها لين تحس انك صفيت حساباتك بطريقه رومنسيه..( اللي كاتب الموضوع مقتنع
ان هالفكره رومنسيه احد عنده اعتراض ..!؟)
لو تقرا بنت موضوع زي كذا اكيد بتنفجع مع انه مستحيل ادمي يفكر كذا ..
وهذا هو شعور الرجل غالبا يوم تسوون له حركات بالونات ولبوه وانت ماشي..
بلاه لو وحده يسوي لها زوجها كذا ..! اكييد بتكرهه لو انه اطخم
ترا الرومنسيه عفويه مع شوية توجيه وليست "تمثيليه"
اهم شي الاخلاق ..
.
.
.
.
(4)
تدريون قمت اعصر راسي ساعه ابحاول احس نفسي متزوج مع الانسه ام الخطط
حقة ثالث ابتدائي ب..
ههه الله يرحم امك اجل اشرب العصير..خ
طيب بشرب سم بس لاتصيرين زوجتي..
آآه بس انا مقتنع اقتناع تام..ان لو يمنعون النت عن البنات كان يسكرن المنتديات
وأولهآ المحروس حقنآ..
مشكلة بنات اللحين يمشن بدون ثقافه..
ثقافتهن من هايدي..وسالي.. لان يصير عمره 20 وهي للحين راحمتن
سالي وودهآ ترجعهآ لهلهآ وحاقدتن على انسه منشن..ومن ذا الخرط..
يعني بنات هالوقت عادي تلقينهن يصبغن وجهين وجه احمر فاتح والثاني فوشي غامئ..
النت آخذوه بدال مجلة سيدتي وهيآ ومزنه ووضحى ومدري وشو وقاموا يطبقون
مدري ماودي احتسي اخاف اجيب العيد فبختصار الوضع..
البنت لانعدمت ثقافته العامه اقوول العامه موب يعني لازم تقرى لسقراط أو كتب فلسفيه..
لا يكفي انها تعرف العالم وش تسوي ..يعني تكون مطلعه بالاشياء الايجابيه بالناس
اللي حولهآ..اما التبذير على الخرابيط مثل اللي اشووف والخزعبلات المريضة!!
سلمينآ عليهآ..(يعني يقالهآ فكره جديده وبتجذب)
.
.
.
.
(5)
ههه صراحه كل ماقريت بعض القصص الي يسوونها الحريم
البسي لبس الغابات.. وصيرله ماوكلي...وهو وش يصيرلها باقيرا مثلا
الحمدلله على نعمة العقل بس
.
.
.
.
( 6)
حرام عليكم .. مو لهالدرجة الحركة شينة .. صح انها ماتناسب لكل الاذواق
بس يظل فيها لمسة رومانتك .. طبعا مو اي واحد يمدح حركةمعينة
تكون انها مناسبة للكل .. عندكم اما مالك ماشاء الله عندها حركات
ماتناسبكم يالسعوديين .. يعني بالله عليكم قد جات في بالكم حركة الفاكس ..
يعني تخيلوا رجال شاقلن حرمته ويدور بها بالصالة ويقول لها ياملاكي الطخما
عمري ماراح اشوف غيرك , هذا ادروا انه نصاب ولاعبن على حرمته ..
الرومانسية ياشعب الجلافة هو الشيء العفوي وعلى طبيعته ..
اشياء بسيطة وبدون تكلف .. احيانا رسالة جوال فيها كلام عفوي وطالع من القلب
احسن بكثير من اللبس التنكري الخايس .. اجل اخلي حرمتي تلبس زي الفراشة
الله لا يبلانا .. بهالحالة مالك ان ترشها بفليت كود تنخمد وتنام وتعدي ليلتكم المنيلة ..
خلكم طبيعين واعرفوا نفسيات ازواجكم واتركوا عنكم خرابيط النت
ماوراها الا تقليل هيبتكم ومقداركم عن ازواجكم ..
ومع كذا انا مقتنع بنظرية الفاكس .. واللهي دنتي هايلة يام مالك
.
.
.
.
(7)
واللهي تووحف الله يستر اذا اعرست لاتسوي لي زوجتي كذا عاد مايمديني اقولها
حركاتك زي وجهك بصبر واسلك غصب خبرك اذا فشلتها يمكن تصكها
النفسيه ويجيها احباط يمشي مليون ولعد تحط ولو ملح بالرز بس صدقيني
راح اقدر لها هالشي يكفي انها فكرت تبسطني بس لا تفلها واجد مره مرتين بالسنه
اوكي اما تخطملي كل اسبوع بشي ماهقا بستحمل وبسوي لها نفس الحركه
الي لبست نمر وقلبت غرفتها ادغال < بالله ذي وش تحسبه
.
.
.
.
(8)
ههه
والله موضوع بطل وخطيير ...
عساج ع القوة خيتي بدعتي .. صراحه في اشياء تفشل ..
تخيلي مثلاً لو اني متزوج وراد من الدوام تعبان ! .. بدال لا القاها مضبطه لي ابيت
والعشى .. و مجهزتلي فلم نسهر عليه ولا شي .. ارد القاها حايسه البيت فوق تحت
فراشه و هبال ...
بالنسبه لي الرومانسيه بين الازواج بس ابيها تهتم فيني ..
اذا اهتمت فيني انا بهتم فيها و ابادلها نفس الشعور ..
بلا فراشه و نحله و نمر .. يا آني رحمت اللي متنكره بلبس نمر ...
.
.
.
.
(9)
لاحول ولا قوة الا بالله
ثاني شئ قسمن لو اعرس على وحده زي كذا لا اكرفعها على بيت اهلها وارسل
ورقة الطلاق بالفاكس خ
.
.
.
.
(10)
يازين البنت على طبيعتها
.
.
.
.
(11)
يعني لو بشوف مثلا زوجتي حاطه ورده بكتاب ياشيخه لا اطلقها بالخمسه
عشان استر الفضيحه اللي صارت بالبيت
حنا يالسعوديين ماتمشي معنا
ولا اعتقد اننا بنتقبل المهازل هذي ههه
بعدين خيير وش فاكس بتقدم على دائره حكوميه هي
وفيه ردود تضحك وتعصب في نفس الوقت
.
.
.
.
(12)
ورده !! ورده وسعودي.. ماتجي !! .. تخيلي شخص يجي يقول لك
روحي للبابا يوحنا وضعي مسواكا داخل القرآن الذي يقرأه !!
تخيلتي شلون مسواك وقرآن وقسيس ماتجتمع ؟؟!! هذا نفس الحال
مع سعودي وكتاب ووردة !
شاب سعودي ملحط ماقد شاف ورد إلا بالأفلام ويحسبها
من ضمن الخيال العلمي ..وفجأه بتحطين له وردة وتتنظرينه
يتأثر ويصير كيوتي وتخنقه العبرة من التأثر والحب والحنان ..
وبعدها بيصير خاتم بيدك .. صدقيني ياختي الورده ماتأثر فيه بكثر
مايأثر فيه لبن المراعي عقب الكبسه
الافضل هو.. لو كان مدخن تحط له زقارة بوسط الكتابة افضل ..
ولو كان غير مدخن تحط له عود اسنان ينقب ضروسه ..
ولو كان مطوع تحط له مسواك والا شريط تهادوا وتحابوا ..
وخلي الورود لجاك وجورج وديفيد .. التمساح السعودي الأبي الأصيل ما تهمه هالاشياء
الرومانسية وطرد الروتين والطفش من البيت .. الزوج والزوجه لازم يتشاركون فيها ..
شيلوا من بالكم الخطوات الغبية اللي تقول لك ..
سوي افعلي حطي هذي معد توكل عيش كلن له طبعه وموب كلن
يتقبل نفس الشي ولاهوب كلن يفعل نفس الشي بصدق وإخلاص ..
إذا ماصارت جايه برغبه وقناعه وفكرة خالصة من الشخص نفسه ..مايصير لها اي طعم
.
.
.
.
(13)
الدلع الي بالفطره يكفي
بس مصيبه لاصارت جلفه وتتدلع ووتتميصل وتسوي حركات مايسويها نزلاء مستشفى شهار
تكسب زوجها ااذا دخل ولقى البيت نظيف وكلشي مرتب اذا لقى عياله
نظيفين ويلقون مووب مشهبين من الوسخ تكسب زوجها اذا هي بس تفكر في عيالها
وتحترم حياتهم المشتركه وخصوصيتهم موب كلن يدري وش في بيتهم
تكسب زوجها لاصارت شخصيتها قويه مستقله تقدر تدبر حياتها وعيالها
من دونه وبغيابه لاقدر الله
بس وحده مهمله كل شي وفجاءه تروع المسكين بليله صفرا مدري حمرا
بعذره لو يهج ومالومه وتجيك تصيح تقول موب رومنسي ؟
طبعا ليس كل الرجال مايحبون هذه حركات لآن في واحد رد وقال
.
.
.
.
(14)
الله يرزقني بوحده من راعية هالخرابيط على قولتكم
لكن ما هو كل يوم يعني بالشهر مره او مرتين من باب التغيير
لكن ماهقيت سعوديه تتعب نفسها بهالامور لان مثل ماقريت بالموضوع هذا وغيره من المواضيع
أغلبيتهن جلفات وعربجيات ولهن شنبات
المشكلة انهن من الجيل المتعلم والمطع
لكن لا حياة مع اليأس وان شاء الله انها موجوده وتنتظرني
.
.
.
.
ايش رايكم..
طبعا الموضوع.. مو معمم..
بس الملخص هو انه كل وحده تنتبه للي يحب زوجها واللي مايحب..
.
.
انا مثلا مافي حياتي سويت من هالحركات.. اذا كثرت شموع وورد..
لاني اعرف ان زوجي مايحب اكثر من كذا..
.
. وزي ماقلت.. كل وحده تنتبه للي يحب زوجها.. عشان ماتنقلب الشغله عليها.. لانه كمان في بنات الله يهديهم اللي تشوفه تسويه من دون تفكير..
وبس..