عشآن تخشعين في القرآءه والدعآء تعالي

السلآم عليكم
وحشتوني والله ، بس تراني ورى الكواليس اقرى مواضيعكم
يادوب ننام ونطبخ نبدأ الهمه بالليل
المهم حبيباتي بقول لكم على شي يمكن يساعدكم مثل ماساعدني ولله الحمد
اول شيء سويته
اني تناسيت موضوع الزواج عشان ما احس اني بس اتقرب لله عشانه
ابي احس ان عبادي لوجه الله ،، وهذا ما يعني اني توقفت عن الدعاء لي ولكم بالزوج الصالح
بالعكس ادعي في كل وقت
في قرآءة القرآن ..
إن شاء الله ماتقرين الا وجه واحد في اليوم
المهم وش هو ؟؟
انك تتدبرين وش تقرين
اقرأي الايه وشوفي وتفكري فيها
القرآن سبحان الله اغلبه قصص و وصف وتهديد ووعيد
واسماء الله ونعم وعطايا وعقاب كل شي لو تفكرتي في الايه
انا رتبت وقتي اني أقرأ جزء واحد في اليوم ..
مو مهم متى اقرآه وفي اي وقت المهم افهم وش انا أقرأ
صرت اقرأ منه شوي بعمق ، و اصلي منه في التراويح ، واكمل بعد التراويح
والحمد الله ،، انتبه لمعاني كثير كنت اقراها وبس ، الله يرحمني برحمته
وقفي عند كل ايه وشوفي وعيد الله وشوفي رحمته
مثلا قال الله تعالى : ( بلى من أسلم وجهه لله وهو محسن
فله أجره عند ربه ولا خوف عليهم ولا هم يحزنون ) البقره 112
تفكري في الايه !
شوفي اذا سلمنا لرب العالمين ، ماينسانا من الاجر ولا يحرمنا منه و يسعدنا بعد
سبحاان الله !
ما ارحمك ما ارحمك
شوفي الايه
( واذا سألك عبادي عني فإني قريب أجيب دعوة الداع
إذا دعان فليستجيبوا لي وليؤنوا بي لعلهم يرشدون)
شفتي سبحاان الله !
سبحانك ماعبدناك حق عبادتك
وادعي اللهم تقبل دعائي برحمتك يا ارحم الراحمين
في الدعاء ..
انا كنت اخذ ادعيه واقراها بس ما احس بالخشوع وانا اقرأ
قلت ليش ما ادعي انا بنفسي !!
صرت احمد الله واشكره واثني عليه
واصلي على النبي
ثم اناجي ربي
ياربي انت تعلم اللي نفسي ولا اعلم اللي بنفسك
يارب انك عالم بكل شي وتشوف كل شي
تعلم بحاجتي فأقضها لي يا ارحم الراحمن
ياربي حزينه فافرج همي يارب
يارب اشتقت اكون زوجه يارب ارزقني باللي يسعدني برحمتك يا ارحم الراحمين
ياربي انكسرت نفسي السنه اللي راحت يارب انك تجبر بخاطري هالسنه
فهمتوو ..
احاور ربي
اقول يارب انا عاصيه ومُذنبه ومُقصره لكن رحمتك واسعه
فأغفر لي ذنوبي ولا تحرمني اجابتك
واسكت شوي كاني انتظر رد ربي كانه يقول لي
كذا تحسين بخشوع تحسين عيونك تدمع من حالك
احيان اسكت واصيح واردد يارب انت اعلم اعلم
ثم اصلي ع النبي واختم دعائي ..
الاذكار والاستفغار ..
جلست افكر معي نفسي
الحين انا ليش اجلس احسب واستغفر 1000 مره وكلها ترووح سُدى
ما لها اجر ليه ؟؟
عشاني جالسه احسب وبس
ففكرت
عادي لو استغفر 10 مرات باليوم بس
بس الاهم !!
اني استوعب وش انا اردد
لما اقول
استغفر الله <-- تجي ببالي ذنوبي وابيها تُغفر والله غفور رحيم
لاإله الا هو <-- متفررد بالألوهيه
الحي القيوم <-- اسم الله الاعظم
واتوب إليه <-- يارب تبت لك واحاول تكون قول وفعل
على الاقل اقولها مره واستوعبها ،، ولا ارددها 1000 مره بلا اي استيعاب
انا كم يوم صليت الليل بالبقره كامله
تورمت رجولي وتعبت لدرجة اني جلست يوم ماصليت لا تراويح ولا قيام !
وفكرت
قلت بدال ما اوقف عليها كلها لآ ..
اصلي اللي اقدر منها
وبعدها اكمل قراءه بدون صلاة ..
الفايده ياخواتي
خذي الدين يسر ، لآ تاخذينه هم تبين تخلصينه وبس ..
ورددي
اللهم لا تجعل نصيبنا من صيامنا الجوع والعطش
ولا من قيامنا السهر والتعب ..
لا ترخي الحبل لنفسك ولا تشدين عليها
بالاول كنت مره اضغط على نفسي واحارب
لقيت اني اطفى ويجيني فتور بعد مده !!
لكن مع هالاسلوب اليسير بإذن الله ماراح يكون فيه فتور
بالعكس بتشتاق نفسك لاشياء تسوينها
فهمتي قصدي ياخواتي
ادري طولت عليكم بس والله عشاني احبكم
الله يجعلنا واياكم من عُتقائه من النار
وأسال الله لي ولكم جنه عرضها السماوات والأرض
واسال الله ان يجمعنا بأزواجنا وتكون خطبتنا وملكتنا ب العيد <-- عشان ما ننشغل عن رمضان
وماتطلع السنه الا واحنا ببيوتهم
وماتجي السنه الجايه الا واحنا حووامل