قصة مليئة بالأمل

القصة دي مش قصتي لكن قصة قرأتها زمان في بريد الاهرام , و منسيتهاش من ساعتها لانها قصة رائعة تعطي الامل لاي انسان تاخر في العثور علي شريك حياته, انا هكتبلوكوا القصة من الذاكرة و سامحوني لو ماكنتش دقيقة 100%, القصة لامرأة كبر سنها من غير متتزوج لانها كانت مشغولة بعملها و كمان مقتنعتش باي حد من اللي اتقدمولها, الي ان خطبت لشخص اصغر منها و كانت والدته بتعايرها كتير لكبر سنها الي ان انفصلت عنه, و طبعا جالها اكتئاب حاد, و لجئت الي الله سبحانه و تعالي, و هي بتقرأ القران الكريم قرأت اية "و لسوف يعطيك ربك فترضي" و قالت لما قرأت الاية دي حسيت اني اول مرة اقرأها و انخرطت في بكاء شديد, و صار عندها يقين بالله انه هيعوضها خير, و فعلا مرت الايام و قابلت انسان رائع اتقدملها للزواج, كان افضل كتير عن خطيبها السابق و كان يعاملها برقة و حنان, و بعد الزواج, من فرط رقته و حبه لها كان يقولها انا مبحبش الاولاد, دول حتي مزعجين, لعلمه بصعوبة قدرتها علي الانجاب لكبر سنها, لكن هي مفقدتش الأمل بالله, تابعت مع الاطباء, الي ان جاءت المفاجأة, ربنا اكرمها بثلاثة توائم في حمل واحد, و فرحت كثيرا و شكرت ربنا و قالت و كأن ربنا عوضني عن خلفة العمر كله. دي قصة حقيقة يا جماعة, و ربنا يكرمنا جميعا.