مصيبه بعد الزواج اكتشفتي ان زوجك مدمن او يشرب الخمر

صراحه هذا الشي يعتمد على الانسان نفسه اذا كان انسان طيب وحبوب حرام تتخلى عنه المفروض تساعده انه يترك هذا الشي بس في رجاجيل مايستحقون ان احد يضحى بحياته علشانهم
بس انا اشوف انه تصبر وتساعده لانه هو نفسه متورط بالادمان حتى لو رفض وقال انا مستانس بالوضع هو من داخل يتالم لانه قاعد يعذب زوجته ويدمر نفسه وحياته
هذي وجهة نظري بين القبول والرفض
اختك
lovely girl

الصراحه اختي اشكرك اولا على طرحك هالموضوع
وحبيت اضيف شي ثاني مب شرط انه يسكر او مدمن مخدرات حتى لو كان يدخن
انا خطيبي يدخن،،ولاني احبه واتمنى له الخير والله واقفه معاه واحاول انه يقطع او عالاقل يخفف
الرجال مثل ماقلتي يبي يترك كل هالاشيا بس هو مثل الطفل يبغي احد يساعده ويشجعه
من رايي ،، ان على الزوجه ان توقف مع زوجها اذا هو يبغي ان يترك هالاشيا بس مايعرف شلون واهم شي انها ماتعصب او تقعد على راسه لان راح يطفش،، كلشي بالهداوه والمعامله الحلوه يصير
والوحده فينا لو بغت شي تقدر تسويه^_* بس يبي له صبر
الله يبعد عنا وعنك كل اذى ويفرح قلوبنا^_^
تسلمين عزيزتي عالموضوع الحلو

أنا من رايى إنهاتحاول معاه و تذكره دايما بربنا
و تجتهدفى المحاوله
لكن لو مفيش فايده يبقى طبعا مينفعش تعيش معاه
أولا :لأنه بيرتكب كبيره
ثانيا:لأن إزاى ده يكون أبو أولادها إزاى ده يربى
ثالثا:إن هذه البلوى تجر وراءها الكثير وما خفى كان أعظم
ده رايى و الله ؟أعلم

والله الواحد ما يدر شقول
انا عرفت بنات تورطو بازواج مدمين والسكر عامي قلبهم والله حلتهم حاله مساكلهم لا تعد ولا تحصى
والمصيبه الاكبر العيال دايما يشوفون الابهات في وضع لا يحسد عليه وفي عالم ثاني ودايما يسالون ليش ابونا كذا
ومره في عيال يلعبون يم البيت وجاهم سكران يبي ياخذ ولده من بينهم اذكر الولد انحرج من منظر ابوه وصاروا العيال ينادون بياولد السكران
وهم ماللهم ذنب
وغير مشاكل الطق للحريم وغيره بلاوي
انا اقول الانفصال احسن من المرار
ام بدور

السلام عليكم
بصراحه اشكرك اختي على هالموضوع والله يجنبنا هذي المواقف ان شاء الله
بصراحه انا عندي رد حلو واتمنى انه يثير اعجابكم والاخت تقتدي به طبعا وصليه لها ههه
انا أفضل للاخت انها تصبر شوي وتسال زوجها اذا كان هو يحبها وما يقدر يستغنى عنها
بس ما تخليه على هواه لانه النفس ضعيفه للاشياء السئيه والانسان اذا تورط في هالاشياء مش بالسهوله يقدر
يخليها الا بمساعدة الاعزاء والناس الطيبه والقريبين منه طبعا وما اعتقد انه في اقرب من الزوجه وتأثيرها له
تعمل له برنامج معين
مثلا
كل اسبوعين يمتنع عن حاجه وما يعود لها مره والاسابيع الاخرى يمتنع عن شي اخر
فيقدر يمتنع عن كمية الشرب الي بيشربها وان شاء الله في خلال شهر بإمكانها تمنعه عن نصف الكميه الي كان يشربها
واذا شافت فيه تجاوب بتسمتمر وتشجعه يعني شهرين بالكثير راح يمتنع
بس تستحمل الاعراض الجانبيه الاخرى مثل المرض والكحه والزوع او القي وخاصه الكحه
وهنا لازم تكون اكثر شجاعه وتكون قريب منه لانه راح يحتاج لها كثير
بس هذي اعراض جانبيه طفيفه ما تلبث انها تروح بعون الله
اما اذا شافت العكس يوعدها يوم ويرجع يشرب يومين احسن لها في هذي الحاله
تتركه وتطلب الطلاق لانه حياتها راح تتحول الى جحيم والله يوفقها مره اخرى وما عليها من المجمتع
في انها مطلقه هذا ابتلاء من الله والله اذا احب عبد ابتلاه في الدنيا وراح يجيها رزقها وين ما تكون اذا مكتوب لها
شكرا وسمحوا لي على الاطاله ونمتمنى نخدمكم في الاعراس

لا بصراحه الطلاق هو الحل بذمتكم كيف تعيش مع واح يسكر يعني مو بعقله
والا نسان اذا فقد عقله خلاص يصلح اي شي
واحنا في هالزمن نسمع عن اللي قتل وهو سكران وكثيرر مصايب تصير بسبب الا دمان
لكن صعب تعيش معه انسان كل يوم هي بخووف وتعب والله صعب
والله يحمينا يارب ويحمي شبابناا

اذا كان ماهوب ملتزم على الصلاة تطلب منه الالتزام لان الصلاة تنهي عن الفحشا والمنكر وتدعيله فيتالي اليل ان الله يفكه
وفيه مستشفيات لمعلجت الادمان بجميع انواعه واذا مايبغا احد يدري عنه لا تقول انه في المستشفا تقول انه مسافر
والله يشفيه ويشفي جميع المسلمين

على حسب .إذا احبه راح اصبر عليه بس احرص اني ما اجيب منه عيال واحاول اصلح حاله قد ما اقدر وما اطلب الطلاق الا اذا
شفت مافي امل انه يترك اللي هو فيه او اذا حسيت ان ادمانه يشكل خطر على حياتي والله لا يكتبها على احد منا يارب

ذكرتيني بسالفة صارت لرفيج زوجي
كان يتعاطى مخدرات ، بس هذا كان بعد الزواج وكان كله بسبب معاملة والده له ، وعلى فكرة بالرغم من إن والده صاحب أكبر مصانع بعمان هالشخص كان يشتغل عند أبوه ، لكنه كان يفرق بينه وبين عياله حتى في المصروف والراتب ، وكان عند أبوه أكثر من زوجة ، وكان هذا الشخص قريب من زوجي ويحبه وأنا حتى كنت أعتبره أكثر من أخ وكانت بينا زيارات عائلية بعد الزواج
هذا الشخص (الله يرحمه ويغفر له ) بعد ما تزوج أدمن عالمخدرات ومع وقوف زوجي معاه تركها وساءت ظروفه ، خاصة معاملة أبوه ، بدال ما يساعده خرب حياته وما حاول إنه يتقرب منه أبداً ، وزجته الله يهداها ما عرفت شلون تساعده وتوقف معاه ، بالعكس كانت تتذمر وتتشكى منه ولا حاولت تساعده ولو شوي كونها كانت صغيرة وقتها لما تزوجت عمرها 17 سنة
بس صدقوني ، هالإنسان كان كالطفل طيب لأبعد الحدود وكان يحب زوجته ، مع الظلم اللي شافه من أبوه ما لقى اللي تحافظ عليه وتشجعه إنه يترك المخدرات ، وطبعا تمادى وصار بينهم طلاق ومشاكل رغم إن عنده بنت وولد ، قبل سنة بس قرر هالإنسان إنه يتغير وكلم طليقته مرة ثانية علشان يردون لبعض ويبدأون حياة جديدة كان كل همه عياله علشان يجمعهم مع بعض ، تخيلوا يا بنات هو كان يفكر في عياله لكن طليقته كانت لاهية ولا عندها خبر ، يعني اللي صار له كان غصب عنه وضاقت فيه الدنيا بعد ما عرف إنه ما ممكن يرجع زوجته مرة ثانية إلا بمحلل ،، تخيلوا إنتحر وسلم على إخواته وعياله قبل ما ينتحر ودموعه على خده ، ومات جدام وحدة ما إخواته ( الله يرحمه ويغفر له يارب )
ما أدري شلي خلاني أقولكم هالقصة ، بس أنا ليومكم هذا متأثرة جداً بالطريقة البشعة اللي مات فيها
الخلاصة ، هذا نصيب والمفروض الزوجة لازم تصبر وتحاول بكل ما تقدر إنها تساعد زوجها مهما كان حجم المشكلة ، والمخدرات والكحول آفة المجتمع ، لكن إحنا ما علينا غير مواجهة هالآفة بكل ما نملك
والله يوفق الجميع يارب