TIYFE هلوسة سحق 75 كيلو

أحسني الأختيار
للأسف دايم نسوي رجيمات
لكن مانختار صح...
ونكتشف بعد مده ان الجسم مايتغير او ماينزل
ويجينا ملل واحباط..وعقبها انتقام
مانحسن الاختيار
نختار رجيم سريع...
نبي ننزل بسرعه
نحضر الزواج وعقبها بعدي الطوفان
كنك تجمعين مبلغ تشترين فيه فستان غالي
وعقبها تعلقين الفستان لين يروح موديله...
والوزن يرجع بمجرد العوده للأكل....ولو ظنينا اننا نخفف...
لازم نختار بعقولنا ..مو بفمنا الاكل
فيه اكل لذيذ لكن خفيف
احسب وافكر بالمكونات..
راح تحسين انك راقيه...حتى بتفكيرك بالاكل
هذي تجربتي كامله.. بل انجازي..ويحق لي اقول عنه انجاز
في عام 1428 اكتشفت اني حامل وكنت عارفه ان وزني زايد جدا
انما ماتوقعته !!!!!!!!!!!!!!!!!!!!!!!!!!!!!!!!!!!!!!!!!!!!
وصل 133 كيلو
وقفت شوي اتامل الرقم المزعج .. واتخيل شكلي المرعب
تجاهلت الامر
وفرحت اني حامل كعذر للسمنه والحريه بالاكل والحريه باللبس الواسع
ومن ربي جت
كنت اصحى واكل فطور كبير
وكثير طبعا على الساعه 12 الظهر
وغدانا كان 3 فكنت اتغدى لكن بحكم اني شبعانه ماقدر اكل اكثر بعدها لاحظت اني لما اتعشى اتعب من حرقان المعده
واضطر للعلاجات وبما اني حامل خفت اضر الطفل
فوقفت الاكل بعد وجبة الغدا وغالبا اتوقف 6-7
انتهت فتره الحمل وجبت بنتي اللي كانت حلم حياتي
ولقيت وزني نازل 17 كيلو
مافكرت برضو بالدايت ..
لين حصل موقف لقريبتي قدامي!!!!!!!!!!!!!!!
كانت بنتها بعمر 6 سنوات وامها سمينه
وكانت بمنتزه وسالت بنتها وين صاحباتك وريني اياهم
قالت قلت لهم هذيك امي واشرت على وحده جسمها حلو
قالت الام ليه؟؟؟
قالت اني دبيه تفشلين....!!
ردة فعل طفل مايعرف يقول امي وافتخر فيها ايا كانت...
هنا فكرت ببنتي
ماحبيت تنحرج... وتضطر تنسب نفسها لوحده ثانيه فقط عشان رشاقتها..!
خلصت نفاس وسفرت خدامتي لاني قررت اكون انسانه تحب نفسها عشان بنتها فقط..!! وانتبهوا للتطور
وبديت ترك الاكل بعد 6 مدة شهرين
ونزلت من 115 الى 105 وكنت امشي بالتدريج من 10دقايق وازيد يوميا دقيقتين لحد ماوصلت رقم ممتاز الحمد لله من الدقائق..
بعدها وقبل رمضان باسبوعين سويت دشتي ونزلت لين 97
في رمضان سويت سعرات ماتجاوزت 1000 كالوري ومشي ساعه ونص يوما..
كنت افطر
3-5 تمرات وقهوه
بعدها اصلي واجهز الفطور الرسمي
اشرب شوربه واكل سلطه بالغصب لاني مااحبها..واخذ من المعجنات 3 حبات بحجم نص الكف وحبتة حلا بحجم اصبعين
وبعدها اسكر فمي إلا نادر جدا اكل لو طلعت
ولما ارجع اخذ زبادي سحور واحيانا مااخذ شي
ولما اكل لو شوي من السحور مع زوجي وخاصه لو كان رز ..اعاقب نفسي
بالمشي ساعه
كنت اعتبره عقاب قبل تتصلح مفاهيمي واعرف ان المشي من اروع الامور اللي تساعد بتخفيف الوزن والضغط النفسي
كنت لما امشي كثير زوجي يطالعني ويضحك
يقول مانتي ناحفه..حتى لو نحفتي شكلك بيستمر كذا زي البالونه المفقوعه.
ارد عليه واقول وربي لااخليك تغير رايك
مع العلم انه كان يقول هالحكي وانا نازله 35 كيلو بعد ..!!
كملت الشهر الكريم على هالنظام
ونزلت 12 كيلو
بعدها ريحت اسبوع
ورجعت اسبوع لدشتي
واضطريت اوقف لاني دخلت المستشفى مع بنتي
وطلعت من المستشفى وزني 86
كملت دشتي اسبوعين ونزلت لين 83
وريحت اسبوعين
بعدها سويت النقاط شهرين ونزلت 10 كيلو
طبعا المشي ماتركته ولا يوم
لما وصلت 73 ريحت فتره شهر
وبديت تخفيف ونقاط ودشتي ومشي كثير لحد ماوصلت
>>> النتيجه
من 133 الى 58
حياة غير و حب منقطع النظير لكل شي فيني واحساس ماحد بيعرفه من كلامي غير لما يحسه بجسمه...

8
8
بداية
عيالي..عاشوا ولازالوا يعيشون الفخر
ولدي الكبير يقولي
ماما ياحلوك صرتي .. اللحين صرتي سريعه وانتي تمشين
اول نطئيه .. كانك تدفين دولاب..
ولدي الصغير
بعد ماجيت من الروضه ,.. رجع مبسوط
يقولي انتي انحف ام جت..الحمدلله ماجيتي وانتي دبيه>>مخربها هذا
زوجي..
حاليا اشوف الاعجاب ..لكن لازال يلتزم الصمت..
كل تعبيره بالملابس اللي كان يخاف يجيبها وتكون فقط خساير...
مره قالي..:
يختي سوي لي هالنقاط .. شكلك صدق فاهمه >>> عقب 75 كيلو اقتنع خ
امي ..وه لبى عروقها..
تقول اللحين تطمنت عليك...>>> معيشتها برعب خ
اما اختي هذي حكايه
مره قالت بعطيك بنطلون حلو كنت البسه قبل ..(( لانها نحفت مره وصارت 50 ))
عطتني اياه وانا وزني 70 وقالت البسيه ..قلت ياشيخه حرام اتحطم
قالت جربي والله بيصير زين
لبسته ..واو
وطلع
قالت : تخيلي يطلع انك نحفتي حلم...!!
قلت لااعوذ بالله
قالت: اتوقع لو ترجعين تسمنين انا بيجين جلطه ...>>> مره هبل فيهم شحمي خ
حتى الان ... جدتي تسميني (( استشارية التغذيه))>>> ياحالي ياام محمد بس
الإراده
كلمه صغيره
لكن نعتبرها شي صعب
ونادر منا اللي يملكها
متى ماملكتي نفسك
متى ماحبيتيها
متى ما ادركتي الفرق بينك وبين (( الحيوانات)) .. >>> اعتذر
متى مالقيتي نفسك
متى ماكنتي صادقه مع نفسك
راح تكتشفين انها عندك ومن زمان...
لكن كانت مركونه على احد رفوف عقلك الغائب بين اكوام الطبخات والحلويات
دلعي نفسك..وعطيها راحتها تريحك
حبي نفسك لدرجه تخافين عليها .. وتخافين على شكلها
استمتعي بكل شي
لكن بطريقه ذكيه..
اتبعي الخطوط الاساسيه بالدايت والحميه..
يعني لاتلتفتين الي الكلام الغير منطقي..
هي امور ثابته وحسابات واقعيه .. لو تبي تجلسين ماتاكلين اسبوع كامل
ماراح تنزلين غير المقدر واللي جسمك مستعد يفقده ..فقط..
وكل جسم يختلف..اجسام قويه وصلبه وسمنتها اصليه
واجسام سمنتها مستحدثه..نغالبا تكون سهله وسلسه..

انا شهيتي مفتوحه
كثير من ذوات الاوزان الزائده شهيتهم مفتووحه
حتى اللي نزلوا اوزانهم شهيتهم مفتوحه ... وانا اولهم
الفرق بين النوعين
ان اللي نزلوا اوزانهم اعتمدوا كثير على موضوع الرياضه والمشي
المشي ساعه باليوم والاكل باعتدال كفيل بتنزيل الوزن
والمشي جدا مفيد
يسرع الايض..
ينشط الدوره الدمويه
ويجعل العضلات دايما تنتج حراره تذيب الدهون بينها حتى بعد ماتخلصين مشي بكم ساعه..
اللي تحب الاكل تاكل
لكن تعتبر نفسها انسانه رياضيه وهي بحاجة هالاكل
تحركي اكثر مدام بتاكلين اكثر
اقتراح
طبقي
ساعه مشي + ساعه ايروبيك = 600-700 كالوري
و خليك مرتاحه بالاكل
خلونا اذكياء
الحركه
الحركه
افضل رياضه مارستها ولقيت نتائجها الخياليه في جسمي المشي...
ماقولك امشي ساعه او ساعه ونص وساعتين
اول ماتبدين خليك 10 دقايق
ويدي يوميا دقيقه
بتلاقينك اخر الشهر تمشين 40 دقيقه بدون مانتحسين فيها...
هذي غالبا معاناة اللي ماقد مشوا ابدا
اما اللي صابهم الملل
تقول امشي ساعه..امل
احط السير قدام التلفزيون اتابع شي لكن امل
لما تمشين اغرقي نفسك بأحلام اليقظه
وان هالمشي سبب كبير بأنك راح توصلين لشكلك المثير في احلام اليقظه..
وخلي 10 دقايق من المشي استغفري فيها فقط (( استغفر الله))
بنيه الثبات على هالامر وتخفيف وزنك وغفران ذنبك..وتحقيق مرادك
راح تستغفرين 1200 مره صدقيني بتزيد العزيمه عندك والاصرار
انا مااقول هالحكي من فراغ
لاوالله انها تجربه .. ولااعتقد احد حاس باللي في داخلي كثر انسانه وصلت للي وصلت له
ومو بفتره قصير..كانت 20 شهر من عمري لكن والله كل يوم احب نفسي اكثر
واقتنع ان الاكل متعه لو زادت ضرت!!

رأي الآخرين
بين الإنتقاد والإرشاد
(( يوه شنتي يافلانه )) (( السمنه احلى عليك )) (( اول شكلك اخف دم ))
او النقيض
(( والله بطله )) (( اهنيك على هالاراده )) (( قسم احسبك اصغر خواتك))
عبارات لما تجوعين تسمعين الاولى
ولما تقاومين تلقين قدامك الثانيه
يعني بالاخير نكون منغمسين بالتفكير بالدايت وحكي الناس
ولازم شكلي ع العيد يكون توب عشان الكل يقول واو
وضغط وحرمان
والاكل قدامك
يعني تعذيب نفسي بحت
ليه طيب؟؟
ولما يقولون واو..بالاخير هو كانوا طول ذيك الايام نفسيا مرتاحين..ومحافظين على اوزانهم
ولاحرموا انفسهم
ولافكروا فيك اصلا
وانتي تفكرين فيهم عشان كلمة (( واو ))
تعاملي مع نفسك بهدوء
لاتقحمينها بين الان ويوم العيد
كل الضغط يولد الانفجار
ان نحفتي بحرمان وتجويع بتخسرين نفسيتك وصحتك
وان مانحفتي كونك حافظتي على وزنك لو هو اصلا زايد يعتبر انجاز..خاصه بهذا الشهر الله يشرفه
وان نحفتي وانتي مريحه بالك ومخففه ومتعامله بذكاء مع الاكل..هنا راح تصدقين كلام سول
ان الاتنقاد والارشاد
فقط كلام من الاخرين يذبذب قراراتك
لازم نفهم الدايت
والفكره حقته
الفكره ان الاكل اللي يدخل لازم نستغله
برياضه او مجهود الجسم العادي
معادله صحيحه
اكل معقول + رياضه= وزن في نزول
أكل اكثر من العادي+رياضه = ثبات
او
جعل الطاقه مصدرها واحد فقط.. والباقي يصرف للعضلات والخلايا
والعاقل خصيم نفسه
التفكير بشكل منطقي
قلت
الى متى..متى راح انبسط..وراح احس بوجودي كوني انثى اهم مقوماتها الجسم الرشيق
متى راح ادخل المحل وانا اضمن اني احصل مقاسي
متى راح اتخلص من هذا ضيق واقعد اخذ مقاسه وعرضه بيدي...!!
اللحين صار اني اروح براحتي اي مكان ولااشيل هم لا لبس ولا غيره
حتى السلام على الناس لما اكون بجلسه ارضيه كانت هم وكابوس
قمة الاحراج اذا جيتي تقومين!!!
يالله...سمنة مؤالمه
خلاص لازم نعيش

الرجيم ليس تعذيب وارهاق وعقاب...!!
فعلا كثير يجلسون ايام فالين ابوها
اكل وبلع وهبال
حلويات وشكولاتات وشيبسات ومشروبات غازيه
وايسكريم
ومعجنات
ولما تشبع لين تعورها ضلوعها
تحس بالم نفسي عظيم
ليه كذا
طيب خلاص ماراح افكر باللي راح
وبكرا ببدا رجيم
الفيشار
او رجيم 3 ايام مويه بس
او رجيم السوائل
او رجيم ال .... شي من العذاب
وتتوقع ان هالامر بينفعها
ممكن تسوي يومين كحد اقصى..بعدها تكرر الموضوع
وتتراكب المعجنات باردافها...والشوكولاتات بظهرها..والحلويات بكرشها
وترجع ذيك الليله السوداء اللي تتخذ فيها القرار الجرئ
<<<<<<>>>>>>>> السوائل
الفيشار
الخرابيط
الرجيم تعامل راقي وذكي مع الاكل
او انك تاكلين بحدود التثبيت وتتحركين لحدود النزول
اغراض الدايت - مقاضي الدايت - اكلات الدايت
حلو ان الواحد يبحث عن بدائل صحيه وجيده
لكن الشي المزعج صرف مبالغ على الفاضي
كونك تحولين اكلك من هاي فات الى لو فات
يكفي
يعني بدل الزيت العادي .. يكون زيت الزيتون
وبدل الجبن العادي يكون اللايت
وبدل الدقيق الابيض والخبز الابيض الخبز الاسمرالغني بالالياف
لو جينا للسعرات ماتفرق كثير
لكن صحيا تفرق..
الدايت (( ليس)) خسارة الوزن والصحه
الدايت اكتساب الصحه بتخفيف الوزن

الميزان
كنت اعتقد انه الصادق الامين
طلع المحطم اللعين
خاصه اللي توزن يوميا
تلقين وزنك 60 صباح السبت
وطحتي يوم السبت بالموالح وورق العنب و الشطه والصويا والامور اللي فيها صوديوم عالي
مع انك شربتي مويه كثير
ولاكثرتي ولاتجاوزتي المحدد لك
صحتي على عادتك تبين توزنين
لقيتيه زايد ..!!
ليه
وش صار؟؟؟
والله ماخبصت...الله يلعن ابو الدايت
كل هالحرمان والوزن يزيد
طيب اليوم اجل بفلها وخله يزيد
هنا خلاص بديتي تنهارين
مدامك واثقه ان اكلك مازاد وانه المقرر لك من سعرات او نقاط ليه زعلتي
طيب راجعي نوعية اكلك
معروف ان زيادة الاملاح وخاصة بنزوات الصوديوم تحبس السوائل بالجسم
وتلقينك طول اليوم اللي راح تشربين مويه وشاي وشاي اخضر
هنا حصل الاحتباس من زيادة الاملاح وحصلت الزياده اللي حطمتك بالميزان
نصيحتي لك مع الميزان
- خليه كل شهر مع وعد منك له انك بتحطمينه
- خففي من الموالح وزيدي المويه
- لو ماقدرتي تسيطرين على انك ماتوزنين يوميا..لاتعتمدين عليه واعتمدي ع المقاسات ..
كثير بنات اعرفهم اوزانهم بالسبعينات ومقاساتهم قريب من الخمسينات..مو شي سمعته شي شفته
الروتين
اول علامات الفشل
لو قالوا لي هذا الدايت ينحف 100 كيلو بالشهر وهو محدد لي الوجبات ماراح اتبعه
لاني ارفض السيطره حتى على رغباتي
مجرد احساسك بان الشي مفروض عليك هذا وحده كفيل بعدم استمراريتك
تعلمي تاكلين اللي تبين لكن بالطريقه الصحيحه
لما تاكلين فكري وفكري..وخليك راقيه باختياراتك
ولاتعودين نفسك على الروتين لانه السبب الاساسي للفشل
الثقه
ثقي بربك اولا
وثقي بانك تقدرين
وان الاكل اللي وداك للهم والتعب النفسي وحدود الحرمان هو نفسه اللي ممكن يكون سبب سعادتك لو تعاملتي معه بشوية ذكاء وعقل
ووعي
كبسات - حلا - معجنات - شكولاتات - كلها ممكن ناكلها
لكن بذوق وروقي
بالله لما تشوفين بنت لها قوام فرنسي او قوام رشيق تتوقعين انها تاكل بنفس شكلك وانتي تلفين الاكل كنه بيطير
شوفي نظرات الاعجاب لها كيف
تتوقعين لو كانت تاكل بنهم وكن الاكل بيطير بتنرين لها نظرة اعجاب؟؟
حتى لو هي منيكان؟؟
ماعتقد..
اساسا منظر الامثى وهي تاكل يقلل من جمالها..فمابالك باللي تاكل كنها ...............!!
المنظر الحلو يعطيك ثقه والثقه تخليك تحققين المستحيل..

الحركه..
تكفيك تأنيب الضمير...يعني انتي محدده سعراتك ماتزيد عن 800 مثلا ووصلتي 1200 في يوم ما
يعني زاد عليك 400 كالوري
سهله
امشي نص ساعه لمدة 4 ايام وبتكوني تخلصتي منها بدون ماتتأمين وتخربين باقي يومك
...
كإقتراح للمشي
وكيف تخلين الوقت يروح بدون ماتحسي فيه
اغرقي بأحلام اليقظه..
تخيلي نفسك تدخلين محل وتطلبين مقاس 10 او 8
واو
ولما تشترين فري سايز كيف يصير عليك
ولما تروحين لناس شايفين حالهم عليك لانك سمينه وكيف ردة فعلهم بتكون..؟!
فكري بترتيب وقتك واوراقك
بتلقين النص ساعه خلصت
كثير منا اللي يفكرون بالرجيم يعتقدون ان الفطور احسن يكون خفيف
فتلقينه يفطر على عصير او حبة فواكه..ك افتتايحة نهار ممتاز
من خلال تجربتي بالرجيم لاحظت ان وجبة الفطور مهمه
وخاصه لما يكون بينها وبين الغدا 6 ساعات تاكدي ان وجبة الفطور لما تكون شوياتها سمرا وخليه من الدهون والسكريات العاديه يعني مو سكر حميه للشاي مثلا,,تاكدي انها بتنحرق كلها قبل الغدا
لكن
لاتكون مباشره .. يعني ممكن عصير الصباح او كوفي وقطعة حلا..
طبعا الافتتاح بالسكر..يخلي يومك سعيد وناجح
بعدها ب ساعه نفطر زي ماذكرنا
الغدا هنا لازم يكون جيد لكن من الافضل انه يكون بروتين وخضار فقط
وتكون هالوجبه معقوله وخاليه قدر الامكان من الدهون
((طبعا ماتكون بعد الساعه 4))
**لاحظوا ان الوقت له قيمته .. واهميته
#يعني وحده تقولك افطر 12 واتغدا 6 وتضرب بالفطور وتقول فطور وبينحرق وهي من 12 لين 6 ع النت!!!
بالله كيف تحرق هالفطور لو سعراته اعلى من 500 كالوري؟؟!!
ووحده تقول افطر 6 وانام 8 انام لي ساعه بس
حلوها عاد
وتجي تقول انا وزني ثابت.!!
يابنات الدايت نظام للاكل ونظام وللحياة
نظمي نومك وقومتك
واصحي بدري وافطري وروقي
**البعض يقول مااشتهي اول مااصحى
بقولك خذ ملعقة عسل الشفاء صغيره وكوب مويه كبير بحراره عاديه
وانتظري نص ساعه وشوفي
**لك بالفطور لين 700 كالوري لكن بشروط
الخبز فيه بر وان حصل الرغيف الصحي يكون افضل..
والبيض لو حبيتوا لاتكون اكثر من 2 بيضه
وتجنبي الطماط قد ماتقدرين
والجبن او اللبنه خليها لو فات
**كنصيحه اللي تبي تاخذ فطورها شابوره تخليها مع شاي بدون حليب..
** الغدا قلت لكم ممكن تاخذين الى 600 كالوري فيه لكن فقط بروتين وخضار بدون طماط ..
وكمية الدهون تكون لاتذكر..
الان نبي نجلس بعد الغدا لين الساعه 8 بالكثير للي تنام من 1 وطالع
اما اللي تنام قبل 12 تخلي براسها ان الاكل بعد الساعه 7 ممنوع.. لكن لاتنام قبل 11
...
هنا تجي وحده تقول يعني من 7 ماراح اكل ؟؟!!
بقولك تحملي هالنظام 5 ايام بس
ويومين تعشي لكن الغي وجبه من وجبات النهار....

التصوير والتصور
فكرة اتخذتها من البدايه
اعتمدت الصور في شكلي والتصور في افكاري
دايم اتصور شكلي لما اوصل الهدف
حتى اني الاحظ شكل ظلي وانا امشي في حوش اهلي لارحت لهم
مريت مره
ولاحظت الظل كيف اخذ نص الجدار اللي امر منه
و قبل كان ياخذ الجدار كله
طول ماانا امشي واروح واجي افكر بشكلي الاخير
وطول ماانا على النت او الجوال بيدي اطلع شكلي القديم
واقول هالشكل مات
بيبقى الشكل الجديد والروح الجديده
الرضا عن النفس احساس مثل المشي على السحاب
مو شرط المثالي رقم
المثالي قناعه في نفسك تعتقدين من خلالها انك في افضل حالاتك
طيب لو اتبع هالنظام كم ينحف بالاسبوع.......؟؟؟؟
سؤال يتردد كثير من المترددات
تجيك تعطل القروب وتسوي زحمه وكم بينزل لما اقولها 3 او 4 كيلو تقول لا قليل ..
واحصلها بكل موضوع تسأل هالنظام كم ينزل؟؟
قسم احس اني بالسوق وتدور ارخص محل..؟؟
او كن وزنها ذهب وتسوم بهالمحلات ..!!
ساعات اتابعها هالبنت بشوف وش ترسى عليه ..
بالاخير احصلها كملت شهر وزنها ماتحرك ماغير تدور وتسأل
واحيان وزنها ينزل كيلو او يزيد
مشكلتنا دايم نبي شي سهل وسريع
وننسى !!!!!!!!
,, ان الجمال يبي إحتمال ,,

تمرين رائع للسيطرة
قبل تاكلين
عدي لين 10
وفكري
تسوى...؟؟
طعمها ماراح يتجاوز فمي والقطعه هذي ماراح تكفيني ولاقطعتين
خليها اجل بعدين..مو ع طول...جربوا وتمرنوا عليها.....
انا الان اتقنها>>>>>>>> ساعات تذبحني الثقه
الاكتيئاب
غالبا حنا الإناث بشكل اعم
تجينا حالات اكتئاب ماندري وش سببها اللي غالبا يكون تبدلات هرمونية
لما نكون نعاني من الوزن الزائد نرمي عليه السبب
ونقول ايه لازم ننحف
الى متى والى متى.!!؟
طيب وننحف
وتستمر الحاله الغريبه اللي تمر علينا...
وهالمره نقول ايه شكلي من كثر الحرمان بديت احس بهالضيق لازم ارفه عن نفسي بشويه اكل
ايه عاد وصلنا خير...اي خير إلا دمار
ونبدأ عملية الترفيه الوهميه المؤقته
وناكل وناكل ....
عاد بالله وش ناكل
وجبه من هارديز...او بيتزا أو شكولاتات ولاهيب قطعه ولاحبه او حبتين
لا ناكل بإجرام...المشكله لو فكرنا شوي ان المتعه فقط في الفم ..!!
وهالنوع من المتعه ماله نهايه إلا لما ماتقدرين تبلعين الاكل لانه وصل لآآآآخر حلقك
يعني الحلق مسدود مافيه مجال ينزل
خلصنا واكلنا..
خلاص بكرا نبي نرجع لنظامنا
نصحى ع العاده ننظر الميزان...واو كيلو
وش اكلت انا............؟؟؟
لا ماهوب كيلو..لكن هالزياده الوهميه حطمتك يوم ثاني وقلتي الله ياخذ الدايت وسنينه
يعني انا اذبح نفسي اسبوع وانزل 2 كيلو وبيوم ارجعها
ماعاد انا متعبه عمري
وترجع نفس الاسطوانه القديمه....
التغيير من الخارج لابد انه يكتمل بتغيير من الداخل.........!!!