أحلى حلى

من يومين سويت حلو وبصراحه كان لذيذ وعجب أهلي فقلت انقله لفراشات المنتدى خصوصا ان رمضان على الأبواب
حتى تكون نتايج الطبق ممتازه يفضل انك تسوينه قبل التقديم بيوم حتى يكون متماسك وتمام
مع ان مقادير الطبق سهله الا ان الطبق يبيله طولة بال شويه لان يدخل الفرن ثلاث مرات
ادري طولت عليكم الهذره .... خلونا مع المقادير
الطبقه الأولى : كيكه ساده ( انا استخدمت علب الكيك الجاهز مثل العلالي وغيره بنكهة الفانيلا)
الطبقةالثانية: 1 علبة قشطة + 1 علبة جبنة فيلادلفيا + 1 بيضة + 1 كيس دريم ويب + فانيلا + 3 ملاعق كبيره سكر
الطبقة الثالثة: 1 علبة حليب نستله كبيرة + 1 كوب زبيب + نص كوب مكسرات (مثلا جوز) + 3 ملاعق جوزهند
الطريقة:
نسوي الكيكه مثل ما الخطوات موضحه على علبة الكيكة وندخلها الفرن وبعد ما تطلع نتركها تبرد وندخلها الثلاجه
بعد ساعه ...
نجهز الطبقة الثانية نخلط كل المقادير ونصبها على الكيكه وندخلها الفرن مدة 25 دقيقة ولازم تحمرينها من فوق (بس حطي بالك لا يحترق)
في نفس الوقت نكون نجهز الطبقه الثالثة في ان نخلط المقادير ونحركها على نار متوسطة مدة 5 دقايق ونصبها على طبقة الجبن السابقه ونرجع ندخلها الفرن حتى تتحمر من فوق ( يعني دقايق بس)
نتركها تبرد وبعدين ندخلها الثلاجه مدة ما تقل عن ساعتين
عند التقديم نفصلها عن صحن الفرن ونقدمها ... راح تشوفون انها ثلاث طبقات روعه
ملاحظات:
ممكن انك تنوعين في الوان الطبقات في انك تستخدمين كيك كاكاو او تخلطين مع خلطة الكريمة شوية كاكاو
اذا خبزتي الكيكه وبعد ما تطلعينها وتبرد يفضل انك تطلعينها من القالب وتلبسين القالب قصدير وترجعين الكيكة وتكملين باقي خطوات عمل الحلو
انا استخدمت كيك الخلطات الجاهز حتى يكون لي اسرع من اني اسوي كيكه واجمع مقاديرها
اتمنى تعجبكم لانها فعلا لذيذه